100 лет государственности Удмуртии
Ижкар+22 °C
6 -тӥ инвожо 2020 Кӧснунал
16+

Удмурт кырӟанъя «Элькуновидение-2019» вожвылъяськонын Глаз ёросысь Юрий Князев.вормиз.  Конкурслэн йылпумъян люкетэз 2-тӥ шуркынмонэ «Удмуртия» телеканаллэн меӵак эфираз ортчиз.

Вормисьлэн нимыз тодмо луиз вожвылъяськонэ пыриськем ёросъёсысь ыстэм муртъёслэсь кылдытэм жюрилэсь концерт дыръя но но ӧнерлыко жюрилэсь студиын пуктэм баллъёссэс ватсаса. Жюриослэсь 144 балл басьтыса, Юрий Князев 40 сюрс манет утӥз.

Ӧнерлыко жюрие пыризы: Марина Ходырева - Удмуртиысь крезьгурчиослэн огазеяськонзылэн кивалтӥсез, Зинаида Рябинина - кылбурчи, «Удмурт дунне» газетлэн валтӥсь редакторез, Богдан Анфиногенов - кылбурчи, кырӟась, Удмуртиысь Калыкъёслэн эшъяськон юртысьтызы ӧнерчи, Надежда Уткина - кырӟась, Удмуртиысь калык артистка, Россиысь дано артистка, Семён Байкузин - «Италмас» кун ансамбльлэн хормейстерез.  Тужгес вылӥ 12 балл соос пуктӥзы:

Марина Ходырева - Пичи Пурга ёрослы;

Зинаида Рябинина - Эгра ёрослы;

Богдан Анфиногенов - Эгра ёрослы;

Надежда Уткина - Глаз ёрослы;

Семён Байкузин хормейстер - Глаз ёрослы. 

Учкисьёслэн концерт дыръя сётэм куараоссы но смс куараослэн лыдзыя (1390 балл)  «Учкисьёслэсь кузьым» - 15 сюрс манет - Шаркан ёросысь «Инвожо» ансамбль басьтӥз. 

Удмуртиысь лулчеберетъя министерстволэсь 100 сюрс манет басьтӥз озьы ик Шаркан ёрос, со учкисьёслэсь вань куараоссэс но жюрилэсь вань баллъёссэс ватсаса оглом 1492 балл люказ.

Тужгес усто кылбур понна 5 сюрс манет кузьым басьтӥз Эгра ёросысь Елизавета Лекомцева «Улонмы - чылкыт куар» уженыз.

Тужгес устоез крезьгур понна 5 сюрс манет утӥз  Пичи Пурга ёросысь Эдуард Мираев, со «Сӥзьыл пала кырӟанлы» крезьгурзэ гожтӥз.

Тодэ вайытом, вожвылъяськонэ ваньмыз 15 кырӟасьёс но коллективъёс пыриськизы, концерт люкетэз бере вормон понна нюръяськонзэс азьланьтӥзы 13-ез. 

Вуоно арын «Элькуновидение» вожвылъяськонын пӧртэм аръёсы но туэ вормисьёс пыриськозы.

19-тӥ коньывуонэ Ижкарысь «Аксион» культура дворецлэн сцена вылаз «Элькуновидение-2019» вожвылъяськонлэн полуфиналэз ортчиз. Удмурт кылын кырӟанъёсты 15 ёросъёсысь нимаз кырӟасьёс но коллективъёс быдэстӥзы.

Котьку сямен, номеръёс пӧртэмесь вал. Одӥгъёсыз шулдыр гур вылын потыны малпазы, мукетъёсыз куаразэс возьматыны тыршизы. Быдэс зал тыр люкаськем учкисьёс котькуд кырӟасез кужмо кичабонъёсын пумитазы но келязы.

Мыным туж яраз, ваньмыз умоесь, чебересь. Соос сыӵе энергия милемлы сётӥзы, ведь со самой главной – соос вань тулкымъяськонзэс асьсэ пыртӥ милемлы сётӥзы залэ. <…> Таӵе конкурсъёс котькуд ар мед луозы
«Элькуновидение-2019» вожвылъяськонэз учкись

Вожвылъяськонэ пыриськем ёросъёслэн ыстэм муртъёссылэсь кылдытэм жюрилэн куара сётонэзлы йылпумъянъёсъя, тужгес трос баллъёс люказ Балезино ёросысь Надежда Сидорова.

