Ижкар-1 °C
22 -тӥ коньывуон 2020 Покчиарня
18+

Ижкарын В, Г. Короленко нимо театрлэсь юртсэ быдэсак выльдон понна устозэ фор-эскиз ӵектосэз быръёнъя вожвылъяськонлы йылпумъянъёс лэсьтӥзы. Со сярысь Удмуртиысь лэсьтӥськонъя, жилищно-коммунальной возёсъя но дыкужымъя министр Дмитрий Сурнин «Фейсбук» мерлыко вотэсысь бамаз ивортӥз.

Солэн кылъёсызъя, вожвылъяськонэ пыриськисьёс азе секыт ужпум пуктэмын вал: юртлэсь азьзэ, архитектуразэ, пуштроссэ утьыса, солэсь быдӟалазэ будэтыны.

Конкурсэ пыриськисьёс пӧртэм амалъёс возьматӥзы, со пӧлын азьвыл театрлэн юртэз вылэ этажъёс ватсан, озьы ик али юрт борды эшшо одӥгзэ пуктон. Нимысьтыз чакламы, кызьы со ваньмыз ог-огеныз тупалоз
Дмитрий Сурнин, Удмуртиысь лэсьтӥськонъя, жилищно-коммунальной возёсъя но дыкужымъя министр

Россиысь архитекторъёслэн огазеяськонзылэн улосвыл ёзэтэныз радъям конкурс 2019-тӥ арын шуркынмонэ кутскиз. Радъясьёслы Ижкарысь, Москваысь, Казаньысь, Нижний Новгородысь, Братскысь, Калининградысь, Костромаысь, Ханты-Мансийскысь, Екатеринбургысь, Воронежысь коллективъёслэсь, архитектурая бюроослэсь но нимаз ужасьёслэсь 17 ӵектонъёс вуизы.

Ужъёсты йӧскалык политикая но лулчеберетъя министръёс, улосвыл кивалтэт бордын ужась лэсьтӥськонъя управленилэн кивалтӥсез, Россиысь архитекторъёслэн огазеяськонзылэн улосвыл ёзэтэзлэн кивалтӥсез, архитектурая бюроослэн ыстэм муртъёссы дунъязы.

1-тӥ инты - Ижкарысь архитектурая «CUBICA» бюро

Архитектурая «CUBICA» бюролэн ӵектосэз

2 фото

2-тӥ инты – Казаньысь авторъёслэн коллективзы

2-тӥ инты - Казаньысь авторъёслэн ӵектоссы
Фото: tehne.com ©

3-тӥ инты – Ижкарысь Виталий Яковицкий

3-тӥ инты - Ижкарысь Виталий Яковицкийлэн ӵектосэз
Фото: tehne.com ©

Ваньзы соос коньдон кузьым сётозы.

Ми понна валтӥсез, со юртэз быдэсак выльдонлэн концепциез, кудӥз вормисьёслэн ӵектосъёссылэн эскизъёссылы инъет луиз. Со инъет, кудӥз азьвыл театрез выльдон ӵектосэз дасяны кутэмын луоз
Дмитрий Сурнин, Удмуртиысь лэсьтӥськонъя, жилищно-коммунальной возёсъя но дыкужымъя министр

Тодэ вайытом, Короленко нимо театрлэн юртаз Удмурт лулчеберетъя центр усьтыны малпало, яке сое Лулчеберетъя Короленко нимо центр шуыса ниманы быгатозы. Нимызъя пумкылъян кутымтэ на. Нырысь юртэз, тупатъяны вераськизы, собере сэрттыны но выльзэ пуктыны дунтэмегс луоз шуыса веразы. Кылем арын шуркынмонэ Удмуртилэн тӧроез юртэз уз сэрттэ, рос-прос тупатъялозы но выльдозы шуыса пусйиз. 

Ижкарысь К. Маркс нимо ульчаысь Короленко нимо театрлэсь азьвыл юртсэ уз сэрттэ. Со сярысь Удмуртилэн тӧроез Александр Бречалов вераз.

Мукет пумкылъян кутӥмы – ум сэрттэ, рос-прос тупатъялом, выльдом. Выль юрт пуктыны милем коньдон висъязы ни, ми сое 2020-тӥ арын пуктыны кутскысалмы. Табере ми выль ӵектос лэсьтомы но федерацилэсь выльдон ужъёслы коньдон куром
Александр Бречалов, Удмуртилэн тӧроез

Тодэ вайытом, театрлэн азьвыл юртаз Удмурт лулчеберетъя центр интыяны пумкылъян кутэмын. Нырысь ик юртэз быдэсак выльдыны вераськизы вал, собере сэрттыны малпазы. Но туэ гудырикошконэ ортчытэм котырес ӝӧк бере Удмуртиысь Мер палата юртэз тупатъяны ӵектӥз. Лэсьтӥськонэз 450-500 миллион манет тыр дунъязы вал, выльдон ужъёс дунтэмгес уз усе шуыса чаклало.

Ижкарысь Драмая Короленко нимо театрлэсь азьвыл юртсэ туэ пӧсьтолэзе сэрттыны малпало. Интыяз Удмурт лулчеберетъя центр пуктозы. Со сярысь журналистъёслы Удмуртиысь лэсьтӥськонъя, жилищно-коммунальной возёсъя но дыкужымъя министр Дмитрий Сурнин вераз.

Милемлы кунлыклэн 100 ар тырмонэзлы вуттоно – со вуоно арын шуркынмонэ. Ми выль туала юрт пуктыны кулэ. Ӵектос дасян йылпумъяське ни. Лэсьтӥськонэз таяз арын кутскомы ни – ми фундамент кисьтыны кулэ
Дмитрий Сурнин, Удмуртиысь лэсьтӥськонъя, жилищно-коммунальной возёсъя но дыкужымъя министр

Юрт 65 процентлы вужмемын. Короленко нимо выль центрлэн ӵектосэз юнматэмын ни. Юрт чебер но йӧно адӟиськоз. Быдӟалаез 6 сюрс 300 квадрат метр луоз.

