Ижкар-19 °C
26 -тӥ тулыспал 2021 Удмуртарня
18+

Михаил Калашниковлэн вордӥськем дырысеныз 100 ар тырмонэн пусъён улсын 10-11 шуркынмонэ Ижкаре пыӵал тӥрлык кылдытӥсьлэсь нимзэ нуллӥсь школаосысь пиналъёс вуылӥзы. Удмуртилэн шоркараз Воткаысь, Алтай шаерысь Курья но Томск улосвылысь Парбиг черкогуртъёсысь дышетскисьёсты пумитазы. Со сярысь Ижкар администрацилэн пресс-службаез ивортэ.

Россиын 7 школаос Михаил Калашниковлэсь нимзэ нулло, соос пӧлын Ижкарысь 20 номеро школа 

Куноос пыӵал тӥрлык кылдытӥсьлэн Вормон скверысь бюстэз доры сяськаос понӥзы, Михаил Калашников нимо музейлэн но Ижысь техникая кун университетлэн адӟытонъёсынызы тодматскизы. Ижкарысь 20 номеро школаын пиналъёслы Удмуртилэн сям-йылолъёсыз сярысь веразы, кадетъёс эскерон ужъёссэс утизы но тодон-валанэнызы люкиськизы. Со сяна, «Академия Калашникова» технопарке вуылӥзы. 

Ужрадэз йылпумъяса, делегациос Ижкарысь техникая кун университетэн но «Школа юных лётчиков» центрен дышетон, Атыкай музъемез гажан мылкыд пыӵатон, дышетонъя туризм ӧръёсын валче ужан сярысь огкылъёс кинюртӥзы. 

Тодэ вайытом, Михаил Калашниковлэн вордскем нуналаз, 10-тӥ шуркынмонэ, Ижкарын пӧртэм ужрадъёс ортчизы, со пӧлын пыӵал тӥрлык кылдытӥсьлэн бюстэз доры сяськаос понӥзы, музейын выль адӟытонъёс усьтӥзы

Михаил Калашниковлэн вордӥськем нуналаз, 10-тӥ шуркынмонэ, Ижкарын конструкторлэсь нимзэ нуллӥсь музейын выль адӟытонъёс усьтӥзы.

Милям экскурсоводъёсмы планшетъёсын ужалозы, соос экскурсиос ортчытъяны юрттозы. Табере Щуровской полигонэн герӟаськем тема паськытгес возьматэмын. Эшшо одӥг зона кылдӥз, кудӥз азьвыл экспозициын воксё ӧй вал, со семьялэн зонаез
Ольга Мнервина, М. Т. Калашников нимо музейлэн кивалтӥсез

Музейын интерактивной танк кылдӥз. Табере мылкыд карисьёс асьсэдыз ожгар машиналэн водителе яке наладчикез интыын эскерыны быгатозы. Озьы ик Калашниковлэсь 1970-1980 аръёсы квартираезлэсь экспозицизэ усьтӥзы.

Калашников нимо музеез рос-прос тупатъяны улосвыл коньдэтысь 35 миллион 600 сюрс манет висъязы. Эшшо 40 миллион манет пала выль экспозициослы сётӥзы.

Туннэ Удмурт Элькун Россиысь 95 процентсэ ыбылӥськон тӥрлыкез поттэ, «Калашников» концерн быдэс дуннеысь 30 процентсэ ыбылӥськон тӥрлыкез поттэ. Отын Михаил Тимофеевич Калашниковлэн тыршемез
Ярослав Семёнов, Удмуртиысь кивалтэтлэн тӧроез

Тодэ вайытом, Михаил Калашниковлэн 100 ар тырмонэзлы сӥзем ужрадъёсты Ижкарын конструкторлэн Вормон скверысь бюстэз доры сяська пононэн кутскизы.

Туннэ, 10-тӥ шуркынмонэ, Михаил Тимофеевич Калашниковлэн вордскем нуналаз Ижкарын улӥсьёс солэн Ялан ӝуась тыл дорысь бюстэз доры сяськаос понӥзы.

Калашниковлэн бюстэз доры сяськаос поно

1 фото

Ужрадэ элькун кивалтэтлэн, министерствоослэн но удысэтъёслэн, мер огазеяськонъёслэн ыстэм муртъёссы, карын улӥсьёс но куноос пыриськизы.

Та зэмос праздник. Ижкар, Удмуртия понна гинэ ӧвӧл, быдэс Россия понна но. Соин ик татын, Ижкарын, ми сое одно ик пусйыны кулэ
Ярослав Семёнов, Удмуртиысь кивалтэтлэн тӧроез

Ярослав Семёнов пусйиз, Михаил Калашников юн мылкыд, батырлык, ас ужедлы вань кужымдэ сётон, матысь адями но Атыкай музъем сярысь сюлмаськон ласянь адӟем карымон луэ.

Ми туж данъяськиськомы Михаил Калашниковен, солы луыса Удмуртия но Ижкар сярысь быдэс дунне тодӥз. Шумпотӥсько, сяськаос поныны но быӟдым оружейникез тодэ вайыны сомында адями лыктӥз шуыса
Людмила Корепанова, Ижкарын улӥсь

Тодэ вайытом, Михаил Калашниковлэн вордскемез дырысен 100 ар тырмонлы сӥзьыса, Ижкарын спортъя но лулчеберетъя пӧртэм ужрадъёс ортчозы.

