Ижкар-12 °C
28 -тӥ тулыспал 2021 Воскресенье
18+

2020-тӥ арын Удмуртиын 566 адямиез куашкан калэ вуэм юртъёсысь выжтӥзы. Озьы оглом 8 сюрс 300 квадрат метр басьтӥсь 255 алама коркаосты бушатӥзы. Со сярысь элькун тӧролэн но кивалтэтлэн пресс-службазы ивортӥз.

Ужез «Жильё и городская среда» йӧскалык ӵектос улсын быдэстӥзы. Со элькунамы 2019-тӥ арысен ужа ини. Со дыр ӵоже 857 адями умой коркаосы выжиз, куашкан калэ вуэм оглом 12 сюрс 600 квадрат метр улон интыос бушазы.

2019-тӥ но 2020-тӥ арлы планъёсмы быдэстэмын, но куашкан калэ вуэм коркаосын улӥсьёсты выжтон ужпум паськыт но лэчыт сылэ на. 2017-тӥ арысь 1-тӥ толшорозь уродэн лыдъям юртъёсысь выжтэмез эшшо 5 сюрс 713 адямиос возьмало. 2021-тӥ арын 605 кузёослэн но мерлыко арендая улӥсьёслэн юанзы сэрттэмен-пертчемын луоз
Дмитрий Сурнин, Удмуртиысь лэсьтӥськонъя, жилищно-коммунальной возёсъя но дыкужымъя министр

Берпуметӥосыз пӧлы 14 муниципал кылдытэтъёсын улӥсьёс пырозы: Ижкарын, Воткаын, Сарапулын, Алнаш, Балезино, Вавож, Глаз, Грак, Дэри, Эгра, Каракулино, Кизнер, Красногорск, Сюмси ёросъёсын.

2021-тӥ ар ӵоже элькунамы куашкан калэ вуэм юртъёслэн лыдзы 10 сюрс 300 квадрат метрлы кулэсмыны кулэ

Министрлэн кылъёсызъя, ужъёс мыно ини. Туэ толшор ӵоже тямыс юртъёсын улӥсь 22 адямиез умой юртэ выжтӥзы. 

Тодэ вайытом, 2021-тӥ ар ӵоже элькунамы куашкан калэ вуэм 13 коркаосын улӥсьёсты выжтыны чаклало

Ижкарын лымыез утялтӥсь огазеяськонъёсты 1 миллион манет тыр штрафъёс улэ кыскизы. Со сярысь карлэн тӧроез Олег Бекмеметьев «ВКонтакте» мерлыко вотэсысь бамаз ивортӥз.

Мон мултэс чурыт амалъёс понна ӧвӧл, но татын штрафъёстэк уг луы. Арня ӵоже технадзоръя ёзэс 126 алонъёс сётӥз. Толсур ӵоже вань подрядчикъёс вылэ 1 миллион манет штрафъёс сётэмын
Олег Бекмеметьев, Ижкарлэн тӧроез

Солэн верамезъя, нырысь быдэстоно ужъёс пӧлын сюресэз пыдын выжон интыосты, транспорт дугдылонниосты сузян, сюбегам сюресъёсты паськытатон, сюрес урдсы люкам лымы гурезьёсты поттон.

Олег Бекмеметьевлэн кылъёсызъя, тол кутсконысен карысь 400 сюрс кубометр пала лымыез поттӥзы. Тудву кошконлы дасяськон улсын частной секторысь лымыез поттыны тулыспал шорысен кутскозы. Кылем тол ӵоже Ижысь 650 сюрс кубометр лымыез кар сьӧры келязы. 

2021-тӥ арын Ижкарысь куашкан калэ вуэм 13 коркаосын улӥсь 153 семьяосты выль интые выжтыны чаклало. Со сярысь Куашкан калэ вуэм коркаосын улӥсьёсты выжтонъя улосвыл программаез 2020-тӥ арын быдэсъянлы йылпумъянъёс лэсьтыку тодмо луиз, ивортэ Ижкар администрацилэн пресс-службаез.

