100 лет государственности Удмуртии
Ижкар+21 °C
29 -тӥ куартолэзь 2020 Удмуртарня
16+

Удмуртиысь куинь ёросъёсысь школаос нылпи хоккеез азинтыны грантъёс басьтозы

  • 329
  • 0
Ижкар / Удмуртия
Удмуртиысь куинь ёросъёсысь школаос нылпи хоккеез азинтыны грантъёс басьтозы
Туспуктэм: Руслан Нуриахметов

Пичи Пурга, Ува ёросъёсысь куинь гурт школаос но Эгра ёросысь спортъя «Витязь» клуб нылпи хоккеез азинтыны грантъёс басьтозы. Соос Елена но Геннадий Тимченкоослэн ӟечлэсьтон фондзы юрттэм улсын радъяськись «Добрый лёд» вожвылъяськонын вормизы. Со сярысь Удмуртиысь дышетонъя но тодосъя министерстволэн пресс-службаез ивортэ.

«Добрый лёд» программае Удмуртия таяз арын гинэ итӥськиз но соку ик вожвылъяськонэ мыло-кыдо пыриськеменыз висъяськиз. Озьы ик ар кутсконын спорт менеджментъя школаез ортчытон бадӟым инты басьтӥз, солы луыса вожвылъяськонэ сётэм куриськонъёслэн дасьлыксы но ӟечлыксы шӧдскымон будӥз
Игорь Барадачёв, Тимченкоослэн фондысьтызы «Спорт» программалэн кивалтӥсез

Пичи Пурга ёросысь Шор Кечол гуртысь школа «Милям азбармылэн командаез» ӵектосэныз 1 миллион 500 сюрс манет пала утӥз, Гожна гуртысь дышетсконни аслэсьтыз ӵектоссэ быдэстыны 1 миллион 100 сюрс манет басьтоз.

Эгра каргуртысь «Витязь» клуб 500 сюрс манет пала коньдонзэ искусственной йӧ лэсьтыны кутоз.

Ува ёросысь Красной черкогуртысь школа 1 миллион манет пала утӥз. Со коньдонэн но гуртоослэн но спонсоръёслэн юрттэменызы дышетсконниын хоккей коробка пуктозы.

Вожвылъяськонэ Россилэн 28 улосвылъёсысьтыз 86 куриськонъёс вуизы. Тужгес мыло-кыдо луизы Приволжск федерал округын улӥсьёс. Соос 40 куриськонъёс ыстӥзы, со пӧлысь 21-ез – Удмуртиысь. Экспертъёслэн кенешсылэн йылпумъянъёсызъя 14 улосвылъёсысь 25 ӵектосъёс юрттэт басьтозы

Тодэ вайытом, 2020-тӥ арын Удмуртия «Добрый лёд» кубоклэсь усьтонэз ортчытоз шуыса чаклазы. Ватсалом, Тимченкоослэн ӟечлэсьтон фондзы юрттэмен, кылем арын Удмуртиын нылпиослэсь следж-хоккей командазэс кылдытӥзы



Наверх
Вниз