Ижкар-4 °C
5 -тӥ толсур 2021 Воскресенье
18+

Сьӧлтаысь нылпиослы но быдэ вуымтэослы спортъя школаысь кивалтӥсьлэн дышетон но визьнодан ужъёсъя воштӥсез Валентина Неустроева Спортъя школаосын устооссэ ужасьёсты шараянъя XI огъяросси конкурсын вормиз. Данъян ужрад Москваын ортчиз. Со сярысь «Удмуртия» агентстволэн корреспондентэзлы вожвылъяськонэ пыриськись вераз.

Конкурс кык люкетэн ортчиз. Улосвыл люкетаз куриськонъёсты но портфолиосты кутӥзы. Бӧрысь соосты Москваын утизы. Тужгес устооссэ вожвылъяськонлэн огъяросси люкетаз ӧтизы, отчы Россиысь 41 улосвылъёсысь 94 номинантъёс пыриськизы. Вормисьёсты куинь номинациын шараязы: кивалтӥсь, кивалтӥсьлэн воштӥсез но валтӥсь инструктор-методист, инструктор-методист, методист. Валентина Неустроеваез кивалтӥсьлэн устоез воштӥсез шуыса пусйизы.

Радъясьёс бадӟым но милям кадь пичи спортшколаосты висъяны тыршизы. Соин ик котькуд номинациын быдэн кык вормисьёсты пусйизы
Валентина Неустроева, Сьӧлтаысь спортъя школаысь кивалтӥсьлэн дышетон но визьнодан ужъёсъя воштӥсез

Данъетъёсты Россиысь спортъя министр Олег Матыцин но спортъя школаосын ужасьёслэн огъяросси огазеяськонзылэн тӧроез Александр Паршиков сётӥзы.

Валентина Неустроева Сьӧлтаысь спортъя школаын кивалтӥсьлэн воштӥсез луыса 10 ар ужа ини. Нылкышно тренеръёслэсь ужамзэс чакла, ужкагазъёсын выре. Со сяна, куасэн бызьылонъя, полиатлонъя но капчи атлетикая ӵошатсконъёсын судья луэ.

Со пусъе, Сьӧлтаысь спортъя школалэн историез кузь ик ӧвӧл на – 20 ар гинэ. Озьы ке но, ужъемышез адӟиське. Тренеръёс ёросысь ваньмаз сямен школаосын 10 пӧртэм ӧръёсъя секциос нуо, отчы ог 500 пала пиналъёс ветло. Соос пӧртэм ӵошатсконъёсын вормисьёс но призёръёс луо. 

Тодэ вайытом, Удмуртиысь куинь дышетскисьёс «Ученик года – 2021» огъяросси конкурслэн финалаз потӥзы.


Удмуртиысь паралимпиец Владислав Лекомцев Куасэн бызьылонъя но биатлонъя дуннелэн кубокез понна вожвылъяськонлэн нырысетӥ люкетаз пыриськоз. Ӵошатсконъёс 4-12 толсуре Канадаысь Кенморын ортчозы. Со сярысь Россиысь Паралимпи комитетлэн пресс-службаез ивортӥз.

4-тӥ, 5-тӥ но 7-тӥ толсуре куасэн бызьылонъя ӵошатсконъёс ортчозы, нош 9-тӥ, 11-тӥ но 12-тӥ толсуре биатлонын кужмооссэ шараялозы.

Озьы ик ӵошатсконъёсы ляб адӟись но адӟисьтэм атлетъёс но пыриськозы. Оглом Канадае 15 кунъёсысь 125-лэсь трос спортсменъёс люкаськозы.

Калыккуспо дырпусын Дуннелэн кубокезлэн куинь люкетэз луоз. Кыкетӥез Швециысь Эстерсундын 27-тӥ толшорысен 1-тӥ тулыспалозь ортчоз, йылпумъясь люкетэз – Япониысь Саппороын 17-21 южтолэзе.

Тодэ вайытом, кылем сезонын Владислав Лекомцев куасэн бызьылонын но, биатлонын но дуннелэн кубокезлэн огъя зачётаз вормиз.