Михаил Калашниковез буре вайизы Ижкарын


Михаил Тимофеевич Калашников вордскиз 1919-тӥ арын 10-тӥ шуркынмонэ Алтай губерниысь Курья черкогуртын. Быдэс дуннелы тодмо автомат (АК) кылдытӥз. Сое Ижысь мотозаводын 1947-тӥ арын поттыны кутскизы.Ачиз Михаил Тимофеевич Ижкаре улыны лыктӥз 1949-тӥ арын. 1971-тӥ арын техника тодосъя доктор ним басьтӥз, 1999-тӥ арын генерал-лейтенант луиз. Улонысь кошкиз Ижкарын 2013-тӥ арын 23-тӥ толсуре

Вуоно арнянуналэ, 10-тӥ коньывуонэ, быдэс дуннелы тодмо ыбылӥськон тӥрлыкез кылдытӥсьлэн Михаил Тимофеевич Калашниковлэн вордскемез дырысен 100 ар тырмоз. Шутэтскон нуналъёсы Ижкарын солы сӥзем пӧртэм ужрадъёс ортчозы. Со сярысь Удмуртиысь тӧролэн но кивалтэтлэн пресс-службазы ивортэ.

9-10 шуркынмонэ «Арена» спорт огъетын нылъёс но пиос пӧлын ӝӧквыл теннисэн шудонъя огъяросси ӵошатсконъёс ортчозы. Турнир 8-тӥ шуркынмонэ кутскиз. Куинь нунал ӵоже ӵошатсконъёс арлыдъя куинь группаосын мынозы: 2002-2004-тӥ аръёсы вордскемъёс, 2005-2007 аръёс вордскемъёс, 2008-тӥ арын но со бере вордскемъёс.

10-тӥ шуркынмонэ:

- 8 час 45 минутэ Архангел Михаиллэн собораз Михаил Калашниковлэн 100 ар тырмонэзлы сӥзем сӥё-дано вӧсяськон ортчоз;

- 11 часын Михаил Калашниковлэн Ялан ӝуась тыл дорысь бюстэз доры сяськаос понозы;

- 12 часын М. Т. Калашниковлэсь нимзэ нуллӥсь музеез тупатъям бере но «Калашников. Траектория судьбы» ялан ужась экспозициез усьтозы. 3-тӥ шуркынмонэ отын «Оружие эпохи Калашникова» адӟытонэз усьтӥзы, со 2020-тӥ арысь тулыспалозь ужалоз. Отын нырысьсэ возьматэмын «ЦНИИточмаш» огазеяськонын эскерон вылысь лэсьтэм 20-лэсь уно пыӵал тӥрлыкъёс, нимысьтыз серийной модельёс: ву улын ыбылӥськон понна ПС, спецназ но ФСО понна «Вал» но «Вихрь» автоматъёс, гранатаен ыбылӥськон «Тишина» но «Канарейка» огъетъёс. Озьы ик учкисьёс Ижысь конструкторъёсын лэсьтэм пыӵал тӥрлыкен тодматскизы. Соос пӧлын ЛА капчи автомат но Геннадий Никоновлэн опытной автоматъёсыз. Со сяна, Россиысь, США-ысь, Евросоюзысь кунъёслэн армиоссылэн ожтӥрлыкъёссы возьматэмын.

- 12 часын Удмуртиысь суредан устолыкъя элькун музейын пиналъёс но егитъёс понна творчествоя «Человек - легенда. Человек – эпоха» улосвылкуспо вожвылъяськонын вормисьёсты пусъёзы; отын ик 14 часын нылпи суредъя «Калашников в судьбе моей страны» вожвылъяськонын вормисьёсты сӥлы карозы;

- 14 часын Удмуртиысь П. И. Чайковский нимо операя но балетъя театрын «Вечер-портрет «Война и Мир Михаила Калашникова» нимо

Читать полностью

7-тӥ шуркынмонэ Ижкарын М. Т. Калашников нимо скверын «Оружейникам Удмуртии, героям трудового фронта Великой Отечественной войны 1941-1945 гг» синпелетэз сӥё-дано усьтон ортчиз. Ужрадэ ивортодэтъя «Удмуртия» агентстволэн корреспондентэз но вуылӥз.

Та композицилэн пуштросэз тодэ кылем суредэз возьматэ – станок дорын сылӥсь нылпиосты. Ми со вакытлы быдэсак тупась образэз, экспозициез, синпелетэз кылдытыны тыршимы.
Валерий Грахов, Ижкарысь техникая кун университетлэн ректорез

Синпелетэз Ижкарысь мотозаводысь егитъёслэн комсомол бригадаысьтызы пиослэн туспуктэмзыя лэсьтӥзы. Со токарной станок азьын сылӥсь куинь ужасьёсты возьматэ. Ужан тӥрлык зэмос – сое Ижкарысь техникая кун университетлэн подвалысьтыз шедьтӥзы. Валерий Граховлэн верамезъя, станок ож вакытысь. Синпелетэз Россиысь суредасьёслэн огазеяськонзылэн ёзчиез Павел Медведев кылдытӥз.

Кулэ вал соосты лэсьтыны, соослэсь шӧдонъёссэс возьматыны. Со огшоры синпелет ӧвӧл ук. Малпасько, та Россиын нырысьсэ, куке урамын таӵе музей
Павел Медведев, синпелетэз кылдытӥсь

Быдӟым Атыкай ож вакытэ Ижкарысь заводъёсын ужам нылпиослэн туспуктэмъёссы

2 фото

Синпелетэз лэсьтӥсьлэн анай-атаез но ӵыжы-выжыосыз ож вакытысь нылпиос луо. «Со мынам матысь адямиосы, соин ик сокем тырши», - вера Павел Медведев

Синпелет пуктыны кичӧлтонэн Ижкарысь техникая кун университет 2018-тӥ арын куарусёнэ Пыӵал тӥрлык лэсьтӥсьёслэн форумазы потӥз. Кылем арын толсуре ӵектосэн выль синпелетъёсъя «Культурный след - 2019» огъяросси вожвылъяськонэ потӥзы. Экспертъёслэн кенешемзы бере синпелет вить вормисьёс пӧлы сюриз. Сое вожвылъяськонэ ӵектэм 550 малпанъёс пӧлысь бырйизы. Синпелетэз грантэн, университетлэн но партнёр луись предприятиослэн коньдонэнызы пуктӥзы.