Улосвыл программа 2019-2025 аръёслы чакламын но Росси азьмуртэн Владимир Путинэн кичӧлтэм «Жильё и городская среда» йӧскалык ӵектос улсын улонэ пыӵатӥське. Отчы Ижкарысь 110 коркаос пыризы, кудъёссэ 2017-тӥ арозь куашкан калэ вуэмен лыдъязы.

Со коркаосын улӥсьёс программа улсын выль улон инты яке улон интызэс воштыны коньдон басьтыны быгато

Пусъём, 2020-тӥ арын улон интыоссэс Ижкарысь 130 семьяос умоятӥзы. Программая оглом 4 сюрс 223 квадрат метр быдӟалаем вить коркаосын улӥсьёс выжтэмын вал. Со пӧлысь 29 семьяослы квартира сётӥзы, нош 101 семья выль улон инты басьтыны коньдон куриз. 

Тодэ вайытом, кылем арын быдэс Удмуртиын 326 адями куашкан калэ вуэм юртысьтыз ӟеч интые выжиз.

2021-тӥ арын, Гуртлэн араз, Удмуртиын ёросъёсысь трос квартираем 139 коркаосты тупатъялозы. Со сярысь элькун тӧролэн но кивалтэтлэн пресс-службазы ивортӥз.

Со 139 коркаос арлы чаклам лыдметэ пыртэм коркаослэн лыдзылэн 39,6 процентэз луо. Тужгес трос юртъёсты Камбарка (21), Дэри (17), Кез (13) но Ува (12) ёросъёсын тупатъялозы.

Тупатъям корка – со выль липет но, дугдылытэк ужась инженер коммуникациос но – электроезъёс, шуныт но ву сётон гумыос, фундаментэз куашканлэсь утись цокольёс но отмосткаос. Кылсярысь, кылем арын Удмуртиысь гурт ёросъёсын трсо квартираем 131 коркаос выльдэмын вал, нош фондлэн куать ар ӵоже ужатозяз – 500-лэсь трос коркаос
Диана Новомейская, Удмуртиысь трос квартираем коркаосты тупатъянъя фондлэн кивалтӥсез

Ёросъёсын трос квартираем коркаосты рос-прос тупатъян ужъёслы коньдон люкан 90 процент луэ, нош куд-ог интыосын элькунъя шоро-куспо лыдпусэз (91 процент) азьпалтэ но. Со тупатъян ужанрадлыке 30-лэсь трос процентсэ юртъёсты ёросъёсысь пыртыны луонлык сётэ.

Тодэ вайытом, 2021-тӥ арез Удмуртиын Гуртлэн ареныз ялӥзы. 

Удмуртиын 132 черкогуртъёсы, каргуртъёсы но гуртъёсы чагыр эстӥськон вуттозы. Элькунын газ сётонэз но газификациез азинтонъя 2021-2025 аръёслы чаклам программаез улосвыллэн тӧроез Александр Бречалво но «Газпром» огазеяськонлэн правлениезлэн кивалтӥсез Алексей Миллер кинюртӥзы. Со сярысь компанилэн пресс-службаез ивортӥз.

Гуртъёс куспын оглом 551 иськем газ гумыос кыскозы

132 гуртъёс Балезино, Вавож, Глаз, Грак, Дэбес, Дэри, Эгра, Кез, Красногорск, Сарапул, Сюмси но Шаркан ёросъёсын интыяськемын.

Со сяна, Ижкарын чагыр эстӥськонэз люкылон станциез выльдозы. Со Удмуртилэн шоркараз но Дэри ёросын улӥсьёслы тросгес газ висъяны но выль кулэяськисьёсты итыны луонлык сётоз.

Элькун кивалтэт гуртъёс пушкын гумыосты кысконэз, озьы ик 8 сюрс 300 коркаосты, 55 котельнойёсты но предприятиосты чагыр эстӥськонэз пыртонлы дасянэз радъялоз.

«Газпромлэн» 3 миллиард 995 миллион манет инвестициос висъялоз. 2016-2020 аръёсын ӵошатыса, со 2,6 поллы тросгес шуыса пусъемын.

