100 лет государственности Удмуртии
Ижкар+22 °C
6 -тӥ инвожо 2020 Кӧснунал
16+

Удмуртилэн тӧроез Александр Бречалов Кам шур вамен выжъя концессиез выльысь эскерыны ӵектӥз. Со сярысь улосвыллэн кивалтӥсез элькунысь иворъёсты вӧлмытӥсь ёзэсъёслэн ыстэм муртъёсынызы пумиськонын вераз.

Сыӵе концессия милемлы кельшыны уг быгаты. Луонлыкъёсты выльысь эскерыны кулэ.
Александр Бречалов, Удмуртилэн тӧроез

Улосвыл кивалтӥсьлэн кылъёсызъя, концессионерез воштыны но выж вылтӥ потон дунъёсты кулэстыны кулэ яке ӵектосэз федерал асъетэ басьтоно. Александр Бречалов пусйиз, концессионерлы элькун коньдэтысь арлы быдэ 470 миллион манет висъяське. Концессионной тупанкылъя, Удмуртия со коньдонэз чакламлэсь ӧжытгес машинаос ветлэмен но табыш ичигес люкаськемен сэрен тыре. 

Котькуд ар 470 миллион манет – луэ вал, вождэс эн вае, кема аръёслы кредит басьтыны, Удмурт Элькунлэн коньдэтэз тырмысал, соку асьмелэн сюресмы дунтэк луыса. <…> Но асьмелэн вань тупанкыл, сое азьвыл тӧро кинюртӥз. <…> Нырысь ик тариф паромен выжон дун быдӟа луыны кулэ вал
Александр Бречалов, Удмуртилэн тӧроез

Александр Бречаловлэн верамезъя, ӵектосэз выльысь лэзён понна коньдонэн юрттӥсь кулэ.

Тодэ вайытом, 1-тӥ южтолэзьысен пичи машинаос понна Кам выж вылтӥ потон дунэз будэтӥзы

1-тӥ южтолэзьысен Кам выж вылтӥ пичи машинаен потон тарифъёс будӥзы. Со сярысь нимлыко сайтаз выж вамен потонэз чаклась оператор ивортэ.

Воштӥськонъёс дун тыронъя 1 номеро пунктын, Кам шур вамен выж вылын, нырысетӥ группае пырись транспорт понна луозы
выж вамен потонэз чаклась оператор – «РИК» огазеяськон

Кык метрозь ӝуждалаем пичи машинаослы Кам шур вамен потон понна дун 250 манетысь 270 манетозь будӥз, нош кык выжъёс вамен, Кам но Буй – 430 манетысь 450 манетозь.

Пусйъём, мукет машинаос понна дунъёс ӧз воштӥське.

Тодэ вайытом, Кам но Буй выжъёс вылтӥ потон тарифъёслэсь выль вылӥ быдӟалазэс Удмуртиын 2019-тӥ арын 1-тӥ толшоре юнматӥзы

2018-тӥ арын 10-тӥ толшорысен Удмуртиысь Камбарка ёросысь Кам но Буй шуръёс вамен выжъёс вылтӥ ветлон тарифъёс воштӥськозы. Со сярысь ӵектослэн операторезлэн — ООО «Региональная Инвестиционная Компаниялэн» пресс-службаез ивортэ.

Озьыен, 2017-тӥ арысь шуркынмонэн ӵошатыса, тарифъя 4 номеро группаысь транспортлы (куинь осен грузовикъёс, туристъёслы чаклам но карысь каре ветлӥсь автобусъёс) выжтон дун будоз. Кам вамен выж вылтӥ ветлон 1 150 манетысен 1 200 манетозь йылоз, Буй вамен выж вылтӥ — 750 манетысен 800 манетозь. Нош кыкез ик выжъёс вамен потон понна дун та группаысь транспорт понна 700 манетлы пичиялоз — 1 900-ысен 1 200 манетозь.

Озьы ик пичи машинаен (тарифъя 1 номеро группа) ветлӥсьёс понна дунъёс будозы: Буй вамен выж вылтӥ 100 манетысен 150-озь, нош кыкез ик выжъёс вылтӥ потон понна — 350-ысен 400 манетозь.

Тарифъя мукет группаосъя но зонаосъя воштӥськонъёс уз луэ.

Тодэ вайытом, та дыре выж вамен уй-нуналаз 1 800 пала машинаос ортчо, со концессионной тупанкылын пусъем лыдлэсь (уй-нуналаз 3 сюрс автомобиль) трослы ӧжытгес. Концессионерлэсь коньдон ыштэмзэ пичиятон понна Удмуртилэн кивалтэтэз тупанкылэ пыртыны чаклам воштонъёсты умоен лыдъяз. Выльдэм тупанкылъя, выжез уже кутон дыръя утет (страхование) сярысь огкылъя банклэн гарантиезлэн быдӟалаез 5 ар ӵоже уз вошъяськы.

Озьы ик концессие ӵектэм воштӥськонъёсы выжъёс вылтӥ потан тарифез пӧртэм дыръёсы вошъяны луонлык пыртэмын. Соку дунъёсты арлэн вакытъёсызъя транспортлэн лыдызъя чаляк тупатыны луоз.

