Ижкар-7 °C
12 толсур 2018 Вирнунал
16+

Дуннелэсь чемпионъёссэ возьмало «Ижевская винтовка» ӵошатсконъёсы

  • 222
  • 0
Ижкар / Удмуртиын
Дуннелэсь чемпионъёссэ возьмало «Ижевская винтовка» ӵошатсконъёсы
Туспуктэм: Григорий Фомин

Биатлонъя «Ижевская винтовка» 49-тӥ ӵошатсконъёсы дуннелэсь чемпионъёссэ витё. Вожвылъяськонъёс улсын Россилэн биатлонъя чемпионатэз но Россилэн кубокез понна ӵошатсконлэн 3-тӥ люкетэз ортчоз. Кызьы ивортэ Удмуртиысь Физкультурая, спортъя но егитъёсын ужан политикая министерстволэн пресс-службаез, «Ижевская винтовка» 26-29 толсуре Демидов нимо спортогъетын радъяськоз.

Воргоронъёслэн ӵошатсконъёсазы дуннелэн но олимпи шудонъёслэн чемпионъёсыз Антон Шипулин, Алексей Волков, дуннелэн чемпионъёсыз Максим Цветков но Антон Бабиков пыриськозы шуыса чаклало. Удмуртилэн сборнойысьтыз IBU кубоклэсь призёрзэ Александр Поварницынэз но 2018-тӥ арын Олимпи шудонъёсы пыриськись Владимир Семаковез возьмало.

Со сяна, кык ар вис лэсьтэм бере, Ижкаре нылкышно стартъёс но берытско. Пӧртэм аръёсы та ӵошатсконъёсын Ольга Зайцева, Яна Романова, Анна Богалий, Екатерина Юрлова но Ульяна Кайшева нырысьсэ вормылӥзы. Туэ вожвылъяськонъёсы Россилэсь чемпионказэ Анастасия Егороваез но Россилэн чемпионатэзлэсь призёрзэ Лариса Куклинаез витё.

Ӵошатсконъёсы ог 250 спортсменъёсты возьмало, со пӧлын кунысь тужгес кужмоосыз 150 биатлонистъёс.

Спортъя ужрадэз радъясьёс учкисьёслы но пыриськисьёслы узыр программа дасяло. Кылсярысь, сцена вылын творчествоя коллективъёс шулдыртозы, озьы ик анимаци вӧлметъёс ужалозы.

Ӵошатскон нуналъёсы висисьёсты «Микрорайон «Север» дугдылонниысен автобус нуллоз. Транспортлэсь ветлон радлыксэ радъясьёс берлогес шараялозы.

Пусъём, 22-тӥ толсуре «Ижевская винтовка» улсын биатлонэз яратӥсьёс пӧлын «Калашников Биатлон Фест» ортчоз. Ӵошатсконъёсы 18 аресысен котькуд мылкыд карись пыриськыны быгатэ. Вожвылъяськисьёслы 2 ыбылӥськон рубежен 4,5 иськем бызьыны кулэ луоз. 

Наши партнеры

Наверх
Вниз