Мон сыӵе малпанэн лыктэмын ӧй вал, дасэтӥ луи ке, ярам шуисько вал. Табере калык мед быръёз, кин вормоз. Мон потӥ бесерман калыкме (возьматыны – ред.), бесерман крезьме кырӟай
Надежда Сидорова, «Элькуновидение-2019» вожвылъяськонэ Балезино ёрослэсь пыриськись

Ӵапак бесерман крезь жюрилэн ёзчиосызлэсь сюлэмзэ берыктӥз кадь. Со эшшо одӥг пол возьматэ, конкурсын мар ке аспӧртэмзэ возьматоно, мукетъёсызлэсь висъяськоно, паймытоно шуыса.

Надежда Сидоровалэн верамезъя, таӵе вожвылъяськонъёсы кырӟасьёс одно ик пыриськыны кулэ.

Тани училище бере особенно селое лыктӥськод ке, кышно но кышно луиськод. Ай, да ярам, кариськод. Тани мынам дас ар ортчиз ни дышетсконме быдтэмме, мон малпасько, мон кадьёслы таӵе ужрадъёс кулэ. Нырысь ик астэ эскерыны – быгатӥськод на-а тон, кытчы мыноно азьлань, зэм-а тон аслад интыяд
Надежда Сидорова, «Элькуновидение-2019» вожвылъяськонэ Балезино ёрослэсь пыриськись

«Элькуновидение» лыктэмъёслы туж усто кузьым луиз Удмуртиысь кун симфони оркестрлэн шудэмез. Со тодмо классикаез но яратоно удмурт гуръёсты быдэстӥз

Озьыен, таӵе баллъёсын «Элькуновидение-2019» вожвылъяськонлэн йылпумъян люкетазы пыриськозы:

  1. Балезино ёрос, Надежда Сидорова - 106;
  2. Глаз ёрос, Юрий Князев - 96;
  3. Шаркан ёрос, «Инвожо» ансамбль - 90;
  4. Октябрь ёрос, Алина Егорова - 88;
  5. Пичи Пурга ёрос, «Акцент» группа - 62;
  6. Можга ёрос, «Алача» ансамбль - 52;
  7. Эгра ёрос, Елизавета Лекомцева - 40;
  8. Сьӧлта ёрос, Василий Иванов - 22;
  9. Алнаш ёрос, Ирина Бурдина, Елена Никонова - 18;
  10. Кез ёрос, Юлия Третьякова - 16;
  11. Индустри ёрос, Виталий Белков - 12;
  12. Ленин ёрос, Катерина Кенӟали - 12;
  13. Кияса ёрос, «Чильтэр» ансамбль - 12.
Вожвылъяськонлэн йылпумъян люкетэз 2-тӥ шуркынмонэ «Удмуртия» телеканаллэн меӵак эфираз ортчоз. Отын ас кылзэс ӧнерлыко жюрилэн ёзчиосыз вералозы на. Кык жюрилэсь баллъёссэс ватсаса, та ар понна «Элькуновиденилэн» вормисез тодмо луоз. Со 40
Читать полностью

Эгра ёрослэсь данзэ «Элькуновидение-2019» вожвылъяськонын Елизавета Лекомцева утёз. Нылаш ужрадэ кыкетӥ арзэ пыриське ини. Ивортодэтъя «Удмуртия» агентстволэн корреспондентэзлы со кыӵе муген отчы нош вамыштэ вераз.

22 аресъем Елизавета Лекомцева Эграысь 4 номеро школаын покчи классъёсты дышетӥсь луыса ужа. Удмурт кылъя кружок нуэ. Со вакытэ ик заочной амалэн Глазкарысь дышетӥсьёсты дасясь институтын тодон-валан люка. Вуоно арын тулыспалэ со вылӥ дышетскемез сярысь дипломзэ басьтоз ини.

«Элькуновидение» вожвылъяськонэ нылаш кылем арын но пыриськиз вал ини.

