Ижкар-3 °C
23 -тӥ тулыспал 2020 Воскресенье
16+

Элькунысь куасэн бызьылон спортлэн историезлы сӥзем книгаен тодматӥзы Удмуртиын

  • 400
  • 0
Ижкар / Удмуртия
Элькунысь куасэн бызьылон спортлэн историезлы сӥзем книгаен тодматӥзы Удмуртиын
Туспуктэм: vk.com (Национальная библиотека Удмуртской Республики)

19-тӥ толсуре Ижкарысь Спортлэн историезъя центрын Валерий Мусалимовлэн «История лыжного спорта Удмуртии» книгаеныз тодматон ортчиз. Ужрад Йӧскалык лыдӟетъюртлэн «Удмурт шаер» клубезлэн пумиськонъёсыз улсын радъяськиз. 

Валерий Мусалимовлэн кылъёсызъя, та книгаез кылдытыны малпан солэн йыраз кемалась вал ни, малы ке шуоно Удмуртиын куасэн бызьылон сярысь литература вань ке но, соос та спорт амаллэсь элькунамы азинскон сюрессэ быдэсак уг возьмато. Удмурт кун университетысь тол спорт амалъёсъя кафедраысь профессорен Владимир Осинцевен но Россиысь физкультура удысысь дано ужасен, Удмуртиысь спортлэн историезъя книгаослэн автореныз Николай Соловьёвен кенешыса, Валерий Мусалимов та уж борды кутскиз.

Удмуртиысь куас спортэз эскеронын авторлы спортсменъёслэн ӵыжы-выжыосыз юрттӥзы: кин ке туспуктэмъёсын, кин ке ивортодэтэн. Кылсярысь, элькунысь куасэн бызьылон спортъя нырысетӥ мастерлэн Галина Медведевалэн нылпиосыз анайзылэсь кылем материалъёссэ сётӥзы.

Мон пайми, куке Галина Георгиевналэн материалъёсыныз ужай. Сыӵе радъяса, тупен-тупен со кельтэмын. Туспуктэм вӧзы туспуктэм, котькуд туспуктэм улын гожтэмын кин со вылын возьматэмын, кыӵе ар. Ӵапак таӵе источникъёслы луыса книга бордын уж азьланьтӥськиз
Валерий Мусалимов, «История лыжного спорта Удмуртии» книгалэн авторез

Кызьы пусъе гожъясь, тужгес секыт вал туспуктэмъёсты утчан но гожтэм материалэз соглаштон. Куд-ог дыръя та уж кӧня ке толэзьёс но кыстӥськылӥз. Книгаез кылдытон пӧртэм сямен мынӥз: кыӵе ке вакытэ со вормонтэм потылӥз, куке капчиен гожтӥськиз. Тужгес но выль усьтонъёс бурдъязы, шуэ Валерий Мусалимов.

Ачим понна трос выльзэ усьтӥ, кылсярысь (Владимир - ред.) Осинцев сярысь. Со милям нырысетӥ адями вылэм, кудӥз калыккуспо ӵошатсконъёсы пыриськиз. 1953-тӥ ар, Заммеринг (Австрия), Студентъёс пӧлын калыккуспо вожвылъяськонъёс. Со СССР-лэн сборной командаяз та ӵошатсконъёсы пыриськиз
Валерий Мусалимов, «История лыжного спорта Удмуртии» книгалэн авторез

Озьы ик автор тол Олимпиадаын Удмурт Элькунысь нырысетӥ спортсменка сярысь тодӥз. 1956-тӥ арын валтӥсь стартъёсын Радья Ерошина (Нургаева) кык азвесь медаль утӥз.

Нош тужгес но паймытӥзы Быдӟым Атыкай ож аръёс. Мон малпай вал, ож дыръя спорт дугдӥз, шуэ книгалэн авторез.

Материалъёсты ӝутӥсько но, лыдӟисько: 1943-тӥ арын Ижкарын спортъя «Зенит» добровольной огазеяськонлэн лично-командной первенствоез ортче, отчы 78 спортсменъёс пырисько. Южтолэзе «Советской Удмуртия» газетлэн кузьымъёсызлы ӵошатсконъёс ортчо. Та аре ик Удмуртилэн сборноез Нижний Новгородэ спортъя «Зенит» добровольной огазеяськонлэн первенствояз пота. Нош 1944-тӥ арын Ижкарын быдэс Совето Союзлэн ӵошатсконъёсыз ортчо
Валерий Мусалимов, «История лыжного спорта Удмуртии» книгалэн авторез

Со сяна, Быдӟым Атыкай ож дыръя тросгес куасъёс лэсьто. Удмуртиысь егит спортсменъёс фронтлы куасэн бызьылӥсьёсты дасяло, ваньмыз ог 160 сюрс адями дышетэмын вал.

Куасэн бызьылон спорт элькунамы котьку но нырысетӥ спорт амал вал, шуэ автор. Туннэ нуналлы Удмуртиын 6 олимпи, 5 паралимпи, 14 дунне чемпионъёс. Мукет спорт амалъёс элькунамы таӵе вормонъёсын ушъяськыны уг быгато. Но та ужъемышъёсты азинтыны кулэ, лыдъя Валерий Мусалимов. Та ужпумлы ик сӥземын «История лыжного спорта Удмуртии» книга.

Книгалэн ужпумез – пиналъёс, егитъёс но арлыдоос мед сое лыдӟозы. Оло, со кыскоз соосты та спорт амалэн вырыны но куасэн бызьылон спорт трос-трос аръёслы нырысетӥ интыын луоз
Валерий Мусалимов, «История лыжного спорта Удмуртии» книгалэн авторез

Ватсалом, «История лыжного спорта Удмуртии» книга «Удмуртия» издательствоын 2018-тӥ арын сӥзьыл потӥз. Отын куасэн бызьылон спортлэн элькунын азинскемез, куасэн бызьылонъя тужгес бадӟым ӵошатсконъёс но Удмуртилы вормонъёс ваись спортсменъёс сярысь гожтэмын. 

Пусъём, Валерий Мусалимов ачиз но спорт удысын бадӟым азинсконъёс возьматӥз. Со СССР-ысь куасэн бызьылонъя спортъя мастер, тунсыкъяськись спортсменъёс пӧлын дуннелэн вить полэс чемпионэз, СССР-ысь ГТО-лэн тол многоборьеезъя спортъя мастер, озьы ик Россиысь физкультурая отличник, Удмуртиысь физкультура но спорт удысысь дано ужась.  

Наши партнеры

Наверх
Вниз