2020-тӥ арысь 1-тӥ толшорлы Удмуртиын газификаци быдӟалаез 75 процент, со пӧлын каръёсын – 82,6 процент, гурт ёросъёсын – 67,2 процент.

Тодэ вайытом, 2020-тӥ арын элькунын 400 иськем пала газ гумыос кыскыны чакламын вал

Ижкарын эстӥськон вакыт кутскем дырысен 210 мерлыко юртъёсы шуныт лэзизы. Со сярысь 16-тӥ куарусёнэ шоркарлэн тӧроез Олег Бекмеметьев мерлыко вотэсъёсысь бамъёсаз меӵак эфирез дыръя вераз.

Нырысь ик ми мерлыко юртъёсты эстыны кутскиськом, но шуныт вань магистральёсъя но вань межквартальной тепловой сетьёсъя, вань юртъёс доры сётэмын
Олег Бекмеметьев, Ижкарлэн тӧроез

Туннэ нуналлы шуныт Ижкарысь 210 объектъёсы вуэ. Со пӧлысь 43-ез - школаос, 109-эз - нылпи садъёс но 22-ез - тазалыкез утён ужъюртъёс. Озьы ик эстӥськыны 13 улон коркаос кутскизы.

Тодэ вайытом, эстӥськон вакыт Ижкарын 14-тӥ куарусёнэ кутскиз.

Ижкарын шунтӥськон вакыт 14-тӥ куарусёнэ кутскоз. Туннэ нуналлы карысь юртъёс но ужъюртъёс 98 процентлы дась. Со сярысь Ижкар администрацилэн пресс-службаез ивортӥз.

Нырысь ик шунытэз нылпи садъёсы но школаосы лэзёзы. Улон коркаосы шуныт сётозы вить нунал ӵоже урамын шоро-куспо температура +8 градуслэсь вылӥе ӧз ӝуткаськы ке.

Ижкарлэн тӧроез Олег Бекмеметьев мерлыко ужъюртъёсы но улон коркаосы шунытэз люкетэн-люкетэн лэзёзы шуыса пусйиз. Со 7-14 нунал котыр кыстӥськоз.

Улӥсьёслэн куронъёссыя шунытэз вазьгес но сётыны быгатозы. Со понна управляющей компание вазиськоно.

Удмуртия 2020-2021 аръёсы эстӥськон вакытлы 97,1 процентлы дась. Со кылем арын та вакытлы ик лыдпусъёслэсь вылӥынгес луэ. Со сярысь элькун тӧролэн но кивалтэтлэн пресс-службазы ивортэ.

Каръёс пӧлын шуныт сётон вакытлы дась луэмезъя нырысетӥ интыын Глазкар луэ. Татын 99,9 процентлы ваньмыз дась. Сарапул 96,6 процентлы дась, Можга – 95,6 процентлы, Ижкар – 93,7 процентлы, Вотка – 91,1 процентлы.

Алнаш, Дэбес но Кияса ёросъёс эстӥськон вакытлы 100 процентлы дасесь. Соослэсь ӧжыт гинэ Кизнер, Сарапул, Ува но Кез ёросъёс бере кылё.

Та дыре 907 котельнойёсты, 245 ЦТП-осты но 2 сюрс иськем шуныт вуттӥсь гумыосты дасян ужъёсты йылпумъяло.

Удмуртиысь лэсьтӥськонъя, жилищно-коммунальной возёсъя но дыкужымъя министрлэн Дмитрий Сурнинлэн верамезъя, али Вотка ёросысь Новый каргуртлы но Дэриысь котельнойлы бадӟым саклык висъяло.

Новый каргуртысь кык нылпи садъёс шунтӥськон вакытлы дасесь ини. 9-тӥ куарусёнлы подрядчик школа юрт но Удмурт кун университетлэн филиалэз доры гумыос кыскон но опрессовка ужъёсты йылпумъялоз. Со вакытэ ик улон юртъёс доры гумыос кыскон ужъёс мыно. 15-тӥ куарусёнлы вань коркаос шуныт лэзьыны луонлык басьтыны кулэ
Дмитрий Сурнин, Удмуртиысь лэсьтӥськонъя, жилищно-коммунальной возёсъя но дыкужымъя министр

Дэриын выль модульной котельной пуктон ужъёсты йылпумъяло. Ужъюрт дась ини, ужан тӥрлык пуктэмын. Министрлэн кылъёсызъя, 15-20 куарусёнэ ужаны дась луэмзэ эскеронъёс кутскозы.

