Ижкар+1 °C
13 -тӥ оштолэзь 2021 Пуксён
18+

Егитъёс пӧлын следж-хоккеен шудонъя нырысетӥ калыккуспо ӵошатсконъёс кутскизы Удмуртиын

  • 363
  • 0
Ижкар / Удмуртия
Егитъёс пӧлын следж-хоккеен шудонъя нырысетӥ калыккуспо ӵошатсконъёс кутскизы Удмуртиын
Туспуктэм: Руслан Нуриахметов

Туннэ, 13-тӥ толсуре, Ижкарын следж-хоккеен шудонъя нырысетӥосыз калыккуспо ӵошатсконъёс кутскизы. Михаил Калашников нимо кубок понна вожвылъяськонэ егитъёслэн ньыль командаоссы пыриськозы: Виктор Кузнецовлэсь нимзэ нуллӥсь «Удмуртия» клуб, Россилэн сборноез, Чехиысь но Словакиысь спортсменъёслэн огазеям командазы но «Башкирские пираты».

Удмуртиын следж-хоккеен шудонъя «KALASHNIKOV CUP» ӵошатсконъёс кутскизы


Ӵошатсконъёсы пыриськисьёслэн арлыдзы 13-25 арес. «Удмуртия» клубысь егитъёслэн командаязы туннэ 10-лэсь уно пиналъёс но егитъёс шудо, тросэзлы 20 арес тырмымтэ на. Кызьы вераз соослэн тренерзы Юрий Широбоков, пиос мыло-кыдо шудо. Нырысь ик кышкалогес ке но, дышемзы бере йӧ вылысь уд улля ни. Егитъёс шыкысазы огъяросси ӵошатсконъёсысь кык азвесь медаль понӥзы ни.

«Милям со пиналъёсмы ветлӥзы ини - Ханты-Мансийскын шудӥзы Россилэн первенствояз, али Алексиноын шудӥзы – тоже молодёжной командаос люкаськылӥзы. Так что соослэн опытсы ӧжытак вань ни. <…> Соос ӧз на шудылэ на ай европейскойёсыныз, а туннэ татын нюръяськозы, быгатозы, малпасько мон. Главное кышканы ӧвӧл кулэ соослы али нокинлэсь но

Юрий Широбоков, следж-хоккеен шудонъя В.Н. Кузнецов нимо «Удмуртия» клубысь егитъёслэн тренерзы

Ужрадэз сӥё-дано усьтон ужрадэ Удмуртиысь кивалтэтлэн тӧроез Ярослав Семёнов вуылӥз. Солэн кылъёсызъя, таӵе бадӟым турнирез радъяны секыт ӧй вал, угось ваньмыз валало, макем со кулэ спортсменъёслы, соослэн анай-атайёссылы, визьнодасьёссылы, тренеръёссылы. Вуоно арын но, берло но та ӵошатсконъёсты одно ик чаклаломы шуыса пусйиз улосвыллэн премьер-министрез. 

Турнир одно ик котькуд ар радъяськыны кулэ, одно ик тросгес командаосты ӧтьыны кулэ. Озьы асьме спортсменъёслэн быгатонлыкъёссы будозы, судъянлэн ӟечлыкез будоз, нюръяськон но ӟырдытгес луоз, оло. Ми валаськомы, туннэ вуоно чемпионъёс ӵошатскозы шуыса, дуннелэн чемпионъёсыз. Со чебер кылъёс гинэ ӧвӧл, со зэмзэ но озьы. Удмуртилэн командаезлэн быгатонлыкез али быдэс дуннеын туж вылӥын
Ярослав Семёнов, Удмуртиысь кивалтэтлэн тӧроез

Михаил Калашниковлэн кубокез понна ӵошатсконъёсты «Удмуртия» команда но Россилэн сборноез усьтӥзы. Пумиськон азьын Юрий Широбоков вераз, таиз шудон капчи уз луы шуыса. Зэм но, пумитъяськисьёс туж золэсь шедизы, нырысетӥ люкетаз асьме пиос 0:3 лыдын келязы.

Вис дыръя вань мылкыд карисьёс понна мастер-класс ортчытӥзы Сочиын Паралимпи шудонъёслэн азвесь призёръёсыз Владимир Каманцев, Иван Кузнецов но Евгений Петров. Нялтас вераса, Кузнецов но Петров али Москва улосвылысь «Фениксын» шудо. Иванлэн кылъёсызъя, следж-хоккейын пиналъёсын рос-прос уж Удмуртиын гинэ мынэ.

Уж пуктэмын умойгес, чем мукет командаосын, малы ке шуоно мукет командаосын чисто шудо ини профессиональной командаос, а татын и профессиональной команда, и егитъёс, пиналъёсыз но дышето шудын. <…> Лыкто пиналъёс, азьлань мыноз «Удмуртия» команда
Иван Кузнецов, Сочиын Паралимпи шудонъёслэн азвесь призёрез

Нырысетӥ пумиськонзэ «Удмуртия» 1:6 лыдын келяз. Азьпалан эшшо кык шудонзы. 14-тӥ но 15-тӥ толсуре пумиськонъёс «Олимпиец» катокын 10 часын кутскылозы. Удмуртиысь хоккеистъёс йӧ вылэ 11 час 30 минутэ потозы.

М.Т. Калашников нимо кубок понна следж-хоккеен шудонъя калыккуспо турнир

15 фото

Пусъём, турнире люкаськемъёс понна радъясьёс экскурсиос но чаклазы. Соосты Михаил Калашниковлэн музеяз, «Лудорвай» музей-заповеднике но Удмуртиысь зоопарке.

Ватсалом, ӵектос Удмуртилэн тӧроез Александр Бречалов кичӧлтэмъя элькун кивалтэт но «Белкамнефть» акционер огазеяськон куспын юнматэм тупанкылъя «САФМАР» ӟечлэсьтон фонд юрттэм улсын быдэстӥське. Радъясьёсыз – Удмуртиысь физкультурая, спортъя но егитъёсын ужан политикая министерство, суй-пыдзыя сӧсыр спортсменъёслэн элькун федерацизы но следж-хоккеен шудонъя В.Н. Кузнецов нимо «Удмуртия» клуб. 



Наверх
Вниз