Тодэ вайытом, Кам шур вамен выж вылтӥ ужан мынон-ветлонэз 2016-тӥ арын шуркынмонлэн кутсконаз усьтӥзы. 2017-тӥ арын 26-тӥ гудырикошконозь автомобилистъёс со вамен дунтэк ветлӥзы. Выж концессионной тупанкылъя кун но ужбергатон ласянь валче ужан амалъя пуктэмын.

Камбарка ёросын улӥсьёс Кам но Буй шуръёс вамен выжъёс вылтӥ потон понна дун сярысь ужпумез нош ик ӝутӥзы туннэ, 6-тӥ куарусёнэ, ёросэ Удмуртилэн тӧроезлэсь ужзэ огдырлы быдэсъясь Александр Бречалов вуылыку. Юанэз калыкен пумиськон дыръя сётӥзы.

Кылсярысь, вераськизы, быгатозы-а ёросын улӥсьёс дун тырытэк ветлыны. Улосвыл кивалтӥсь тодэ вайытӥз, шурез выжон котьку дунын вал шуыса — паромен но, электричкаен но. Паромен выжон 250 манет усе вал.

Александр Бречалов пусйиз, ёросын улӥсьёс понна дунтэк потон уз луы, но эскерисько мукет луонлыкъёс.

Ми толон берозь пукимы но эскеримы — кӧня сылэ электричка. Мон тодӥсько ни, со тӥляд куинь пол ветлэ — ӵукна 5 час 30 минутэ, 12 часын но 18 час котырын. Валаськоды, автобусъёс. Ми чакламы, кин тӥляд Камбарка ёросысь Сарапулысь СЭГЗ-ын, „Элекондын“ но мукет интыын ужа. Зэмзэ но ваньзэ рос-прос чакламы. <…> Оскисько, ӵошен пумкылъянэ вуомы
Александр Бречалов, Удмуртилэн тӧроезлэсь ужзэ огдырлы быдэсъясь

Концессионерлэн — «РИК» огазеяськонлэн — пресс-службаяз иворъёсъя «Удмуртия» агентстволы веразы, выжъёс вылтӥ потон дунъёсъя капчиятонъёс эскерисько шуыса, но соосты сётон понна трафикез чаклано.

«Капчиятонъёс сётон сярысь вераськемлэсь азьвыл валаны кулэ, кӧня машинаос отӥ ветлозы. Ми 10-тӥ нунал гинэ ужаськомы, трафик ялан таӵе ик луоз шуыса вераны вазь на. Эскеронъёс та ласянь мыно», — валэктӥзы «РИК» огазеяськонлэн пресс-службаяз.

Тодэ вайытом, выжъёс вылтӥ потон понна дун басьтыны кутскизы 26-тӥ гудырикошконысен. Кык уй-нунал ӵоже отӥ 4 сюрс 700 автомобильёс ортчизы, чакламын вал 3 сюрс 500 машина ортчоз шуыса. Трафикъя выль лыдпусъёсты «РИК» огазеяськонын ӧз сётэ.

Дун басьтыны кутскем бере нырысетӥ нуналъёсы водительёслэн мылкыдъёссы пӧртэмесь вал: одӥгъёсыз дунъёсты тупамон лыдъяло, мукетъёсыз паромен яке котыр сюрестӥ умойгес ветлыны луоз шуыса веразы.

Кӧснуналэ, 26-тӥ гудырикошконэ, уйшорысен Удмуртиын Кам но Буй шуръёс вамен выжъёс вылтӥ потэм понна дун басьтыны кутскозы. Кызьы ивортӥз компания-концессионер — «РИК» огазеяськон, тыриськыны луоз коньдонэн но, банк картаен, но (Visa, Master Card, МИР, Union Pay, Амех).

Пичи машинаос понна Кам вамен выж вылтӥ потонлэн дуныз 250 манет но Буй вамен 80 манет луоз. Тодэ вайытом, Кам но Буй шуръёс вамен выжъёс вылтӥ потон понна дунъёсты пӧсьтолэзь пумын шараязы.

Со сяна, нырысетӥ кык толэзьёс ӵоже дун басьтэм бере Камбарка ёросын улӥсьёслы, кин Сарапулэ ялан ветлоно луэ, капчиятонъёс сётозы, озьы соос ӧжытгес тырыны быгатозы. Выжъёсты быдэсак усьтыны чакламын 2017-тӥ арын куарусён кутсконын.

Ватсалом, Кам шур вамен 1 иськемлэсь кузьгес выж Тарасовоысь паромен выжон интылэсь кӧня ке уллапалазгес интыяськемын. Кыкетӥез (200 метр) — Буй шур вамен Камбаркаысь Башкортостанэ нуэ. Выль выжъёс Москваысь Уфа пыр Екатеринбургозь сюресэз 269 иськемлы вакчиятыны луонлык сёто.

Вуоно шутэтскон нуналъёсысен Камбарка ёросысь Кам но Буй шуръёс вамен выжъёс вылтӥ потон понна дун тырытыны чаклало ни. Туннэ, 24-тӥ гудырикошконэ, журналистъёслы со сярысь вераз Удмуртиысь транспортъя но сюрес возёсъя министрлэсь ужзэ быдэсъясь Алексей Горбачёв.

Солэн кылъёсызъя, дун тырон пунктъёсты кӧснуналэ яке арнянуналэ потон уе лэзьыны малпало. Дырыз ужкагазъёслэн дасьлыкенызы герӟаськемын.