Пусъём, Удмуртиын толлы оглом 34 миллион 600 сюрс квадрат метр улон интыосты но 2 сюрс 927 мерлыко удысысь ужъюртъёсты дасяны кулэ.

Можга ёрос 2020-2021 аръёсы эстӥськон вакытлы 83 процентлы дась. Со сярысь «ВКонтакте» мерлыко вотэсысь бамаз ёрослэн тӧроез Александр Васильев ивортӥз.

Дышетон ужъюртъёс 100 процентлы дась, котельнойёс – 77 процентлы, шуныт но ву сётон сӧзнэт 73 процентлы, электрокужым, чагыр эстӥськон но ву кошкон сӧзнэтъёс 60-75 процентлы
Александр Васильев, Можга ёрослэн тӧроез

Та дыре Пычас черкогуртын кык модульной котельнойёс пукто. Огез черкогуртысь эмъюртэз шунтоз, мукетыз – Крезьгуръя нылпи школаез но трос патеръем коркаосты. Солы луыса шуныт сётӥсь гумыослэн кузьдалазы 900 метрлы кулэсмоз но эмъюртэз нимаз шунтыны луонлык кылдоз. Котельнойёсты туэ шуныт сётон вакытлы лэзёзы ни.   

Тодэ вайытом, Якшур-Бӧдья ёрос шунтӥськон вакытлы 80 процентлы дась.

Якшур-Бӧдья ёрос 2020-2021 аръёсы шунтӥськон вакытлы 80 процентлы дась. Со сярысь «ВКонтакте» мерлыко вотэсысь бамаз ёрослэн тӧроез Андрей Леконцев ивортӥз.

Ёросамы 40 пӧлысь 37-ез котельнойёс шунтӥськон вакытлы дасесь. Мукетъёсаз котельнойёсын контрольно-измерительной арбериосты пуктон ужъёс мыно
Андрей Леконцев, Якшур-Бӧдья ёрослэн тӧроез

Эгыр вуттон пумысен огкылъёс гожтӥзы, эстӥськон ваён радлык лэсьтӥзы. Андрей Леконцевлэн кылъёсызъя, туэ 10-тӥ куарусёнозь ёросэ арлы тырмыт луись 80 процентсэ эгырез вуттозы ини.

Нылпиослы ужъюртъёс эстӥськон вакытлы приёмкаез ортчизы. Ваньмыз ик ужъюртъёс дасесь. Ёросысь 17 дышетон юртъёс пӧлысь 15-ез дасесь, Лынга но Мукши школаосын рос-прос тупатъян ужъёс йылпумъясько
Андрей Леконцев, Якшур-Бӧдья ёрослэн тӧроез

Озьы ик эстӥськон вакытлы дасьлыксы сярысь ужкагазъёс ёросысь тазалыкез утён удысысь 29 ужъюртъёс басьтӥзы. Лулчеберет ужъюртъёс 76 процентлы дасесь. Тупатъян ужъёс Чур черкогуртысь но Ӵошкыт (Большие Ошворцы) гуртысь ивортодэтъя но лулчеберетъя гурт центръёсын мыно на. Мерлыко ужъюртъёс карантин ялэмен шутӥськон вакытлы дасяськыны берлогес кутскизы, но 1-тӥ куарусёнлы вань ужъёссэс йылпумъялозы шуыса оскыто. Трос патеръем коркаос толлы 63 процентлы дась.

Тодэ вайытом, Удмуртия эстӥськон вакытлы 70 процентлы дась

Удмуртия вуоно шунтӥськон вакытлы 70,2 процентлы дась. Со сярысь улосвыл тӧролэн но кивалтэтлэн пресс-службазы ивортэ.