Проект Центра культуры им. Короленко
Лулчеберетъя Короленко нимо центрлэн вылтусыз (ӵектос) Фото: Лэсьтӥськонъя министерство ©

Чакланъёсъя, ӵектослэн дуныз 450-500 миллион манет. Лэсьтӥськонлы 81 процентсэ федерал коньдэт висъялоз, 19 процентсэ – элькун.

«Удмуртгражданпроектлэн» йылсанкылэзъя юрт уже кутымон ӧвӧл, куашкан калэ вуэмын но сое сэрттыны кулэ. <…> Концертъёс но адӟытонъёс радъян интылы кулэяськон Удмуртиын бадӟым бере, лулчеберетъя центр пуктон сярысь пумкылъян кутэмын. Инъет луись огазеяськон «Айкай» театр луоз, озьы ик «Удмурт Кенеш» мер огазеяськон
Анна Боталова, Удмуртиысь ваньбур кусыпъёсъя министр

Пусъём, выль ужъюртлэн нимыз пумысен пумкылъян кутымтэ на. Кызьы азьвылгес вераз Удмуртиысь тӧролэн но кивалтэтлэн администрацизылэн кивалтӥсез Сергей Смирновен, центр Удмуртиез но удмурт калыкез возьматӥсь инты луыны кулэ. 

Улосвыл кивалтэтын Ижкарын Удмурт лулчеберетъя центр пуктон пумысен кенешон ортчиз. Удмуртиысь тӧролэн но кивалтэтлэн администрацизылэн кивалтӥсеныз Сергей Смирновен ортчытэм пумиськонэ удмурт движенилэн азьветлӥсьёсыз, элькун но кар тӧрлыкъёсысь, улосвылысь архитекторъёслэн огазеяськонысьтызы ыстэм муртъёс пыриськизы. Со сярысь тӧролэн но кивалтэтлэн пресс-службазы ивортэ.

Азьвыл ортчем калыкен кылзонъёслы луыса центрез тырмытонъя учкет (концепция) кылдытэмын. Со сяна, ӧнерчиосын юртлэн ӟечлыкезъя экспертиза лэсьтэмын.

Лулчеберетъя центр кылдытонъя малпан туннэ ӵектослы кельше ини. Ӵектос лэсьтонъя конкурс ортчиз, отын архитектурая «Группа А» мастерской вормиз. Возьматэм ӵектос калыкын споръяськон ӝутӥз, лулчеберетъя центрлы юртэз быдэсак выльдон яке выль юрт пуктон пумысен пӧртэм малпанъёс вал
Сергей Смирнов, Удмуртиысь тӧролэн но кивалтэтлэн администрацизылэн кивалтӥсез

Элькун кивалтэтын та уже вань пыриськисьёсты люканы но лэсьтӥськон ласянь пӧртэм малпанъёсты эскерыны пумкылъян кутӥзы. Кенешонэ пыриськемъёс соглаш луиз, юрт уже кутӥськыны кулэ ӧвӧл ини, со кышкытлыке вуттыны быгатоз. Солэн интыяз Ижкарын улӥсьёс но, быдэс Удмуртия понна но данъяськымон выль юрт пуксьыны кулэ.

Выль юртлэн ӵектосэз Архитекторъёслэн союзэнызы но калыкен валче дасямын луоз. Центрлэн эскизэз но пушкыз Удмуртиысь лулчеберетлэн сяме пырем ёзнэтъёс (элементъёс) вылэ, озьы ик архитектурая но карез лэсьтонъя азинлыко ужан амалъёс вылэ пыкъяськыса лэсьтэмын луоз.

Ӵектосын азьвыл В. Г. Короленко нимо театрлэн но тусыз кылёз.

Лулчеберетъя Короленко нимо центр зэмзэ но удмурт лулчеберетлэн шорсюлмыз луыны кулэ шуыса чакламын, со тросгес туристъёсты мед кыскоз, узыр удмурт лулчеберет сярысь кунамы гинэ ӧвӧл, кунгож сьӧрын но мед тодозы. Лулчеберетъя центре фольклор кырӟанъя но эктонъя «Айкай» театр одно ик кыльыны кулэ. Оглом, татын пӧртэм студиос но кружокъёс луыны кулэ, со пӧлын нылпиослы. Валтӥсез – со Удмурт Элькунэз но удмурт калыкез возьматон. Та центр элькунамы ортчись пӧртэм ужрадъёс понна одӥгез валтӥсь инты луыны быгатысал
Сергей Смирнов, Удмуртиысь тӧролэн но кивалтэтлэн администрацизылэн кивалтӥсез

Сергей Смирнов Удмуртиысь Лэсьтӥськонъя, жилищно-коммунальной возёсъя но дыкужымъя министерствоез ӵектос кылдытыкузы кенешонлэсь пумкылъянъёссэ но Архитекторъёслэн союззылэсь но мер огазеяськонъёслэсь малпанъёссэс лыдэ басьтыны куриз.

Куке визуализациен, валэктонъёсын огъя ӵектос дась луоз, сое калыклы возьматоно – сайтъёсы поттоно, ивортодэт вӧлмытӥсьёс пыр адӟытоно. Та ӵектос возьматэмез но со сярысь вераськемез кулэ каре
Сергей Смирнов, Удмуртиысь тӧролэн но кивалтэтлэн администрацизылэн кивалтӥсез

Тодэ вайытом, Азьвыл В. Г. Короленко нимо театрлэн юртаз Удмурт лулчеберетъя центр пуктон сярысь юан кык ар талэсь азьло Удмуртилэн тӧроезлэн ужзэ огдырлы быдэсъясьлэн Александр Бречаловлэн «Удмурт Кенеш» огазеяськонлэн азьветлӥсьёсыныз пумиськоназ ӝутэмын вал. 2011-тӥ арысен юрт ӧжытэзтэк буш сылэ. Та дыре отын кырӟанъя но эктонъя «Айкай» театр но Йӧскалык лыдӟетъюртлэн одӥг ёзэтэз гинэ интыясько. Юрт рос-прос тупатъямез кулэ каре. Соку «Удмурт Кенешлэн» ёзчиосызлэсь ӵектонзэс элькун тӧрлыкъёс умоен лыдъязы.