Озьы ик лыдӟе: Меӵ удмурт Владислав Лекомцев: «Куддыръя мон аслэсьтым соперникъёсме настраивать карисько ӵошатсконлы»

Удмуртиысь Пичи Пурга ёросысь спортсменкаослэн командазы гозы кысканъя Россилэн чемпионатаз куинетӥ инты басьтӥз. Ӵошатсконъёс 27-28 шуркынмонэ Тверьын ортчизы. Со сярысь элькунысь Спортъя дасяськонъя центрлэн «ВКонтакте» мерлыко вотэсысь бамаз ивортӥзы.

Тямыс нылкышноос оглом секталазыя 560 килограммозь категориын нюръяськизы но Тверьысь но Пенза улосвылысь командаослы гинэ келязы

Ӵошатсконъёсы Москва, Тюмень, Ленинград улосвылъёсысь, Дагестанысь, Москваысь но Санкт-Петербургысь командаос пыриськизы. Нылкышноос пӧлын сяна, вожвылъяськонъёс воргоронъёс пӧлын (640, 720 но 1000 килограммозь категориосын) но 580 килограммозь суро командаос пӧлын (ньыль воргоронъёс но ньыль кышномуртъёс) ортчизы. Отчы Удмуртиысь гозы кыскасьёс ӧз пыриське.

Ӵошатсконъёслы йылпумъянъёсъя, тужгес усто командаос Россилэн сборнояз пырозы но 2022-тӥ арын южтолэзе Голландие липет улын дуннелэн чемпионатаз мынозы

Нялтас вераса, гозы кыскась нылкышноосмы 2019-тӥ арын но Россилэн чемпионатаз куинетӥ луизы вал. Нош туэ соос Гракын Спортъя гужем элькун гурт шудонъёсын но Ижкарын Йӧскалык но олимпи луисьтэм спорт амалъёсъя огъяросси фестивальын вормизы.

Тодэ вайытом, Удмуртиысь биатлонист IBU-лэн кубокезлэн нырысетӥ люкетаз бронза медаль утӥз.


Удмуртиысь биатлонист Александр Поварницын Швециысь Эстерсундын Дуннелэн кубокезлэн кыкетӥ люкетаз пыриськоз. Со сярысь Россиысь биатлонъя огазеяськонлэн пресс-службаез ивортӥз.

Сборнойлэн тренеръёсыныз Дуннелэн кубокезлэн но IBU-лэн кубокезлэн нырысетӥ этапъёссылы йылпумъянъёс лэсьтыса, Василий Томшин но Александр Поварницын Дуннелэн кубокезлэн кыкетӥ люкетаз ӵошатскозы шуыса пумкылъян кутӥм, нош Матвей Елисеев но Евгений Гараничев – IBU-лэн кубоказ
Виктор Майгуров, Россиысь биатлонъя огазеяськонлэн кивалтӥсез

Дуннелэн кубокезлэн кыкетӥ люкетэз 2-5 толсуре Швециысь Эстерсундын ортчоз. Нош IBU-лэн кубокез понна ӵошатсконъёс 1-4 толсуре Норвегиысь Шушенын азьланьтӥськозы.

Тодэ вайытом, Александр Поварницын биатлонъя Дуннелэн кубокезлэн нырысетӥ люкетаз ик пыриськыны кулэ вал, но квалификаци очкоосыз ӧвӧлэн сое отчы ӧз лэзе. Соин ик спортсмен сезонзэ IBU-лэн кубокез понна вожвылъяськонын кутскиз но нимаз бызьылонъёсын бронза медаль утӥз.

Удмуртиысь Александр Поварницын Швециысь Идреын Биатлонъя калыккуспо огазеяськонлэн (IBU) кубокез понна вожвылъяськонлэн нырысетӥ люкетаз бронза медаль утӥз. Со сярысь Россиысь биатлонистъёслэн огазеяськонзылэн пресс-службаез ивортӥз.

Воргоронъёс пӧлын нимаз бызьылонъёс 28-тӥ шуркынмонэ ортчизы. Александр Поварницын стартэ укмысэтӥ интыын потӥз. Одӥг мишеньзэ ворсатэк, вормисьлы, Россиысь Василий Томшинлы, 1 минут 7,7 секунд келяз. Кыкетӥ инты Норвегиысь Александр Фьелд Андерсен басьтӥз.

25-тӥ но 27-тӥ шуркынмонэ спринт амалэн ӵошатсконъёс ортчизы. Александр Поварницын кыказ ик быдэн одӥг мишеньёссэ ворсатэк кельтӥз но укмысэтӥ луиз (+34.0 но +53.3).