Туннэ нуналлы тужгес умой дасьлыкез Глазкарлэн – 71 процент. Ижкар но Вотка 67 процентлы дась, Можга – 65 процентлы, Сарапул – 64 процентлы.

Ёросъёс пӧлын азьпалан Алнаш, со 93,2 процентлы дась. Собере Сарапул (82,1 процент) но Якшур-Бӧдья (78,6 процент) ёросъёс мыно.

Таяз арын толлы дасяськыны Удмуртилэн коньдэтысьтыз 200 миллион манет висяъзы. Кылем арын сярысь со кык поллы тросгес

Толлы дасяськонын нимысьтыз инты басьтэ резерв эстӥськонэз дасян. Та дыре эгыр чакламлэсь 11,8 процентлы тросгес дасямын ни, кизер эстӥськон – 2,7 процентлы. Нош пу кулэезлэсь 45 процентэз гинэ дасямын на. 

Новости

Вуоно толалтэ шунтӥськон вакытлы туннэ Удмуртия 45 процентлы дась. Со сярысь элькунысь лэсьтӥськонъя, жилищно-коммунальной возёсъя но дыкужымъя министр Дмитрий Сурнин толлы дасяськонъя удыскуспо ӧрилэн кенешоназ вераз, ивортэ улосвыл тӧролэн но кивалтэтлэн пресс-службазы.

Улон юртъёс толлы 55,3 процентлы дась, школаос, нылпи садъёс, эмъяськонниос, лулчеберет но спорт ужъюртъёс – шорлыдын 35 процентлы

Шунтӥськон вакытлы элькунын тазалыкез утён, лулчеберет, спорт но мерлык удысъёсысь 205 ужъюртъёсты дасяны кулэ.

Толлы дасяськыны Удмуртилэн коньдэтысьтыз 200 миллион манет висъязы, со кылем арынлэсь кык поллы тросгес. Коньдонэз муниципал кылдытэтъёслы сёто.

Резерв эстӥськон сярысь верано ке, эгыр та дырлы 10,6 процентлы чакламлэсь вылтӥ дасямын ни, кизер эстӥськон – 4,9 процентлы. Нош пу 2 сюрс тонна пала гинэ дасямын, нош кулэ 7 сюрс тонна.

Дмитрий Сурнинлэн верамезъя, таяз арын нимысьтыз саклык висъяло куинь котельнойёслы: Ижкарысь («МАН» огазеяськонлэсь котельнойзэ муниципал асъетэ басьтон ужпумез сэртто-пертчо), Дэриын но Вотка ёросысь Новый каргуртын.

Дэриын котельноез лэсьтон ужъёсты 5-тӥ гудырикошконозь йылпумъяны кулэ, Новый каргуртын – 10-тӥ гудырикошконозь. 

Удмуртиын жуг-жагез поттон понна тарифъёс воштӥськытэк кылёзы. Сыӵе пумкылъян 2-тӥ пӧсьтолэзе элькунысь лэсьтӥськонъя, жилищно-коммунальной возёсъя но дыкужымъя министерстволэн тарифъёсты радъянъя ӧрилэн кенешоназы кутӥзы, ивортэ улосвыл тӧролэн но кивалтэтлэн пресс-службазы.

Удмуртиын жуг-жагез поттон понна дунъёс уз воштӥське

Таяз арын тарифе 3 сюрс 150 контейнеръёс басьтыны коньдон пыртэмын, со пӧлысь 2 сюрс 800-эз суро жагез люканы, 350-эз – нимаз люкан понна. Ужпум быдэстэмын ни.

Ватсалом, 2020-тӥ арын куать толэзь ӵоже элькунын 158 сюрс тонна жуг-жагез поттӥзы. Кылем арысь та вакытэн ик ӵошатыса, со 7 процентлы тросгес. Куиньмос люкетсэ люкам жагез переработкае келязы.

Пусъём, Росси азьмуртэн Владимир Путинэн кичӧлтэм «Экология» йӧскалык ӵектос улсын 2020-тӥ арын элькунысь 15 ёросъёсын 50 свалкаосты быдтозы.

