100 лет государственности Удмуртии
Ижкар+7 °C
4 -тӥ оштолэзь 2020 Кӧснунал
16+

Выль хоккей коробка усьтӥзы Каракулиноын

  • 369
  • 0
Каракулино / Удмуртия
Выль хоккей коробка усьтӥзы Каракулиноын
Туспуктэм: Удмуртиысь физкультурая, спортъя но егитъёсын ужан политикая министерстволэн пресс-службаез

Удмуртиысь Каракулино черкогуртын выль хоккей коробка лэсьтӥзы. Со сярысь элькунысь физкультурая, спортъя но егитъёсын ужан политикая министерстволэн пресс-службаез ивортэ.

Хоккей коробкаез усьтон нуналэ выль йӧ вылын Сарапул но Дэри ёросъёсысь нылпи командаос пумиськылӥзы. Пиналъёслы куазь жобаськем улсын шудоно луиз. 

Ужрадэ Удмуртиысь физкультурая, спортъя но егитъёсын ужан политикая министр Александр Варшавский но вуылӥз. Со хоккей площадкаез усьтон Каракулино ёросын та спорт амалэз азинтонын нырысетӥ вамыш луоз шуыса оскемзэ вераз. Озьы ик нылпиослы вазиськиз.

Пиналъёс, мон оскисько, тӥляд зэмос хоккей амбициосты вань но «Ижстальын» ке но шудон сярысь малпаськиськоды шуыса. Тырше но тӥледыз адӟозы. Нош ӧнерлыко спортэ вамыштэмды уг ке поты, хоккей тӥледыз командаен ужаны, эштылы пельпумдэс пуктыны дышетоз
Александр Варшавский, Удмуртиысь физкультурая, спортъя но егитъёсын ужан политикая министр
 

Хоккей коробкаез  черкогуртысь шоръёзо школа вӧзы «САФМАР» ӟечлэсьтон фонд юрттэмен пуктӥзы, азьланяз со трос луонлыкъем спортъя площадкалы пӧрмыны быгатоз 

26х56 метръем коробка пластиклэсь бортъёсын лэсьтэмын. Вӧзаз кык кылӥськон интыен, туалетэн но гылтӥськон интыен, ужан тӥрлыкез возён но коньки сётъян висъетъёсын шуныт юрт пуктэмын. Огдырлы сётъяны чаклам 20 куз конькиос но нылпиослэн командазылы 30 форма (шлем бордысен кутскыса, конькиос дорозь) басьтыны коньдон озьы ик ӟечлэсьтон фонд висъяз.

Каракулино ёрослэн тӧроезлэн Сергей Русиновлэн верамезъя, азьланяз хоккей коробкаез быдэс ар ӵоже ужатыны чаклало. Резиналэсь шобрет вӧлдыса, отын баскетбол, волейбол но мини-футбол шудыны луоз.

Ёрос администрациысь калыкез дышетонъя управлениен кивалтӥсь Лариса Ульянова хоккей команда кылдыто ини шуыса пусйиз.

Йӧмы милям азьло но вал, ми стадионын каток лэсьтылӥм, но со пичи, куронъёслы тупасьтэм вал. Озьы ик йӧ площадка огаз улон микрорайонын вань, сое калык ас мылкыдызъя лэсьтӥз. Нош табере милям Каракулиноын вань улӥсьёслы лыктымон интыын туала хоккей площадкамы вань
Лариса Ульянова, Каракулино ёрос администрациысь калыкез дышетонъя управлениен кивалтӥсь
 

Хоккей площадкаез 2018-2020 аръёсы нылпиос пӧлын хоккеез азинтон сярысь «САФМАР» ӟечлэсьтон фонд но Удмуртилэн кивалтэтэз куспын тупанкыл улсын. Соя куинь ар ӵоже элькунамы фондлэн коньдонэныз 11 хоккей площадкаос пуктозы. Тужгес бадӟымез ӵектос - Можгаын 6 сюрс 500 квадрат метръем йӧ арена, сое туэ усьтыны чаклало. Со сяна, 2020-тӥ арын эшшо куинь хоккей площадка лэсьтозы – Эграын, Шаркан ёросысь Мувырын но Балезино ёросысь Кестымын.

Тодэ вайытом, кемалась ӧвӧл Яр ёросын но Киясаын хоккей шудон интыос усьтӥзы ини. 



Наверх
Вниз