100 лет государственности Удмуртии
Ижкар+14 °C
31 -тӥ куартолэзь 2020 Воскресенье
16+

1 сюрс 200 дышетскисьёс пырисько Спортъя XXI элькун фестивале Ижкарын

  • 262
  • 0
Ижкар / Удмуртия
1 сюрс 200 дышетскисьёс пырисько Спортъя XXI элькун фестивале Ижкарын
Туспуктэм: Альфия Варнавьева

Ижкарысь выльдэм «Динамо» стадионын Удмуртиысь дышетскисьёслэн спортъя XXI элькун фестивальзы усьтӥськиз. Ӵошатсконъёсы улосвылысь школаосысь тужгес усто спортсменъёс вуизы.

Ми та ӵошатсконъёслы быдэс ар дасяським. Воткаын мини-футболъя вань командаосты вормим. Сарапулын волейбол шудӥм. Озьы ик нырысетӥ луим. Можгаын баскетбол вал. Отын секытгес йӧтӥз. Та ӵошатсконъёсын вормыны оскиськом. Малпасько, капчи атлетикаын но кык нырысетӥ интымы луоз
Александр Чепарухин, Сарапулысь нылпиослы спортъя школалэн кивалтӥсез

Ӵошатсконъёсы элькунысьтымы каръёсысь но ёросъёсысь 34 люкам командаос вуизы. 14 аресысен 18 аресозь огъя 1 сюрс 200 пиналъёс. Куинь нунал ӵоже соос мини-футболъя, волейболъя, баскетболъя, тупен-чапен (лаптаен) шудонъя но капчи атлетикая ӵошатсконъёсын вожвылъяськозы.

Нырысь ик карын ӵошатсконъёс ортчизы. Мон отын умой дыр возьматӥ но вормисьёс пӧлы сюри, озьы Удмуртие бырйиськи. Та ӵошатсконъёсын 400 метре бызё, собере 800 метре, эшшо эстафета луоз на
Всеволод Заварзин, Сарапуллэн командаысьтыз капчиатлет

Спортъя XXI элькун фестивалез усьтон

10 фото

Спортъя элькун фестиваль Удмуртиысь школаосын дышетскисьёслэн йылпумъясь ӵошатсконзы луэ. Сое нырысьсэ 1996-тӥ арын Яр каргуртын ортчытӥзы. Нош кыкетӥез спортъя фестиваль 2000-тӥ арын гинэ Дэри черкогуртын  радъяськиз. Удмуртилэн азьмуртэз но кивалтэт юрттэмен ӵошатсконъёсты арысь аре ортчыны кутскизы. 2002-тӥ арын программае баскетболъя, волейболъя, мини-футболъя ӵошатсконъёсты пыртӥзы. Нош 2008-тӥ арын тупан-чапен шудонэз но ватсазы на.

Спортэн ялан вырисьёслэн лыдзы кунамы арысь аре мед йылоз шуыса, федерал но, улосвыл но тӧрлыкъёс трос лэсьто. <…> Мон оскисько, тӥ пӧлын, пиналъёс, вуоно олимпи чемпионъёс вань шуыса. Сӥзисько азьланяз но мыло-кыдо, котькытчы вутскись, кужмо луыны но вормонъёстэс ватсаны
Анастасия Муталенко, Удмуртиысь кивалтэтлэн тӧроезлэн воштӥсез

Туэ элькунысь школаосысь спортзалъёсты тупатъяны 19 миллион 500 сюрс манет висъязы. Эшшо 45 миллион манет Ижкарысь спортъя объектъёсты тупатъяны мыноз. Ваньмыз со ужъёс Россилэн азьмуртэныз Владимир Путинэн кичӧлтэм «Спорт – норма жизни» федерал ӵектос улсын лэсьтӥське.

Милям ужпуммы элькунамы но быдэс кунамы улӥсьёсты но егитъёсты «Демография» йӧскалык ӵектосэз быдэсъянэ тросгес но тросгес кыскон бордын. Соин ик кунамы улӥсь котькуд кыкетӥез, бадӟымгес процентэз но, спортэн вырыны кулэ. Со мылкыд сюлмысь луыны кулэ. Асьмелэн со понна ваньмыз вань
Олег Бекмеметьев, Ижкарлэн тӧроез

Тужгес кужмооссэ спортсменъёсты 13-тӥ пӧсьтолэзёзь шараялозы. Вормисьёсты пусъён но Спортъя XXI элькун фестивалез ворсан 15 часын «Динамо» стадионын ортчоз. 



Наверх
Вниз