Ижкар+2 °C
28 -тӥ коньывуон 2021 Покчиарня
18+

Удмуртилэн командаез нырысетӥ инты басьтӥз спортъя огъяросси фестивальын

  • 109
  • 0
Ижкар / Удмуртия
Удмуртилэн командаез нырысетӥ инты басьтӥз спортъя огъяросси фестивальын
Туспуктэм: Удмуртиысь тӧролэн но кивалтэтлэн пресс-службазы

Удмуртилэн командаез Йӧскалык но Олимпи шудонъёсы пыртымтэ спорт амалъёсъя VI огъяросси фестивальын нырысетӥ инты басьтӥз. 14-тӥ гудырикошконэ, Мугор чеберетэз гажасьёслэн нуналазы, Ижкарысь «Металлург» культура юртын ӵошатсконъёсты сӥё-дано ворсан ужрад ортчиз. Со сярысь элькун тӧролэн но кивалтэтлэн пресс-службазы ивортӥз.

Россиысь улосвылъёс куспын огъя зачётын вормисьёс луизы: 1-тӥ инты – Удмуртия, 2-тӥ инты – Москва, 3-тӥ инты – Дагестан.

1,3 миллионлэсь трос улӥсен улосвылъёс пӧлын группаын: 1-тӥ инты – Удмуртия, 2-тӥ – Москва, 3-тӥ – Дагестан.

1,3 миллионозь улӥсен улосвылъёс пӧлын группаын: 1-тӥ инты – Ульяновск улосвыл, 2-тӥ – Тверь улосвыл, 3-тӥ – Киров улосвыл.

Ӵошатсконъёсы 42 улосвылъёсысь 800-лэсь трос спортсменъёс люкаськизы. Соос 16 спорт амалъёсъя кужымзэс мертазы.

Ужрадын Удмуртилэн тӧроез Александр Бречалов тренеръёсты, физкультурая дышетӥсьёсты, ветеранъёсты но куноосты праздникен ӟечкылаз.

Нимлыко статистикая гинэ элькунамы 600 сюрс пала адями спортэн но физкультураен выре. Зэмзэ ке, та лыдпус шӧдскымон бадӟымгес. Сое эшшо будэтон понна трос адямилы ветлыны луымон спорт инфраструктура кылдытыны кулэ
Александр Бречалов, Удмуртилэн тӧроез

Александр Бречалов пусйиз, 2017-тӥ арысен элькунамы физкультурая но тазалыкез кыдатонъя троспӧртэмлыко (универсальный) 10 огъетъёс, тямысэз соос пӧлысь ёросъёсын, липет улэ пыртэм куинь катокъёс, кык йӧ аренаос, югдытӥськись роллер трассаосын ньыль куас базаос, искусственной турынэн шобыртэм 15 стадионъёс усьтӥзы, ГТО куронъёсты сётыны 38 спорт площадкаос пуктӥзы. Туэ но тэк ӧз пуке – кемалась ик ӧвӧл Ижкарысь «Локомотив» стадионэз тупатъянлэсь нырысетӥ люкетсэ йылпумъязы, матысь дыре кема возьмам 50 метръем бассейн но ӧсъёссэ усьтоз.

Элькун ӵем гинэ Россиысь мукет улосвылъёсысь но, кунъёсысь но спортсменъёсты пумита.

Туэ элькунамы Студент спортъя огъяросси фестиваль ортчоз. Отчы 40 федерал вузъёсысь 700 дышетскисьёс пыриськозы. Толсуре Гуртлэн арез улсын Ижкарын кунысьтымы Гурт возёс вузъёслэн огъяросси спартакиадазы ортчоз, озьы ик Уянъя огъяросси ӵошатсконъёс
Александр Бречалов, Удмуртилэн тӧроез

Удмуртилэн кивалтэтэзлэсь таукаронъёссэ басьтӥзы: «Оператор спортивных стартов Удмуртии» огазеяськонлэн кивалтӥсез Алексей Выстребов, Воткаысь Нылпи спорт школаысь тренер Сергей Закиров, «Калашников» концернысь производственной участокысь мастер Олег Казанцев, «Комплексная специализированная спортивная школа олимпийского резерва имени В. В. Лукина» ужъюртысь пуляен ыбылӥськон ёзэтысь валтӥсь тренер Владимир Лукин но тренер Наталья Падерина, Ижкарлэн спортъя историезлэн центрезлэн кивалтӥсез Татьяна Пензина, велоспортъя олимпи резервысь специализированной спорт школаысь тренер Юрий Харин но «Специализированная спортивная школа олимпийского резерва «Юный Динамовец» ужъюртысь тренер Александр Янбеков басьтӥзы.

Учкисьёсты «Примавера» ансамбль но воргоронъёслэн квартетсы, «Пломбир» кырӟанъя театр но Next эктонъя коллектив но кавер-группа шулдыртӥзы. 

Тодэ вайытом, Йӧскалык но Олимпи шудонъёсы пыртымтэ спорт амалъёсъя VI огъяросси фестивальлэн нырысетӥ нуналаз Удмуртиысь спортсменъёс тямыс медаль утӥзы



Наверх
Вниз