Озьы ик та ӵошатсконъёсы Удмуртиысь Ильназ Мухаметзянов пыриськиз. Нырысетӥ спринтын со 13-тӥ вал (+52.4 (2)), кыкетӥ спринтын – куатетӥ (+38.4 (0)), уйыса бызёнын – 15-тӥ (+2:08.7 (6)).

Тодэ вайытом, Александр Поварницын Дуннелэн кубокез понна вожвылъяськонлэн нырысетӥ люкетаз мыныны кулэ вал, но куронъёсты воштэмен сэрен, со Эстерсундэ ӧз вуы.

IBU-лэн кубокезлэн кыкетӥ люкетэз Норвегиысь Шушенын 1-4 толсуре ортчоз.

Ватсалом, Дуннелэн кубокезлэн нырысетӥ люкетаз Удмуртиысь Ульяна Нигматуллина пыриськиз. Нимаз бызьылонын со витетӥ луиз (+2:04.0 (1)), спринтын 17-тӥ инты басьтӥз (+1:03.7 (0)). Кыкетӥ люкетэз Эстерсундын ик 2-5 толсуре ортчоз. Спортсменъёс спринтын, уйыса бызьылонын но эстафетаын кужымзэс мерталозы. 

Удмуртиысь спортсменъёс ляб адӟисьёс пӧлын уянъя Россилэн первенствоысьтыз 12 медаль вайизы. Ӵошатсконъёс 18-23 шуркынмонэ Москва улосвылысь Раменское карын ортчизы. Со сярысь элькунысь Спортъя дасяськонъя центрлэн пресс-службаез ивортӥз.

Удмуртилэсь данзэ куинь спортсменъёс утизы: Дмитрий Энтентеев, Егор Кузьмин но Булат Салихов.

Дмитрий Энтентеев куать медаль басьтӥз:

  • эрико амалэн 400 метре уянын – зарни;
  • тыбыр вылын 50 метре уянын – азвесь;
  • эрико амалэн 50 метре уянын – азвесь;
  • тыбыр вылын 100 метре уянын – азвесь;
  • эрико амалэн 100 метре уянын – азвесь;
  • брасс амалэн 100 метре уянын – азвесь.

Егор Кузьмин куинь медаль утӥз:

  • баттерфляй амалэн 50 метре уянын – зарни;
  • баттерфляй амалэн 100 метре уянын – азвесь;
  • пӧртэм амалэн 200 метре уянын – бронза.

Булат Салихов куинь медаль вайиз:

  • брасс амалэн 50 метре уянын – азвесь;
  • баттерфляй амалэн 50 метре уянын – азвесь;
  • брасс амалэн 100 метре уянын – азвесь.

Ӵошатсконъёсы 20 улосвылъёсысь 77 спортсменъёс пыриськизы. Командаос пӧлын огъя зачётын Москваысь спортсменъёс вормизы (1 сюрс 821 очко люказы). Кыкетӥ Красноярск улосысь уясьёс луизы (636 очкозы), куинетӥ – Москва улосысь команда (540 очкозы).

Тодэ вайытом, 26-28 шуркынмонэ Финляндиысь Рукаын куасэн бызьылонъя Дуннелэн кубокез понна вожвылъяськонъёс кутскозы. Нырысетӥ люкетаз Удмуртиын вордскем куинь спортсменъёс пыриськозы

Удмуртиысь куасэн бызьылӥсь Лилия Васильева Дуннелэн кубокез понна вожвылъяськонлэн нырысетӥ люкетаз пыриськоз. Ӵошатсконъёс 26-28 шуркынмонэ Финляндиысь Рукаын мини-тур форматэн ортчозы. Со сярысь Удмуртиысь куасэн бызьылонъя федерацилэн «ВКонтакте» мерлыко вотэсысь бамаз ивортӥзы.

26-тӥ шуркынмонэ Лилия Васильева классика амалэн спринтын кужымзэ эскероз. 27-тӥ шуркынмонэ классика амалэн ик нимаз ӵошатсконэ пыриськоз

Нылкышноос пӧлын спринтын Россилэн люкам командаысьтыз озьы ик ӵошатскозы: Юлия Ступак, Татьяна Сорина, Наталья Непряева, Анастасия Фалеева, Ольга Кучерук, Христина Мацокина. 10 иськеме классика амалэн ас чотэ бызьылонын: Юлия Ступак, Татьяна Сорина, Наталья Непряева, Яна Кирпиченко, Анастасия Рыгалина, Мария Истомина.

