Ижкар+19 °C
7 -тӥ пӧсьтолэзь 2020 Пуксён
16+

Спортъя огъяросси ӵошатсконъёс ортчозы Удмуртиын элькунлэн кунлыкезлы 100 ар тырмон улсын

  • 52
  • 0
Ижкар / Удмуртия
Спортъя огъяросси ӵошатсконъёс ортчозы Удмуртиын элькунлэн кунлыкезлы 100 ар тырмон улсын
Туспуктэм: Руслан Нуриахметов

Удмуртилэн кунлыкезлы 100 ар тырмон улсын элькунамы огъяросси ӵошатсконъёс ортчозы. Со сярысь элькун кивалтэтлэн тӧроез Ярослав Семёнов кивалтэм улсын ортчем улосвыллэн даур тырмонэзлы дасяськонъя но сое пусъёнъя ужъя группалэн кенешоназ физкультурая, спортъя но егитъёсын ужан политикая министр Александр Варшавский вераз, ивортэ улосвыл тӧролэн но кивалтэтлэн пресс-службазы.

Спортъя нырысетӥез ужрад 22-тӥ гудырикошконлы чакламын. Капчи атлетикая «Исток Камы - 100» огъяросси марафонэ кузь дистанциосы бызьылыны яратӥсь 500 адями пыриськоз. Росиысь спортсменъёс Удмуртилэн уйпалысьтыз чебер интыосын, сямъёсын тодматскыны быгатозы. Соос понна экскурсиос, творческой ужрадъёс радъялозы, куноятозы.

Ужрадлэн амбассадоръёсыз куасэн бызьылонъя олимпи чемпионка Тамара Тихонова но дуннелэн чемпионатэзлэн призёрез Константин Главатских луозы. Ӵошатсконъёсы котькуд пыриськись финише вуэмез бере синпель кузьым басьтоз

Коньывуонэ нырысьсэ Удмуртиын Россиысь улосвылъёс но финн-угор калыкъёс пӧлын пневматика винтовкаысь калыккуспо ӵошатсконъёс ортчытыны малпало. Ӵошатсконъёс физкультура но спорт пыр лулчеберетъя огазеяськыны но устооссэ йылолъёсты азинтыны луонлык сётозы.

Ярослав Семёнов тодэ вайытӥз, трос калыкен ужрадъёсты сюбегатонъёслэсь куштӥськонлэн куинетӥ люкетаз гинэ ортчытыны лэземын шуыса, Удмуртия туннэ нуналлы – кыкетӥ люкетын. Куинетӥ люкетэ выжыса, котькуд ужрадъя, санитар куронъёсты лыдэ басьтыса, нимысьтыз план дасяны кулэ луоз.

Ватсалом, эпидеми югдурен сэрен кӧня ке ужрадъёслэсь куштӥськоно луиз. Соос пӧлын: экстремальной спорт амалъёсъя калыккуспо фестиваль (скейт, роллерспорт, ВМХ) но йӧскалык но олимпи луисьтэм спорт амалъёсъя VI огъяросси фестиваль. Ужрадъёсы Россиысь 700-лэсь трос спортсменъёс пыриськыны кулэ вал.

Тодэ вайытом, Удмуртилэн кунлыкезлы 100 ар тырмон ужрадъёсты санитар куронъёсты чакласа ортчытозы



Наверх
Вниз