18-тӥ тулыспалысен Ижкарысь 7 номеро кар эмъюртлэн 5 номеро нылпи ваён юртаз коронавирусэн черламтэ нылкышноосты выльысь кутыны кутскизы. Со сярысь Удмуртиысь тазалыкез утёнъя министерстволэн пресс-службаез ивортӥз.
Палатаосын, пинал вордон висъетъёсын но мукет интыосын рос-прос дезинфекция ортчытӥзы.
5 номеро роддомлэсь оглюкетсэ выльысь азьвыл ужан ӧраз берыктон сярысь пумкылъян коронавирус инфекциен черлам секытэн нылкышноослэн лыдзы бадӟым ӧвӧлэн кутэмын вал. Ужан дырыз ӵоже оглом 417 кӧто кышномуртъёс эмъямын вал
Озьы ке но, эмъюртын коронавирусэн черлам кӧто нылкышноослы 15 интылы чаклам нимысьтыз ёзэт кельтӥзы ик. Отын соос эмъяськыны но нылпи вайыны быгатозы. Сое мукет этажъёслэсь висъязы, солэн нимаз пыронэз но пияны нимаз висъетъёсыз вань.
Тодэ вайытом, Ижкарысь 8 номеро кар эмъяськонни, Сарапулысь кар эмъяськонни но Воткаысь ёрос эмъяськонни азьвыл сямен ужан радлыке выжизы ини. Соос борды Ижысь 2 номеро кар эмъяськонни но итӥськиз.
Удмуртиысь тазаылкез утёнъя министерство ивортэмъя, элькунын коронавирусэн висисьёслы оглом 1 сюрс 411 койка кылёз. 18-тӥ тулыспаллы стационаръёсын ковидэн но пневмониен 949 адями кылле.