Читать полностью

Удмуртилэн тӧроез Александр Бречалов 4-тӥ южтолэзе Россиысь лулчеберетъя министрен Владимир Мединскиен пумиськылыкуз Ижкарын Удмурт лулчеберетъя центр пуктон ужпумез ӝутӥз. Со сярысь улосвыл тӧролэн но кивалтэтлэн пресс-службазы ивортэ.

Кивалтӥсьёс «Культура» йӧскалык ӵектос но Удмуртилэн кунлыкезлы 100 ар тырмонэз пусйыны дасяськон улсын элькунын лулчеберетъя юртъёсты пуктон но быдэсак выльдон луонлыкъёс сярысь вераськизы.

Александр Бречалов министрлы Ижкарын Удмурт лулчеберетъя центр кылдытон сярысь вераз. Сое В. Г. Короленко нимо драмая ӟуч театрлэн азьвыл юртэз интые пуктыны чакламын, али отын фольклор кырӟанъя но эктонъя «Айкай» театр ужа.

Ар кутсконын Удмуртиысь кивалтэт Центр пуктонэз инвестициосъя адресной федерал программае пыртон понна ужкагазъёсты Россиысь лулчеберетъя министерствое лэзиз. Куриськонэз умоен лыдъязы ке, лэсьтӥськон федерал коньдэт чотын, элькун коньдэтысь уксё ватсаса, мыноз.
Удмуртиысь тӧролэн но кивалтэтлэн пресс-службазы

Александр Бречалов Владимир Мединскиез Удмуртилэн куриськонэзлы дурбасьтыны куриз.

Озьы ик лулчеберетъя объектъёсты быдэсак выльдон ужпумез ӝутӥзы. Кылсярысь, «Культура» йӧскалык ӵектос улсын Удмуртиысь Драмая ӟуч театрлэн буш интыосаз выль ужъюрт – Пинал учкисьлэсь театрзэ – кылдытыны.

Тодэ вайытом, Удмуртиысь лулчеберетъя министр Владимир Соловьёв азьвылгес вераз вал, Пинал учкисьлэн театрезлы шуыса юртэз выльдон ужъёсты 2020-тӥ арын кутскозы.

Тодэ вайытом, нырысь ик Удмурт лулчеберетъя центр улэ драмая ӟуч театрлэсь азьвыл юртсэ быдэсак выльдыны чакламын вал, но берлогес выльзэ пуктыны дунтэмгес луоз шуыса кенешизы. Улосвыллэн тӧроез оскытӥз, Удмуртилэн кунлык басьтонэзлы 100 ар тырмонлы, 2020-тӥ арлы, Центр дась луоз.

Ижкарын Короленко нимо театрлэн юртэз интые Удмурт лулчеберетъя центр пуктон понна Удмуртия федерал коньдэтысь юрттэт басьтыны оске. Со сярысь улосвыллэн тӧроез Александр Бречалов «Комсомольская правда - Ижевск» радиоын «Утро с главой Удмуртии» программаын вераз.

Ӵектос вань ни. <…> Мон (Россиысь – ред.) азьмуртлы куинь юанъёсын вазиськи, <…> соос пӧлын Удмурт лулчеберетъя центр. Али Лулчеберетъя министерствоен кенешиськомы инвестициосъя федерал программае пырон пумысен, Федерация милемлы коньдонэн мед юрттоз. Но озьы-а, тазьы-а, Удмурт лулчеберетъя центрез ми со интыын пуктомы
Александр Бречалов, Удмуртилэн тӧроез

Тодэ вайытом, нырысь ик юртэз быдэсак выльдыны чакламын вал, но берлогес выльзэ пуктыны дунтэмгес луоз шуыса кенешизы.

Сое быдэсак выльдыны, выльдонэз йылпумъяны малпамын вал, но эскеронъёс ортчытӥмы: сомында ик коньдон, нош со 400 миллион манетлэсь трос, кулэ выль юрт пуктыны
Александр Бречалов, Удмуртилэн тӧроез

Озьы ик улосвыллэн тӧрез ватсаз, юртлы ӵектосэз ӧнерчиос «Удмурт Кенеш» огазеяськонэн валче кылдытӥзы но выль юртлэн вылтусыз мукет луоз шуыса.

Тодэ вайытом, Ижкарын Удмурт лулчеберетъя центр кылдытонлэн кулэлыкез сярысь «Удмурт Кенешлэн» азьветлӥсьёсыз Александр Бречаловлы 2017-тӥ арын куартолэзе ортчем пумиськонын веразы. Инвожое ини солэн пуштросэз пумысен калыкен кенешон радъязы. 2018-тӥ арын южтолэзе Центрлы выль юрт пуктозы шуыса тодмо луиз. Соку ие улосвыллэн тӧроез пусйиз, Удмуртилэн кунлык басьтонэзлы 100 ар тырмонлы, 2020-тӥ арлы, Удмурт лулчеберетъя центр дась луоз.

8-тӥ шуркынмонэ улосвыл кивалтэтлэн тӧроез Ярослав Семёнов «Удмурт Кенеш» огазеяськонлэн Удмуртилэн кунлык нуналэзлы сӥзем Пичи кенешаз пыриськиз. Со люкаськемъёсты праздникен ӟечкылаз но элькунлы 100 ар тырмонэз пусъёнлы дасяськон ужрадъёс сярысь вераз.

Таяз арняе радъясь комитетлэн кенешоназ матысь аръёсы быдэстыны чаклам ужрадъёсты пусйизы. Ярослав Семёнов верамъя, ужанрадлыке выль юртъёсты пуктон но пыртэмын, улосвыл тӧрлыкъёс солы но коньдон шедьтыны быгатозы шуыса оско.