Мыным ваньмыз вал выль. Кӧня ке тулкымъяськи. Но таре мон кӧня ке уверенногес асме шӧдӥсько. Валай, кызьы асме возёно, кызьы кырӟано, дышетски быдэс ар, быдэс ар настраивалась, шуом, и туннэ мон нош ик со конкурсын
Елизавета Лекомцева, «Элькуновидение-2019» вожвылъяськонэ пыриськись

2018-тӥ арын кырӟась Алексей Даниловлэсь «Сяськаяське гербер» кырӟанзэ быдэстӥз вал ке, туэ со ас гожтэм «Улонмы – чылкыт куар» кырӟанэныз сцена вылэ потоз.

Потэ, мед монэ не только кырӟась кадь тодозы шуыса, но кылбур но кырӟан гожъясь шуыса мед тодозы, малы ке шуоно мынам основной уже - со дышетон уже, школаын уже, но улонэ мынам тӥни озьы пӧрме, что кырӟан монэн улонэ ӵоже ини ӵош
Елизавета Лекомцева,«Элькуновидение-2019» вожвылъяськонэ пыриськись

Елизавета Лекомцева кылем арын «Элькуновидение» пыриськемез бере улонэз воштӥськиз шуыса пусъе.

Кырӟанъёсы радиоын чузъясько, сольный концерт сётӥмы Артемий Гавриловен Дэбесын но Играын
Елизавета Лекомцева, «Элькуновидение-2019» вожвылъяськонэ пыриськись

Со сяна, егит дышетӥсь валтӥсь ужаз но вормонъёс басьтыны вуэ. Кылсярысь, 2017-тӥ арын егит ӧнерчиослэн «WorkdSkills» улосвылкуспо конкурсазы пыриськиз но 2-тӥ инты басьтӥз. Нош 2018-тӥ арын «Учитель года» улосвыл конкурсын «Педагогический дебют» номинациын вормиз. Со понна туэ сое Москваысь Кремльын дышетӥсьёслэсь нуналзэс пусйыны ӧтчазы.

Кремле ветлэме мыным сётӥз мотивация, что ужано дышетӥсь удысын, яратоно аслэсьтыд профессидэ. Дышетӥсьлэн ӧнерез котькыӵе вакытэ престижной луэ
Елизавета Лекомцева, «Элькуновидение-2019» вожвылъяськонэ пыриськись

Егит дышетӥсь верамъя, «Учитель года» выллем конкурсъёсы одно ик пыриськоно, но со понна дышетонын, дышетон ужын выль технологиосты кутоно шуыса пусъе.

Вуж методикаос соос умоесь, но соосты выль сямен кызьы ке сётоно, малы ке шуоно пиналъёс визьмогес, туалагес лыкто, соосъя ужано
Елизавета Лекомцева, «Элькуновидение-2019» вожвылъяськонэ пыриськись

Шутэтскон сярысь но быгатонлыко нылаш уг вунэты, со дуннеез котыръяны яратэмзэ вераз.

Туж потэ трос кунъёсты адӟеме, чебер интыосты, мукет континетъёсты, мукет материкъёс вылэ вуылэме
Елизавета Лекомцева, «Элькуновидение-2019» вожвылъяськонэ пыриськись

Тодэ вайытом, КиясаПичи ПургаКезМожгаШарканБалезиноКизнерАлнашСьӧлтаГлаз, Ижкарысь ИндустриПервомайЛенин но Октябрь ёросъёсысь кырӟасьёс но «Элькуновидение» вожвылъяськонэ пыриськыны дасясько. Конкурслэн тужгес яркыт люкетэз, концерт, Ижкарын 19-тӥ коньывуонэ ортчоз ни. 

«Элькуновидение-2019» вожвылъяськонэ Глаз ёрос понна нош ик Юрий Князев пыриськоз. Ивортодэтъя «Удмуртия» агентстволэн корреспондентэзлы кырӟась туэ возьманъёсыз но азьвыл аръёсы пыриськылэмез бере улоназ воштӥськонъёсыз сярысь вераз.

Юрий Князев Глаз ёросысь «Искра» лулчеберет юртын клубъёслэн огазеяськонзылэн кивалтӥсез луыса ужа. «Элькуновидение» вожвылъяськонэ со 2015-тӥ но 2018-тӥ аръёсы пыриськылӥз вал ини.

Кырӟась ӟуч кылын вераське ке но, удмурт кырӟанъёсты быдэсъя.

