Ижкар+12 °C
10 -тӥ куартолэзь 2021 Вордӥськон
18+

Спортъя арбитраж суд Калыккуспо Олимпи комитетлэсь Максим Вылегжанинлы пумит санкциоссэ палэнтӥз

  • 432
  • 0
Лозанна / Швейцария
Спортъя арбитраж суд Калыккуспо Олимпи комитетлэсь Максим Вылегжанинлы пумит санкциоссэ палэнтӥз
Туспуктэм: Григорий Фомин

Лозаннаысь Спортъя арбитраж суд (CAS) Калыккуспо Олимпи комитетлэсь Россиысь 28 спортсменъёсты Олимпиадаослэсь пыраклы люкон сярысь пумкылъянзэ палэнтӥз. Со сярысь туннэ, 1-тӥ тулыспалэ, судлэн сайтаз шараям пресс-релизын ивортэмын.

Спортсменъёс допинглы пумитъяськон куронъёсты тӥязы шуыса пусъён понна 28 учырын люкам туконъёс (доказательствоос) тырмыт ӧй вал. Со 28 атлетъёслэн ӝожтӥськонъёссы шонерен лыдъямын, санкциос палэнтэмын, 2014-тӥ арын Сочиын басьтэм вормонъёссы берыктэмын
Спортъя арбитраж суд

Шонере поттэм спортсменъёс пӧлы Удмуртиысь куасэн бызьылӥсь Максим Вылегжанин но шедиз, Сочиын Олимпи шудонъёсын со куинь азвесь медальёс утӥз. Лыдметэ пыризы куасэн бызьылӥсьёс, бобслеистъёс, скелетонистъёс, саночникъёс, конькиен бызьылӥсьёс но хоккеисткаос.

Решение CAS
Спортъя арбитраж судлэн 1-тӥ тулыспаллэсь пресс-релизэз Фото: Спортъя арбитраж суд © http://www.tas-cas.org

Калыккуспо Олмпи комитетлэсь санкциоссэс палэнтӥзы ке но, шонере поттэм спортсменъёслэн Кореяын Олмпи шудонъёсы пыриськыны луонлыксыя юанъёс вань. МОК соослы нимаз ӧтёнъёс лэсьтыны кулэ.

Тодэ вайытом, ар талэсь азьвыл Вылегжанин но солэн Росси сборнойысь эшъёсыз 2014-тӥ арын Сочиын Олимпиада дыръя допинглы пумитъяськон куронъёсты тӥямен янгыше уськытэмын но ӵошатсконъёслэсь огдырлы палэнтэмын вал. 2017-тӥ арын шуркынмонэ Калыккуспо Олимпи комитет спортсменъёсты янгыш кариз, Сочиын утэм медальёссэс талаз но Олимпиадаослэсь пыраклы палэнтӥз. Со дыре ик та спортсменъёслэн одӥг пробазы но допингез ӧз возьматы.



Наверх
Вниз