Шутэтскон нуналъёсы, мукет улосвылъёслэн опытсыя, мынӥсь-ветлӥсьёс ӧжытгес луо. Дун тыронэн шугъяськонъёс ӧжытгес кылдо. <…> Дун тыронэз пыӵатыны малпаськомы со ужкагазъёсты басьтэм бере, со яке таяз кӧснуналэ, яке таяз арняннуналэ 00:00 дырысен луыны быгатоз
Алексей Горбачёв

Кызьы валэктӥз удысэтлэн кивалтӥсез, дун тыронэз шутэтскон нуналъёсы пыӵатон валамтэос кылдон учыръёсты кулэстыны луонлык сётоз. «Ум тодӥське вал, коньдон сьӧрамы ӧм басьтэ. Сыӵе учыръёсты алон вылысь Камбарка ёрослэн администрациез но, Сарапул ёрослэн но калык пӧлын иворез вӧлмытон уж нуозы», — валэктӥз со.

Со тӥрлык, кудӥз выж вылын пуктэмын, автоматика амалэн транспортлэсь быдӟалазэ пусъёз, автоматика амалэн дун пуктоз, соин ик водитель дун тырон пункт доры вуыку, отын табло вылын дуныз ӝуалоз ни
Алексей Горбачёв

Пичи машинаос понна Кам вамен выж вылтӥ потонлэн дуныз 250 манет но Буй вамен 80 манет луоз. Со мында ик вал паромен выжон понна. «Бадӟым машинаос понна, марказэ но секталазэ лыдэ басьтыса — 1 сюрс 700 манетозь», — вераз Алексей Горбачёв.

Тодэ вайытом, Кам но Буй шуръёс вамен выжъёс вылтӥ потон понна дунъёсты пӧсьтолэзь пумын шараязы.

Со сяна, нырысетӥ кык толэзьёс ӵоже дун басьтэм бере Камбарка ёросын улӥсьёслы, кин Сарапулэ ялан ветлоно луэ, капчиятонъёс сётозы, озьы соос ӧжытгес тырыны быгатозы.

Выжъёсты быдэсак усьтыны чакламын 2017-тӥ арын куарусён кутсконын.

Ужан мынон-ветлонэз 2016-тӥ арын шуркынмон кутсконын усьтӥзы. Соку выж вылтӥ ортчон понна дун ӧз басьтылэ.

Ватсалом, Кам шур вамен 1 иськемлэсь кузьгес выж Тарасовоысь паромен выжон интылэсь кӧня ке уллапалазгес интыяськемын. Кыкетӥез (200 метр) – Буй шур вамен Камбаркаысь Башкортостанэ нуэ. Выль выжъёс Москваысь Уфа пыр Екатеринбургозь сюресэз 269 иськемлы вакчиятыны луонлык сёто. 

Удмуртиысь Камбарка ёросын Кам но Буй шуръёс вамен выжъёсты лэсьтӥсь концессионер — «Региональная инвестиционная компания» огазеяськон — выжъёс вылтӥ потон понна дунъёсты шараяз. Ивортон ӵектослэн сайтаз поттэмын.

Тарифъёсъя куинь зона (Кам выж вылтӥ потон; Буй выж вылтӥ; кыкез ик выжъёс вылтӥ) но тарифъя ньыль группа чакламын:

1. капчи транспорт (мотоциклъёс но пичи машинаос);

2. шоро-куспо транспорт (пичи фургонъёс, фургонъёс, пикапъёс);

3. вузъёсты нуллӥсь машинаос но автобусъёс (ӝуждалазы 2,6 метрлэсь бадӟым, 2 черсэн (ось);

4. вузъёсты нуллӥсь машинаос но автобусъёс (ӝуждалазы 2,6 метрлэсь ӧжыт, 3-лэсь трос черсэн.

Озьы, пичи машинаен Кам выж вылтӥ потон 250 манет усёз, Буй вамен — 80 манет, кыкез ик вамен — 330 манет. Фургонэн Кам выж вылтӥ ортчон понна 510 манет тыроно луоз, Буй вамен — 270 манет, кыкез вамен — 780 манет.

Выжъёс вылтӥ потон тужгес дуно усёз бадӟым машинаосын ветлӥсьёслы (Кам, Буй, кык выж):

 — тарифъя 3-тӥ группа — 900 манет, 460 манет, 1350 манет;

 — тарифъя 4-тӥ группа — 1150 манет, 590 манет, 1730 манет.

Выль выжъёс вылтӥ потон понна дунъёс

2 фото

Тодэ вайытом, 2016-тӥ арын Кам шур вамен выжъёс вылтӥ потон понна тужгес бадӟым дунъёсты юнматӥзы: пичи машинаослы Кам выж вылтӥ 340 манет, Буй вамен -187 манет, шоро-куспо транспортлы: 679 но 357 манет, вузъёсты нуллӥсь машинаослы но автобусъёслы — 1189 но 611 манет, прицепен грузовикъёслы — 1528 но 781 манет.

Берлогес веразы, выжъёс вылтӥ потон паромен выжонлэсь дуногес уз луы шуыса.

Со сяна, дунэз басьтыны кутскем дырысен, чакланъёсъя гудырикошкон шорысен, кык толэзь ортчыса, Камбарка ёросысь Сарапулэ ялан ветлӥсьёс понна дунъёсъя капчиятонъёс сётыны малпало.