Удмуртилэн кунлыкезлы 100 ар тырмон арлы – 2020-тӥ арлы – Ижкарын Удмурт лулчеберетъя центр но пуктыны кулэ.

Ижкарын Удмурт лулчеберетъя центрлы ӵектос лэсьтонъя аукционэ куриськонъёсты кутон вуоно арняе йылпумъяське. Со бадӟым туала юрт луоз, быдӟалаез 5 сюрс 800 квадрат метр. Отчы творчествоя коллективъёсмы интыяськыны быгатозы, лулчеберет ужрадъёсты, ужъя пумиськонъёсты ортчытъяны интыос луозы. Со туж кулэ, соин ик ӵектосэз быдэстон понна ми ваньзэ лэсьтомы
Ярослав Семёнов, Удмуртиысь кивалтэтлэн тӧроез

Тодэ вайытом, Ижкарын Удмурт лулчеберетъя центрлэн кулэлыкез сярысь «Удмурт Кенеш» огазеяськонлэн азьветлӥсьёсыз улосвыл тӧрлыкъёслы 2017-тӥ арын куартолэзе веразы. Сое ӟуч драмая театрлэн азьвыл юртаз интыяны ӵектӥзы. Инвожое ини центрлэн пуштросэз сярысь калык кылзонъёс ортчытӥзы. Нырысь ик Короленко нимо театрлэсь азьвыл юртсэ быдэсак выльдыны чакламын вал, но 2018-тӥ арын оштолэзе кенешизы, со интыын выль юрт пуктозы шуыса. Элькунысь лэсьтӥськонъя министерстволэн йылпумъянъёсызъя, пуктӥськон ужъёс, тупатъян сярысь, дунтэмгес усёзы. Соку ик улосвыллэн тӧроез Александр Бречалов эшшо одӥг пол пусйиз, Удмуртилэн кунлык басьтонэзлы 100 ар тырмонлы (со пусйиськоз 2020-тӥ арын 4-тӥ шуркынмонэ — ред.) Удмурт лулчеберетъя центр дась луоз.

Ватсалом, озьы ик «Удмурт Кенешлэн» Пичи кенешаз огазеяськонлэн Данъян книгаяз пыртэм муртъёсты сӥлы каризы.

Ижкарын Удмурт лулчеберетъя центрлы выль юрт пуктозы. Со сярысь тодмо луиз 18-тӥ оштолэзе «Удмурт Кенеш» огазеяськонлэн исполкомезлэн ёзчиосыз но удмурт азьветлӥсьёс улосвыл тӧроен Александр Бречаловен пумиськонын. 

Тодэ вайытом, Удмурт лулчеберетъя центрез В. Г. Короленко нимо ӟуч театрлэн азьвыл юртаз интыяны чакламын вал. Солэн пуштросэзъя ӵектосэз соглаштэмын ни. Элькун тӧрлыкъёс оскытэмъя, тупатъян-выльдон ужъёсты нуыны ӵектос дасяны коньдон висъямын. Но кызьы возьматӥзы чотанъёс, выль юрт пуктыны дунтэмгес луоз.

Мыным табере верало, министр Иван Ястреб (лэсьтӥськонъя, жилищно-коммунальной возёсъя но дыкужымъя министрлэсь ужзэ быдэсъясь — ред.) вераз, тӥледын та ужпумез эскериз шуыса, тупатъян ужъёс, выльзэ пуктон сярысь, дуногес луэ. <…> Соку асьмелы сэрттыны но выльзэ пуктыны кулэ. Татын юан — мыным ӵектосэз возьматӥзы <…> мон отын туж туала юртэз адӟи, асьмеос вылтуссэ сыӵе ик ум кельтэ шат? Мон малпасько вал, асьмеос сыӵе ик пуктомы шуыса. Но со сокем кулэ ӧвӧл ке, отын мукет юрт пуктыны интыез вань
Александр Бречалов, Удмуртилэн тӧроез

Татьяна Ишматова валэктӥз, театрлэн азьвыл юртэз лулчеберетъя кылёсбурысь объектъёс пӧлы уг пыры, но отын историен герӟаськем учырез вань — со Быдӟым Атыкай ож вакытэ пуктэмын.

Ми ведь эскерим ваньзэ, ветлӥм комиссиен, быдэсак учким со юртэз, кыӵе солэн али югдурез. Жаляса верано, сое тупатъяны, туала арлы тупась со мед луоз, со туж секыт, но трос отын ярантэм пространствоосыз кылдо, кудъёсыз ужаны уз быгатэ. Соин ик ми соглаш луомы, выль юрт мед пуктозы, но со дыре ик азьло вылтусыз солэн мед кылёз шуыса
Татьяна Ишматова, «Удмурт Кенеш» огазеяськонлэн тӧроез

Александр Бречалов сыӵе ӵектонлы дурбасьтӥз. Солэн кылъёсызъя, али быдӟалаезъя но вӧлдэтлэн ӝуждалаезъя ярамон луэ учкон залэз гинэ, мукет висъетъёс «мыркесь, валантэм, мар лэсьтыны отын луэ».

Ойдолэ, ӵошен кенешом, таяз арын ми огдыре ӵектос лэсьтом но юртэз сэрттом. Сотэк… тӥ тодӥськоды ук, асьмеос кунлыклы 100 ар тырмонлы вераськимы (усьтыны — ред.), со 2020-тӥ арын. Дыр туж но туж ӧжыт кылемын. Таяз арын ваньзэ соглаштыны, юртэз сэрттыны, ӵектосэз юнматыны, кун экспертизаез ортчыны кулэ. Вуоно арын оштолэзе-куартолэзе лэсьтӥськон борды кутсконо
Александр Бречалов, Удмуртилэн тӧроез

Али со юртын «Айкай» театр ужа. Лэсьтӥськон мынытозь соосты кытчы ке интыяны кулэ. Удмуртиысь лулчеберетъя но туризмъя министрлэн Владимир Соловьёвлэн верамезъя, али кык инты эскериське. Нырысетӥез — Калык творчествоя элькун юрт, симфони оркестрез отысь филармоние выжтыны чакламын. Кыкетӥез — Лулчеберет удысын ужасьёслэсь быгатонлыкъёссэс будэтонъя центр. Операя но балетъя кун театрез выльдыку балетъя репетициос ӵапак отын ортчылӥзы.