Калык куре, <…>, адямиослэн удмурт кырӟанъёсты кылэмзы потэ. Азьло ӟуч сямен гинэ кырӟалляй, нош али асме удмурт кылэ ӧръясько ини. Кырӟанъёс пыр кылэз дышетӥсько
Юрий Князев, «Элькуновидение-2019» вожвылъяськонэ пыриськись

Юрий Князевлэн верамезъя, азьвыл аръёсы «Элькуновидение» пыриськемезлы луыса, со доры 6-8 аресъем пиналъёс дышетскыны куриськыны кутскизы.

Адӟизы мынэсьтым выступлениме, милям но удмурт сямен, удмурт кырӟанъёсты кырӟаммы потэ шуизы
Юрий Князев, «Элькуновидение-2019» вожвылъяськонэ пыриськись

Со сяна, Юрий Князев ачиз кырӟанъёс гожъяны кутскиз. Кылсярысь, туэ «Чагыр инметӥ» кырӟанэзлэсь крезьгурзэ но ачиз малпаз, нош кылъёссэ ёросысьтызы ик Валентина Васильева гожтӥз. Кырӟан бордын али но ужаськом на шуыса пусъе.

Малпаськом вал, дась кырӟан ини шуыса, нош собере кылъёсызлэсь пуштроссэ мургес валам но, крезьгурез кылъёсызлы уггес тупа потӥз. Соин ик али та толэзь ӵоже ми сое быдэсак мукет ӧре воштӥськом
Юрий Князев, «Элькуновидение-2019» вожвылъяськонэ пыриськись

Куинетӥ арзэ пыриськыса ини кырӟась вормон сярысь но малпаське, но льӧль малпанъёсаз уг выйы.

Вормем потэ, конешно, но кызьы пӧрмоз, малы ке шуоно кырӟан котькуд ар выль, уд тодӥськы, кызьы сое калык пумиталоз, кельшоз-а
Юрий Князев, кырӟась

Юрий Князев «Элькуновидение» вожвылъяськон элькунмылы туж кулэ шуыса пусъе, угось солы луыса трос гинэ выль удмурт кырӟанъёс пото.

Туэ тани 15 кырӟась, озьыен, ӧжытэзъя 15 выль кырӟан. Со ӧжытэзъя. Уго куд-ог ёросъёсын «Ёросовидение» ортчыто. Мон уг тодӥськы, кӧня адями отчы пыриське, 10 пала, дыр, малпасько. Озьыен, отын эшшо 10 выль кырӟан кылдэ. Нош со удмурт кылэз, удмурт лулчеберетэз вӧлмытон
Юрий Князев, «Элькуновидение-2019» вожвылъяськонэ пыриськись

Пусъём, «Элькуновидение» вожвылъяськонын сяна, Юрий ассэ мукет конкурсъёсын но эскере. Кылсярысь, кылем арын со Киров улосвылын совето вакытысь кырӟанъёсъя «Спето в СССР» улосвылкуспо конкурсын вормиз.

Тодэ вайытом, азьвыл КиясаПичи ПургаКезМожгаШарканБалезиноКизнерАлнашСьӧлта, Ижкарысь ИндустриПервомайЛенин но Октябрь ёросъёсысь кырӟасьёсын тодматӥм вал ини. 

Сьӧлта ёрослэсь данзэ «Элькуновидение-2019» вожвылъяськонын Василий Иванов утёз. Тунсыко егит воргоронэн ивортодэтъя «Удмуртия» агентстволэн корреспондентэз тодматскиз.

Василий Иванов Сьӧлта ёросысь Выль Мӧнья гуртын вордӥськиз. «Элькуновидение» вожвылъяськонэ вазен ини гуртысьтызы лулчеберет юртэн кивалтӥсь луыса тыршись анаез Галина Иванова пыриськыны ӧтьылэм.

Куинь ар талэсь азьло мамае чортэ вал ини монэ: «Ойдо пыриськы, ойдо пыриськы». <…> И со монэ сагитировала. Но таре мынам дыры воксё ӧвӧл. Но, озьы ке но, дасяськисько, дасяськисько. Туэ мукет адями кулэ вал луыны, Прохор (Столбов – ред.), но солэн тоже ӧз луы
Василий Иванов, «Элькуновидение-2019» вожвылъяськонэ пыриськись

Вожвылъяськонын Василий Иванов Прохор Столбовлэсь «Ой, кыӵе со зэмос яратон» кырӟанзэ быдэстоз.

