Ижкар+22 °C
11 -тӥ пӧсьтолэзь 2020 Кӧснунал
16+

Пиналъёслэсь следж-хоккеен шудонъя командазэс кылдытозы Удмуртиын

  • 731
  • 0
Ижкар / Удмуртия
Пиналъёслэсь следж-хоккеен шудонъя командазэс кылдытозы Удмуртиын

Удмуртиын 7-14 аресъем пиналъёслэсь следж-хоккеен шудонъя командазэс кылдытозы. Солы Елена но Геннадий Тимченкоослэн ӟечлэсьтон фондзы юрттоз. Со сярысь улосвыл тӧролэн но кивалтэтлэн пресс-службазы ивортэ.

Следж-хоккеен шудонъя В. Н. Кузнецов нимо «Удмуртия» клуб «Хоккей без барьеров» вожвылъяськонын «Импульс развития» ӧрын вормисьёс пӧлы шедиз. Тимченкоослэн фондзы элькунын нылпиослэсь комадазэс кылдытыны, солы нимысьтыз тӥрлык, дӥськут басьтыны юрттоз. Со сяна, тренировкаосты радъян понна коньдон висъяны чакламын.

Грант чотын Москваысь но мукет улосвылъёсысь ужълтошъёсмы юрттэмен ми Ижкарын пиналъёсты быръён ортчытыны, соос понна мастер-классъёс, дышетон семинаръёс, котыр ласянь эм эскеронъёс радъяны малпаськом. Уж капчи ӧвӧл, но сӥзьылозь команда люканы но ар пумын следж-хоккеистъёслэн огъяросси фестивалязы келяны чакласьком
Павел Вечтомов, следж-хоккеен шудонъя В. Н. Кузнецов нимо «Удмуртия» клублэн президентэз

Удмуртиысь следж-хоккеистъёсты грант утэменызы улосвыллэн тӧроез Александр Бречалов ӟечкылаз.

Пиналъёс Фондлэсь дӥськут но нимысьтыз тӥрлык гинэ ӧвӧл, 1 миллион манет но басьтозы. Удмуртиысь мыло-кыдо адямиослы но спортэз яратӥсьёслы луыса Россиын следж-хоккей кылдӥз. Спортлэсь та тунсыко но секыт амалзэ азинтонын узыр опыт люкамын
Александр Бречалов, Удмуртилэн тӧроез

Та дыре «Удмуртия» клубын воргоронъёслэн но 14-17 аресъем пиослэн командаоссы вань. Павел Вечтомов верамъя, быдэ вуымтэос одӥг ар гинэ уг шудо ни, соослэн ӟеч ужъемышъёссы но вань. 2017-тӥ арын егитъёс Сӧсыръёслэн спортсыя огъяросси тол спартакиадаязы кыкетӥ инты басьтӥзы. 2018-тӥ арын Ижкарын М. Т. Калашников нимо кубок понна калыккуспо вожвылъяськонын озьы ик кыкетӥ луизы.

Тодэ вайытом, 2018/2019 аръёсы сезонын следж-хоккеен шудонъя Россилэн чемпионатаз «Удмуртия» команда ньылетӥ инты басьтӥз

ВАТСАН

Россиын следж-хоккейлэн историез сокем ик бадӟым ӧвӧл на. 2009-тӥ арын Удмуртиысь Суй-пыдзыя сӧсыр муртъёслэн физкультурая но спортъя федерацизылэн вице-президентэз Виктор Кузнецов команда кылдытыны ӵектӥз. Солэн ӧтемезъя элькунэ Канадаысь Онтарио провинциысь Следж-хоккеен шудонъя федерацилэн президентэз Тодд Сержент лыктӥз но пукыса хоккеен шудонлэсь пӧртэмлыксэ возьматӥз. Озьы Виктор Кузнецов Удмуртиын гинэ ӧвӧл, быдэс Россиын та спорт амаллы кутскон сётӥз. 2017-тӥ ар пумын дано тренер улонысь кошкиз, туннэ солэсь ужзэ эшъёсыз но Андрей пиез азьланьто.


Наверх
Вниз