Ижкар+26 °C
12 -тӥ пӧсьтолэзь 2020 Воскресенье
16+

Лемтэй мертчиськон нырысетӥ учырез пусйизы Удмуртиын

  • 277
  • 0
Ижкар / Удмуртия
Лемтэй мертчиськон нырысетӥ учырез пусйизы Удмуртиын
Туспуктэм: Алексей Арзамасцев

Удмуртиын адями борды лемтэй мертчиськон нырысетӥ учырез пусйизы. 23-тӥ южтолэзе нымы-кибыез эскерыны Роспотребнадзорлэн элькунъя управлениезлэн лабораторияз вайизы, ивортэ ужъюртлэн пресс-службаез.

Лемтэй Ижкарын улӥсь борды Вотка шоссе вӧзысь нюлэсын мертчиськиз. Энцефалитлэсь прививкаез нылкышнолэн ӧй вал.

Нымы-кибыез туннэ нуналлы эскеризы ини. Нокыӵе висёнъёсыз, соос пӧлын лемтэй боррелиоз но энцефалит, шараямын ӧвӧл

Роспотребнадзорысь ӧнерчиос лемтэйёс лымы шунаны кутскемен сайкало ини шуыса иворто. Соин валче нюлэсъёсы но паркъёсы ветлыку чакласькыны куро. Тазалыкез утьыны тужгес умоез амал – вакцинация.

Лемтэез утялтон понна улон интыя поликлиникае яке мукет травматологияя пунктэ вазиськоно. Нымы-кибылэн нюжнырез (хоботокез) медаз кыльы шуыса, туж чакласькыса поттоно. Кыскыку таӵе ӵектонъёсты чаклано:

  • лемтэез пинцетэн яке марляен бинялтэм чиньыосын ымызлы тужгес но матэтӥ пачкатоно но, мертчиськем интыезлы перпендикулярно возьыса, котыр бергатыса поттоно;
  • мертчиськем интыез 70 процентъем спиртэн, 5 процентъем йодэн яке одеколонэн ӵушылоно;
  • лемтэез поттэм бере киосты майталэн рос-прос миськоно;
  • сьӧд точка кылиз ке (лемтэйлэн йырыз яке нюжнырез), 5 процентъем йодэн ӵушылоно но ас кожаз потытозяз кельтоно.

Мугор вылысь басьтэм лемтэез Роспотребнадзорлэн элькунъя управлениысьтыз лабораторияз яке нымы-кибыосты эскерись мукет лабораториосы нуоно но одно ик эм юртъёсы вазиськоно.

Тодэ вайытом, туэ нырысетӥ лемтэйёсты тулыспалэ ик шедьтылӥзы вал ини. 



Наверх
Вниз