100 лет государственности Удмуртии
Ижкар+12 °C
1 -тӥ инвожо 2020 Вордӥськон
16+

Удмуртилэн тӧроезлэсь ужзэ огдырлы быдэсъясь Александр Бречалов Кам выж вылтӥ потон дун пумысен ВТБ-лэн кивалтӥсеныз вераськыны малпа. Кивалтӥсь со сярысь журналистъёслы вераз 7-тӥ оштолэзе Сарапул ёросэ вуылыкуз.

Солэн кылъёсызъя, выжез усьтон дыр ӧз воштӥськы — со 2017-тӥ арын 17-тӥ пӧсьтолэзе луоз.

Милям юанъёсмы вань, но соос сокем бадӟымесь ӧвӧл. Соин ик али шугъяськонъёсты ум адӟиське шуом. Отын вань бадӟым, шуом озьы, оло, ужпум но ӧвӧл, юан — азьланяз выж вылтӥ потон понна дун. Но малпасько, матысь дыре ми ВТБ-лэн кивалтӥсеныз Костинэн (Андрей Костин — ВТБ-лэн президентэз — правленилэн кивалтӥсез — ред.), ужъюлтошъёсын пумиськом но со юанэз сэрттом-пертчом
Александр Бречалов

Бречалов озьы ик пусйиз, дунлэсь тужгес вылӥ быдӟалазэ тыриськон дунэз сямен верыны кулэ ӧвӧл. Озьы ик кивалтӥсь вераз, оглом «туж умой элькун но, федерация но таӵе ӵектосэз быдэстэ» шуыса.

«Выжез 17-тӥ пӧсьтолэзе усьтон — со кутсконэз гинэ. Нош сое тырмытон, ужатон, со концессионерлы но ыштон медаз луы, кызьы асьмелэн ӵем луылэ, — тӥни со валче уж ни», — вераз со.

Али выж дорын дун тырон пунктъёсты лэсьтон уж азьланьтӥське. Чакланъёсъя, соосты эскерон вылысь куартолэзе усьтозы. Дун уз басьтэ.

ВАТСАН

2016-тӥ арын Удмуртиын Кам шур вамен потон понна дунлэсь тужгес вылӥ быдӟалазэ юнматӥзы: пичи машинаен потон 340 манет усёз, нош Буй вамен — 187, шор секталаем машинаос понна — 679 но 357, бадӟым машинаослы (кык осен) но автобусъёслы — 1 189 но 611, прицепен грузовикъёслы (куинь но солэсь трос осен) — 1 528 но 781 манет.

Удмуртилэн тӧроезлэсь ужзээ огдырлы быдэсъясь Александр Бречалов  7-тӥ оштолэзе Симониха каргуртын улӥсьёсын пумиськиз. Интыысен со сярысь ивортэ «Удмуртия» агентстволэн корреспондентэз.

Симониха Сарапуллэн люкетэныз лыдъяське. Но уж вылын каргурт висъяськыса кыле. Матысь Ершовка гурт дорозь 6 иськем сюрес тудву кошкон вакытэ воксё быре. Отын улӥсьёс калыке потыны быгато катерен, теплоходэн яке чугун сюрес транспортэн гинэ. Каргуртын ФАП-сы но, чагыр эстӥськонзы но, ву кошкон гумыоссы но ӧвӧл, электрокужым дырын-дырын ышылэ. Та дыре отын 109 адями пусъемын. Но баракъёсын, куд-огез соос пӧлысь куашкан калэ вуэмен лыдъямын ини, 33 адями улэ.

Фото: Григорий Фомин
Баракъёсын, куд-огъёсыз соос пӧлысь куашкан калэ вуэмен лыдъямын ини, 33 адями улэ                  Фото: Григорий Фомин © udmurt.media

Улосвыл кивалтӥсь улэм-вылэмзэс чаклаз но калыклэн юанъёсызлы валэктонъёс сётӥз. Солэн кылъёсызъя, транспорт висъян, сиён-юон вуттон но эмъюрттэт сётон сярысь юанъёс матысь дыре сэрттӥськозы-пертчиськозы. Бречалов нимысьтыз пусйиз, вуттэм вузъёслы дунъёс Сарапулысь лавкаосысь дунъёслэсь вылӥын луыны кулэ ӧвӧл шуыса.

