Удмуртилэн командаез суй-пыдзыя сӧсыр спортсменъёс пӧлын куасэн бызьылонъя но биатлонъя Россилэн чемпионатаз но первенствояз пырисько. Ӵошатсконъёс Москва улосвылысь Пересветын 2-тӥ оштолэзёзь мынозы. Со сярысь элькунысь Спортъя дасяськонъя центрлэн «ВКонакте» мерлыко вотэсысь огиназ ивортӥзы.
29-тӥ южтолэзе классика амалэн шор-куспо дистанцие бызьылонъёс ортчизы. Россилэн чемпионатэз улсын ӵошатсконын Владислав Лекомцев бронза медаль утӥз. Россилэн первенствояз Валентина Переносова вормиз, Лилиана Садыкова кыкетӥ луиз. Озьы ик бронза медаль Владислав Потапов басьтӥз.
30-тӥ южтолэзе куасэн бызьылонъя спринтъёс ортчизы. Россилэн чемпионатаз Владислав Лекомцев вормиз. Россилэн первенствояз Валентина Переносова зарни медаль утӥз, Лилиана Садыкова – азвесь. Пиос пӧлын Владимир Чайников кыкетӥ инты басьтӥз.
1-тӥ оштолэзе биатлонын нимаз бызьылонъёс ортчозы, 2-тӥ оштолэзе – спринт.
Тодэ вайытом, Владислав Лекомцев куасэн бызьылонъя но биатлонъя дуннелэн кубокезлэн огъя зачётаз вормиз.