100 лет государственности Удмуртии
Ижкар+17 °C
5 -тӥ инвожо 2020 Удмуртарня
16+

Ёроскуспо хирурги центр усьтӥськиз Сарапулысь 1 номеро кар эмъяськонниын

  • 313
  • 0
Сарапул / Удмуртия
Ёроскуспо хирурги центр усьтӥськиз Сарапулысь 1 номеро кар эмъяськонниын
Фото: Григорий Фомин

Ёроскуспо хирурги центр усьтӥськиз Сарапулысь 1 номеро кар эмъяськонниын. Таяз толэзе гинэ выль центрын 120-лэсь трос операциос ортчытэмын, со быдэс кылем арынлэсь кык поллы тросгес, вераз иворъёсъя «Удмуртия» агентстволэн корреспондентэзлы эмъюртысь валтӥсь эмчи Елена Николаева.

Операциос лэсьтонъя 3 блокъёс ужало ни, эшшо одӥгзэ усьтыны дасясько. Ваньмаз Россиын но кунгож сьӧрын вылӥ технологиосъя кылдытэм тӥрлык пуктэмын. Со вылӥ быгатонлыкъёсын хирургъёсты уже кыскыны юрттӥз. Куд-огез соос Ижкарысь лыктӥзы.

Кылем арын, куке центр ӧй вал на, эмъюртын 2 гинэ хирургъёс ужазы, али — 9, соос пӧртэм ӧръёсъя операциос лэсьто.

Фото: Григорий Фомин

«Милям центрмы кылдытэмын, со азинскоз. Ми амбулаториын хирургияя юрттэт сётонъя центр но кылдытыны, ӧнерчиосты огазеяны малпаськомы. Ваньмызлы валамон мед луоз: пичи-а, бадӟым-а операция кулэ, адямилы мед луоз кытчы вазиськыны, ваньмыз, кинлы кулэ милям юрттэтмы, ӧнерчиосты утчаса медаз ветлэ — соос табере артэ. Со сяна, милям эмъюртмы, озьыен — хирурги центр борды но, вань матысь ёросъёсын улӥсьёс юнматэмын», - вераз Елена Николаева.

Эмъяськоннилэсь вуж юртсэ, кытчы интыяськиз выль центр, туала технологиосты но материалъёсты кутыса тупатъязы.

Фото: Григорий Фомин

Юртэз выльдыны элькун коньдэтысь 4 миллион манет котыр висъязы, со тӥрлыклэсь дунзэ лыдэ басьтытэк.

«Выльдэмын вал милям лабораторимы но. Басьтэмын но пуктэмын тужгес выль тӥрлыкъёс, со вылӥ ӟечлыко эскеронъёс ортчытыны луонлык сётэ. Сарапулын таӵе лабораториос ӧвӧл на, милям тужгес устоез», — вераз 1 номеро кар эмъяськонниысь лабораторилэн кивалтӥсез Светлана Мерзлякова.

Фото: Григорий Фомин

Пусъёмы, тазалыкез утён удысэз азинтон понна 2016-тӥ арлы элькунлэн коньдэтаз 11 миллиард манет чакламын. 2015-тӥ арен ӵошатыса, ватсаса коньдон висъямын вакцинаос басьтыны, «Земский доктор» программае тупатонъёс пыртэмын, йырсазез усыкмытӥсь суретъёсты кутӥсьёсты йӧназъянъя 3 центръёс кылдытыны коньдон пусъемын, эмъюрттэт сётонэз умоятон понна мукет расходъёс но чакламын.

26-тӥ гудырикошконэ Сарапулын тазалыко улон ужпумъёсъя форум ужаз. Отчы карын улӥсьёс, Удмуртиысь эмъюртъёсысь эмчиос но мукет ӧнерчиос пыриськизы.



Наверх
Вниз