Каргуртын улӥсьёсын юристъёс ужаны кутскозы. Соос азьланяз мукет юртэ улыны выжыны кулэ луись ужкагазъёс бичаны юрттозы.

Улон интызэс умоятыны кулэяськисьёслэн лыдметазы 2017-тӥ арын 1-тӥ оштолэзьлы вить семья пусъемын.

Удмуртиысь тӧролэн но кивалтэтлэн администрацизылэн кивалтӥсез луиз Сергей Смирнов. Со сярысь туннэ, 7-тӥ оштолэзе, ивортӥз улосвыл тӧролэсь ужзэ огдырлы быдэсъясь Александр Бречалов.

2016-тӥ арын куарусёнысен Сергей Смирнов Россилэн азьмуртэзлэн пуш политикая управлениезлэн кивалтӥсезлэн Федерал собраниен кусып возён понна кылкутонэн воштӥсез вал. Солэсь азьвыл Россиысь Мер палаталэн аппаратэныз кивалтӥз.

Тодэ вайытом, солэсь азьвыл Удмуртиысь тӧролэн но кивалтэтлэн администрацизылэн кивалтӥсезлэсь ужзэ огдырлы быдэсъясь вал Сергей Бурнышев. Со интыужысь ас мылкыд каремезъя Андрей Гальцинэз воштӥз.

Фото: Григорий Фомин
7-тӥ оштолэзе Александр Бречалов Сарапул но Камбарка ёросэн тодматскыны потӥз Фото: Григорий Фомин © udmurt.media

Александр Бречалов Удмуртилэн тӧроезлэсь ужзэ огдырлы быдэсъясе юнматэмын Росси азьмуртлэн Владимир Путинлэн пуктэтэныз 4-тӥ оштолэзе.

6-тӥ оштолэзе Бречалов улосвыл кивалтэтэз отставкае келян сярысь пуктэтэз юнматӥз. Удмуртилэсь тӧрозэ 2017-тӥ арын куарусёнэ бырйытозь, кивалтэтлэн ваньмыз ёзчиосыз ужез быдэсъясь ватсэтэн ужалозы. Сергей Смирнов озьы ик ужез быдэсъясь луэ.

ВАТСАН

Сергей Витальевич Смирнов вордӥськиз 1978-тӥ арын 2-тӥ куартолэзе. 
Школаез йылпумъяса, ФСБ-лэн Москваысь кунгожчиосты дасясь институтаз «юриспруденция» ӧнеръя дышетскыны пыриз. 
2000-тӥ арысен Москваысь Лианозово ёросын депутатэ бырйиськылӥз. 
2004-2005 аръёсы – «Спортивная Россия» мер огазеяськонлэн ёзэтэзлэн кивалтӥсез. 
2007-тӥ арын «Молодая Гвардия Единой России» огазеяськонлэн ёзчиез луиз.  
2007-тӥ арын ик Москваысь Кар дума бордын ужась Егитъёслэн палатаязы пыриз но спортъя, мугорез кыдатонъя но туризмъя секцилэн кивалтӥсезлэн воштӥсез луиз.  
2011-тӥ арын Москваысь Егитъёслэн но семьяослэн политиказыя департаментын «Молодые Москвичи» центрлэн кивалтӥсезлэн воштӥсез интые юнматӥзы.  
2013-тӥ арын Москваысь Новомосковской но Троицкой административной округъёсын Егитъёслэн но семьяослэн политиказыя департаментэн
Читать полностью

Удмуртилэн тӧроезлэсь ужзэ огдырлы быдэсъясь Александр Бречалов элькунлэсь кивалтэтсэ кошкытӥз. Пуктэтэз со 5-тӥ оштолэзе кинюртӥз. Ужкагаз улосвыл кивалтэтлэн нимлыко сайтаз шараямын.

Удмуртилэсь тӧрозэ 2017-тӥ арын куарусёнэ бырйытозь кивалтэтлэн вань ёзчиосыз, со пӧлын министръёс, ужез быдэсъясь ватсэтэн ужалозы.