Тодэ вайытом, 1-тӥ пӧсьтолэзьысен Удмуртиын коммунальной тыриськонъёс шорлыдын 4 процентлы будӥзы

2020-тӥ арын 1-тӥ пӧсьтолэзьысен Удмуртиын, Ижкарын но Глазкарын сяна, коммунальной тыриськонъёс шорлыдын 4 процентлы йылӥзы. Со сярысь элькунысь лэсьтӥськонъя, жилищно-коммунальной возёсъя но дыкужымъя министерстволэн пресс-службаез ивортэ.

Глазкарын тыриськонъёс 11,4 процентлы йылыны кулэ вал ке, коньдэтысь 15 миллион 700 сюрс манет висъямлы луыса, 6 процентлы будозы. Воштӥськонъёс государственно-частной партнёрство улсын кезьыт ву сётон сӧзнэтэз но ву кошкон гумыосты лэсьтон но выльдон ужъёсын герӟаськемын.

Карысь ву гумыос но канализация кылем даурын лэсьтэмын ай. Соослэн ужан дырзы – 25 ар, нош куд-огез кык поллы солэсь кемагес уже кутӥсько ини. Гумыос 70-100 процентлы пӧсьтэмын ини. Соин ик соос ӝегатскытэк воштэмез кулэ каро.

Ижкарын тыриськонъёссы тужгес трослы будозы счётчикъёс пуктымтэ коркаосын улӥсьёслэн. Кылсярысь, 32,6 квадрат метръем одӥг висъето квартираын улӥсь вить адямилэсь семьялэн тыриськонэз 652 манет 71 коньылы йылоз. Та категорие 80 адями гинэ шеде. Мукетъёсызлэн тыриськонъёссы счётчикъёссы бергатэм бордысь потозы но трослы ӧжытгес луозы.

Ижкарын государственно-частной партнёрство улсын муниципал ваньбуре пырись шуныт вуттон сӧзнэтэз выльдозы, озьы ик «Ижводоканал» муниципал предприятилэсь инвестициосъя программазэ улонэ пыӵатозы.

Озьы, та толэзьысен электрокужымлы тырӥськонъёс йылозы (час ӵоже киловатт понна):

  • гурт калыклы – 2 манет 67 коньыысь 2 манет 78 коньыозь (11 коньылы будоз):
  • карын улӥсьёслы – 3 манет 82 коньыысь 3 манет 97 коньыозь (15 коньылы).

Электрокужымлы тарифлэн быдӟалаезъя Удмуртия Приволжск федерал округын ньылетӥ инты басьтэ. Аьмелэсь тросгес Киров, Самара улосвылъёсын но Пермь шаерын тырисько.

Ву сётон но ву кошкон понна тыриськонъёс воштӥськозы (кубометрез понна):

  • ву сётон понна – 19 манет 97 коньыысь 25 манет 96 коньыозь (5 манет 99 коньылы);
  • ву кошкон понна – 14 манет 44 коньыысь 18 манет 77 коньыозь (4 манет 33 коньылы).

Шунытлы

Читать полностью

Куашкан калэ вуэм юртъёсын улӥсьёсты выжтон понна жилищно-коммунальной удысэз выльдыны юрттонъя фондысь Удмуртие 41 миллион манет вуиз. Со сярысь элькунлэн тӧроез Александр Бречалов «ВКонтакте» мерлыко вотэсысь бамаз ивортӥз.

Калыкез выль юртъёсы выжтонъя программа «Жильё и городская среда» йӧскалык ӵектос улсын быдэсъяське.

Кылем арын ми куашкан калэ вуэм оглом 5 сюрс 300 квадрат метр улон интыосын улӥсьёсты выжтыны быгатӥм – 352 адями выль юрт басьтӥз. Программалэсь I люкетсэ быдэстӥзы: Глазкар, Вотка, Сарапул но Кизнер ёрос. Глазкар 2017-тӥ арысь 1-тӥ толшорозь куашкан калэ вуэмен лыдъям юртъёсын вань улӥсьёсты выжтӥз
Александр Бречалов, Удмуртилэн тӧроез

Туэ алама юртъёсын улӥсьёсты выжтонъя улосвыл программалэн II люкетэз кутскиз. Отчы вить муниципал кылдытэтъёс пырисько: Ижкар, Вотка кар, Алнаш, Дэри, Кизнер ёросъёс. Кык ар ӵоже оглом 9 сюрс пала квадрат метр юртъёсын улӥсь 624 адямилы выль улон инты сётыны кулэ.