10-тӥ шуркынмонэ Ижкар пыӵал тӥрлык лэсьтӥсь тодмо конструкторлы Михаил Калашниковлы 100 ар тырмонэз пусъёз.

Пичи Пургаысь ёрос лыдӟетъюртын черкогуртысь юнармеецъёс понна Михаил Калашниковлы вордӥськем дырысеныз 100 ар тырмонлы сӥзем «Калашников-квест» ужрад ортчытӥзы. Со сярысь ивортодэтъя «Удмуртия» агентстволэн корреспондентэзлы ёрос лыдӟетъюртысь шаертодонъя ёзэтысь библиотекарь Асият Фишер вераз.

Ужрадэ Пичи Пургаысь 4-8 классъёсын дышетскисьёс пыриськизы. Соос, ньыль командалы люкиськыса, тямыс станциосты ортчизы. Пиналъёслэсь визьзэс но сыназы, граната лэзьяны, ыбылӥськыны, автомат сэрттыны-бичаны, эм юрттэт сётыны быгатэмзэс но чаклазы, Морзелэн азбукаезъя шифровкаез сэрттыны но куризы. Со сяна, кырӟаса строен ветлыны быгатэмзэс эскеризы.

Шугъясько соос история пумысен. <…> Мае ке но мукетсэ соос туж умой лэсьязы. Тани, шуом, пазл бичаны, яке, шуом, шифровка ми отын азбука Морзеен лэсьтӥм вал. Сое соос туж-туж чаляк быгатӥзы лэсьтыны. Но тани история ласянь соос кӧня ке лябгес
Асият Фишер, Пичи Пургаысь ёрос лыдӟетъюртысь шаертодонъя ёзэтысь библиотекарь

Лыдӟетъюртын ужасьлэн верамезъя, пиналъёс уг тодо, кылсярысь, кызьы Василий Чапаев бырыны шедиз. Азьло аръёсы дышетскемъёс верало ай, сое ыбизы, но со выйиз шуыса, туала нылпиос вертолётэн шуккизы шуыса малпало.

Ужрадэ «Группа советских войск в Германии» огазеяськонысь ветеранъёс но пыриськизы. Соос пиналъёс понна «Солдатские будни» станция дасязы. Ӵапак соос Василий Чапаев сярысь юан но сётӥзы.

Соослэн теорияя юанъёссы вал, <…> со сяна, соос сётӥзы практикая но. Тани, кызьы портянка дӥсяське, мар та таӵе. Шинелез возьмато вал соослы, сое тодоно вал. Кыӵе пӧртэм луо гужемлы но толалтэлы портянкаос, маин соос пӧртэмесь. Туж тунсыко станция вал
Асият Фишер, Пичи Пургаысь ёрос лыдӟетъюртысь шаертодонъя ёзэтысь библиотекарь

Пиналъёс зэмос команда луэмзэс, ог-огзы понна висемзэс, сюлмаськемзэс возьматӥзы.

Соос эшъяськон кусыпъёсынызы туж золэсь. Ог-огзылы юртто. Солы ми туж шумпотӥм. Пичиосыз соос эскерысагес уло. Туж ӟеч сямо нылпиос
Асият Фишер, Пичи Пургаысь ёрос лыдӟетъюртысь шаертодонъя ёзэтысь библиотекарь

Квестэз ортчем бере, ваньзэсты ик ӝукен но чаен куноятӥзы. Ужрадэз нош азьланьтоно шуыса малпанэ вуизы.

Пусъём, ёрос лыдӟетъюртлы ужрадэз дасяны ёрос администрациысь дышетонъя управление, военкомат но «Группа советских войск в Германии» ветеранъёслэн огазеяськонзы юрттӥзы.

Тодэ вайытом, Ижкарысь Кузебай Герд нимо йӧскалык гимназиын быдэс ар «Алангасарлэн пытьыостӥз» шудон мыноз.

6-8 шуркынмонэ Ижысь М. Т. Калашников нимо техникая кун университетын Россиысь вылӥ дышетсконниосысь ожутиськон ӧнеръёсъя студентъёслэн но курсантъёслэн «Калашниковлэн нимыныз» («С именем Калашникова») форумзы ортчоз. Ужрад тодмо конструкторлэн вордскемез дырысен 100 ар тырмонлы сӥземын. Со сярысь Удмуртиысь дышетонъя но тодосъя министерстволэн пресс-службаез ивортэ.

Форуме Рязаньысь, Самараысь, Пермысь, Санкт-Петербургысь, Ковровысь, Челябинскысь, Тулаысь, Пензаысь, Новосибирскысь, Нижний Новгородысь, Москваысь студентъёслэн даслэсь трос командаоссы пыриськозы шуыса чаклало.

Ижкарысь форумлэн ужпумез – оборонно-промышленной огъетысь но армиысь вуоно ӧнерчиосты огазеян, егитъёсты кунлэсь ожутиськонзэ юнматонъя лэчыт ужпумъёсты эскеронлы но сэрттон-пертчонлы дасян, удысысь азьветлӥсьёсын, ог-огенызы вераськыны, экспертъёслы тодосъя ӵектосъёссэс возьматыны, выль тодонлык басьтыны луонлык сётон

Пыриськисьёсты тунсыко ужанрадлык возьма: «Калашников лыдӟонъёс» конференци, выль технологиосын тодматскон но кенешон площадкаос, М. Т. Калашников нимо музее вуылон но мукет.