Выжъёсты быдэсак усьтыны чакламын 2017-тӥ арын куарусён кутсконын.

«Кам но Буй шуръёс вамен выжъёсты лэсьтон» сярысь вань иворъёс

Удмуртиысь тӧрлыкъёс концессионерен ӵош Камбарка ёросын улӥсьёс понна Кам но Буй шуръёс вамен выж вылтӥ дун тырыса потон вакытлы капчиятонъёсъя программа дасяло. Со ёросысь Сарапулэ ужаны, кун юрттӥськетлы но мукетызлы ветлӥсьёслы дунэз кулэстыны кулэ. Удмуртиысь кивалтэтлэн тӧроезлэсь ужзэ быдэсъясь Виктор Савельев верамъя, солэсь азьвыл эскерозы, Камбарка ёросысь кӧня адями солань-талань ветлоз, солы кык толэзь пала кулэ луоз.

Нырысь ик кык толэзь ӵоже огъя режимын ужаломы, эскером Камбарка ёросысь кӧня транспорт солань-талань ветлэ. Собере коньдон ласянь дунъет лэсьтомы, милям дунъетмыя Камбарка ёросын улӥсьёслы нимысьтыз картаос сётэмын луозы
Виктор Савельев

Тодэ вайытом, Кам но Буй вамен выжъёс вылтӥ потон понна дун басьтыны кутскозы гудырикошкон шорысен. Со паромен выжон дунлэсь быдӟым уз луы. Кылсярысь, пичи машинаос понна Кам вамен выж вылтӥ потон 250 манет усёз, Буй вамен — 80 манет. Котькуд траснпорт понна нимаз дун луоз. Азьланяз со араз одӥг пол индексациез ортчыны быгатоз.

Али выжъёс вылтӥ дунтэк ортчыны луэ на.

Камбарка ёросысь выжъёсты куарусён кутсконын усьтыны чакламын.

Та сярысь вань иворъёс татын: «Кам но Буй шуръёс вамен выжъёсты лэсьтон»

Удмуртиысь Камбарка ёросын Кам но Буй шуръёс вамен выжъёслэн куронъёслы тупамзы но соосты уже кутон сярысь ужкагазъёсты басьтон понна кӧня ке нунал кулэ луоз. Татын вераськон мынэ ужъёслэн нырысетӥ люкетсы — лэсьтӥськон — сярысь. Иворъёсъя «Удмуртия» агентстволы 26-тӥ пӧсьтолэзе со сярысь вераз элькун кивалтэтлэн тӧроезлэсь ужзэ быдэсъясь Виктор Савельев. Кыкетӥ люкетаз котырез тупатон но чылкытатон (рекультвация) чакламын. Со али мынэ ни, нырысь-валысь чакланъёсъя, ужъёс арня ортчыса йылпумъяськозы.

Та дыре отын 600 адями ужа.

Эшшо одӥг ужпум, кудзэ сэрттыны-пертчыны кулэ — азьвыл лэсьтӥськисьлэсь («Мострострой-12») паллян палась ярдурысь базазэ утялтон. Со пумысен кенешонъёс али мыно. «Азьвылэз лэсьтӥськись со ужен уг выры. Солэсь ваньбурзэ поттон пумысен соин вераськыны тырше алиез лэсьтӥськись. Мон малпасько, ужпум сэрттэмын-пертчемын луоз, ваньбурез нуозы», — валэктӥз Виктор Савельев.

Солэн верамезъя, ужъёслэн кыкетӥ люкетсыя ужкагазъёс басьтэмын луозы гудырикошкон шорын.

Соку ик выж вылтӥ потон понна дун басьтыны кутскозы.

«Дун басьтон пунктъёс ужаны быдэсак дасесь, техникаез дась, ужасьёс кутэмын, али эскерон вылысь ужаны кутскозы», — вераз Виктор Савельев.

Нырысь выж вылтӥ потонлэн дуныз паромен выжон дун быдӟа луоз. Кылсярысь, пичи машинаос понна Кам вамен выж вылтӥ потон 250 манет усёз, Буй вамен — 80 манет. Азьланяз концессионной тупанкылъя дун араз одӥг пол индексациез ортчыны быгатоз.

Ваньмылы кулэ, дун мултэс бадӟым медаз луы шуыса, но экономика ласянь валэктымон
Виктор Савельев

Выжъёсты куарусён кутсконын усьтыны чакламын.

Камбарка ёросын Кам но Буй шуръёс вамен выжъёс вылтӥ потон понна дун басьтыны кутскозы дун тырон пунктъёсты но отын ужасьёсты дышетэм бере — гудырикошкон шорын. Со сярысь ивортӥзы Удмуртиысь тӧролэн но кивалтэтлэн пресс-службаязы.

Озьы ик пусъемын, элькун но концессионер дун пумысен огкылэ вуизы шуыса, выжъёс вылтӥ выжон паромен потонлэсь дуногес уз луы (пичи машинаос понна Кам вамен — 250 манет, Буй вамен — 80 манет).

Со сяна, али выжъёс вылтӥ ялан ветлӥсьёслы капчиятонъёс сётонъя программаез дасяло. Кылсярысь, вераськон мыныны быгатоз Камбаркаын улӥсьёс сярысь.