«Удмурт Элькунысь Кивалтэт ужзэ азьланьтыны кулэ Удмурт Элькунлэсь выль Кивалтэтсэ кылдытытозь», — верамын ужкагазын.

Пуктэт кужымаз пыриз сое юнматэм нуналысен.

Александр Бречаловез Удмуртилэн тӧроезлэсь ужзэ быдэсъясе юнматӥзы 4-тӥ оштолэзе Росси азьмуртлэн Владимир Путинлэн пуктэтэзъя. Элькунысь кивалтэтэз, депутатъёсты, кар но ёрос кивалтӥсьёсты соин тодматон толон ортчиз.

Удмуртилэн тӧроезлэсь ужзэ огдырлы быдэсъясь Александр Бречалов ужан командазэ Москваысь вайыны уг малпа шуыса вераз. Со сое татын, элькунамы кылдытоз.

«Улон сюресме учкиды ке — мон адямиосты сьӧрам уг нуллӥськы», — вераз со туннэ журналистъёслы но пусйиз: «Мон оскисько, татын ӧнерлыко адямиос ужало шуыса, татын ужасьёсъя луонлык туж вылӥын ».

Со оскытӥз, «ужаны кулэ тужгес устоосыз адямиос», «пайдалыкоосыз» инъет-малпанъя тыршоз шуыса.

Кивалтэтын али ужась котькуд адямиен ми ужалом <…> Соин ик, бен, мон туж оскисько, татын мынам ӧнерлыко командае кылдоз шуыса
Александр Бречалов

Туннэ, 5-тӥ оштолэзе, Удмуртилэн тӧроезлэсь ужъёссэ огдырлы быдэсъясь Александр Бречалов элькунын улӥсьёсын кенешыса ужалоз шуыса оскытӥз.

«Мон малпамъя, тӧрлык, уката ик улосысь, быдэсак усьтэмын луыны кулэ, ӵапак озьы луоз шуыса мон тӥледыз оскытӥсько», — пусйиз со.

«Асьмеос ӵошен мер эскеронэз но нуом, шуг-секытъёсты но валаны тыршом, котькыӵе секытэсь соос мед луозы, туннэ нуналлы, оло, сэрттымон-пертчымон луымтэесь ке но. Нош согон но ватон, яке воксё кыӵе ке ужлэсь палэнтӥськыны амалъёс малпан, яке пӧяськон — сыӵеез уз луы. Элькунын улӥсьёслэн вань эрикрадзы соосын зэмлыко вераськозы но шуг-секытъёссэс сэрттыны-пертчыны тыршозы шуыса возьманы», — шуиз журналистъёслы элькун тӧролэсь ужзэ огдырлы быдэсъясь.

Удмуртиысь кивалтэтлэсь ёзчиоссэ но Кун Кенешысь депутатъёсты улосвыл тӧролэсь ужзэ огдырлы быдэсъясен Александр Бречаловен тодматӥзы. Выль кивалтӥсен нимлыко пумиськон кивалтэтлэн юртаз 5-тӥ оштолэзе ортчиз. Александр Бречаловен тодматӥз Росси азьмуртлэн Приволжск федерал округъя ужоскето муртэз Михаил Бабич.

«Гажано ужъюлтошъёс, толон Удмуртилэсь тӧрозэ отставкае келязы <…>. Александр Соловьёвез кӧня ке пол алылӥзы, но со номыр ӧз вала. Тӧролэн рйтингез ог 23 процентлы усиз. Удмурт Элькунлэн кун пунэмез йылӥз. Со ас табышлэсь 96 процентэз луэ. Росси Федерациысь коньдон ужпумъёсъя министерствоен тупанкылъя таяз арын азьвыл чакламтэ радлыкъя 14 миллиард 700 миллион манетэз ворсаны кулэ», — пусйиз Михаил Бабич.

Озьы ик со вераз, 2017-тӥ арын Удмуртиын элькунлы тӧроез быръёнъёс ортчозы шуыса. Соин ик «со быръён кампаниез умоен ортчыны» кулэ.