Ватсалом, ожутиськон ӧнеръёсъя студентъёслэн но курсантъёслэн форумзы Ижкарын кыкетӥзэ радъяське ни. 2018-тӥ арын ИжГТУ Егитъёсын ужанъя федерал агентстволэсь грант утӥз, солы луыса нырысетӥез «Калашниковлэн нимынызы» форум ортчиз. 

Тодэ вайытом, 27-тӥ коньывуонэ Ижкарын пиналъёслэн кырӟанъя ансамбльёссылэн «Катюша» вожвылъяськонзы ортчоз, ужрад озьы ик Михаил Калашников вордскем дырысен 100 ар тырмонлы сӥземын.

27-тӥ коньывуонэ 11 часысен Ижкарын Калык творчествоя элькун юртын (Коммунаръёслэн ульчазы, 363) пиналъёслэн кырӟанъя ансамбльёссылэн «Катюша» вожвылъяськонзы ортчоз. Ужрад Михаил Калашников вордскем дырысен 100 ар тырмонлы сӥземын, ивортэ Удмуртиысь лулчеберетъя министерстволэн пресс-службаез.

Кырӟанъя ӵошатсконэ Можгаысь, Сарапулысь, Воткаысь, Алнаш, Каракулино, Кизнер, Вотка, Кияса, Балезино, Якшур-Бӧдья, Дэри, Кез, Сарапул но Вавож ёросъёсысь академ, калык но эстрада кырӟанъя 25 ансамбльёс вуозы. Пыриськисьёслэн арлыдзы 7-17 арес.

Вожвылъяськонын соос кык кырӟан быдэстозы – атыкай музъемез гажан, вордскем шаерез яратон мылкыдо но асьсэлэн быръемзыя

Конкурсэз Калык творчествоя элькун юрт кырӟан искусство пыр визьнодан дунлыкъёсты азинтон вылысь радъя.

Учкисьёс понна пыронэз эркын.

Тодэ вайытом, 2-тӥ шуркынмонэ удмурт кырӟанъя «Элькуновидение-2019» вожвылъяськонлэн йылпумъян люкетэз ортчоз.

11-тӥ коньывуонэ Ижкарысь М. Т. Калашников нимо скверын 100 кедрапуос мерттозы. Конструкторлэн вордскемез дырысен 100 ар тырмонлы сӥзем ужрадэ Техникая кун университетысь студентъёс, дышетӥсьёс но Ижын улӥсьёс пыриськозы. Со сярысь дышетсконнилэн пресс-службаез ивортэ.

Писпу юнме шорысь быръемын ӧвӧл. Михаил Тимофеевич та писпуэз яратэ вал но трос пол пусйылӥз, сибыр кедр – со вордскем Алтай шаерзэ тодаз возён
Ижысь техникая кун университетлэн пресс-службаез

Со сяна, скверын 600 тюльпанъёс мерттозы. Со выль скверлы но Октябрь ёросын улӥсьёслы Ижкар администрацилэсь кузьым.

Озьы ик ужрадэ «Студент года-2019» йӧскалык премие пыриськисьёс итӥськозы. Со нуналэ студентъёслэн «Интеграл» дворецазы вожвылъяськонлэн улосвыл люкетэзлэн финалэз ортчоз. Удмуртиысь вань ёросъёсысь но каръёсысь студентъёс, эшъяськонзэс возьматыса но Михаил Калашниковез сӥлы карыса, кедрапуос мерттозы.

Ужрад университетлэн 2-тӥ юртэз дорын 11 час 40 минутэ кутскоз. Пыриськыны вань мылкыд карисьёс быгато. 

Тодэ вайытом, Михаил Калашников нимо скверез Ижкарын 25-тӥ куарусёнэ усьтӥзы




Ижкарысь 20 номеро школалы Михаил Калашниковлэсь нимзэ сётозы. Со сярысь кар администрацилэн пресс-службаез ивортэ.

Сыӵе вазиськонэн карысь Историяя но лулчеберетъя синпелетъёсты утёнъя, урамъёслы, пролкаослы но дугдылонниослы ним сётонъя но воштонъя ӧрие школалэн кивалтӥсез Александр Кудрявцев потӥз.

Кар администрацилэн тӧроезлэн воштӥсез, ӧрилэн кивалтӥсез Дмитрий Чистяков верамъя, Михаил Калашников вордскем дырысен 100 ар тырмон аре выль школалы солэсь нимзэ сётон шонер луоз, уката ик дышетсконнилэсь инженер ӧръя ужамзэ лыдэ басьтыса.

Россиын куать дышетон огазеяськонъёс Михаил Тимофеевич Калашниковлэсь нимзэ нулло, оскисько, асьме карамы но сыӵе школа одно ик луыны кулэ
Дмитрий Чистяков, Ижкар администрацилэн тӧроезлэн воштӥсез

Ӧрилэн ёзчиосыз вазиськон понна огкылысь дурбасьтӥзы

Озьы ик ӧри Ижкарысь Михаил Калашников нимо техникая кун университетлэн ректорезлэсь Валерий Граховлэсь ыбылӥськон тӥрлык кылдытӥсьлэсь нимзэ нуллӥсь сквере «Оружейникам Удмуртии, героям трудового фронта в годы Великой Отечественной войны 1941-1945» синпелет пуктыны ӵектонзэ умоен лыдъяз. Синпелетлэн ӵектосэз «Культурный след» огъяросси конкурсын вить вормисьёс пӧлы пыриз. Али сое лэсьтон бордын ужъёс мыно. 

