100 лет государственности Удмуртии
Ижкар+17 °C
4 -тӥ инвожо 2020 Покчиарня
16+

Выльдэм нылпи поликлиникаез усьтӥзы Ижкарын

  • 443
  • 0
Ижкар / Удмуртия
Выльдэм нылпи поликлиникаез усьтӥзы Ижкарын
Фото: Ульяна Колмогорова

Выльдэм нылпи поликлиникаез усьтӥзы Ижкарын 12-тӥ куарусёнэ. Со 7 номеро кар эмъяськоннилэн люкетэз луиз, интыяськемын Буммашевской ульчаысь 96 номеро юртын.

Кызьы верало артысь юртъёсын улӥсьёс но эмчиос, выль интыын ужаны умойгес луоз. Азьвыл вань кулэяськисьёсты кутон понна куинь сменаен ужано луэ вал.

«Мон малпасько, лэсьтӥськисьёслы «плюсэн ньыль» пуктыны луоз. Урод ӧвӧл лэсьтэмын», —  выльдэм юртэз учкыса вераз Удмуртилэн тӧроез Александр Соловьёв но пусйиз, али элькунлэн шоркараз та тужгес умоез поликлиника.

Фото: Ульяна Колмогорова

Выльдэм интыосын сюбег ӧръёсъя ӧнерчиос но ужалозы — пульмонолог, аллерголог, кардиолог, гинеколог, ЛОР-эмчи но педиатръёс. Вань функциональной диагностикая кабинет, паськытатэм лаборатория, электроэнцефолограф.

«Кык ар талэсь азьло ми та юртэз кузёезлэсь 30 миллион манетэн басьтӥмы. Эшшо 32 миллион манет кутэмын тупатъян ужъёсы но 8 миллион манет ужан тӥрлык басьтыны. Кӧняез ке тӥрлык пуктымтэ на, но матысь дыре ваньмыз ужалоз», — вераз элькунысь тазалыкез утёнъя министр Алексей Чуршин.

Фото: Ульяна Колмогорова

Таяз арын ик эмъяськонни бордын вож нуныослы йӧллэсь сиёнъёс лэсьтонъя кухня кылдоз.

Али эмъюрт борды 14 сюрслэсь трос нылпиос юнматэмын, со пӧлын одӥг аресозь 1 сюрс 100 покчиос. Тросэз пиналъёс «Столичный» микрорайонысь ветло. Эмъяськонни 17 участокъёсты чакла, соосын ужась ёзэс 90 процентлы тырмытэмын.



Наверх
Вниз