«Азьмуртлэн пуктэмезъя, монэ Удмурт Элькунлэн тӧроезлэсь ужзэ огдырлы быдэсъясе юнматӥзы. Со бадӟым вызов. Сое ӵошен, командаен гинэ вормыны луоз. Мон туж оскисько, асьмеос команда луомы шуыса. Удмуртия — аспӧртэм но тунсыко элькун, бадӟым луонлыкен, быдӟым историен но лулчеберетэн. Валтӥсь ужпум — азьмуртлэсь куартолэзе шараям куронъёссэ быдэстон. Ваньмыз соос улонэз умойгес карон вылысь пуктэмын. Солы ми саклык висъялом», — вераз Александр Бречалов.

Нялтас вераса, пумиськонын вал Ижкарысь но Удмуртиысь Викторин митрополит, озьы ик улосвылысь валтӥсь муфтий Фаиз-хазрат Мухамедшин.

Тодэ вайытом, Александр Бречаловез интыуже юнматон сярысь пуктэтэз Россилэн азьмуртэз Владимир Путин 4-тӥ оштолэзе кутӥз.

Александр Бречалов улосвылэн кивалтоз быръёнъёс дорозь, соос куарусёнэ кура сётонъя огъя нуналэ ортчозы.

ВАТСАН

Александр Владимирович Бречалов вордӥськиз 1973-тӥ арын 18-тӥ шуркынмонэ Адыгея автономной улосвылысь Тлюстенхабль каргуртын.

1994-тӥ арын Краснодарысь армилэн генералэз Сергей Матвеевич Штеменко нимо вылӥ ожгар училищеез (ожгар институт) горд дипломен йылпумъяз.

1999-тӥ арын

Читать полностью

Режиссёр, Росси калык фронтлэн шор штабезлэн огез тӧроез, Кун Думаысь лулчеберетъя комитетлэн кивалтӥсез Станислав Говорухин Бречаловез Удмуртилэн тӧроезлэсь ужъёссэ огдырлы быдэсъясе пуктон сярысь вераз. Со сярысь Росси калык фронтлэн пресс-службаез ивортэ.

«Ваньзылы тодмо, Удмуртия ас пӧртэмлыкеныз секыт улос луэ шуыса. Тросэз удысъёс, кылсярысь, жилищно-коммунальной возёс, тазалыкез утён, сюрес лэсьтон, татын туж ик умой югдурын ӧвӧл, соин ик улосэн выль кивалтӥсьлы, милям ужъюлтошмылы Александр Бречаловлы трос ужано луоз. Тодӥсько сое ӟеч адямиез сямен, соин ик вераны быгатӥсько, пуктэм ужпумъёсты быдэстоз шуыса», — пусйиз Говорухин.

Тодэ вайытом, Россилэн азьмуртэзлэн 4-тӥ оштолэзе кинюртэм указэзъя Александр Бречаловез Удмуртилэн тӧроезлэсь ужъёссэ огдырлы быдэсъясе юнматӥзы. Та интыужын со туэ куарусёнозь тыршоз — соку элькунлы тӧроез быръёнъёс ортчозы.

Удмуртилэсь кивалтэтсэ, улосвыл парламентысь депутатъёсты, кар но ёрос кивалтӥсьёсты Александр Бречаловен тодматозы 5-тӥ оштолэзе. Улосвыл тӧролэсь ужзэ огдырлы быдэсъясен тодматоз Росси азьмуртлэн Приволжск федерал округъя ужоскето муртэз Михаил Бабич, ивортэ солэн пресс-службаез.

Тодэ вайытом, Александр Бречаловез элькун тӧролэсь ужзэ огдырлы быдэсъясе 4-тӥ оштолэзе юнматӥз Россилэн азьмуртэз Владимир Путин.

Удмуртиысь Кун Кенешлэн тӧроез Владимир Невоструев Удмуртилэн тӧроезлэсь ужзэ огдырлы быдэсъясе Александр Бречаловез юнматэм пумысен мылкыдъёссэ вераз. Солэн кылъёсызъя, со солы ужын юрттыны дась, ивортэ улосвыл парламентлэн пресс-службаез.