Кызьы тодмо луиз толон, выжъёсты нимлыко усьтыны малпало куарусён кутсконын. Али чаклась ёзэсъёс йылпумъян эскеронъёсты нуо, собере выжъёслэн куронъёслы тупамзы сярысь визьпумъян (заключение) но соосты уже кутыны лэзён басьтэмын луоз.

Тодэ вайытом, выж вылтӥ ужан мынон-ветлонэз 2016-тӥ арын шуркынмон кутсконын усьтӥзы. Али отӥ дунтэк ортчыны луэ. Кам вамен выж вылын валтӥсь ужъёсты пӧсьтолэзе йылпумъялозы. Юрттӥсь сооружениосты, котырзэ утялтон ужъёсты куарусёнэ йылпумъяны чакламын.

Удмуртиын Кам но Буй шуръёс вамен выжъёсты нимлыко усьтыны быгатозы 25-тӥ пӧсьтолэзе. Со сярысь 3-тӥ пӧсьтолэзе журналистъёслы вераз элькун тӧролэсь ужзэ огдырлы быдэсъясь Александр Бречалов.

Тодэ вайытом, выж вылтӥ ужан мынон-ветлонэз 2016-тӥ арын шуркынмонэ усьтӥзы. Али отӥ дун тырытэк ортчыны луэ. Азьвылгес Удмуртиысь кивалтэтын ивортӥзы, Кам вамен выж вылын валтӥсь ужъёсты пӧсьтолэзе йылпумъялозы шуыса. Лэсьтӥськонлэсь кыкетӥ люкетсэ — технологической потонъёс, юрттӥсь сооружениос но рекультивация — 1-тӥ куарусёнозь быдэстозы.

Улосвыл тӧролэсь ужзэ огдырлы быдэсъясьлэн верамезъя, 25-тӥ пӧсьтолэзе элькунэ Россиысь транспортъя министр Максим Соколов лыктыны быгатоз.

Озьы ик кивалтӥсь вераз, со нуналэ «адӟыны малпало, кызьы шлагбаум азьвыл соглаштэм тарифъёсъя усьтӥське-ворсаське».

Кам вамен 1 иськемлэсь кузьгес выж Тарасовоысь паромен выжон интыослэсь кӧня ке уллапалазгес. Кыкетӥез (200 метр) — Буй шур вамен Камбаркаысь Башкортостанэ нуэ. Выль выжъёс Москваысен Екатеринбургозь Уфа пыр сюресэз 269 иськемлы вакчиятыны луонлык сётозы.

Удмуртиын Кам шур вамен выжез лэсьтонын валтӥсь ужъёсты таяз арын пӧсьтолэзе йылпумъялозы. Со сярысь ивортэ улосвыл тӧролэн но кивалтэтлэн пресс-службазы.

«Пӧсьтолэзе вань ужъёс, рекультвация сяна, йылпумъямын луозы. Со дырлы ик чакламын нырысетӥ люкетсэ уже кутон, отчы пыро Кам но Буй шуръёс вамен выжъёс вылтӥ потон, озьы ик дун басьтон интыос», — верамын ивортонын.

Лэсьтӥськонлэн кыкетӥ люкетэз — технологической потонъёс, юрттӥсь сооружениос но рекультивация — 1-тӥ куарусёнозь йылпумъяськоз.

Та дыре объектын котькуд нунал 600-лэсь трос адями но 150 техника ужа.

Удмуртиысь кивалтэтлэн тӧроезлэсь ужзэ быдэсъясь Виктор Савельев верамъя, выж вылын быдэстӥськись ужъёслэсь ӟечлыксэс эскерон арня быдэ ортчытӥське.

«Выж вылын мынӥсь ужъёсты ми чакласькомы, объектын кенешонъёс ортчытъяськомы. Уж ӟырдыт мынэ, азинскон вань. Генподрядчик ужъёсты юнматэм радлыкъя йылпумъяны но объектэз уже сётыны дась», — пусйиз улосвыл кивалтэтлэн тӧроезлэсь ужзэ быдэсъясь.

Кам шур вамен выжез Удмуртиын быдэсак усьтозы 17-тӥ пӧсьтолэзе. Ужрадэ Россиысь транспортъя министр Максим Соколов лыктоз. 10-тӥ куартолэзе ортчем брифингын со сярысь вераз элькун тӧролэсь ужзэ огдырлы быдэсъясь Александр Бречалов.

«Кылем арняе концессионерлэн, ВТБ банклэн, ыстэм муртъёсыныз кенешон ортчытӥмы <…> Валтӥсез йылпумъян — 17-тӥ пӧсьтолэзе выж быдэсак усьтэмын луоз шуыса вераны инъет вань. <…> Витьымтэ шорысь мар ке луон гинэ выжез дыраз усьтыны уз сёты», — вераз со.

Озьы ик улосвыл кивалтӥсь вераз, куд-ог ужпумъёс эскерисько на шуыса, кылсярысь, дунъёсты юнматон пумысен. Югдурез сэрттон-пертчон сярысь валан вань ни, но сое шараяны вазь на, пусйиз Александр Бречалов

Тодэ вайытом, кун но ужбергатон ласянь валче вылысь пуктэм выж Москваысен Екатеринбургозь сюресэз автомобилистъёс понна 164 иськемлы вакчиятыны луонлык сётоз.

