25-тӥ тулыспалэ Удмуртиын йӧскалык огазеяськонъёс куспын футзалъя XIII чемпионат ортчоз. Отчы йӧскалык лулчеберетъя огазеяськонъёслэсь командаоссэс ӧтё. Со сярысь Калыкъёслэн эшъяськон юртсылэн пресс-службаез ивортӥз.
Ӵошатсконъёсы 16 ареслэсь бадӟымъёс пыриськыны быгато. Вӧзазы кык «легионеръёсты» (огазеяськонзылэн ёзчиез луисьтэм спортсменъёсты) басьтыны луэ. Котькуд командаын ог 10 футболист луыны быгатэ (вить валтӥсь шудӥсьёс но вить запасын пукисьёс).
Ӵошатсконъёс Ижкарысь спортъя «Арена» огъетын (Красногеройской урам, 54) ортчозы. Пумиськонъёс 10 часын кутскозы ини. 12 часын чемпионатэз сӥё-дано усьтозы но командаосын тодматозы. 13 часысен 19 часозь финалъёс ортчозы.
Куриськонъёсты 22-тӥ тулыспалозь Калыкъёслэн эшъяськон юртазы 311-тӥ кабинетын яке ddnodm@mail.ru электрон почтае кутозы. Ватсаса юанъёсын 8 (3412) 63-10-36 телефон номеръя вазиськыны яра. Чемпионатлэн куронъёсыныз тодматскыны но куриськон гожтыны луэ.
Пусъём, ӵошатсконъёсты арлы быдэ армянъёслэн «Урарту» огазеяськонзы радъя. Солэн ужпумез - йӧскалык кусыпъёсты юнматон но кужмооссэ спортсменъёсты шараян.
Тодэ вайытом, кылем арын чемпионат нырысьсэ Удмуртилэн нырысетӥ азьмуртэзлы Александр Волковлы сӥзьыса ортчиз. Нош туэ толшоре йӧскалык лулчеберетъя огазеяськонъёс шахматъя ӵошатсконъёсы пыриськизы.