Ижкар-7 °C
12 толсур 2018 Вирнунал
16+

Жуг-жагез поттон понна дунэз Удмуртиын адямилы быдэ пуктозы

  • 144
  • 0
Ижкар / Удмуртиын
Жуг-жагез поттон понна дунэз Удмуртиын адямилы быдэ пуктозы
Туспуктэм: Майя Бывальцева

2019-тӥ арын 1-тӥ толшорысен жуг-жагез поттон понна нимаз тыриськонъёс луозы. Удмуртиын дунэз адямилы быдэ пуктӥзы, ивортэ элькунысь Лэсьтӥськонъя, жилищно-коммунальной возёсъя но дыкужымъя министерстволэн пресс-службаез.

Азьвыл торос патеръем юртъёсын квадрат метр понна, нош нимаз коркаосын котькуд адями понна дун басьтыны ӵектӥзы вал. Но пӧртэм юалляськонъёс возьматӥзы, калык солы пумит луэ шуыса.

Ми ужась группа люкамы, отчы управляющий компаниослэн но мер огазеяськонъёслэн, патер кузёослэн эштосъёссылэн ыстэм муртъёссы пыризы. Лыдэ басьтӥмы мунципал кылдытэтъёслэсь веранъёссэс, соос озьы ик адямилэсь дун басьтон понна. Туннэ Огъяросси калык фронтлэн ёзчиосыныз пумиськылэм бере пумкылъян кутӥм, 2019-тӥ арын 1-тӥ толшорысен Удмурт Элькунын жуг-жагез поттон понна дун адямилы быдэ пуктэмын луыны кулэ шуыса. Со шонер но валамон
Дмитрий Сурнин, Удмуртиысь лэсьтӥськонъя, жилищно-коммунальной возёсъя но дыкужымъя министрлэн нырысетӥ воштӥсез

Вераны кулэ, вуоно арысен жуг-жаглэсь мозмытӥськон коммунальной юрттӥськетъёс пӧлы пыроз. Тарифе сое люкан, поттон, полигонын сое тазатон но согон ужъёс огазеямын.

Дмитрий Сурнинлэн кылъёсызъя, жуг-жаге поттон понна дунэз квадрат метр понна басьтон ужпумез вуоно арын выльысь эскерыны быгатозы. Но соку гинэ, куке калык валалоз, озьы тыриськон дунтэмгес луысал шуыса.

Тодэ вайытом, азьвылгес таӵе дунъёсты ӵектӥзы вал: трос патеръем коркаосын улӥсьёслы котькуд квадрат метр понна 7 манет 61 коньы но нимаз юртъёсын улӥсьёслы котькуд адямилэсь 135 манет. Солэсь азьвыл мукет лыдпусъёсты эскеризы: патерын квадрат метр понна 7 манет 54 коньы но нимаз юртъёсын адямилэсь 166 манет. Дмитрий Сурнин верамъя, выль тарифлэн лыдпусъёсыз 7-10 процентлы кулэсмыны быгатоз на. Дунлэсь быдӟалазэ улосвыл кивалтэт 20-тӥ толсурозь юнматыны кулэ.

Нялтас вераса, толсуре Удмуртиын улӥсьёс жуг-жагез поттон понна буш квитанциос басьтозы шуыса ивортӥзы вал.

Ватсалом, жуг-жаглэсь мозмытскон удысэ воштонъёс пыртэмен улосвылъёсын жагез переработать карон заводъёс пуктыны чакламын, со экологи кышкытлыкез палэнтыны юрттоз. 

Наши партнеры

Наверх
Вниз