Выж вылтӥ ужъя мынон-ветлонэз 2016-тӥ арын шуркынмон кутсконын усьтӥзы. Дун тырон пунктъёсты пуктэм бере, чакланъёсъя 2017-тӥ арысь кыкетӥ кварталын, отӥ ортчон понна дун тыроно луоз. Тужгес бадӟым тарифъёсты Удмуртиысь кивалтэт юнматӥз.

Удмуртилэн тӧроезлэсь ужзэ огдырлы быдэсъясь Александр Бречалов выж вылтӥ потон понна дунъёс пумысен ВТБ-лэн кивалтӥсеныз вераськыны малпа вал. Азьвылгес дун тыронэз люкетэн-люкетэн улонэ пыӵатон, озьы ик выжъёс вылтӥ ӵем ветлӥсь водительёс понна капчиятонъёс чаклан луонлыкез эскеризы.

Удмуртилэн тӧроезлэсь ужзэ огдырлы быдэсъясь Александр Бречалов Кам выж вылтӥ потон дун пумысен ВТБ-лэн кивалтӥсеныз вераськыны малпа. Кивалтӥсь со сярысь журналистъёслы вераз 7-тӥ оштолэзе Сарапул ёросэ вуылыкуз.

Солэн кылъёсызъя, выжез усьтон дыр ӧз воштӥськы — со 2017-тӥ арын 17-тӥ пӧсьтолэзе луоз.

Милям юанъёсмы вань, но соос сокем бадӟымесь ӧвӧл. Соин ик али шугъяськонъёсты ум адӟиське шуом. Отын вань бадӟым, шуом озьы, оло, ужпум но ӧвӧл, юан — азьланяз выж вылтӥ потон понна дун. Но малпасько, матысь дыре ми ВТБ-лэн кивалтӥсеныз Костинэн (Андрей Костин — ВТБ-лэн президентэз — правленилэн кивалтӥсез — ред.), ужъюлтошъёсын пумиськом но со юанэз сэрттом-пертчом
Александр Бречалов

Бречалов озьы ик пусйиз, дунлэсь тужгес вылӥ быдӟалазэ тыриськон дунэз сямен верыны кулэ ӧвӧл. Озьы ик кивалтӥсь вераз, оглом «туж умой элькун но, федерация но таӵе ӵектосэз быдэстэ» шуыса.

«Выжез 17-тӥ пӧсьтолэзе усьтон — со кутсконэз гинэ. Нош сое тырмытон, ужатон, со концессионерлы но ыштон медаз луы, кызьы асьмелэн ӵем луылэ, — тӥни со валче уж ни», — вераз со.

Али выж дорын дун тырон пунктъёсты лэсьтон уж азьланьтӥське. Чакланъёсъя, соосты эскерон вылысь куартолэзе усьтозы. Дун уз басьтэ.

ВАТСАН

2016-тӥ арын Удмуртиын Кам шур вамен потон понна дунлэсь тужгес вылӥ быдӟалазэ юнматӥзы: пичи машинаен потон 340 манет усёз, нош Буй вамен — 187, шор секталаем машинаос понна — 679 но 357, бадӟым машинаослы (кык осен) но автобусъёслы — 1 189 но 611, прицепен грузовикъёслы (куинь но солэсь трос осен) — 1 528 но 781 манет.

Кам шур вамен выж вылтӥ уй-нуналаз 2 сюрс 500 — 3 сюрс машина ортче. Дун тырон пунктъёс ужаны кутскытозь, отӥ дунтэк ветлыны луэ. 18-тӥ толшоре Ува ёросысь ветеранъёсын пумиськыкуз со сярысь вераз элькунлэн тӧроез Александр Соловьёв.

Улосвыл кивалтӥсь пусйиз, выж доры Башкириын Нефтекамск палась но Удмуртиын Сарапул палась сюресъёсты тупатэм бере трафик эшшо будоз шуыса.

Сюресэз тупатъян ужъёсты элькунын 2016-тӥ арын кутскизы. Федерал коньдэт чотын куинь арскын улосвыл Ижкар — Сарапул сюреслэсь 35 иськемзэ но Костино — Камбарка сюреслэсь 28,5 иськемзэ выльдоз.

Тодэ вайытом, кун но ужбергатон ласянь валче вылысь пуктэм выж Москваысь Екатеринбургозь сюресэз 164 иськемлы вакчигес карыны луонлык сётоз.

Удмуртиысь транспортъя но сюрес возёсъя министерствоын чакламзыя, выж вылтӥ уй-нуналаз 3 сюрс 700 автомобильёс ортчылозы.

Выж вылтӥ ужан мынон-ветлонэз 2016-тӥ арын шуркынмон кутсконын усьтӥзы. Коньдон тырон пунктъёс ужаны кутскем бере отӥ потон понна дун сётоно луоз. Удмуртиысь кивалтэт тужгес бадӟым дунъёсты юнматӥз. Кивалтэтлэн тӧроез Виктор Савельев верамъя, зэмос дун пичигес луоз, со паромен выжон дунлэсь бадӟым уз луы. Лэсьтӥськонэз быдэсак йылпумъялозы 2017-тӥ арын.

Удмуртиын Кам но Буй шуръёс вамен выжъёс вылтӥ автотранспортэн потон понна тужгес бадӟым дунъёсты юнматӥзы. Со сярысь ивортэмын элькун тӧролэн но кивалтэтлэн нимлыко сайтазы.

