Ижкар-3 °C
24 -тӥ тулыспал 2020 Вордӥськон
16+

Владислав Лекомцевлэсь нимзэ сётозы Алнашысь выль куас базалы

  • 891
  • 0
Алнаш / Удмуртия
Владислав Лекомцевлэсь нимзэ сётозы Алнашысь выль куас базалы
Туспуктэм: Руслан Нуриахметов

Алнашысь выль куас базалы Паралимпи чемпионлэсь Владислав Лекомцевлэсь нимзэ сётозы. Со сярысь ивортодэтъя «Удмуртия» агентстволэн корреспондентэзлы Алнаш ёрос администрациысь физкультурая но спортъя ёзэтысь валтӥсь ӧнерчи Наталья Корнева вераз.

Ар талэсь азьвыл усьтэм куас базалы ним быръён вылысь куара сётон ялӥзы, отчы оглом 1 сюрс 980 адями пыриськиз. Ӵектӥзы куать ним, 694 адями спортъя дано мастерлэсь Владислав Лекомцевлэсь нимзэ сётон понна дурбасьтӥз. Кыкетӥ интые «Дубки» ним потӥз (570 куара), куинетӥ – «Олимп» (281 куара).

Наталья Корневалэн верамезъя, ачиз Владислав Лекомцев солэсь нимзэ куас базалы сётыны ӵектӥзы шуыса пумозяз ӧз ик тодылы.

Куара сётон бырем бере гинэ соин герӟаським, озьы-озьы, тон соглаш-а шуыса. Со шуиз, конечно, туж приятно, мон понна со бадӟым дан но кылкутон, шуиз
Наталья Корнева, Алнаш ёрос администрациысь физкультурая но спортъя ёзэтысь валтӥсь ӧнерчи

Валтӥсь ӧнерчилэн кылъёсызъя, Владислав Лекомцевлэсь нимзэ сётэм сяна, вӧзаз ватсэт малпаны кулэ на. Кылсярысь, Шарканын куасэн бызьылӥсьёсты дасянъя центрлы Максим Вылегжанинлэсь нимзэ сётӥзы, нош спортклубез «Максимум» нимазы. 

Ми учкылӥмы, Лекомцев фамилия мар бордысь кылдэ шуыса, солэсь нимзэ но, тулзэ но. «Леком» ӵектӥм вал, «Влас»
Наталья Корнева, Алнаш ёрос администрациысь физкультурая но спортъя ёзэтысь валтӥсь ӧнерчи

Чакламъя, куас базалы спортъя дано мастерлэсь нимзэ вуоно арняе сётозы. 

Тодэ вайытом, Алнашысь выль туала куас базаез 25-тӥ тол элькун гурт шудонъёслы усьтӥзы.

Нялтас вераса, ёросъёсын спорт огъетъёслы нимо-дано улосчиоссылэсь-спортсменъёслэсь нимзэс сётон ӟеч сямлы пӧрме ни. Кылем арын Сьӧлтаын мугорез но тазалыкез кыдатонъя огъетлы (ФОК) ӝог ветлонын спортъя дано мастерлэсь Герман Скурыгинлэсь нимзэ сётӥзы


Наши партнеры

Наверх
Вниз