Следж-хоккеен шудонъя нылпи командаен тодматӥзы Удмуртиын

  • 272
  • 0
Ижкар / Удмуртия
Следж-хоккеен шудонъя нылпи командаен тодматӥзы Удмуртиын
Туспуктэм: Удмуртиысь тӧролэн но кивалтэтлэн пресс-службазы

10-тӥ гудырикошконэ Удмуртиын Елена но Геннадий Тимченкоослэн Ӟечлэсьтон фондзылэн юрттэмез улсын нылпиос пӧлын следж-хоккеез азинтонъя «Команда моей мечты» но «Хоккей без барьеров» ӵектосъёсын тодматон ортчиз. Нылпиослэсь командазэс кылдытэмен но 1 миллион манет тыр грант басьтэмен спортсменъёсты элькунлэн тӧроез Александр Бречалов ӟечкылаз. Ужрадэ ивортодэтъя «Удмуртия» агентстволэн корреспондентэз но вуылӥз.

Тӥ – зэмос геройёс, тӥляд пумтэм быгатонлыкъёсты вань, малы ке шуоно тӥледлы, тросэныз пиналъёсын ӵошатыса, шӧдскымон секытгес. Со дыре ик спортэ кыстӥськонды,вормыны тыршемды трослы золгес. Тӥ вӧзын сылыны мон понна бадӟым дан. Эшшо огпол Елена но Геннадий Тимченкоослэн фондзылы юрттэт сётэмзы понна тау кареме потэ!
Александр Бречалов, Удмуртилэн тӧроез

Утэм коньдонэн мастер-классъёс, дышетӥсь семинаръёс, эм эскеронъёс ортчытъяло. Озьы ик Фонд нимысьтыз дӧдьыос, клюшкаос но шудыны кулэ луись дӥсь басьтыны юрттоз на.

Тимченкоослэн фондзылэсь дӧдьыос вуизы ини, ми Росси Федерациын поттэм пластик клюшкаосын шудӥськом. <…> Форма но, каскаос но – ваньмыз фонд юрттэмен басьтэмын, валтӥсез – тренировкаос радъямын
Павел Вечтомов, следж-хоккеен шудонъя «Удмуртия» клублэн азьмуртэз

Следж-хоккеистъёслэсь нылпи командазэс но грант чотын кылдытӥзы. Удмуртиын со нырысетӥез, нош Россиын – 15-ез. Командае 7-14 аресъем нылпиос пыризы. Туннэ нуналлы 11 пиналъёс тренировкаосы ветло.

Ми соосты кемалась ик ӧм люкалэ, но соос нискыланы но, шайбаез но нуыны быгато ини. <…> Коньывуонэ Казане мыныны малпаськом, мукет пиналъёслэсь шудэмзэс учком
Юрий Широбоков, следж-хоккеен шудонъя нылпиослэн командазылэн тренерез

Пусъём, следж-хоккеен шудонъя «Удмуртия» клублы туэ элькун коньдэтысь 5 миллион 400 сюрс манетлэсь ятыр коньдон висъязы. Со борды эшшо 2 миллион 500 сюрс манет ватсаны чаклало на. 

Тодэ вайытом, 2018-тӥ арын толсуре егитъёс пӧлын следж-хоккеен шудонъя М. Т. Калашников нимо кубок понна калыккуспо вожвылъяськонъёсын «Удмуртия» команда кыкетӥ инты басьтӥз.

Наши партнеры

Наверх
Вниз