Улосвыл кивалтэтлэн пуктэмезъя, тужгес бадӟым дунъёс пӧртэм автотранспортлы юнматэмын.

Кылсярысь, Кам шур вамен пичи машинаен потон 340 манет усёз, нош Буй вамен — 187, шор секталаем машинаос понна — 679 но 357, бадӟым машинаослы (кык осен) но автобусъёслы — 1 сюрс 189 но 611, прицепен грузовикъёслы (куинь но солэсь трос осен) — 1 сюрс 528 но 781 манет.

Кыкез ик выж вылтӥ потон пӧртэм транспорт понна сылоз 509, 1 сюрс 19, 1 сюрс 783 но 2 сюрс 292 манет.

Пусъёмы, нырысь ик чакламын вал, кылсярысь, пичи машинаос Кам шур вамен выж вылтӥ потон понна 326 тырозы шуыса. Но Удмуртиысь кивалтэтэн юнматэм тужгес бадӟым дун вылӥынгес луиз.

Тодэ вайытом, 2013-тӥ арын тулыс Удмуртиысь кивалтэт, ВТБ банк но «Инвестициосъя улосвыл компания» огазеяськон Кам но Буй шуръёс вамен выжъёс лэсьтон сярысь тупанкыл юнматӥзы.

Улосвылын со нырысетӥез бадӟым объект, кудӥз кун но ужбергатон ласянь валче вылысь пуктӥське. Выжъёсты вуттэм бере концессионер соосты уже кутоз 49 ар ӵоже.

Та дыре Кам но Буй выжъёс вамен ужан мынон-ветлон усьтэмын, отӥ ортчон понна дун али уг басьтӥськы. Азьвылгес ивортӥзы вал, южтолэзёзь дун тыроно уз луы шуыса. Объектэз быдэсак вуттыны кулэ 2017-тӥ арын пӧсьтолэзе.

Кам шур вамен 1 иськемлэсь кузьгес выж Тарасовоысь паромен выжон интылэсь кӧня ке улӥынгес лэсьтэмын. Кыкетӥез (200 метр) — Буй шур вамен 

Камбаркаысь Башкортостанэ нуэ. Москваысь Екатеринбургозь но берен сюрес Камбарка пыр 1 сюрс 721 иськем луоз. Со Пермь пыр сюреслэсь 164 иськемлы вакчигес, нош Уфа пыр мыноно ке, 269 иськемлы вакчигес.

Фото: скриншот

Удмуртиысь Кам шур вамен усьтэм выжлы кулэяськон вань. Со вылтӥ ортчись машинаослэн лыдзы, паромен выжисьёс сярысь, куинь поллы тросгес. Дун басьтыны кутскозы нимысьтыз пунктъёсын, куке объект 2017-тӥ арын пӧсьтолэзьлы быдэсак вуттэмын луоз. 13-тӥ толсуре журналистъёслы со сярысь вераз элькун кивалтэтлэн тӧроезлэн воштӥсезлэсь ужзэ быдэсъясь Рафис Касимов, ивортэ «Удмуртия» агентстволэн корреспондентэз.

«Выж вылтӥ ужан мынон-ветлон усьтэмын, калыклы туж кельше, выжон интыын возьмаса ӧвӧл ни сылоно шуыса…, трафик паромын сярысь ог куинь полы будӥз», — вераз со.

Кивалтӥсьлэн кылъёсызъя, объектын ужан мынон-ветлонэз усьтон кунын паськыт кутӥське. Выж вылын кышкыттэмлык радъямын. Со сяна, сое тол вакытэ кулэезъя возён пумысен Автодорен огкыл юнматэмын.

Рафис Касимов валэктӥз, лэсьтӥськон радлыкъя нырысь ик сое 2017-тӥ арын пӧсьтолэзе йылпумъяны кулэ вал. Но подрядчик, кужымзэ мертаса, ужъёсты радъяз озьы, объектэз 2016-тӥ арын куарусёнэ вуттыны мед луоз шуыса. Но солэсь счётъёссэ лицензизэс ыштэм банкъёсын ворсамен сэрен, коньдонэн шугъяськонъёс кылдӥзы.

Лэсьтӥськон ужъёс огдырлы дугдытэмын, но объектын 90 процентэз ужъёс быдэстэмын, 2017-тӥ арын пӧсьтолэзе со вуттэмын луоз. Та дырлы коньдон тырон пунктъёс лэсьтымтэ на.

Ужъёсты йылпумъян понна подрядчик банклэсь выль гарантия басьтыны кулэ, угось азьвылэзлэн ужан дырыз 2016-тӥ арын куарусёнэ быриз. Удмуртиысь кивалтэт со сярысь ватсаса тупанкылэз соглаштӥз.

Концессионер банк гарантиез матысь нуналъёсы вайыны кулэ. ВТБ банклэн нимамтэ вице-президентэз вылэ чӧлскыса, Рафис Касмимов вераз, яке та толэзь пумын, но одно ик вуоно ар кутсконын, выжез лэсьтонлы коньдон висъян азьланьтӥськоз шуыса. Кылкутытонэз быдэсъятӥсь федерал ёзэслэн кивалтонниез азьын пунэмъёссэ подрядчик ворсаз ни, таяз арняе студентъёслы коньдон тырыны кулэ.