Пусъём, Россилэн сборнояз Удмуртиысь Сергей Ардашев но Денис Филимонов сюризы. Та дыре соос Татарстан понна бызьыло. Пиос спринтын ӵошатскозы.

Соосын ӵош стартэ Александр Большунов, Глеб Ретивых, Александр Теретьев, Сергей Устюгов, Андрей Ларьков, Александр Бессмертных потозы. Со сяна, воргоронъёс 15 иськеме классика амалэн ӵошатскозы. Отчы Александр Большунов, Иван Якимушкин, Артём Мальцев, Евгений Белов, Илья Семиков, Сергей Устюгов, Алексей Червоткин, Андрей Ларьков но Александр Бессмертных пыриськозы.

28-тӥ шуркынмонэ, нырысетӥ кык нуналъёслы йылпумъянъёсъя, эркын амалэн уйиськыса ӵошатсконъёс луозы.

Тодэ вайытом, биатлонъя Дуннелэн кубокезлэн нырысетӥ люкетаз пыриськыны Россилэн сборнояз Ульяна Нигматуллина сюриз. Со сяна, воргоронъёс пӧлы Александр Поварницын но пыриз вал, но сое Биатлонистъёслэн калыккуспо огазеяськонзы ӵошатсконъёсы ӧз лэзьы

Ханты-Мансийскын следж-хоккеен шудонъя Россилэн чемпионатэзлэн кыкетӥ люкетэз йылпумъяськиз. Удмуртилэн командаез ӵошатсконъёсын куинетӥ луиз. Со сярысь следж-хоккейя «Удмуртия» клублэн «Вконтакте» мерлыко вотэсысь бамаз ивортӥзы.

Ӵошатсконъёсы Москва, Тула, Оренбург, Челябинск улосвылъёсысь, Удмуртиысь, Ханты-Мансийск автоном округысь, Москваысь но Нижний Новгородысь тямыс командаос пыриськизы.

«Удмуртия» клубысь спортсменъёс сизьым пӧлысь витяз пумиськоназы вормизы:

«Удмуртия» – «Торпедо» – 23:0;

«Удмуртия» – Челябинск улосвыллэн люкам командаез – 14:0;

«Удмуртия» – «Югра» – 1:3;

«Удмуртия» – «Феникс» – 1:5;

«Удмуртия» – Москвалэн люкам командаез – 7:0;

«Удмуртия» – «Звезда» – 5:0;

«Удмуртия» – «Ястребы» – 3:1.

Чемпионатлэн кык люкетэзлы йылпумъянъёсъя нырысетӥ интыын «Феникс» клуб мынэ (41 очкозы), кыкетӥ интыын – «Югра» (34 очкозы), куинетӥ – «Удмуртия» (33 очкозы).

Тодэ вайытом, Россилэн чемпионатэзлэн нырысетӥ люкетэз Ижкарын ортчиз. Отын Удмуртиысь команда кыкетӥ инты басьтӥз.

Йӧскалык чемпионатлэн куинетӥ (йылпумъясь) люкетэз Тула улосвылысь Алексин карын 2022-тӥ арын оштолэзе ортчоз

Биатлонистъёслэн калыккуспо огазеяськонзы (IBU) Удмуртиысь Александр Поварницынэз Дуннелэн кубокезлэн нырысетӥ куинь люкетъёсаз ӧз лэзьы. Со сярысь Россиысь биатлонистъёслэн огазеяськонзылэн нимлыко сайтаз ивортӥзы.

Сыӵе пумкылъянэз Поварницынлэн квалификаци очкоосыз ӧвӧлэн валэктӥзы, угось со калыккуспо огазеяськонлэн ӵошатсконъёсаз 2019-тӥ арысь толсурысен ӧз пыриськылы. Лозаннаын ортчем кенешоназ IBU-лэн исполкомез выль сезонын спортсменъёсты ӵошатсконъёсы лэзёнъя куронъёссэ воштӥз. 

Азьвыл улосчимес быръён стартъёсын вормисез сямен кунлэн валтӥсь сборнояз пыртӥзы вал. Табере сое Даниил Серохвостов воштоз, нош Поварницын IBU-лэн кубокез понна вожвылъяськонэ мыноз, отын Удмуртиысь Ильназ Мухаметзянов но кужымзэ мерталоз.