Со сяна, мукет интыос но шедьыны быгатозы. «Ми али ваньбуретэз эскериськомы, мон учко, оло, мар ке тупамонэзгес но шедёз», — вераз улосвыллэн тӧроез.

Та ужпумъя вераськонэз йылпумъяса, Александр Бречалов эшшо одӥг пол пусйиз, Удмуртилэн кунлык басьтонэзлы 100 ар тырмонлы (со пусйиськоз 2020-тӥ арын 4-тӥ шуркынмонэ — ред.) Удмурт лулчеберетъя центр дась луоз.

Ижкарын Удмурт лулчеберетъя юртэз кылдытон бордын уж чаклам радлыкъя мынэ. Та дыре элькунысь Лэсьтӥськонъя министерство юртэз выльдон, уже кутон ласянь ужкагазъёсты дася. Удысэтлы ужпум пуктэмын — Короленко нимо театрлэсь азьвыл юртсэ Центрез кылдытонъя ужась группалэн ӵектонъёсызъя тупатъяны, шуиз ивортодэтъя «Удмуртия» агентстволы «Удмурт Кенешлэн» тӧроез Татьяна Ишматова.

Али вераськон мынэ, кызьыгес радъяны, малы ке шуоно выль юртэз пуктон понна коньдон ӧжытгес кулэ луэ, тупатъянэн ӵошатыса, улон озьы возьматэ. Соин валче, али кенешо кивалтӥсьёсмы, кызьыгес сое шонер радъяны
Татьяна Ишматова

Солэн кылъёсызъя, котькуд ӵектос Казаньын яке Москваын эскерон пыр ортче. Тупатъянъя проектъёсын ӵемысь янгышъёсты шедьто, соин ик лэсьтӥськон ужъёс борды кутскон, Йӧскалык лыдӟетъюртэн кадь ик, кема дырлы кыстӥськыны быгатоз.

Тодэ вайытом, Ижкарысь Удмурт лулчеберетъя центрлэн ӵектосэз южтолэзёзь дась луыны кулэ.

Ижкарын Удмурт лулчеберетъя юртэз кылдытонъя технической задание лэсьтӥськисьёслы вуоно арня вискын сётозы, нош ӵектосэз 2018-тӥ арын южтолэзёзь дась луыны кулэ. Со сырысь ивортодэтъя «Удмуртия» агентстволы элькунлэн Кун Кенешысьтыз депутат, «Удмурт Кенеш» огазеяськонлэн тӧроез Татьяна Ишматова вераз.

Туннэ, 12-тӥ толсуре, Центрез кылдытон бордын ужась группалэн кенешоназ Короленко нимо театрлэн азьвыл юртаз вуылэмлы йылпумъянъёс лэсьтӥз. 

Вуоно арняе, мон малпасько, ми со техзаданиез сётыны кулэ ни лэсьтӥськисьёслы, малы ке шуоно соослы кулэ вуоно арын южтолэзёзь лэсьтыны ӵектос. Нош ӵектос лэсьтыны озьы ик дыр кулэ
Татьяна Ишматова

Тодэ вайытом, Ижкарын Короленко нимо театрлэн азьвыл юртаз Удмурт лулчеберетъя центрез усьтон пумысен кичӧлтон нырысьсэ куартолэзе чузъяськиз. Инвоже солэн пуштросэз пумысен калыкен кенешон ортчиз, нош гудырикошконэ учкетэз дась вал ни. Коньывуонэ Удмуртилэн тӧроез Александр Бречалов «Удмурт Кенешлэн» исполкомезлэн ёзчиосыныз пумиськылыкуз пусйиз, центр пумысен ужкагазъёс 2018-тӥ арлэн нырысетӥ ӝыныяз дась луыны кулэ. Соку вань ужъёсты Удмуртилэн кунлыкезлы 100 ар тырмонлы, 2020-тӥ арлы, быдэстыса вуттозы.

Туннэ, 5-тӥ толсуре, Удмурт лулчеберетъя центрлэн учкетэз (концепциез) бордын ужась группа Короленко нимо театрлэсь азьвыл юртсэ эскериз. Отчы матысь дыре центр интыяськоз. Та дыре котькуд ӧрлы висъям интылэсь быдӟалазэ валаны кулэ, шуиз ивортодэтъя «Удмуртия» агентстволы элькунысь Кун Кенешлэн депутатэз, «Удмурт Кенеш» огазеяськонлэн тӧроез Татьяна Ишматова.

Ужпум одӥг — центрез пуктыны кулэ, со понна ӵектос кылдытыны кулэ, кызьы сое тупатыны, кытын, мае интыяны. Со понна тодыны кулэ, кыӵегес али юрт, кыӵегес солэн югдурез
Татьяна Ишматова

«Удмурт Кенешлэн» кивалтӥсез верамъя, табере лэсьтӥськисьёслы техзадание гожтоно. Соя ӧнерчиос ӵектос кылдытозы ни.

«Лэсьтӥськисьёс уг тодо, кӧня квадрат (метр — ред.) кулэ, кылсярысь, ательелы, кӧня квадрат кулэ кафелы но кытчы сое интыяны. Сое ваньзэ лэсьто со адямиос, кин выре, шуом ни, (центрлэн — ред.) пуштросэныз», — валэктӥз Татьяна Ишматова.

Озьы ик со пусйиз, В. Короленко нимо театрлэн азьвыл юртаз интыяськем «Айкай» театр Удмурт лулчеберетъя центрлэн шорсюлмыз луыны кулэ, соин ик юртын коллективлы нимысьтыз инты чаклано.

