Ижкар-11 °C
4 -тӥ толсур 2020 Удмуртарня
18+

Удмуртиын коронавирус сэрен ватсаса сюбегатонъёс кутӥзы

  • 92
  • 0
Ижкар / Удмуртия
Удмуртиын коронавирус сэрен ватсаса сюбегатонъёс кутӥзы
Туспуктэм: Руслан Нуриахметов

17-тӥ коньывуонысен Удмуртиын ялан кыстӥськись (хронической) висёнъёсын, паласькись кынман висёнлэн (ОРВИ) тодметъёсыныз, секытэн кышномуртъёс но 65 ареслэсь бадӟым адямиос понна астэ ачид нимаз висъян режим ялӥзы. Со сярысь элькун тӧролэн но кивалтэтлэн пресс-службазы ивортӥз.

Та группаосы шедись муртъёслы дорысьтызы потаны ӧвӧл лэземын, потыны луоз та учыръёсы гинэ:

- эмъюрттэтлы вазиськыны;

- ужан интые яке ужысь доре ветлыны (дистанционной ужан амалэ выжтэм, отпускын яке больничнойын дыръя сяна);

- дорысь вузкаронние, жуг-жаг куштыны, пуныосын калгыны, физкультураен но спортэн вырыны.

Огазеяськонъёслэн кивалтӥсьёссы ужасьёссэс дистанционной ужан амалэ выжтыны кулэ, ужан интые кылё со адямиос гинэ, кинтэк огазеяськонлэн ужан радэз азьланьтӥськыны уг быгаты.

Со сяна, уж сётӥсьёс ужан интые лэзьыны кулэ ӧвӧл ялан кыстӥськись висёнъёсын ужасьёсты, секытэн кышномуртъёсты, паласькись лек вирус инфекцилэн тодметъёсыныз адямиосты, 65 ареслэсь бадӟым муртъёсты. Соосты дистанционной амалэн ужанэ выжтонэз радъяны яке отпуске, яке соос понна ужантэм нуналъёс ялыны, но уждунэз кельытса.

Озьы ик огазеяськонъёс понна санитарной ужрадъёсъя куронъёс пусъемын:

- ужан интыосын бактерицидной лампаос, рециркуляторъёс луыны кулэ;

- ӧжытсэ вить нуналлы тырмымон дезинфекци суретъёс, нимаз утиськон арбериос луыны кулэ.

Астэ ачид нимаз висъян режиме потытэк быгато эм ужасьёс но предприятиослэн кивалтӥсьёссы, кин одно ик ужан интыяз луыны кулэ.

Калыкез нуись-ваись предприятиосъя:

- транспортын котькуд нунал дезинфекци ортчытъяны;

- ӧнерчиосты маскаостэк но мукет утиськон арбериостэк ужан интыязы ӧвӧл лэзёно;

- мер транспортэ но таксие утиськон арбериостэк пассажиръёсты ӧвӧл лэзёно

Улон юртъёсты эскерись огазеяськонъёс подъездъёсын, лифтъёсын но мукет интыосын ватсаса дезинфекци ортчытъяны кулэ.

Со сяна, дышетсконниосын ужасьёслэн кынман висёнлэн тодметъёсыз кылдыку, соослы коронавируслы эскеронъёсты ортчытонэз нырысетӥ радэ пыртӥзы.



Наверх
Вниз