Рафис Касимов пусйиз, концессионной тупанкылъя Удмуртиысь коньдэт 270 миллион манет пала висъяны кулэ на. Выжез лэсьтонэ мукет коньдонэз сётыны элькун уг малпа.

Читать полностью

Кам шур вамен выж вылтӥ ужан мынон-ветлонэз усьтэм бере выж пумысен нокыӵе алонъёс ӧй вал. 7-тӥ шуркынмонэ журналистъёслы со сярысь вераз Удмуртиысь транспортъя но сюрес возёсъя министр Виктор Вахромеев.

Мынон-ветлонэз усьтӥзы 4-тӥ шуркынмонэ, валтӥсь подрядчикен соглаштэм бере. Отӥ ортчем машинаослэсь лыдзэ ӧз чоталэ на, но мытысь дыре со борды басьтӥськыны малпало.

«Кык часлы, куддыр трослыгес но, сюрес вакчигес луэ. Паромез возьмаса сылӥськомы вал, нош али милемлы туж кельше, ми шумпотӥськомы», — вераз иворъёсъя «Удмуртия» агентстволэн корреспондентэзлы Нефтекамскысь водитель Алмаз Рахматуллин.

Тодэ вайытом, али выж вылтӥ дунтэк потыны луэ, но Выль арозь дун тырон пунктъёсты усьтыны малпало. Соосты лэсьтон ужъёс та дырлы 90 процентлы быдэстэмын.

Кам шур вамен выж вылтӥ ужан мымон-ветлонэз 4-тӥ шуркынмонэ усьтӥзы


Кам но Буй шуръёс вамен выж вылтӥ потон понна дун тырон пунктъёс 90 процентлы дась. Журналистъёслы со сярысь вераз Удмуртиысь транспортъя но сюрес возёсъя министр Виктор Вахромеев.

«Соослэн 90 процентлы дась ни (выж вылтӥ потон понна дун тырон пунктъёс — ред.). Та дыре коньдон тырон ужпумез, пунэмъёсты берыктон сэрттӥське-пертчиське… Выль арозь лэзьыны кулэ», — вераз удысэтлэн кивалтӥсез.

Вахромеев верамъя, ужан мынон-ветлонэз усьтон азьын объектъёс кӧня ке ӧриосын соглаштэмын.

«Али объект солэн (валтӥсь подрядчиклэн — ред.) асъетаз, со кузёяське. Мынон-ветлонэз кышкыттэмлыко карон понна кулэ луись вань тӥрлыкъёс пуктэмын», — вераз министр.

Тодэ вайытом, Кам но Буй шуръёс вамен выжъёс вылтӥ ужан мынон-ветлон усьтэмын 4-тӥ шуркынмонэ.

Удмуртиын Кам шур вамен выж вылтӥ ужан мынон-ветлонэз усьтӥзы. Элькун тӧролэн резиденцияз аппарат кенешонын со сярысь ивортӥз элькунысь транспортъя но сюрес возёсъя министр Виктор Вахромеев.

Солэн верамезъя, али ватӥсь ужпум — пусъем ужанрадлыкез ӟеч быдэстон но пунэмъёсты берыктон.

«Та дыре валтӥсь подрядчикен ужан мынон-ветлонэз усьтон сярысь пумкылъян кутэмын», — вераз Вахромеев.

Дун тырон пунктъёсты лэсьтонэз концессионер 1-тӥ толсурозь йылпумъяны оскытэ. Тупанкылъя выжез усьтыны кулэ тужгес берзэ 2017-тӥ арын инвожое.

Азьвылгес Удмуртиысь кивалтэт концессионерен выж вылтӥ ужан мынон-ветлонэз усьтон сярысь кенешонъёс нуиз. Элькун кивалтэтлэн тӧроезлэн воштӥсезлэсь ужзэ быдэсъясь Рафис Касимов верамъя, лэсьтӥськонлэн ӝегамез нырысь ик герӟаськемын концессионер ласянь коньдон беромыса вуэмен. Элькун коньдэт ласянь нокыӵе пунэмъёс ӧвӧл. Тупанкылъя, кылемзэ 308 миллион манетэз улосвыл тыроз объектэз сётэм бере.

Кама, Вагановка но Буй шуръёс вамен выжъёсты пуктон кун но ужбергатон чотын мынэ. Выль сюрес Москваысен Екатеринбургозь висэз 164 иськемлы вакчиятыны луонлык сётоз.

Тодэ вайытом, выжез лэсьтон сярысь тупанкыл юнматэмын вал 2013-тӥ арын 1-тӥ коньывуонэ. Кам шур вамен выжлэн кузьдалаез 1081,6 метр, Буй шур вамен — 223,54 метр. Со сяна, Камбарка но Вагановка шуръёс вамен пичи выжъёс кылдозы. Ӵектослэн оглом дуныз 14 миллиард манет котыр.

Нырысь-валысь чотанъёсъя, автомобиль сюрес но выж ужаны кутскыса, Ижкарысь Уфаозь сюрес 437 иськемозь кулэсмоз. Сое 5–7 часын ортчыны луоз, али 8–10 час кошке. Екатеринбурге но вуыны капчигес луоз. Выжез усьтэм бере Москва но Екатеринбург вискысь сюрес 220 иськемлы вакчигес луоз.

Наверх
Вниз