Удмурт лулчеберетъя центрлэн шорсюлмыз луыны кулэ «Айкай» коллектив. Соин валче асьмелэн гожтэмын, «Айкай» но кулэ паськытгес ужаны шуыса, нылпи студия бордаз кылдытыны
Татьяна Ишматова, «Удмурт Кенешлэн» тӧроез

Тодэ вайытом, Ижкарын центрез усьтон пумысен кичӧлтон куартолэзе чузъяськиз. Гудырикошконэ «Удмурт Кенеш» солэсь учкетсэ дасяз. Нош коньывуонэ Удмуртилэн тӧроез Александр Бречалов огазеяськонлэн исполкомезлэн ёзчиосыныз пумиськылыкуз пусйиз, центр пумысен ужкагазъёс 2018-тӥ арлэн нырысетӥ ӝыныяз дась луыны кулэ. Соку вань ужъёсты Удмуртилэн кунлыкезлы 100 ар тырмонлы, 2020-тӥ арлы, быдэстыса вуттозы.

Туннэ, 2-тӥ коньывуонэ, Удмуртилэн тӧроез Александр Бречалов «Удмурт Кенеш» огазеяськонлэн исполкомезлэн ёзчиосыныз, ёросъёсысь но каръёсысь ёзэтъёсызлэн азьветлӥсьёсыныз пумиськылӥз. Одӥгез эскерем ужпум Ижкарын Удмурт лулчеберетъя центрез кылдытонэн герӟаськемын вал.

Тодэ вайытом, Удмуртилэн шоркараз центрез усьтон пумысен кичӧлтон куартолэзе чузъяськиз. Та дырлы «Удмурт Кенеш» солэсь учкетсэ (концепцизэ) дасяз ни. Табере азьлань вамышъёс лэсьтыны кулэ.

«Мон Евдокимов Станислав Петровичлы, кудзэ али гинэ Кун Кенеш коньдон ужпумъёсъя министр интые соглаштӥз, ӵектос лэсьтыны коньдон висъяны ужпум пуктӥ, малы ке шуоно проектно-сметной ужкагазтэк ми сое лэсьтыны ум кутске. 2018-тӥ арлэн нырысетӥ ӝыныяз ужкагазъёс Казаньысь экспертизаен луыны кулэ, соку инвестициосъя федерал программаысь но коньдон басьтыны луонлыкмы кылдоз, озьы ик инвесторъёсты но соослэсь коньдонзэс кыскыны», — пусйиз Александр Бречалов.

Озьы ик Удмуртилэн тӧроез пусйиз, ӵектосэз кылдытон борды лэсьтӥськонъя министерство но со ужен вырись удысэтъёс ӵуказе ик кутскозы ни шуыса. Юртэз выльдонъя но центрлэсь ужзэ радъянъя ужкагазъёс вуоно арын ӧз ке луэ, пуктэм ужпумез 2020-тӥ арлы, Удмуртилэн кунлыкезлы 100 ар тырмонлы, быдэстыны уз вуттэ, шуиз Александр Бречалов, «соку ваньмыз вераськонъёсын ик кылёз».

Удмурт лулчеберетъя юртлэн учкетэзлэн (концепциезлэн) ӵектосэз 1-тӥ гудырикошконлы дась луоз. 26-тӥ пӧсьтолэзе со пумысен рос-прос вераськон мынӥз «Удмурт Кенеш» огазеяськонлэн исполкомаз. Солэн ёзчиосыз вань вуэм ӵектонъёсты ӧръёсъя люкылӥзы но пусйизы.

Удмурт юртын луозы таӵе ӧръёс: лулчеберет, дышетон, ивортодэт сётон, туризм. Соосты азинтон пӧртэм амалъёсын мыноз. Ваньмыз со удмурт калыклэсь лулчеберетъя но историяя кылёсбурзэ утьыны, люканы, азинтыны но вӧлмытыны кулэ.

Центрын нимысьтыз инты висъяськоз фольклор кырӟанъя но эктонъя «Айкай» кун театрлы. Со бордын одно ик кылдытэмын луоз нылпи студия — оркестр, эктон, кырӟан ёзэтъёсын. Озьы ик пичи ателье кулэ шуыса чакламын. Со артистъёслы гинэ ӧвӧл, мылкыд карись адямиос понна но мед ужалоз.

Со сяна, юрт котырысь интывылэз но ужатыны кулэ. Отын мифъёсысь персонажъёсын яке батыръёсын аллея лэсьтыны луоз. Одно ик кулэ чебер кафе, но со мукетъёсызлэсь мед висъяськоз, пусйизы исполкомлэн ёзчиосыз. Кылсярысь, сиёнэз гурын пӧраны, «удмурт коркае ветлэм кадь мед потоз».

Удмурт лулчеберетъя юртлэн нимыз али бырйымтэ на. «ВКонтакте» вотэс бамын со пумысен юалляськон лэземын. Куара сётонэ пыртэмын со нимъёс, кудъёсызлы та дырлы дурбасьтӥсьёс тросгес вал:

  • «Удмурт лулчеберетъя центр»,
  • «Удмурт лулчеберетъя «Айкай» центр»
  • «Айкай» центр
  • «Удмурт корка»

Вераны кулэ, та вотэс бамын ик котькудӥз мылкыд карись аслэсьтыз нимзэ ӵектыны быгатэ на.

Тодэ вайытом, Ижкарын ӟуч драмая В. Г. Короленко ним театрлэн азьвыл юртаз Удмурт лулчеберетъя центр кылдытэмын луоз шуыса пумкылъян кутэмын вал «Удмурт Кенешлэн» азьветлӥсьёсыз улосвыл тӧролэсь ужзэ огдырлы быдэсъясен Александр Бречаловен пумиськылэмзы бере. 7-тӥ инвожое удмурт юртлэн пуштросэз пумысен калыкен кенешон ортчиз.

