100 лет государственности Удмуртии
Ижкар+17 °C
5 -тӥ инвожо 2020 Удмуртарня
16+

Ижкарын ӝог эмъюрттэт сётӥсь бригадаослэн планшетъёссы луозы

  • 300
  • 0
Ижкар / Удмуртия
Ижкарын ӝог эмъюрттэт сётӥсь бригадаослэн планшетъёссы луозы
Фото: Григорий Фомин

Ижкарын ӝог эмъюрттэт сётӥсь машинаослэн матысь дыре планшет компьютеръёссы луозы. 18-тӥ гудырикошконэ со сярысь ивортӥз «Удмурт Элькунысь тазалыкез утёнъя министерстволэн ӝог эмъюрттэт сётонъя станциез» автоном ужъюртлэн валтӥсь эмчиез Олег Прузан.

«Котькуд бригадын планшет компьютер луоз. Али ми кӧняезлы ке гинэ сётӥськомы. Вань бригадаослы со техника басьтэмын. Со матысь толэзь ӵоже луоз», — вераз Олег Прузан.

Ижкарысь Ӝог эмъюрттэт сётонъя станцилэн валтӥсь эмчиез верамъя, туннэ уже кутӥськись сотовой герӟет котьку ик пайдалыко уг луы. Планшетъёслы но отчы пуктэм нимысьтыз программаослы луыса вань кулэ ивортодэтэз одӥг кнопкаез зӥбыса сётыны луоз. Сыӵе ӧтён телефон пыр жингыртэм сямен ик кутӥськоз. Планшет компьютерысь бригада адӟоз со ивортонэз, кудӥз диспетчеръёслэн мониторазы вань.

Фото: Григорий Фомин

Ӝог эмъюрттэт сётӥсь бригада висись доры вуэмлэсь азьвыл кӧня ке ужрадъёс быдэстӥсько. Автоматикаен ужась диспетчер ивортодэт сӧзнэт пыр жингыртон нырысь ик вуэ оперативной ёзэтэ. Ӧтёнъёсты кутӥсь но соосты бригадаослы сётӥсь диспетчеръёс 03 каналъёсъя вуись ивортодэтэз эскеро. Уй-нуналаз ӝог эмъюрттэт сётӥсь ёзэс 700 пала ӧтёнъёсты эскере, диспетчер пультэ кык поллы тросгес жингыртонъёс вуо. Ар ӵоже бригадаос 240 пала ӧтёнъёсты куто, мукет сямен вераса, Ижкарын но Дэри ёросын улӥсь котькуд куинетӥез адями доры потало.

Фото: Григорий Фомин

Эмчиосты ӧтён зэматӥське ке, «заказ» бригадаосты ыстӥсь диспетчеръёс доры кошке. Ӧтёнъёсты кутӥсь диспетчер карта вылын адӟе, кытысь вуиз жингыртон но кытын матысез эркын бригада, нош ыстӥсь диспетчеръёс быдэс карлэсь суредзэ адӟо.

«Соос адӟо, кытын ваньмыз бригадаос, соос адӟо вань ӧтёнъёсты, кытчы эмчиос ӧз вуылэ на. Озьы ик соослэн вань ивортодэтсы, кытчы ветлэмын ни. Соослэн бадӟым мониторазы быдэс карлэн картаез, отысь соос нимаз автомобилез шедьтыны яке ваньзэ та дыре ужась машинаосты учкыны быгато». — валэктӥз Олег Прузан.

Фото: Григорий Фомин

Автомобильёс мониторын пӧртэм буёлъёсын пусъемын; лызъёсыз висисез эмъяськонние нуо, вожъёсыз — ӧтёнъя мыно, ӵужъёсыз — спутникен герӟетэз ыштӥзы. Огъя суредэз учкыса, ыстӥсь диспетчер бригадаосын телефон пыр герӟаське. Планшетъёс кулэ со ужез ӝогомытон но герӟет урод луон дыръя ивортодэтэз ыштонлэсь утиськон понна.

Туала гаджетъёсын ужасьёс тодо, со ялан лэземын ке, аккумуляторез ӝог пуксе. Сыӵе учыръёсты палэнтон амал вань: планшетъёсты ӝог эмъюрттэт сётӥсь машинаын ик зарядкае пуктылозы.

Фото: Григорий Фомин



Наверх
Вниз