Элькунысь лэсьтӥськонъя министерствоын ватсазы, вуэм коньдон - со нырысетӥез транш таяз арын. 

Туннэ, 6-тӥ куартолэзе, Ижкарын шуныт сётон вакыт йылпумъяськиз. Со сярысь 5-тӥ куартолэзе карлэн тӧроез Олег Бекмеметьев «ВКонтакте» мерлыко вотэсысь бамаз ивортӥз.

Тодэ вайыто, катъя со омырын шоро-куспо температура +8 градуслэсь вылӥын юнматскем бере куатетӥ нуналаз йылпумъямын луыны быгатэ. Со нунал ӵуказе вуэ. Соин ик ми 6-тӥ куартолэзе со сярысь ужкагаз поттом
Олег Бекмеметьев, Ижкарлэн тӧроез

Пусъём, 30 пала трос патеръем коркаосын шуныт сётон вакыт азьвылгес йылпумъяськиз ини. Сыӵе пумкылъян отын улӥсьёс кутӥзы.

Туэ шуныт сётӥсь 10 пунктъёсты выльдозы, 36,5 иськем гумыосты воштозы. Карысь шуныт сётон сӧзнэтэ 516 миллион манет понозы.

Тодэ вайытом, озьы ик 6-тӥ куартолэзе Ижкарын шуныт сётон сӧзнэтэз эскеронъёс кутскозы. Пӧсь вуэз 12-тӥ куартолэзьысен кысылозы. 

6-тӥ куартолэзьысен 15-тӥ гудырикошконозь Ижкарын  «Удмуртские коммунальные системы» огазеяськон шуныт сётон сӧзнэтэз эскеронъёсты ортчытоз. Со сярысь кар администрацилэн пресс-службаез ивортэ.

Магистральной гумыосты эскеронэз 29 люкетэн ортчытыны чаклало. Со гумыосты пичи люкетъёсын чакланы но шекъёсты дыраз шараяны но палэнтыны, пӧсь вуэз улон юртъёсы ӝоггес лэзьыны луонлык сётэ

6-тӥ куартолэзьысен Удмуртской урамысь (Северной пролка дорысен Киров нимо урамозь) магистральной гумыез эскерыны кутскозы. Трос патеръем коркаосын улӥсьёслэсь шунытсэс но пӧсь вузэс уж кысылэ.

12-тӥ куартолэзьысен эскеронлэн кыкетӥ люкетэз кутскоз. Соку ини пӧсь вуэз кысоно луозы.

Эскеронъёслэн радлыкенызы чӧлсконпусъя потыса тодматскыны луэ.

Тодэ вайытом, «Бадӟым утялскон» улсын Удмуртиын 165 адямиез уже интыязы

5-тӥ тулыспалэ потон уе Ижкарысь ульчаосысь 12 сюрс кубометр пала лымы поттӥзы. Со сярысь кар администрацилэн пресс-службаез ивортэ.

Та арня кутсконын Ижкарын кужмо лымыямен валче сюресчиос кар ульчаосысь 20 сюрс кубометрлэсь трос лымы поттӥзы. Тужгес трос лымы – 12 сюрс кубометр пала – пуксёнысь вирнуналэ потон уе поттэмын вал
Ижкар администрацилэн пресс-службаез

Вордӥськонэ, 3-тӥ тулыспалэ, тужгес трос лымы усиз. Та толэзь ӵоже шорлыдын 21 миллиметр мында лымыя ке, туэ одӥг уй-нуналскын 7 миллиметр ӝоктӥз

5-тӥ тулыспалэ лымыез поттон, озьы ик тротуаръёсты но пыдын ветлон интыосты сузян, машинаос ветлон сюресъёсты паськытатон, йӧвалеген нюръяськон суретъёсты пазян ужъёсты азьланьтозы. 