Кырӟаны Василий пичи дырысеныз ик, анаез лулчеберет юртэ ужаны басьтӥськем дырысь, кутскиз, шуэ. Ёросазы крезьгуръя пӧртэм вожвылъяськонъёсы пыриськылӥз. Вормонъёс но басьтылӥз. Но «Элькуновидениын» вормонэз уг возьма шуыса пусъе.

Отын сыӵе артистъёс ини, нош мон урамысь пияш
Василий Иванов, «Элькуновидение-2019» вожвылъяськонэ пыриськись

Вожвылъяськонэ пыриськон Василий Иванов понна бадӟым сцена вылэ нырысетӥез потон луоз. «Элькуновидение» солы эстрада удысын тодон-валан сётоз, шуэ. Конкурслэсь кулэлыксэ но егит воргорон вылӥ пусъе.

Кулэ, конешно, асьмеос удмурт кылэз поддерживать карыны кулэ ук
Василий Иванов, «Элькуновидение-2019» вожвылъяськонэ пыриськись

Та пумысен вераськонамы Василийлэн атаез Вениамин Иванов но пыриськытэк ӧз чида. Со но ас малпанзэ кисьтӥз.

Бигер телевидениез учке ай, отын чильк-вальк лулчеберет удысазы, нош асьмеос татын кылем-мылемез вылын улӥськом. Ӟечокъёс, коть мар ке лэсьто, нош «Элькуновидение» - со коть мар ке ӧвӧл, со супер!
Вениамин Иванов, «Элькуновидение-2019» вожвылъяськонэ пыриськисьлэн атаез

Василий Иванов агрономлы дышетскиз но берло дырозь Ува ёросысь Бызара (Узей-Тукля) гуртын «Штумф» крестьян-фермер возёсын валтӥсь агроном луыса ужаз. Но кемалась ик ӧвӧл 25 аресъем егит воргоронлы отын ужзэ куштоно луиз, угось со йӧскалык ӵектосъя «Агростартап» программа улсын сӥльлы пудо будэтон понна 2 миллион 800 сюрс манет тыр грант утӥз. Табере Василий ужбергатӥсь луоз но атаеныз ӵош ас возёссы бордын тыршозы. Али воргоронъёс гид пукто.

Тодэ вайытом, «Элькуновидение» пыриськыны КиясаПичи ПургаКезМожгаШарканБалезиноКизнерАлнаш, Ижкарысь ИндустриПервомайЛенин но Октябрь ёросъёсысь кырӟасьёс но дасясько. 

Ижкарысь Октябрь ёрослэсь данзэ «Элькуновидение-2019» вожвылъяськонын егит нылаш Алина Егорова утёз. Ивортодэтъя «Удмуртия» агентстволэн корреспондентэзлы со вераз, мар возьма та конкурслэсь.

Алина Егорова Кизнер ёросысь Вуж Бӧдья гуртын вордӥськемын, но али Ижкарысь эм академиын врач-ординаторлы дышетске. Солэн верамезъя, «Элькуновидение» вожвылъяськонэ кемалась пыриськемез потэ вал ини, но татчыозь ӧз учыра.

Али луонлык сыӵе кылдӥз но, мынам сыӵе пыриськеме отчы потӥз! Мон понна со тунсыко опыт луоз. Телевидение пыр но ужан ук со луэ, кырӟан бордын ужан
Алина Егорова, «Элькуновидение-2019» вожвылъяськонэ пыриськись

Вожвылъяськонын Алина Егорова «Берытскы» кырӟанзэ быдэстоз. Вормон со понна туж бадӟым вамыш луоз, шуэ.

Мон ворми ке, со туж бадӟым толчок мон понна луоз, но пыриськон но бадӟым толчок ини. Мон пушкам, бумага вылын ваньзэ возисько но уг поттӥськы сое, соин кыӵе ке но толчок со всё-таки луоз
Алина Егорова, «Элькуновидение-2019» вожвылъяськонэ пыриськись

«Элькуновидение» вожвылъяськон шаермылы туж кулэ, лыдъя Алина.