Тодэ вайытом, кемалась ик ӧвӧл ИжГТУ вӧзын Михаил Калашниковлэсь синпелетсэ усьтӥзы, нош 25-тӥ куарусёнэ скверез сӥё-дано усьтон ужрад ортчиз.

Ижкарын Михаил Калашников нимо сквер усьтӥзы. Сӥё-дано ужрадэ ивортодэтъя «Удмуртия» агентстволэн корреспондентэз но вуылӥз.

Калашников нимо скверез сӥё-дано усьтӥзы Ижкарын

7 фото

Скверез 25-тӥ куарусёнэ Ижкарысь техникая кун университетлэн куинетӥ корпусэз дорын усьтӥзы. Сое пыӵал тӥрлык лэсьтӥсьлэн вордӥськем дырысеныз 100 ар тырмонлы сӥзизы.

Ми кык ар ӵоже та нуналлы дасяськимы. Университетмес азинтон понна ми туж кулэ луись вамыш лэсьтӥм шуыса малпасько
Валерий Грахов, Ижкарысь техникая кун университетлэн ректорез

Мер интывылэз «Жильё и городская среда» йӧскалык ӵектослэн «Формирование комфортной городской среды» ӵектосэз улсын умоятӥзы.

Кар коньдэтысь 16 миллион 500 сюрс манет сётӥзы, эшшо 29 миллион манетсэ университет висъяз

Скверлэн оглом быдӟалаез – 25 сюрс квадрат метр, со пӧлысь 11 сюрс квадрат метрез брусчаткаен шобыртэмын. Интывылэ турын кизизы, велосипедистъёслы сюресъёс лэсьтӥзы но ляб адӟисьёслы плитка понӥзы, видеокамераос пуктӥзы но 200 машиналы чаклам парковка радъязы. Озьы ик сквере шунтӥськись ӟусъёс но 90 югдытӥсь юбоос вань. Нош 30-тӥ гудырикошконэ отын Калашниковлы синпелетэз усьтӥзы.

Куке мон студент вал но Ижкарысь механикая институтлэн куинетӥ огъяулоннияз улӥ, ми ӵем гинэ татчы ураме поталлям, но татын таӵе умой инты ӧй вал, кудӥныз али данъяськыны луэ
Олег Бекмеметьев, Ижкарлэн тӧроез

Сӥё-дано ужрадын студентъёс но Пинал лётчикъёслэн школаязы ветлӥсь пиналъёс творчествоя номеръёссэс возьматӥзы.

Озьы ик ужрад улсын Ижкарысь 5, 9, 35 но 70 номеро школаосысь пиналъёсты «Крылатая пехота» классэ пыртон ортчиз. 

Ижысь техникая кун университетысь скверын ыбылӥськон тӥрлык кылдытӥсьлы Михаил Калашниковлы синпелет усьтӥзы. Ужрадэз конструкторлэн вордскемез дырысен 100 ар тырмонлы тупатӥзы.

Туннэ асьмеос вакытъёсты, ужрадъёсты но поколениосты герӟаськомы. <…> Студентъёслэн городоксылэн интывылаз быдӟым конструкторлы синпелет усьтӥськомы
Валерий Грахов, М. Т. Калашников нимо ИжГТУ-лэн кивалтӥсез

Калашниковлы синпелетэз усьтон


Синпелетэз университетлэн нырысетӥ юртэз вӧзы пуктӥзы, азьвыл отын конструкторлэн бюстэз сылӥз. Нош сое выльдӥзы но ИжГТУ-лэн валтӥсь юртаз выжтӥзы.

Конструкторлэн нылыз Елена Калашникова Удмуртиысь вань оружейникъёслэсь аллеязэс лэсьтыны ӵектӥз, соос пӧлын Евгений Драгунов, Геннадий Никонов.

Татын Михаил Тимофеевич – со вань оружейникъёсты возьматэ, дыр. Сӥземе потэ, асьме карын зэмзэ но ружейникъёслэн скверзы мед кылдоз шуыса, асьмеос оружейникъёслэн карзы бере, со одно ик луыны кулэ. Оружейник, кудӥзлы усьтӥмы синпелет, егитъёслы артэ султыны мылкыд сётылӥз
Елена Калашникова, конструкторлэн нылыз

Михаил Калашников котькуд адями понна аслаз – эш, атай, дышетӥсь, конструктор, нимо-дано адями, герой. Нош синпелет котькудӥз понна шудо тодметъёс кылдытыны юрттоз.

Ыбылӥськон тӥрлык кылдытӥсьлы синпелет

11 фото

Синпелет бронзалэсь лэсьтэмын, секталаез 400 килограмм. Удмуртиысь скульптор Павел Медведев сое кылдытон бордын ӝыны ар пала ужаз. Синпелет конструкторез студентъёс доры ветлон дырысьтыз возьматэ.

Ваньзылы тодмо адямиез лэсьтыны котьку секыт но дано. Мон Михаил Тимофеевичен тодмо вал. Мукет ласянь, ужаны капчи вал, угось мынам умой тодэ ваёнъёсы кылемын
Павел Медведев, скульптор

Синпелет котырысь скверез но умоято. Солы 10 сюрс квадрат метр ожо но 11 сюрс квадрат метр брусчатка быдтӥзы. Котыраз 250 интылы парковка лэсьтозы, 100 фонарьёс, 30 видеокамераос пуктозы. Сквере горд, тӧдьы но лыз тюльпанъёс мерттозы. Сӥё-дано усьтон Пыӵал тӥрлык поттӥсьлэн нуналаз, 19-тӥ куарусёнэ, ортчоз.