Сюресчиослэн ужамзылэн ӟечлыкез тӥледлы уг ке кельшы, 072 (мобильной телефонысь 998-072) номере жингыртыны быгатӥськоды. 

2020-тӥ арын Удмуртиын жуг-жаг люкан интыосты ворсан но тазатон ужъёсты кутскозы. 26-тӥ толсуре Россиысь инкуазез утёнъя министерство но элькун кивалтэт «Экология» йӧскалык ӵектослэн «Чылкыт кун» федерал ӵектосэз улсын коньдон висъян сярысь тупанкыл гожтӥзы. Со сярысь улосвыл тӧролэн но кивалтэтлэн пресс-службазы ивортэ.

Юнматэм тупанкылъя Удмуртия жаг люкан интыосты тазатыны вуоно арын 75 миллион манет висъялоз. Со пӧлысь 60 миллионэз – федерал уксё. Свалкаосты тазатон – со кылем-мылемъёсын ужанын шоры чылкак мукет ямен учкон
Александр Бречалов, Удмуртилэн тӧроез

Улосвыл тӧро пусйиз, сыӵе ужрадъёс экологиез умоято но инкуазьлы ыштонъёсты кулэсто. Со сяна, азьланяз музъемез мукет кулэяськонъёслы кутыны луонлык сёто.

Та дыре Удмуртиын жуг-жаг люкан интыосты быдтон ужез элькун коньдэт чотын улосвыл оператор нуэ, но со вылзэ гинэ утялтэ. Росси азьмуртэн Владимир Путинэн кичӧлтэм ӵектос улсын свалкаос улысь музъемез тазатон (рекультвация) кутскоз. Таяз арын оглом 3 гектарлэсь трос вить свалкаосты утялтыны ужкагазъёс дасязы, соос экологи ласянь эскеронъёс пыр потӥзы.

Тодэ вайытом, 2019-тӥ ар кутсконлы Удмуртиын лэзьымтэ интые жаг люкан интыос 481 мында пусъемын вал. Оглом 394 гектар вылын нырысь-валысь чотанъёсъя 1 миллион 400 сюрс тонна жуг-жаг люкамын. Та ар ӵоже 73 свалкаосты быдтӥзы ни. Элькунысь ёросъёсын инкуазьлы ыштонъёсты палэнтон понна вуоно арлы улосвыл коньдэтын 37 миллион манет чакламын. 

25-тӥ толсуре Удмуртиын жилищно-коммунальной возёсэз шуныт сётон вакытлы дасянъя элькун вожвылъяськонын вормисьёсты шараязы. Со сярысь улосвылысь лэсьтӥськонъя, жилищно-коммунальной возёсъя но дыкужымъя министр Дмитрий Сурнин «Фейсбукысь» бамаз ивортӥз.

Куронъёс туж чурытэсь вал, 25 ӧръёсъя, соос пӧлын дасяськонлы висъям коньдонэз уже кутон, дасьлыкъя ужкагазъёсты но паспортъёсты басьтон, эстӥськон запасъёсты кылдытон но жилищно-коммунальной юрттӥськет понна тыриськонъёсты люка*
Дмитрий Сурнин, Удмуртиысь лэсьтӥськонъя, жилищно-коммунальной возёсъя но дыкужымъя министр

Озьы каръёс пӧлын нырысетӥ инты Ижкар басьтӥз, кыкетӥ – Глазкар.

Ёросъёс пӧлын Ува ёрос вормиз, кыкетӥ интыын – Сьӧлта ёрос, куинетӥ – Сарапул ёрос.

Вормисьёслы техника басьтыны субсидиос сётозы

Тодэ вайытом, Удмуртиысь ваньмыз муниципал кылдытэтъёс толалтэ шуныт сётон вакытлы дасьлыкъя паспортъёс 15-тӥ шуркынмонлы басьтӥзы. Нырысетӥосыз пӧлын Вотка но Алнаш ёросъёс вал.

Наверх
Вниз