Та темая вань иворъёсты лыдӟе «Ижкарысь Удмурт лулчеберетъя юрт» сюжетысь

Удмуртиын элькунлэн шоркараз Удмурт лулчеберетъя юртэз усьтон пумысен кенешонъёс, эскеронъёс мыно. Тодэ вайытом, со В. Г. Короленко нимо театрлэн азьвыл юртаз интыяськоз шуыса чакламын. Та дыре ассэ юртэз но эскеро — валаны кулэ, макем бадӟым тупатъян ужъёсты отын быдэстоно луоз. Со дыре ик вуоно Центрлэсь концепцизэ кылдытон мынэ. Кызьы вераз иворъёсъя «Удмуртия» агентстволы «Удмурт Кенеш» огазеяськонлэн тӧроез Татьяна Ишматова, ӵектослэн инъетэз пӧсьтолэзь пумозь дась луыны кулэ, нош гужем пумозь ваньзэ радъяны малпало.

— Татьяна Витальевна, кылем арня пумын Удмурт лулчеберетъя центрез тырмытонъя ужась группалэн пумиськонэз ортчиз. Мар сярысь вераськиды?

— Милям та ужпумъя нырысетӥ гинэ пумиськон ӧй вал ини. Со быдэсак, шуом, уж кутскемын пӧртэм оръёсъя. Бадӟым пумиськон вал, кытчы ми люкамы вань мылкыд карисьёсты — Ижкарысь филармониын люкаськылӥм вал, мер кылзонъёс ортчытыса, калык аслэсьтыз мылкыдъёссэ мед вералоз шуыса. Мон туж шумпотӥсько, отчы туж трос сыӵе тодмо адямиос ветлӥзы шуыса. Озьы ик ветлӥзы егитъёс но. Адӟисько, та мылкыд, кудӥз туннэ вань та ужпум котыр, со туж бурдъя, калык кыӵе ке выль мылкыдын кутске та уж борды.

— Ижкарын удмурт центр кулэ шуыса вераськонъёс одӥг ар гинэ уг мыно ни…

Асьмеос зэм но центр сярысь 20 ар ӵоже трос гинэ вераськиськом. Пӧртэм интыос но шедьтылэмын вал, пӧртэм адямиос но со борды басьтӥськылэмын вал, но идеологиез но пӧртэм вал. Кутскылӥм ке вал нырысь вераськыны, кыӵе ке духовной центр пумысен — вот Касим Галихановлэн проектэз вал, кылдытыны кулэ шуыса духовно-нравственной-а, кызы-а со нимаськоз центр, кытын луоз куала но, вӧсяськон инты. Собере кыкетӥез вал — со туристъёсты, куноосты пумитаны гостинично-ресторанный комплекс.

Нош туннэ вераськиськом ини сыӵе центр сярысь (мыным йӧтэ, со туж шонер вераськон), со центр кулэ азинтыны удмурт культураез. Мукет сямен вераса, ужаны удмурт культура понна но, асьмеос мед азинском шуыса, но со дыре ик куноосты но, туристъёсты но палэнэ кельтыны уг яра —

Читать полностью

7-тӥ инвожое Ижкарын Удмурт лулчеберетъя центрлэн пуштросэз пумысен калыкен кенешон ортчиз. Удмуртиысь кун филармонилэн залаз люкаськемъёс трос ӵектонъёс вераны. Соос центрлэсь учкетсэ (концепцизэ) кылдытыку одно ик лыдэ басьтэмын луозы.

Калык кылзонъёсы удмурт азьветлӥсьёс, тодосчиос, «Удмурт Кенеш» огазеяськонлэн тӧроез Татьяна Ишматова, Удмуртиысь тӧролэн но кивалтэтлэн администрациенызы кивалтӥсьлэсь ужзэ быдэсъясь Сергей Смирнов, элькунысь лулчеберетъя но туризмъя министрлэсь ужзэ быдэсъясь Владимир Соловьёв, печатья но калыке ивортодэт вӧлмытонъя агентстволэн кивалтӥсез Алексей Воронцов, Ижысь Кар Думалэн тӧроез Олег Гарин пыриськизы.

Кенешонэз кутскыса, Татьяна Ишматова пусйиз, туннэ асьмеос ог-огмес оскытыны кулэ ӧвӧл ни со центр кулэ шуыса, али ужпум — солэн пуштросэзъя одӥг кылэ вуон.

Валано, мар отын луыны кулэ, кызьы со азинскыны кулэ но кызьы асьмеос со центре калыкез кыскыны быгатомы, Удмурт Элькунысь гинэ ӧвӧл, туристъёсты но
Татьяна Ишматова

Удмуртиысь тӧролэн но кивалтэтлэн администрациенызы кивалтӥсьлэсь ужзэ быдэсъясь Сергей Смирнов озьы ик пусйиз - Удмурт лулчеберетъя центрлэн кулэлыкез пумысен юанъёс ӧвӧл ни. Со луоз шуыса пумкылъян кутэмын ни. Но азьвыл Короленко нимо театрлэн юртэз быдэсак выльдэмез кулэ каре.

«Ужкагазъёс юнматэмын ӧвӧл на, но Александр Владимирович (Бречалов, улосвыл тӧролэсь ужзэ огдырлы быдэсъясь — ред.) вераны куриз, пумкылъян кутэмын ни шуыса, со юртын ми Удмурт лулчеберетъя центр лэсьтом. Таяз арын тупатъян ужъёсты кутскомы. Кӧня ке ар ортчыса, шонергес вераса, куинь ар улыса, Удмуртилэн кунлыкезлы 100 ар тырме. Мон вераны быгатӥсько, со дырлы, тыршомы вазьгес но, Удмурт лулчеберетъя центр отын усьтӥськоз», — ивортӥз Сергей Смирнов.

Со оскемзэ вераз, та ужын удмурт азьветлӥсьёс, интеллигенция, Ижкарын улӥсьёс центрез тунсыко лэсьтыны юрттозы шуыса. Центр мед луоз шуыса гинэ ужаны кулэ ӧвӧл, со удмурт лулчеберетэз кунамы, быдэс дуннеын улӥсьёслы возьматыны кулэ.

«Удмурт лулчеберет туж узыр. <…> Ижкаре лыктӥсьёслэн ужанрадлыказы та центре ветлон одно ик мед луоз. Соин ик ужбергатонэз но кыскыны кулэ, йӧскалык сиён-юонъёсын ӟеч ресторан усьтыны.