Милям быгатонлыко студентъёсмы скверлы трос выльзэ ӵектӥзы, али ми соосты быдэстыны тыршиськомы. Со витьымтэ кузьым луоз
Валерий Грахов, Ижысь М. Т. Калашников нимо техникая кун университетлэн кивалтӥсез

Тодэ вайытом, 18-19 куарусёнэ Ижкарын Россиысь пыӵал тӥрлык поттӥсьёслэн форумазы ортчоз, отчы 1 сюрслэсь трос адями пыриськоз.

18-19 куарусёнэ Ижкарын Россиысь пыӵал тӥрлык поттӥсьёслэн форумазы 1 сюрслэсь трос адями пыриськоз. Со сярысь Удмуртиысь тӧролэн но кивалтэтлэн пресс-службазы ивортэ.

Форумын оборонно-промышленной огъетысь лэчыт ужпумъёсты эскерозы, со пӧлын предприятиосын ужазинлыкез ӝутонэз но вузпӧрез шырыт радъян амалъёсты пыӵатонэз, озьы ик вузкаронэз паськытатон но кулэяськонэз будэтон понна туала ужан амалъёсты

Ужрадэ тӧрлык ёзэсъёслэн ыстэм муртъёссы, оборонно-промышленной огъетысь предприятиослэн кивалтӥсьёсы но ӧнерчиос, промышленной дизайнъя но туризмъя ӧнерчиос. Форуме Россиысь промышленностья но вузкаронъя министр Денис Мантуров, экономикаез азинтонъя министрлэн воштӥсез Пётр Засельский, Ужазинлык удысын компетенциосъя федерал центрлэн кивалтӥсез Николай Соломон, Кун Думаысь оборонно-промышленной огъетысь огазеяськонъёсты азинтыны эрикрадэн юрттонъя ӧрилэн тӧроез Владимир Гутенёв но мукетъёсыз. Азьвылгес Удмуртилэн тӧроез форуме Россилэсь азьмуртсэ Владимир Путинэз ӧтиз.

Удмуртилэн кивалтэтэз Пыӵал тӥрлык поттӥсьлэн нуналзэ пусъёнлы паськыт ужанрадлык дасяз. Отчы удысъя ужен герӟаськымтэ ужрадъёс но пыризы. Кылсярысь, Ижкарын выльдэм Шор площадез но пиналъёслы М. Т. Калашников нимо технопаркез усьтозы, отчы тӥрлык «Дышетон» йӧскалык ӵектос улсын басьто.

100 ар тырмонэз пусъён улсын карын улӥсьёс но куноос понна Ижкаретӥ «Ижевчанин – Калашников» турмаршрут усьтэмын луоз, со улсын М. Т. Калашниковлэн улонэныз но уженыз герӟаськем пусйымон интыосы вуылон чакламын. Ижкарын 20-лэсь трос пӧртэм ужрадъёс ортчозы, кызьы оборонно-промышленной огъетысь ӧнерчиос понна удысужлыко ужрадъёс, озьы ик карын вань улӥсьёс но куноос понна. Ми тыршимы, Пыӵал тӥрлык поттӥсьлэсь нуналзэ пусъёнэ котькуд адями мед пыриськоз шуыса
Александр Бречалов, Удмуртилэн тӧроез

Чакланъёсъя, Пыӵал тӥрлык поттӥсь нуналзэ пусъён ужрадъёсы оглом 1 миллион 500 сюрс пала адями пыриськоз

Тодэ вайытом, Пыӵал тӥрлык лэсьтӥсьлэсь нуналзэ пусъён улсын Ижкаре вылӥ пилотажъя «Русские витязи» группа вуоз

Ыбылӥськон тӥрлык кылдытӥсьлэн Михаил Калашниковлэн вордскемез дырысен 100 ар тырмонлы сӥзьыса, Удмуртиысь архивъёс «М. Т. Калашников: страницы жизни и деятельности в архивных документах (к 100-летию со дня рождения)» интернет-адӟытон дасязы. Со сярысь улосвыл тӧролэн но кивалтэтлэн пресс-службазы ивортэ.

Адӟытонын Удмурт Элькунысь кун архивъёслэн 22 фондъёсысьтызы 80-лэсь трос кагаз вылын ужкагазъёс но туспуктэмъёс возьматэмын
Удмуртиысь тӧролэн но кивалтэтлэн пресс-службазы

Экспонатъёс пуштроссыя тямыс люкетлы люкемын.

Нырысетӥез Михаил Калашниковлэн улон сюресэныз, ыбылӥськон тӥрлык кылдытонын нырысетӥ вамышъёсынызы тодматэ, Быдӟым Атыкай оже пыриськемез сярысь вера.

Кыкетӥез АК-47 автоматэз кылдытонлы сӥземын. Отын конструкторлэн ожтӥрлык бордын ужаменыз герӟаськем туж трос ужкагазъёс возьматэмын.

Мукет люкетъёсыз Михаил Тимофеевичлэн СССР-ысь Выл Кенешын ужамез, кунысь но дуннеысь тодмо адямиосын эшъяськемез сярысь верало.

Адӟытонэ пырисьёслы одно ик тунсыко луоз сизьыметӥ люкетэз, отын конструкторлэн шутэтскон дыръяз семьяеныз, эшъёсыныз, пӧйшуран но чорыган интыын лэсьтэм туспуктэмъёс поттэмын

 

Санкт-Петербургысь Артиллери музейын Ижкарысь ожтӥрлык лэсьтӥсьлы 100 ар тырмонлы сӥзем «Калашников – человек, оружие, легенда» выльдэм возьматон усьтӥськоз. Со сярысь ужъюртлэн пресс-службаез ивортэ.