«Росси Федерацилэн Азьмуртэз Владимир Владимирович (Путин — ред.) адямиосты, ужасьёсты тросгес тодэ. Адями дасямын, дыр, туннэ ужаны дась. Юрттомы. Выль кивалтӥсьлэсь нырысь ик возьмам потэ, элькун мед азинскоз, выль мерлыко объектъёс мед пуктӥськозы, экономика, гурт возёс мед азинскозы шуыса. Валтӥсез — экономика мед будоз», — пусйиз Владимир Невоструев.

Озьы ик со ватсаз, котькуд кивалтӥсьлы команда кулэ шуыса.

«Командатэк нокыӵе кивалтӥсь но экономикая ужпумъёсты но мер азинсконъя ужпумъёсты сэрттыны-пертчыны уз быгаты. Соин ик командаен гинэ котькыӵе ужпумез сэрттыны-пертчыны луэ», — вераз Удмуртиысь Кун Кенешлэн тӧроез.

Тодэ вайытом, Александр Бречаловез Удмуртилэн тӧроезлэсь ужзэ огдырлы быдэсъясе юнматӥзы 4-тӥ оштолэзе. Со ужоскетъёсты быдэсъялоз 2017-тӥ арын куарусёнозь, соку улосвыллы выль кивалтӥсез быръёнъёс ортчозы.

Россилэн азьмуртэз Владимир Путин Удмуртилэн тӧроезлэсь ужъёссэ огдырлы быдэсъясе Александр Бречаловез юнматӥз. Со сярысь пуктэтэз Кремльлэн нимлыко сайтаз поттӥзы.

«Удмурт Элькунлэн тӧроез интые быръем мурт ужоскетаз пырытозь Удмурт Элькунлэн тӧроезлэсь ужзэ огдырлы быдэсъясе юнматоно Бречалов Александр Владимировичез», — верамын ужкагазын.

Пуктэт кинюртэм дырысен кужымаз пыре.

Тодэ вайытом, Владимир Путин улосвыллэсь азьвыл кивалтӥсьсэ Александр Соловьёвез солы оскон быремен валче 4-тӥ оштолэзе ужъёсызлэсь палэнтӥз. Пуктэтэз Кремльлэн нимлыко сайтаз поттӥзы. Азьвылгес Удмуртилэсь азьвыл тӧрозэ ӝегатӥзы но Москвае келязы. Сое Росси Федерацилэн Уголовной Кодексысьтыз 290-тӥ ёзэтлэн 6-тӥ люкетэзъя («Получение взятки должностным лицом, занимающим государственную должность Российской Федерации, в особо крупном размере») янгыше уськытэмын.

ВАТСАН

Александр Владимирович Бречалов вордӥськиз 1973-тӥ арын 18-тӥ шуркынмонэ Адыгея автономной улосвылысь Тлюстенхабль каргуртын. 
1994-тӥ арын Краснодарысь армилэн генералэз Сергей Матвеевич Штеменко нимо вылӥ ожгар училищеез (ожгар институт) горд дипломен йылпумъяз.  
1999-тӥ арын Москваысь Олег Емельянович Кутафин нимо кун юридик академиез йылпумъяз. 
1994–1996-тӥ аръёсы — Чкаловской гарнизонысь режимъя ёзэсэныз кивалтӥсьлэн воштӥсез (нимысьтыз ужъёсъя авиационной дивизия). 
1996–1999-тӥ аръёсы — «ТВ-6 Москва» акционер огазеяськонын юрисконсульт. 
1999–2000-тӥ аръёсы — «Альфа-Банк» акционер огазеяськонын юрисконсульт. 
2001–2002-тӥ аръёсы — «Юниаструм Банк» (ООО) коммерци банклэн юридик ёзэтэн кивалтӥсез.  
2002–2003-тӥ аръёсы — «Юниаструм Банк» (ООО) коммерци банклэн юридик департаментэзлэн кивалтӥсез. 
2003–2006-тӥ аръёсы — «Юниаструм Консалтинг» огазеяськонлэн кивалтӥсез. 
2006–2013-тӥ аръёсы — «ВБО Консалт» огазеяськонлэн президентэз. 
2007–2014-тӥ аръёсы — «Юниаструм Банк» (ООО) коммерци банклэн Кивалтӥсёсызлэн кенешсылэн ёзчиез.  
2012–2014-тӥ
Читать полностью
Наверх
Вниз