Ижкар+1 °C
9 -тӥ толсур 2021 Покчиарня
18+

Удмуртиысь куасэн бызьылӥсь Финляндиын Дуннелэн кубокезлэн нырысетӥ люкетаз пыриськоз

  • 331
  • 0
Рука / Финляндия
Удмуртиысь куасэн бызьылӥсь Финляндиын Дуннелэн кубокезлэн нырысетӥ люкетаз пыриськоз
Туспуктэм: vk.com (Лыжные гонки Удмуртии)

Удмуртиысь куасэн бызьылӥсь Лилия Васильева Дуннелэн кубокез понна вожвылъяськонлэн нырысетӥ люкетаз пыриськоз. Ӵошатсконъёс 26-28 шуркынмонэ Финляндиысь Рукаын мини-тур форматэн ортчозы. Со сярысь Удмуртиысь куасэн бызьылонъя федерацилэн «ВКонтакте» мерлыко вотэсысь бамаз ивортӥзы.

26-тӥ шуркынмонэ Лилия Васильева классика амалэн спринтын кужымзэ эскероз. 27-тӥ шуркынмонэ классика амалэн ик нимаз ӵошатсконэ пыриськоз

Нылкышноос пӧлын спринтын Россилэн люкам командаысьтыз озьы ик ӵошатскозы: Юлия Ступак, Татьяна Сорина, Наталья Непряева, Анастасия Фалеева, Ольга Кучерук, Христина Мацокина. 10 иськеме классика амалэн ас чотэ бызьылонын: Юлия Ступак, Татьяна Сорина, Наталья Непряева, Яна Кирпиченко, Анастасия Рыгалина, Мария Истомина.

Пусъём, Россилэн сборнояз Удмуртиысь Сергей Ардашев но Денис Филимонов сюризы. Та дыре соос Татарстан понна бызьыло. Пиос спринтын ӵошатскозы.

Соосын ӵош стартэ Александр Большунов, Глеб Ретивых, Александр Теретьев, Сергей Устюгов, Андрей Ларьков, Александр Бессмертных потозы. Со сяна, воргоронъёс 15 иськеме классика амалэн ӵошатскозы. Отчы Александр Большунов, Иван Якимушкин, Артём Мальцев, Евгений Белов, Илья Семиков, Сергей Устюгов, Алексей Червоткин, Андрей Ларьков но Александр Бессмертных пыриськозы.

28-тӥ шуркынмонэ, нырысетӥ кык нуналъёслы йылпумъянъёсъя, эркын амалэн уйиськыса ӵошатсконъёс луозы.

Тодэ вайытом, биатлонъя Дуннелэн кубокезлэн нырысетӥ люкетаз пыриськыны Россилэн сборнояз Ульяна Нигматуллина сюриз. Со сяна, воргоронъёс пӧлы Александр Поварницын но пыриз вал, но сое Биатлонистъёслэн калыккуспо огазеяськонзы ӵошатсконъёсы ӧз лэзьы



Наверх
Вниз