Адӟытонэз сӥё-дано усьтон 24-тӥ пӧсьтолэзе 12 часын ортчоз. Отчы М. Т. Калашников нимо улосвыл фондлэн кивалтӥсез, конструкторлэн нылыз Елена Калашникова вуоз, озьы ик Россиысь Обороная министерствоысь но промышленностья предприятиосысь ыстэм муртъёс пыриськозы.

Табере возьматон кык висъетын интыяськоз. Вань мылкыд карисьёс тодмо конструкторен герӟаськем ожтӥрлык бичетъёсты, аслэсьтыз арбериоссэ, ужкагазъёссэ, туспуктэмъёссэ адӟыны быгатозы

Нош «Дары М.Т. Калашникова музею» висъетын пӧртэм кунъёслэн азьмуртъёссылэн но кунъёсысь нимысьтыз делегациослэн пӧртэм вакытъёсы конструкторлы кузьымъёсынызы тодматскыны луоз. Озьы ик возьматонын Михаил Тимофеевичлэсь огшоры улоназ кутэм арбериоссэ адӟыны луоз. Туннэ нуналлы музейын 160-лэсь ятыр экспонатъёс лыдъясько.  

Тодэ вайытом, Пыӵал тӥрлык поттӥсьлэн нуналэзлы Ижысь техникая кун университет вӧзын Калашников нимо сквер кылдоз.

Пыӵал тӥрлык поттӥсьлэн нуналэзлы Ижысь техникая кун университет вӧзын Калашников нимо сквер кылдоз. Отын тодмо конструкторлэн синпелетэз сылоз. Со сярысь Ижкар администрацилэн пресс-службаез ивортэ.

Лэсьтӥськон ужъёслы оглом 45 миллион манетлэсь трос коньдон кутозы. Со пӧлысь 29 миллион манетсэ техникая университет висъя.

Бадӟым интые брусчатка тырозы, турын кизёзы, югдытон понна 76 юбо пуктозы. Скверын шутэтскыны ӟусъёс сылозы, отын телефонэз зарядить карыны но вай-фай борды итӥськыны луоз. Студентъёслы гинэ ӧвӧл, карын улӥсьёслы но туж чебер сквер пӧрмоз
Валерий Грахов, Ижысь М. Т. Калашников нимо техникая кун университетлэн кивалтӥсез

Та дыре Михаил Калашниковлы синпелет бордын ужало. Со куарусёнлы дась луоз но университетлэн нырысетӥ корпусэз азьын сылоз.

Озьы ик Пушкаосын площадез выльдозы. Отын тротуаръёсысь асфальтобетонэз брусчаткалы воштозы, выль светильникъёс пуктозы.

Скверез умоятонлы 16 миллион 400 сюрс манет кар коньдэт висъяз. Со университет вӧзын Студентъёслэн но Вормонлы 30 ар ульчаосын машина пуктон интыос лэсьтыны, тыл кыскыны, кенер пуктыны мыноз. Со сяна, Вормонлы 30 ар ульчаын тротуаръёсты тупатъялозы, со паськытгес луоз.

Вань ужъёсты 1-тӥ куарусёнлы йылпумъяны кулэ. Ужъёсты «Жильё и городская среда» йӧскалык ӵектослэн «Формирование комфортной городской среды» ӵектосэзъя быдэсъяло.


23-тӥ куартолэзе Ижкарын тодмо конструкторлэн Михаил Калашниковлэн улон-вылонэз, соин кылдытэм ожтӥрлык, озьы ик Быдыӟым Аткай ожлэн историез сярысь верась конвертъёсын, маркаосын но коньдонэн адӟытон усьтӥськоз. Филателистъёслэн огъяросси адӟытонзы Калашников нимо музее интыяськоз. Со сярысь Россиысь почталэн элькунъя ёзэтэз ивортэ.

«Россилэн данэз» («Слава России») адӟытон АК-47 автоматэз кылдытӥсьлэн 100 ар тырмонэзлы сӥземын. Отын быдэс кунысь филателистъёс но нумизматъёс асьсэ бичетъёссэс возьматозы.

15 часын адӟытонэз усьтон улсын маркатэм почта карточкаос вылэ нимысьтыз та ужрадлы лэсьтэм штемпелен пус пуктылозы.

«Россилэн данэз» адӟытон 22-тӥ инвожоозь ужалоз. 

Михаил Тимофеевич Калашниковлэн 100 ар тырмонэзлы Ижкарын литературая но кылбуретъя конкурс ортче. Со сярысь кар администрацилэн пресс-службаез ивортэ.

Конкурсэ элькунысь вань мылкыд карисьёс пыриськыны быгато: пичиез но, мӧйыэз но. Конкурсэ азьвыл нокытын поттылымтэ кылбуръёсты но проза амалэн гожъямъёсты (эссеос, зарисовкаос) куто.

Чаклам номинациос:

  • «Великий оружейник» - М. Т. Калашниковлы сӥзем произведениос;
  • «Ижевск – оружейная столица» - ожгар тӥрлык поттӥсь предприятиосын ужасьёслэн Ижкарын улӥсьёс но кар сярысь, карлэн Быдӟым Атыкай ожын вормон понна тыршемез сярысь гожъямъёссы;
  • «Мастер жанра» - пӧртэм жанръёсын гожъямъёс. 

Конкурсэ пыриськыны куриськонъёсты 1-тӥ шуркынмонозь куто. Соосты konkurs-poetov@mail.ru электрон почтае келяно яке гожтэтэн таӵе адресъя:  Ижкар, Ворошилов нимо урам, 1а, УРОО «Центр инвалидов – ветеранских силовых структур «Честь».