Со выль адямиосты усьтэ, выль нарпавлениосты шараятэ, адямиос пушкы пыртэ
Алина Егорова, «Элькуновидение-2019» вожвылъяськонэ пыриськись
 

Кӧня асме тодӥсько, сомында ик кырӟасько, шуэ нылаш. Крезьгуръя школаын но дышетскемез вань. 2013-тӥ арын со егит кырӟасьёс пӧлын «Выль куара» вожвылъяськонын вормисе потӥз вал, со сяна, «Студенческая весна Удмуртии» фестивальёсын призёр луылэмын. Алина Егорова эм академиысь театре ветлэ. Отын, пьесаосты шудэм сяна, мюзикл бордын но ужало, кылсярысь, али «Лес» нимо мюзикл пукто. 

Тодэ вайытом, азьвыл КиясаПичи ПургаКезМожгаШарканБалезино, Ижкарысь ИндустриПервомайЛенинКизнерАлнаш ёросъёсысь кырӟасьёсын тодматӥмы вал. 

Удмуртиысь тодмо кырӟась Катерина Кенjали (Самоделко) «Элькуновидение-2019» вожвылъяськонын Ижкарысь Ленин нимо ёрос понна кырӟалоз. Артистэн ивортодэтъя «Удмуртия» агентстволэн корреспондентэз тодматскиз.

Катерина Кенjали Татарстанысь удмурт гуртын вордскиз, Удмурт кун университетэз «Калык хор» ӧнеръя йылпумъяз, со дырысен Ижкарын улэ ни. Кылзӥсьёсызлы аутентичной но туала кырӟанъёсыныз вазен тодмо ини. Кемалась ик ӧвӧл, Ижкарын кырӟасьлэн нырысетӥ ас концертэз ортчиз. Огназ кырӟам сяна, артистка «Нюркины песни» ансамбле пыриське.

Кенjали кушем нимзэ кырӟась юнме ӧз басьты. Нырысь ик, пельпумаз кенӟали татуировкаез вань шуыса. Со сяна, кенӟали, Катериналэн верамезъя, котькыӵе шуг-секытъёсты вормыны луэ шуыса возьматэ.

Быж чигиз ке, со нош ик будоз
Катерина Кенjали, «Элькуновидение-2019» вожвылъяськонэ пыриськись

«Элькуновидение» вожвылъяськонын Катерина Кенjали аслаз «Сюлэмо» кырӟанэныз тодматоз.

Мон выль кырӟанлы шокан сётӥсько шуисько, со нырысетӥ малпанэ мынам. Капчи мылкыдын пыриськисько, шумпотыса
Катерина Кенjали, «Элькуновидение-2019» вожвылъяськонэ пыриськись

«Элькуновидение» кырӟась понна нырысетӥез вожвылъяськон ӧвӧл. Солэн кылъёсызъя, вормонъёссэ ваньзэ уд но вера, данъетъёсыз быдэс папка люкаськемын ини.

Сцена вылын кырӟам сяна, Катерина Кенjали мукет ӧрын но ассэ утча.

Практика нуисько - «Интуитивное пение», шаманский практикаос лэсьтӥсько Галиханов Толяен ӵош
Катерина Кенjали, «Элькуновидение-2019» вожвылъяськонэ пыриськись

Егит нылкышно трос нылпиё анай ини. Кузпалэныз ӵош ньыль пиоссэс будэто.

Тодэ вайытом, «Элькуновидение» пыриськыны КиясаПичи ПургаКезМожгаШарканБалезино, Ижкарысь ИндустриПервомайКизнерАлнаш ёросъёс но дасясько ини.

2019-тӥ арын «Элькуновидениын» Алнаш ёрослэсь данзэ нош ик Муважиысь кырӟасьёс утёзы. Нылкышноослэн дуэтэнызы ивортодэтъя «Удмуртия» агентстволэн корреспондентэз тодматскиз.

Алнаш ёросысь Ирина Бурдина но Елена Никонова Муважи гуртысь лулчеберет центрын лулчеберетъя ужрадъёсты радъясь но аккомпаниатор луыса тыршо. Кылем арын соос «Элькуновидение» вожвылъяськонэ «Айлетъ» группаенызы пыриськизы. Соку куинь кузя кырӟазы вал.

Туэ нош ик «Элькуновидение» пыриськозы шуыса нылкышноос малпаллямтэ вылэм. Но Алнаш калык «ВКонтакте» мерлыко вотэс пыр радъям куара сётонын соосты быръем.

