Нуналлы быдэ 8 тонна пала йӧл юо Удмуртиысь дышетскисьёс

  • 567
  • 0
Ижкар / Удмуртия
Нуналлы быдэ 8 тонна пала йӧл юо Удмуртиысь дышетскисьёс
Туспуктэм: Алексей Арзамасцев

Удмуртиысь школаосын дышетскисьёс «Школьное молоко» программая нуналлы быдэ 8 тонна пала йӧл юо. Со сярысь журналистъёслы «Здоров от коров» огъяросси вожвылъяськонын вормисьёсты пусъем бере элькунысь гурт возёсъя но сиён-юонъя министр Ольга Абрамова вераз.

Туннэ Удмуртиын одӥг адямилы чакласа 250 пала килограмм йӧл юиськом, со вакытэ ик поттӥськом – 500 килограмм. <…> Ми элькунамы йӧллэсь сиён-юонъёс поттӥськом, озьы пиналъёсмылы таза но ӟечлыко продукт вуттӥськом
Ольга Абрамова, Удмуртиысь гурт возёсъя но сиён-юонъя министр

«Школьное молоко» программаез улонэ пыӵатон понна арлы быдэ элькун коньдэтысь 120 миллион манет быдто. Удмуртия программае 15 ар ӵоже пыриське ини.

Удмуртилэсь коньдэтсэ эскерыку котьку ик программалэн кулэлыкез сярысь вераськиськом, малпаськиськом. Шуг-секытъёс шоры учкытэм, ми та программаез утим но утём
Анастасия Муталенко, Удмуртиысь кивалтэтлэн тӧроезлэн воштӥсез

Россиысь «Здоровье наших детей» огазеяськонлэн но «Школьное молоко» программалэн кивалтӥсез Ольга Панова Удмуртия программае кунамы нырысетӥосыз пӧлын пыриз шуыса пусйиз. Со сяна, йӧллэн ӟечлыкезъя но мындалаезъя элькунмы озьы ик азьветлӥсьёс пӧлын.

2019-тӥ арын программаез 18 улосвылъёс улонэ пыӵатӥзы. 2020-тӥ арын эшшо кык улосвылъёс итӥськозы. Программае пыриськисьёслэн радзы паськыта. Вожвылъяськонэ пыриськонъя но, нылпиосты визьноданъя но, йӧллэн ӟечлыкезъя но. Нош Удмуртия – нырысетӥез
Ольга Панова, Россиысь «Здоровье наших детей» огазеяськонлэн но «Школьное молоко» программалэн кивалтӥсез

Программалэн валтӥсь ужпумез – пиналъёсты таза сиськыны дышетон.

Со мултэс уз луы. Пӧсь сиён кулэ, но со умой нуназеян яке умой ӵуксиён. Со туж умой юрттэт
Светлана Болотникова, Удмуртиысь дышетонъя но тодосъя министр

Элькунысь каръёсын пиналъёс нуналлы быдэ йӧл но печення басьто, нош гуртъёсысь дышетскисьёсты пӧсь ӝукен, йӧлэн но пыжиськемен сюдо

«Школьное молоко» программа Удмуртиын 2005-тӥ арысен ужа. Отчы покчи классъёсын дышетскись 83 сюрс пала пиналъёс пырисько. Дышетскисьёсты сюдэм сяна, соос понна вожвылъяськонъёс но радъяло. Огез соос пӧлысь – «Здоров от коров» огъяросси мерлыко вожвылъяськон. Отчы программае 18 пыриськись улосвылъёсысь 15 сюрс пиналъёс пыриськизы. Соос «Как молоко помогает твоему здоровью?» видеороликъёс кылдытӥзы. 

 Удмуртиысь 67 команда вожвылъяськонэ пыриськиз

Йылпумъянъёсъя, улосвылысь вить классъёс жюрилэн ёзчиосызлэсь тужгес трос баллъёс басьтӥзы, нош кыксэ классэз радъясьёс таукаронъёсын пусйизы.

«Начальная школа» категориын нырысетӥ инты Глазкарысь 14 номеро гимназиысь нырысетӥ класс басьтӥз. Воткаысь 17 номеро школаысь нырысетӥ классэ ветлӥсьёслэн видеороликсы кыкетӥ луиз, нош куинетӥ интыез Воткаысь 10 номеро школаын но Ижкарысь 56 номеро гимназиын куинетӥ классын дышетскисьёс люкизы. Ижкарысь 20 номеро школаысь витетӥ но укмысэтӥ классъёсын дышетскисьёс «Старшая школа» категориын куинетӥ луизы. 

С сяна, нимысьтыз номинациосын Сарапулысь ляб тазалыко пиналъёслэн школа-интернатысьтызы но Балезиноысь нылпи юртысь дышетскисьёсты пусйизы. 

Ватсан

Нылпиослы «Здоров от коров» огъяросси мерлыко вожвылъяськон 2019-тӥ арын 25-тӥ куарусёнысен 15-тӥ толсурозь ортчиз. Сое нылпиослэсь, дышетӥсьёслэсь но анай-атайёслэсь школаын дышетскон аръёсы таза сиськонлы но тросгес йӧл юон пала саклыксэс кыскон понна радъязы.

Наши партнеры

Наверх
Вниз