Ижкар-9 °C
24 -тӥ толшор 2020 Удмуртарня
16+

Хоккей шудон инты лэсьтӥзы но спортзалэз выльдӥзы Удмуртиысь Яр ёросын

  • 315
  • 0
Яр / Удмуртия
Хоккей шудон инты лэсьтӥзы но спортзалэз выльдӥзы Удмуртиысь Яр ёросын
Туспуктэм: Руслан Нуриахметов

Яр ёросысь Биграгурт (Дизьмино) черкогуртын хоккей шудон инты лэсьтӥзы но школалэсь спортзалзэ рос-прос тупатъязы. Удмуртилэн тӧроез Александр Бречалов быдэстэм ужъёсты дунъяны вуылӥз.

Спортзалын физкультурая урокъёс ортчытъям сяна, бадӟымъёс понна секциос ужало. 

Ми туж кема возьмамы, выжез умой мед луоз шуыса. Милем сое лэсьтӥзы. Со милям котьку буямын гинэ вал, табере выжмы лакен шобыртэмын
Марина Ефимова, Биграгурт школаысь физкультурая дышетӥсь

Солэн верамезъя, азьвыл баскетбол но волейбол шудыны шуг вал - туп умойтэм тэчылӥз, нош куд-ог дыръя пиналъёс выж пулъёс борды канжаськылӥзы.

Биграгурт школаысь выльдэм спортзал
Биграгурт школаысь выльдэм спортзал Фото: Руслан Нуриахметов © udmurt.media

Тупатъян ужъёслы Удмуртилэн коньдэтысьтызы 415 сюрс 900 манет висъязы. Кӧня ке коньдон Яр ёрос ватсаз. Торгъёс ортчытыса, тупатъянлэн дуныз 349 сюрс 300 манетозь усиз. Кылем коньдонлы тупъёс, тэтчан гозыос, куасъёс но бодыос, куас ботинкаос басьтӥзы.

Спортзалэз «Образование» йӧскалык ӵектослэн «Успех каждого ребенка» улосвыл ӵектосэз но Удмуртиысь «Дышетонэз азинтон» кун программаез быдэстыны луонлыкъёс кылдытонъя подрограмма улсын тупатъязы.

2019-тӥ арын гужем Биграгуртын хоккей шудон инты лэсьтӥзы - кузьдалаез 45 метр но пасьталаез 25 метр.

Татын пичиез но, быдӟымез но. Арлыдоос лыкто пиналъёсын, кин ке ачиз нискыла. Коробка буш уг улы. Ёросын 30-40 адями ялан выре
Юрий Шандыбин, Биграгурт школалэн кивалтӥсез

Конькиен нискыланэз физкультурая урокъёсы но пыртӥзы. Каток 5 часысен 20 часозь нуналлы быдэ, вордӥськонэ сяна, ужа. Вань мылкыд карисьёс дунтэк нискыланы быгато.

Хоккей коробкаез «Сообщество» улосвыл фонд пыриськемен но «САФМАР» ӟечлэсьтон фонд юрттэмен лэсьтӥзы.

Ватсалом, хоккей коробка вӧзы футбол бусы лэсьтозы на, отчы вӧлдыны сюй но кизьыны турын вайизы ни.  

Наши партнеры

Наверх
Вниз