Ижкар+1 °C
13 -тӥ оштолэзь 2021 Пуксён
18+

Удмуртиысь паралимпиец Владислав Лекомцев биатлонъя Хрусталь глобусэз утӥз

  • 594
  • 0
Вуокатти / Филяндия
Удмуртиысь паралимпиец Владислав Лекомцев биатлонъя Хрусталь глобусэз утӥз
Туспуктэм: Григорий Фомин

Финляндиысь Вуокаттиын суй-пыдзыя но адӟемзыя сӧсыр спортсменъёслэн биатлонъя Дуннелэн кубокез понна вожвылъяськонзылэн куинетӥ люкетэз йылпумъяськиз. Берпуметӥ нуналаз атлетъёс нимаз бызьылонъёсын ӵошатскизы, ивортэ Удмуртиысь Спортъя министерстволэн пресс-службаез.

Элькунысьтымы 23 аресъем Владислав Лекомцев та амалын зарни медаль утӥз. Ньыль пол ыбылӥськонын вань мишеньёсты ворсаса, спортсмен сюресэз 42 минут 14,4 секундскын ортчиз. Солы 30 секунд келяз Россиысь ик Александр Проньков (42:44,4). Куинетӥ луиз Украинаысь Игорь Рептюк (43:33,1).

Нунал азьвыл Лекомцев спринтын азвесь медаль басьтӥз.

Дуннелэн кубокез понна вожвылъяськонлэн куинь люкетэзлы йылпумъянъёсъя Владислав Лекомцев огъя зачётын вормиз но биатлонъя Дуннелэн кубокезлэсь Хрусталь глобуссэ утӥз. Озьы ке но, со Кореяе Парамлимпи шудонъёсы мынон понна ӧтён ӧз басьты.

Тодэ вайытом, биатлонъя Дуннелэсь кубоксэ Лекомцев 2016-тӥ но 2017-тӥ аръёсы но басьтӥз.



Наверх
Вниз