Ижкар+1 °C
13 -тӥ оштолэзь 2021 Пуксён
18+

Спортъя элькун гужем гурт шудонъёслы Киясаын стадион но ФОК пуктозы

  • 1336
  • 0
Кияса / Удмуртия
Спортъя элькун гужем гурт шудонъёслы Киясаын стадион но ФОК пуктозы
Туспуктэм: Михаил Шустов

Кияса черкогуртын физкультурая но тазалыкез юнматонъя огъетэз лэсьтон ужъёс туэ 15-тӥ инвожое йылпумъяськозы. Со сярысь 10-тӥ оштолэзе Спортъя XXVII элькун гужем гурт шудонъёсъя оргкомитетлэн пумиськоназ тодмо луиз, ивортэ Кияса ёрос администрацилэн пресс-службаез. Радъясь комитетлэн кенешоназ Удмуртиысь физкультурая, спортъя но егитъёсын ужан политикая министр но солэн нырысетӥ воштӥсез Павел Вечтомов пыриськизы. 

Кызьы шуэмын ивортонын, та дырлы музъем ужъёс быдэстэмын, свайёс пуктэмын но фундамент кисьтэмын, кирпичлэсь цоколь ӝутэмын, вуоно юрт дорозь канализация но шуныт сётон гумыос кыскемын, тылпуэз кысыны ву возён инты радъямын.

Али юртлэсь корт каркассэ лэсьтон мынэ. 2018-тӥ арын 16-тӥ оштолэзьысен котыр борддоръёсты пуктыны кутскозы, озьы ик оштолэзь шорысен выжез бетонэн кисьтон но кирпичлэсь пуш борддоръёсты ӝутон ужъёсты кутскозы
Кияса ёрос администрацилэн пресс-службаез

Та дырлы ик стадионэз пуктон ужъёс йылпумъяськозы шуыса чаклало. Нош куартолэзе футбол шудон бусыез, бызьылон сюресъёсты но трибунаосты лэсьтыны кутскозы.

Пуктӥськон ужъёс сяна, шулдыръяськон программа бордын бадӟым уж нуиське. Туннэ нуналлы ужрадлэн сценариез дась ни. Нырысь-вылысь чакланъёсъя, шудонъёсты сиё-дано усьтонын возьматонэ 500 пала адями пыриськоз. Репетициос куартолэзе кутскозы ни.

Спортъя XXVII элькун гужем гурт шудонъёс Кияса черкогуртын 3-7 пӧсьтолэзе ортчозы

Озьы ик Кияса ёрос кузьымъёс но дася. Чеберлыко киужъёсъя ёрос юртысь ӧнерчиос Шудонъёслэсь тодметсэ — Шеп мунёез лэсьто. «Кияса ёрос пумита шудонъёсты» бичет, «Ужрад туризмъя дырпус» но «П. А. Кривоногов — Вормонлэн летописецез» буклетъёс бордын уж мынэ.

«Со сяна, котькуд нуналлы трос калык пыриськымон ужрадъёс дасямын: библио-бульвар, кылбуретъя усьтэм микрофон, Пётр Кривоноговлэн музеяз адӟытонъёс, Чеберлыко киужъёсъя юртын мастер-классъёс, интерактив шудонъёс, концертъёс, туспуктон зона, спорт-кафелэн ужез, кытын дуннелэсь футболъя чемпионатсэ возьматозы, ёрос центрлэн площадяз ӝыт концертъёс но дискотекаос, калык шулдыръяськонъёс, фейерверкъёс», — ивортэмын Кияса ёрос администрацилэн нимлыко сайтаз.

Тодэ вайытом, али Кияса ёросын ортчись гужем гурт шудонъёсын ужаны волонтёръёсты люкало. Та дырлы лыдметэ 42 адями пыртэмын.



Наверх
Вниз