Биатлонъя Дуннелэн кубокез понна вожвылъяськонъёс 25-тӥ шуркынмонэ Швециысь Эстерсундын кутско.

Тодэ вайытом, нылъёслэн валтӥсь командаязы Удмуртиысь Ульяна Нигматуллина шедиз

Удмуртиысь Ульяна Нигматуллина (азьвыл – Кайшева - ред.) Дуннелэн кубокез понна вожвылъяськонлэн нырысетӥ люкетаз пыриськоз. Россилэсь валтӥсь сборнойзэ Тюменьын ортчем контрольной ӵошатсконъёслы йылпумъянъёсъя кылдытӥзы. Со сярысь Россиысь биатлонистъёслэн огазеяськонзылэн пресс-службаез ивортӥз.

Россилэн сборнояз озьы ик шедизы Свердловск улосвылысь Светлана Миронова но Ирина Казакевич, Пермь шаерысь Валерия Васнецова (вордскемын но будэмын Можгаын – ред), озьы ик Лариса Куклина (Ямало-Ненец АО) но Кристина Резцова (ХМАО-Югра).

Вераны кулэ, Ульяна Нигматуллина но Светлана Миронова кылем сезонын огъя зачётын 20 устоосыз спортсменъёс пӧлы шедеменызы валче сборное азьвыл ик пыртэмын вал.

IBU-лэн кубокез понна вожвылъяськонлэн нырысетӥ люкетаз мынозы Анастасия Шевченко, Тамара Дербушева (Свердловск улосвыл), Евгения Буртасова (Новосибирск улосвыл/Кемерово улосвыл), Наталья Гербулова (Красноярск шаер), Екатерина Носкова (ХМАО-Югра) но Анастасия Гореева (Москва улосвыл).

Тодэ вайытом, азьвылгес воргоронъёслэн командаосазы шедем спортсменъёслэсь лыдметъёссэс шараязы. Озьы, Дуннелэн кубокез понна вожвылъяськонэ Удмуртиысь Александр Поварницын пыриськоз, IBU-лэн кубокез понна – Ильназ Мухаметзянов.

Ӵошатсконъёс Швециын ортчозы. Дуннелэн кубокезлэн люкетэз – 27-тӥ шуркынмонысен Эстерсуднды, IBU-лэн кубокезлэн люкетэз – 25-тӥ шуркынмонысен Идреын. 

13-тӥ шуркынмонэ Россиысь тренеръёслэн штабзы биатлонъя Дуннелэн кубокез но IBU-лэн кубокез понна вожвылъяськонъёслэн нырысетӥ люкетъёсаз мынӥсь спортсменъёсты пусйиз. Дуннелэн кубокез понна нюръяськонэ Удмуртиысь Александр Поварницын но шедиз. Со сярысь Россиысь биатлонистъёслэн огазеяськонзылэн пресс-службаез ивортӥз.

Улосчимы командае Ханты-Мансийскын ортчем кык контрольной ӵошатсконъёслы йылпумъянъёсъя шедиз.

Александр Поварницын валӥсь командае спорт принципъя тренеръёслэн штабзылэн пумкылъянэзъя быръемын. Контрольной гонкаосын кык кыкетӥ интыосын со вань пыриськисьёс пӧлын очкоосъя устоез вал
Виктор Майгуров, Россиысь биатлонистъёслэн огазеяськонзылэн президентэз

Азьвылгес быръёнъёсты Александр Логинов, Эдуард Латыпов, Матвей Елисеев, Евгений Гараничев но Карим Халили ортчизы.

Удмуртиысь спортсмен IBU-лэн кубокез понна вожвылъяськонлэн но нырысетӥ люкетаз вань – со Ильназ Мухамедзянов. Со сяна, ӵошатсконъёсы Никита Поршнев, Даниил Серохвостов, Антон Бабиков, Василий Томшин, Кирилл Стрельцов мынозы, запасын – Максим Цветков.

Дуннелэн кубокез но IBU-лэн кубокезлэн нырысетӥ люкетъёсыз Швециысь Эстерсундын но Идреын 27-тӥ но 25-тӥ шуркынмонэ кутскозы.

