100 лет государственности Удмуртии
Ижкар+17 °C
4 -тӥ инвожо 2020 Покчиарня
16+

Выль ФАП усьтӥзы Можга ёросын

  • 331
  • 0
Бальзяшур / Удмуртия
Выль ФАП усьтӥзы Можга ёросын
Туспуктэм: Удмуртиысь тӧролэн но кивалтэтлэн пресс-службазы

Туннэ, 14-тӥ шуркынмонэ, Можга ёросысь Бальзяшур гуртын выль фельдшер-акушер пунктэз усьтӥзы. ФАП «Гурт интывылъёсты ялан азинтон» программая пуктэмын, ивортэ Удмуртиысь тӧролэн но кивалтэтлэн пресс-службазы.

Фельдшер-акушер пунктэз пуктыны 4 миллион 400 сюрс манетэз федерал коньдэтысь висъязы. Со сяна, эм тӥрлык басьтыны улосвыл коньдэтысь 1 миллион манетлэсь трос кутӥзы. 

Бальзяшурысь выль ФАП-ез усьтон

6 фото
 

Выль эмъяськонниын Бальзяшурысь но бускель Акаршур гуртысь калык эмъяськоз. Ваньмыз 268 адями, 36-ез соос пӧлысь пиналъёс. Татын соос нырысетӥ эмъюрттэт басьтыны, тазалыксэс эскерыны,  прививкаос пуктылыны быгатозы. Фельдшер-акушер пунктын ваньмыз туала оборудование вань: вирысь холестеринэз мертан, дефибриллятор, электрокардиограф, ингалятор но мукетыз. Выль юртын фельдшер Клавдия Кузнецова ужалоз. 

Та ужрадэз ми туж кема возьмам. Таӵе выль ФАП сярысь ми малпаны но ӧм быгатэ. Вужаз эмъюртын кезьыт вал, нош татын вань условиос кылдытэмын
Клавдия Кузнецова, Бальзяшур гуртысь фельдшер

Эмъськонниез сӥё-дано усьтонэ Удмуртиысь кивалтэтлэн тӧроезлэн воштӥсез Анастасия Муталенко пыриськиз. Солэн кылъёсызъя, гуртын улӥсьёс понна та туж пусйымон ужрад. Бадӟым юрт, вӧл-вӧл но шуныт кабинетъёсын калыкез эмъян но эмчиослэн ужан луонлыкъёс быдэсак воштӥськозы. Фельдшер-акушер пунктын вань выль эмъян аппаратура, соин тросгес юрттӥськет сётыны луоз.

Калыклы интыосын эмъюрттэт сётон – гуртын улонэз умоятон понна одӥгез валтӥсез курон. Мон гуртоослы таза луыны но выль ФАП-ын эмъюрттэт басьтон умоен мед ортчоз шуыса сӥзисько
Анастасия Муталенко, Удмуртиысь кивалтэтлэн тӧроезлэн воштӥсез

Анастасия Муталенко верамъя, туннэ ик Сьӧлта ёросысь Удгурт (Уть-Сюмси) черкогуртын выль ФАП усьтӥзы. Талэсь азьвыл - Алнаш ёросысь Кузьымгуртын, Дэри ёросысь Лудорвай гуртын. Оглом 2018-тӥ арын элькунын 10 фельдшер-акушер пунктъёс пуктыны чакламын вал, со пӧлын Пичи Пурга ёросысь Норья черкогуртын. Вуоно арын Удмуртиын эшшо ог 20 ФАП пуктозы. Собере али ужась пунктъёсты выльдон борды басьтӥськозы

Тодэ вайытом, 2019-тӥ ар Удмуртиын Тазалыклэн арез ялэмын луыны быгатоз.



Наверх
Вниз