Ижкар+13 °C
13 -тӥ куартолэзь 2021 Покчиарня
18+

Ӝог эмъюрттэт сётон удысын 1 сюрс 400-лэсь трос ужасьёс ӧнер праздниксэс пусъё Удмуртиын

  • 747
  • 0
Ижкар / Удмуртия
Ӝог эмъюрттэт сётон удысын 1 сюрс 400-лэсь трос ужасьёс ӧнер праздниксэс пусъё Удмуртиын
Туспуктэм: Алексей Арзамасцев

28-тӥ оштолэзе Удмуртиысь ӝог эмъюрттэт сётон удысын 1 сюрс 400-лэсь трос ужасьёс ӧнер праздниксэс пусъё. Со сярысь тазалыкез утёнъя министерстволэн пресс-службаез ивортӥз.

Удмуртиысь тазалыкез утёнъя министр Георгий Щербак ӝог эмъюрттэт сётон службаын ужасьёс котьку но азьпал радын шуыса пусйиз. Соослэн ӝог, валаса но лад-лад ужаменызы пациентъёслэн тазалыксы гинэ ӧвӧл, улонзы но герӟаське.

Ми ӝог эмъюрттэт сётон службаенымы но татаын ужась адямиосын – эмчиосын, фельдшеръёсын, диспетчеръёсын, руль бергатӥсьёсын – данъяськиськом. Быгатонлыксы, калык понна сюлмаськись но котьку юрттыны дась луэмзы понна тау кариськом
Георгий Щербак, Удмуртиысь тазалыкез утёнъя министр

Туннэ нуналлы ӝог эмъюрттэт сётон удысын Ижкарын одӥг станция но элькунысь кар но ёрос эмъюртъёс бордын 23 ёзэтъёс ужало. Нуналлы быдэ калыклы 127 выездной бригадаос юрттэт сёто. Соос пӧлын огъя профилья эмчиослэн 56 бригадаоссы, огъя профилья фельдшеръёслэн 65 бригадаоссы, анестезиологияя но реанимацияя нимысьтыз бригада но педиатръёслэн вить бригадаоссы. 2020-тӥ арын коронавирусэн нюръяськон понна нимысьтыз 19 «COVID-бригадаос» кылдытӥзы.

Кылем ар ӵоже элькунысь ӝог эмъюрттэт сётон бригадаос ӧтёнъёсы оглом 461 сюрслэсь трос пол потазы

Удмуртиын ӝог эмъюрттэт сётонын 233 машинаос ужало. 43-ез соос пӧлысь 2020-тӥ арын вуизы. Машинаос дефибрилляторъёсын, кардиографъёсын, тыосты шокатӥсь аппаратъёсын, планшетъёсын но навигаци сӧзнэтъёсын тырмытэмын.

Ӝог эмъюрттэт сётӥсьёслэн ӧнер нуналазы Удмуртиын сӥё-дано ужрадъёс но концертъёс ортчозы, усто ужасьёслы кун но удысэт данъетъёс сётозы. Нош волонтёръёс Ижкарысь Шор площадьын флешмоб радъялозы, ӝог эмъюрттэт сётонлэсь пуссэ – горд киросэз пӧрмытозы.

Россын Ӝог эмъюрттэт сётон удысын ужасьлэсь нуналзэ Владимир Путинлэн кичӧлтэмезъя 2020-тӥ арын юнматӥзы

Удмуртиын ӝог эъмюрттэт сётонлэн историез 100 ар талэсь азьло, 1921-тӥ арын шуркынмонэ, кутскиз. Со понна карысь лазаретын одӥг висъет, ньыль эм юрттӥсьёс но одӥг вал повозка висъязы. Котькуд нуналлы дежурной эмчиез юнматылӥзы, солэсь нимзэ газетэ поттазы. 1922-тӥ арын Ижкарысь станциын ужасьёс 627 ӧтёнъёсы потаз. Нош карын со вакытэ 105 сюрс адями улэ вал. Ӝог эмъюрттэт сётон станцилэн нырысетӥ валтӥсь эмчиез Аркадий Иванович Соковнин луиз.

Нош Россиын ӝог эмъюрттэт сётон нырысетӥ каретаос 23 арлы вазьгес кылдӥзы, 1898-тӥ арын. Соку Москваын кык полиция участокъёс борды быдэн карета юнматӥзы. Эмчиослы нимаз висъет сётӥзы. Бригадаос полицейской сьӧры ӧтёнъёсы потазы, вӧсь луэмъёсты участоке вуттылӥзы. 

Тодэ вайытом, 2020-тӥ арын Ижкарысь ӝог эмъюрттэт сётонъя станцилэсь коллективзэ Удмуртилэн Данъян пул вылаз пыртӥзы.



Наверх
Вниз