Читать полностью

Удмуртилэн тӧроезлэсь ужзэ быдэсъясь Александр Бречалов 20-тӥ куартолэзе «Удмурт Кенеш» огазеяськонлэн азьветлӥсьёсыныз пумиськылэмез бере 21-тӥ куартолэзе азьвыл драмая ӟуч театрлэсь юртсэ учкыны ветлӥз. Кенешчиос отын удмурт лулчеберетъя центр усьтыны куро. Та дыре юртын интыяськемын удмурт кырӟанъя но эктонъя «Айкай» кун театр.

«Мон толон ветлӥ Короленко театре. Мынам юанэ кылдӥз — малы ми сое лэсьтӥмы? Отын этажъёс вискын коръёс. Юртэз кема ужатэммы потэ ке, соосты вошъяны кулэ вал. Со капитальной лэсьтӥськон. Малы юртлэсь вылзэ пичи люкетсэ тупатъямы. Но мон визьрадзэ уг валаськы. Ужбергатон ласянь учкыса шат? Но кытын визьрадыз? Ми сое лэсьтом. Мон пумиськылӥ «Удмурт Кенешен», соослэн удмурт лулчеберетъя центр кылдытонъя куронзы — туж шонер», — Александр Бречаловлэсь кылъёссэ вера улосвыл тӧролэн но кивалтэтлэн пресс-службазы.

Тодэ вайытом, 2016-тӥ арын Короленко нимо театрлэн азьвыл юртэзлэсь вылзэ тупатъязы но укнооссэ воштӥзы. Со понна элькун коньдэтысь 10 миллион манет пала висъязы.

Ватсан

Короленко нимо театрлэн юртэз 1946-тӥ арын усьтэмын. 2011-тӥ арын сое луыкыресэн лыдъязы но коллектив Александр Невский Собор вадьсысь выльдэм Лулчеберетъя юртэ выжиз.

2013-тӥ арын элькунысь ваньбур кусыпъёсъя министр Рустэм Зайнуллин театр интые выль автовокзал пуктыны ӵектӥз. 2014-тӥ арын Удмуртилэн тӧроез ӵектонлы пумит луэмзэ вераз.

2014-тӥ арын театрлэсь юртсэ Ижкарлэн асъетаз сётӥзы. Сое выльдон муниципалителы укыр дуно потӥз.

2016-тӥ арын толшоре Короленко нимо театрлэн азьвыл юртэз но улысьтыз музъем Удмуртилэн асъетаз выжиз. Инвожое сьӧрысьтыз пуктӥськемъёс но соос улысь музъем озьы ик улосвыллы сётэмын вал. Лукырес пуктӥськемъёсты кылем арын ик сэрттыны кутскизы.

Удмуртилэн тӧроезлэсь ужзэ быдэсъясен Александр Бречаловен пумиськонын «Удмурт Кенешлэн» азьветлӥсьёсыз йӧскалык дышетон сярысь ужпумъёсты ӝутӥзы. Кенешон 20-тӥ куартолэзе «Лудорвай» музей-заповедникын ортчиз.

Кызьы вераз иворъёсъя «Удмуртия» агентстволы «Удмурт Кенеш» огазеяськонлэн тӧроез Татьяна Ишматова пумиськонын трос юанъёс ӝутэмын вал, нош тужгес сюлмаськытӥсьёсыз йӧскалык дышетонэн герӟаськемын.

«Татын туж трос юанъёс кылдо: учебникъёсъя асьмелэн пумозяз лэсьтэмын ӧвӧл аккредитация вань линейкаослы, собере удмурт садикъёс удмурт пиналъёс понна ӧвӧл, кытын соос быгатысалзы удмурт кылэз дышетыны. Туж паймыса со кылзӥз со (Александр Бречалов — ред.) ужпумъёсты. Сое одно ик сэрттыны-пертчыны кулэ шуыса вераськиз. Удмурт гимназиос пумысен ӝутӥм (ужпумез — ред.), Можгалан но, Глазовын но сыӵе луонлык луысал ке, туж умой луысал шуыса, озьы ик Можгаысь педколледжъя», — вераз Татьяна Ишматова.

Солэн кылъёсызъя, та юанъёсты сэрттон-пертчон, кыӵе ке но ужанрадлык дасян понна нимысьтыз ӧри кылдытэмын луоз шуыса пумкылъян кутэмын. Нырысь ик валаны кулэ, мае али ик лэсьтоно, нош мар кӧня ке возьманы быгатоз на. «Удмурт Кенешлэн» тӧроез верамъя, Александр Бречалов Глазкаре вуылыкуз отысь удмурт азьветлӥсьёсын пумиськылыны, удмурт гимназия усьтыны быръем школае ветлыны оскытӥз. Озьы ик Можгаысь педколледжлэн ужаменыз тодматскоз шуыса вераз.

Григорий Фомин
«Удмурт Кенешлэн» азьветлӥсьёсыз йӧскалык дышетон сярысь ужпумъёсты ӝутӥзы Фото: Григорий Фомин © udmurt.media

Пумиськонын ӝутэм эшшо одӥгез бадӟым ужпум герӟаськемын вал Ижкарын удмурт лулчеберетъя центр кылдытонэн. «Удмурт Кенеш» сое азьвыл ӟуч драмая театрлэн юртаз интыяны ӵектэ.

«Со отчы ветлӥз ни пумиськонмы бӧрсьы, мылкыдзэ вера кадь кулэ шуыса малпаськыны та ӵектос пумысен. Пумитсэ сыӵе центрлы ӧз вера», — пусйиз Ишматова.

Озьы ик Удмуртилэн кун кылъёсыз сярысь кат пумысен вераськон потӥз. Туннэ со рос-прос уг быдэсъяськы шуыса трос пол верамын ни вал, со сяна, катэ воштонъёс пыртыны кулэлык вань.

Читать полностью
Наверх
Вниз