Ватсалом, нылъёслэн контрольной гонкаоссы Тюменьын 15-тӥ но 16-тӥ шуркынмонэ ортчозы.

Тодэ вайытом, 2022-тӥ арын тулыспалэ Сарапул ёросысь Сигаево черкогуртын ортчоно Спортъя XXVIII элькун тол гурт шудонъёслэн талисманзы Камушка луоз. 

Гракысь пайдаё шутэтсконъя «Сосновый» центр вӧзысь куас сюресэз толлы дасяны кутскизы. Ужъёс кӧня ке толэзь мыно ни, трасса шӧдскымон воштӥськиз. Со сярысь Грак ёрослэн тӧроез Виктор Белов «ВКонтакте» мерлыко вотэсысь бамаз ивортӥз.

Солэн кылъёсызъя, трассаез шӧдскымон паськытатӥзы но ӵошкытатӥзы, ошиськись вайёсты вандылӥзы но вечи будосъёсты коразы. Сюреслэсь люкетсэ туэ югдытозы.

Ваньмыз со куасэн бызьылонэз кышкыттэмлыко кароз. Спортсменъёс но куасэн нискыланы яратӥсьёс понна манёвръёслы но ортчылыны инты кылдэ, со мырӟиськон учыръёслэсь утёз
Виктор Белов, Грак ёрослэн тӧроез

Ёрослэн тӧроез куас сюресэз умоятъя субботникъёсы пыриськисьёслы тау кариз.

Тодэ вайытом, Грак черкогуртын куас базаез кылем толалтэ усьтӥзы.

Удмуртиысь куасэн бызьылӥсьёс калыккуспо федерациен (FIS) радъяськись нырысетӥ ӵошатсконъёсы пыриськыны Россилэн сборнояз шедизы. Турнир Финляндиысь Муониоын 12-14 шуркынмонэ ортчозы. Со сярысь элькунысь спортъя министерстволэн пресс-службаез ивортӥз.

Нылъёслэн командаязы Шарканысь Арина Перевозчикова, Можгаысь Лилия Васильева шедизы. Пиослэн сборноязы – Балезиноысь Сергей Ардашев (али Татарстан понна бызьылэ) но Эграысь Кирилл Киливнюк (Красноярск шаер понна бызьылэ).

Воргоронъёслэн командаязы озьы ик шедизы Александр Бессмертных, Сергей Устюгов, Артём Мальцев, Глеб Ретивых, Евгений Белов, Алексей Червоткин, Денис Спицов, Александр Терентьев, Иван Горбунов, Андрей Собакарёв, Иван Якимушкин, Александр Клюген, Илья Порошкин, Илья Семиков, Артём Николаев, Андрей Ларьков но Андрей Мельниченко. Ӵошатсконъёслэн радлыказы классика амалэн спринт но 15 иськеме бызьылонъёс (классика но эркын амалэн)

Нылкышноослэн командазы: Христина Мацокина, Алиса Жамбалова, Наталья Непряева, Яна Кирпиченко, Мария Истомина, Анна Грухвина, Анастасия Фалеева, Вероника Степанова, Анастасия Рыгалина но Татьяна Сорина. Программаын классика амалэн спринт но 10 иськеме бызьылонъёс (классика но эркын амалэн).

Тодэ вайытом, кылем сезонын Лилия Васильева Шундыӝужанпал Европалэсь Континентальной кубоксэ утӥз

10-тӥ шуркынмонэ Ханты-Мансийскын следж-хоккеен шудонъя Россилэн чемпионатэзлэн кыкетӥ люкетэз кутскиз. Ӵошатсконъёслэн нырысетӥ нуналазы «Удмуртия» Нижний Новгородысь «Торпедоез» 23:0 лыдын вормиз. Со сярысь элькунысь спортъя министерстволэн пресс-службаез ивортӥз.

Чемпионатэ тямыс командаос пырисько: «Удмуртия». Москва улосвылысь «Феникс», Ханты-Мансийскысь «Югра», Оренбургысь «Ястребы», Москваысь «Москва», Тула улосвылысь «Звезда», Челябинск улосвыллэн сборноез, Нижний Новгородысь «Торпедо».

Ӵошатсконъёс 17-тӥ шуркынмонозь мынозы, радлыксэс татысь учкыны луоз. Пумиськонъёсысь трансляциос нуо.