Тодэ вайытом, Михаил Калашниковлэн котырес лыдпусэзлы сӥзьыса, коньывуонозь Удмуртиын «Армиысь туспуктэмъёсын альбом. Мон Калашников автоматэн служба нуи» ужрад мыноз

Удмуртиын «Армиысь туспуктэмъёсын альбом. Мон Калашников автоматэн служба нуи» («Фотографии из армейского альбома. Я служил с автоматом Калашникова») (6+) ужрад кутскиз. Кызьы ивортӥз «ВКонтакте» мерлыко вотэсысь бамаз улосвылысьтымы лулчеберетъя министр Владимир Соловьёв, ужрад конструкторлэн вордскем дырысеныз 100 ар тырмонлы сӥземын.

Акцие пыриськыны капчи: со понна ас туспуктэмъёсты пӧлысь армиын яке флотын службадэс нуон вакытэ лэсьтэм туспуктэмдэс быръёно но «Я служил с автоматов Калашникова» хештэген яке гожтэмен мерлык вотэсъёсы пуктоно, DMB2019@museum-mtk.ru почтае келяно но пыриськисьлэсь анкетазэ быдэстоно.

Люкаськем туспуктэмъёслэсь «Армиысь туспуктэмъёсын альбом. Мон Калашников автоматэн служба нуи» нимысьтыз альбом кылдытозы.

Ужрадэ котькуд мылкыд карись пыриськыны быгатэ.

Тодэ вайытом, Ижкарын Михаил Калашниковлы синпелет но конструкторлэсь нимзэ нуллӥсь сквер кылдозы

Удмуртиын Михаил Калашниковлэн вордскемез дырысен 100 ар тырмонэз пусъён улосвыл ужанрадылкез шараязы. Отчы 83 ужрадъёс пыризы, ивортэ элькун тӧролэн но кивалтэтлэн пресс-службазы. Ужрадлыке воштонъёс но ватсанъёс пыртыны быгатозы на.

Тодмо конструкторлэн котырес лыдпусэзлы сӥзем ужрадъёс но акциос быдэс Россиын ортчозы. Юбилеез пусъён борды Алтай шаер, Москва но Санкт-Петербург итӥськизы ни.

Михаил Тимофеевич Калашниковлэн вордскемез дырысен 100 тырмонлы сӥзем ужрадъёс 30 муниципал кылдытэтъёсын ортчозы, ваньмыз 350-лэсь трос сыӵе ужрадъёс чакламын. Тужгес паськытъёсыз соос пӧлысь улосвыл ужранрадлыке пыризы
Александр Бречалов, Удмуртилэн тӧроез

Михаил Калашниковлэсь ужъёссэ но вормонъёссэ тодын возён понна М. Т. Калашников нимо музеез рос-прос тупатъяны чакламын. Юбилейлы сӥзем ужрадъёс пӧлысь тросэз изобретательстволы, конструированилы но выль технологиослы сӥземын луоз. Одӥгез валтӥсь ужрад луоз «Техно-Арт Калашников» улосвылкуспо хакатон (разработчикъёслэн форумзы). 2019-тӥ арын Удмуртиын мерлыко но спорт огъетъёсты усьтозы. Соос пӧлын – Ижкарын нылпиослы М. Т. Калашников нимо технопарк но Ижысь техникая кун университетлэн Воткаысь ёзэтэз бордын пинал конструкторлэн школаез.

Кызьы азьвылгес ивортэмын вал, валтӥсез ужрад Пыӵал тӥрлык поттӥсьлэсь нуналзэ пусъён луоз. Ижкаре тӧрлык ёзэсъёслэн но бадӟым компаниослэн ыстэм муртъёссы, пыӵал тӥрлык поттӥсь предприятиослэн кивалтӥсьёссы но ӧнерчиоссы, озьы ик та удсыны ужась кунгож сьӧрысь куноос лыктозы, ваньмыз 1 сюрслэсь трос адями. Тодэ вайытом, Удмуртилэн тӧроез ужрадэ Россилэсь азьмуртсэ Владимир Путинэз но ӧтиз

Ижкарын улӥсьёслы та нуналлы кузьым луыны кулэ быдэсак выльдэм Шор площадь. Отын ужъёс кӧня ке толэзь мынозы. Тодэ вайыто, ӵектос туала дизайнъя, кар вӧлметэз радъян куронъёсъя лэсьтэмын, нош валтӥсез – калыкен соглаштэмын
Александр Бречалов, Удмуртилэн тӧроез

Озьы ик ар ӵоже спортъя ужрадъёс ортчозы, соос пӧлын киберспортъя ӵошатскон, хоккеен шудонъя М.Т. Калашников нимо элькун турнир но биатлонъя Россилэн кубокезлэн люкетэз «Ижевская винтовка».

Со сяна, тулыс Ижкарын улӥсьёс но куноос понна выль турмаршрутъёс усьтозы: «Ижевск – оружейная столица России» но «Ижевчанин – Калашников», соос конструкторлэн улонэныз но уженыз герӟаськем интыостӥ ортчозы.

Выль турмаршрутъёсын тунсыкъяськон али ини бадӟым, соос пӧлын элькунысь предприятиосы – «Ижсталь», «Калашников» концерн, «Аксион-холдинг» но мукетъёсыз. Маршрутъёс юбилей ар улсын кутско, но азьланяз но мыло-кыдо азинтӥськозы
Александр Бречалов, Удмуртилэн тӧроез

Михаил Калашниковен Удмуртиын гинэ ӧвӧл, мукет улосвылъёсын но тодматон вылысь интыысь интые ветлӥсь «Калашников: солдат, конструктор, легенда» адӟытон дасямын но конструкторлэн онлайн-музеез кылдытэмын луоз,

Читать полностью
Наверх
Вниз