Тодэ вайытом, Россилэн чемпионатэзлэн нырысетӥ люкетэз 27 куарусёнэ – 6-тӥ коньывуонэ ортчиз. 21 очкоен нырысетӥ интыын «Феникс» мынэ, кыкетӥ интыын «Удмуртия» – 18 очко, куинетӥ интыын «Югра» – 15 очко.  

2022-тӥ арын тулыспалэ Сарапул ёросысь Сигаево черкогуртын ортчоно Спортъя XXVIII элькун тол гурт шудонъёслэн талисманзы Камушка луоз. Со сярысь, Сарапул ёрослэн тӧроез Игорь Асабин вылэ чӧлскыса, Удмуртиысь Спортъя дасяськонъя центрлэн пресс-службаез ивортӥз.

Та дыре Шудонъёсты сӥё-дано усьтон ужрадлэн концепциез дась ни, али видеосузьетэ Камушкаен люкетъёсты гожтон бордын ужало.

Озьы ик синпель кузьымъёслэн но усьтон ужрадэ пыриськисьёслы костюмъёслэн эскизъёссы дасесь ини. Али соосты лэсьтон бордын тыршо. Черкогуртысь шор карлудэз чебер карыны ӵектонъёс люкамын. Мерлыко удысысь ужъюртъёсты огвыллем чебертон эскизъёс дасян бордын ужало на. 

Али куасэн ворттылон трасса лэсьто, спорт объектъёсын тупатъян ужъёс нуо. 

Вуоно ужрад ёросмы туж пусйымон луэ, азьланяз трос ужмы на, но мон оскисько – вань пуктэм ужпумъёсмес быдэстом, Шудонъёсты умой ортчытом
Игорь Асабин, Сарапул ёрослэн тӧроез

Пусъём, Кам шурез возьматӥсь Камушка ӟуч чеберай 2016-тӥ арын гурт шудонъёслэн талисманэз луылӥз вал ини. Соку Сигаево черкогуртын ик Спортъя XXV элькун гужем гурт шудонъёс ортчизы.

Тодэ вайытом, 2021-тӥ арын элькун тол гурт шудонъёс Вавож ёросын ортчизы, нош гужем гурт шудонъёс – Грак ёросын. 2022-тӥ арын гужем ӵошатсконъёс Балезино ёросын ортчозы

Удмуртиын 2021-тӥ ар пумозь «Демография» йӧскалык ӵектос улсын физькультурая но тазалыкез кыдатонъя куинь огъетъёс усьтӥськозы. Со сярысь элькун тӧролэн но кивалтэтлэн пресс-службазы ивортӥз.

Одӥгез огъет инбам улын луоз но Можгаысь 10 номеро школалэн стадионаз интыяськоз. Мукетыз, озьы ик инбам улын, Ижкарысь 42 номеро школалэн стадионаз пуксёз. Нош куинетӥез, липет улын, Ижкарысь Ухтомский нимо урамысь 25-тӥ юрт дорын интыяськоз

Пусъём, 2021-тӥ арын калыклэсь тазалыксэ кыдатон но спортэз азинтон понна одӥг футбол бусы, ГТО куронъёсты сётыны куинь площадкаос, физкультурая но тазалыкез кыдатонъя огъет но инбам улын интыяськись кык огъетъёс лэсьтӥзы.

Футбол шудонъя олипи резервысь «Зенит-Ижевск» школаын футбол бусыез шунтӥсь сӧзнэт лэсьтӥзы. Али школалы тӥрлык басьтон бордын ужало.

Тодэ вайытом, 2021-тӥ арын Удмуртиын «Демография» йӧскалык ӵектос улсысь «Спорт – норма жизни» федерал ӵектосъя 50 метръем выль бассейнэз усьтӥзы. 

Глазкарын вордӥськем Елизавета Туктамышева Финляндиысь Эспоо карын фигурной нискыланъя Finlandia Trophy - 2021 калыккуспо турнирын азвесь медаль утӥз. Ӵошатсконъёс 10-тӥ коньывуонэ йылпумъяськизы.

Елизавета Туктамышева, вакчи но эркын программаоссэ быдэстыса, оглом 233,3 балл люказ

Нырысетӥ интые Россиысь ик Камила Валиева ӝутскиз (249,24 балл люказ), куинетӥ Алёна Косторная луиз (218,23 балл). Кыкназы ик ӵошатсконъёслы Этери Тутберидзелэн группаяз дасясько.

Пусъём, Алексей Мишинлэн дышетскисез Елизавета Туктамышева вакчи программа бере нырысетӥ интыын мынэ вал.

Тодэ вайытом, 2020-2021 ӵошатскон вакытэ Елизавета Туктамышева Швециын ортчем дуннелэн чемпионатаз кыкетӥ луиз. Нош Япониын командаен дуннелэн чемпионатаз зарни утӥз. 

Ижкарын следж-хоккеен шудонъя Россилэн чемпионатэзлэн нырысетӥ люкетэз – Виктор Кузнецовез буре ваён ӵошатскон йылпумъяськиз. Удмуртиысь спортсменъёс кыкетӥ инты басьтӥзы. Со сярысь элькунысь Спортъя дасяськонъя центрлэн «ВКонтакте» мерлыко вотэсысь огиназ ивортӥзы.

Ӵошатсконъёсы тямыс команда пыриськиз. «Удмуртия» команда сизьым пумиськонъёсыз пӧлысь куатяз вормиз, «Феникслы» гинэ келяз. 

«Удмуртия» - «Торпедо» 23:0
«Удмуртия» - Челябинск улосвыллэн сборноез 14:0
«Удмуртия» - «Югра» 3:0
«Удмуртия» - «Феникс» 1:4
«Удмуртия» - Москвалэн сборноез 7:1
«Удмуртия» - «Звезда» 7:1
«Удмуртия» - «Ястребы» 3:1

Ӵапак Москва улосвылысь команда нырысетӥ инты басьтӥз, куинетӥ интыын «Югра» клуб.

Россилэн чемпионатэзлэн кыкетӥ люкетэз 2021-тӥ арын шуркынмонэ Ханты-Манскийскын ортчоз. Ӵошатсконъёслы йылпумъянъёсъя кунлэн паралимпи сборнояз пырись спортсменъёслэн нимъёссы тодмо луозы. 

29-тӥ куарусёнысен 6-тӥ коньывуонозь Ижкарын следж-хоккеен шудонъя Россилэн чемпионатэзлэн нырысетӥ кругез ортчоз. Ӵошатсконъёс «Олимпиец» катокын (Удмуртской ульча, 222а) мынозы. Со сярысь Удмуртиысь Спортъя дасяськонъя центрлэн пресс-службаез ивортӥз.

Чемпионатэ тямыс команда пыриське: Москва улосвылысь «Феникс», Ханты-Мансийскысь «Югра», Оренбургысь «Ястребы», Москваысь «Москва», Тула улосвылысь «Звезда», Челябинск улосвыллэн сборноез, Нижний Новгородысь «Торпедо» но «Удмуртия».

Учкисьёс шудонъёсы дунтэк пырыны быгато, сьӧре одно ик эм маска кутоно. Ӵошатсконъёслэн радлыкенызы татын тодматскыны луэ.

Турнир Россиын следж-хоккейлы кутскон сётӥсез, Россиысь но Удмуртиысь дано тренерез Виктор Кузнецовез буре ваёнлы сӥземын

Тодэ вайытом, 2020/2021 сезонын «Удмуртия» команда куинетӥ инты басьтӥз. Зарни медальёс «Фениксын» шудӥсьёс утӥзы, азвесь – «Юграысь» спортсменъёс. 

Удмуртиысь Ринат Якупов паратхэквондоя усьтэм чемпионатын зарни медаль утӥз. Суй-пыдзыя сӧсыр спортсменъёс пӧлын ӵошатсконъёс 21-23 куарусёнэ Стамбулын (Турция) ортчизы. Со сярысь элькунысь Спортъя дасяськонъя центрлэн пресс-службаез ивортӥз.

Чемпионатлэн медальёсыыз понна 12 кунъёсысь 83 тхэквондистъёс пыриськизы.

Россилэн чемпионэз Ринат Якупов 56 килограммозь секталаем спортсменъёс пӧлын вормиз. Кыкетӥ инты Турциысь атлет басьтӥз, куинетӥ интыез Турциысь но Грузиысь спортсменъёс люкизы.

Тодэ вайытом, 2019-тӥ арын Ринат дуннелэн чемпионатаз броназ медаль утӥз, Европалэн чемпинатаз азвесь басьтӥз.

Наверх
Вниз