Шудмы сыӵе, дыр, кыкетӥяз сюрыны. Ми кадь тузӥ кырӟасьёсыз ӧвӧл ни, дыр, ёросамы, соин
Ирина Бурдина, «Элькуновидение-2019» вожвылъяськонэ пыриськись

Кылем арын кырӟасьёс эшъёс сярысь кырӟан быдэстӥзы вал, нош туэ гуртысьтызы ик Светлана Ермаковалэн кылбурезъя но Михаил Бурдинлэн крезьгурезъя «Тонэ пумитай» кырӟанзы яратонлы сӥземын. 

Нылкышноос понна гурт калыксы но висе. Ирина Бурдиналэн тодэмезъя, кылзӥсьёссы туэ но вожвылъяськонэ сьӧразы мыныны малпало.

Тодэ вайытом, азьвыл КиясаПичи ПургаКезМожгаШарканБалезино, Ижкарысь ИндустриПервомайКизнер ёросъёсысь кырӟасьёсын тодматӥм вал.

Кизнер ёросысь Вуж Бӧдья гуртысь Александра Зайцева но Елена Афонова «Элькуновидениын» «Гуртэлы» кырӟанэнызы тодматозы. Бадӟым вожвылъяськонэ пыриськыны курдамзы но бӧрысь дӥсьтэмзы сярысь ивортодэтъя «Удмуртия» агентстволэн корреспондентэзлы Александра Зайцева вераз.

Нылкышноос кыкназы ик Вуж Бӧдья гуртысь лулчеберет юртын ужало. Елена Афонова кивалтӥсь луыса, Александра Зайцева – чеберлыкъя кивалтӥсь.

Александра Зайцевалэн верамезъя, «Элькуновидение» пыриськыны соосты кема куроно луиз. Нырысь соосты «Удмурт Кенеш» огазеяськонлэн Кизнер ёросысь ёзэтэзлэн кивалтӥсез Андрей Карпов дэмлам, собере ёрос администрациысь депутатъёслэн ёззы но курем.

Ми дӥсьтытэкгес ик мынӥм. Милям воксё йырамы но ӧй вал отчы мынон. <…> Ма кызьы, кызьы шуиськом, сокеме, собыдӟа конкурсэ, кызьы ми пыриськомы, гуртын ужасьёс. <…> Ми сярысь чебересь кырӟасьёс но вань ук Кизнерын шуиськом . Но вот соос ми борды кырмиськизы, и ми 30 числое, берпуметӥ нуналаз ини, соглаш кариським но заявка келям
Александра Зайцева, «Элькуновидение-2019» вожвылъяськонэ пыриськись

Кышкан кышканэн, но дарт аслэсьтыз «ужзэ» лэсьтӥз ик.

Любопытство милемыз таре нуэ ини отчы. Ми али отборочной тураз ветлӥмы бере, адямиосын тодматскимы, табере «Аксионын» но кырӟаса утчано
Александра Зайцева, «Элькуновидение-2019» вожвылъяськонэ пыриськись

Нылкышноос сизьым ар ӵоже ини ӵошен кырӟало. Кизнер ёросын ӵем гинэ сцена вылэ потало. Ижкаре «Марӟан гуръёс» фестивале вуылэмзы вань.

«Элькуновидениын» соос Александра Зайцевалэсь «Гуртэлы» кырӟанзэ быдэстозы. Со дасо пала кырӟанъёс гожтӥз ини, но аслаз верамезъя, таиз тужгес но сюлэмзыя, эшшо ик сое кылзӥсьёссы но, клубазы ветлӥсь арлыдо эшъёссы но туж ярато.

Мон сое гожъяй вал ини кемалась, ужаны пырем берамыгес ик. Сэре ми сое котькытынгес ик кырӟаськом ке, тани праздникъёсын, гуртъёсын но кырӟамзы потэ сое весь. <…> Ярато бере, муртъёслы но, оло, нош кельшоз шуыса. Мукетъёсыз но вань бон но, тазэ поттэммы потӥз. Гуртмес яратӥськом ми укыр, соин, дыр
Александра Зайцева, «Элькуновидение-2019» вожвылъяськонэ пыриськись

Гуртсэс яратэмзы ужзэс гижысь-пиньысь быдэстэмзыя но шӧдӥське. Нылкышноос калыксы понна туж тыршыса ужало, клубазы кыкназы 11 кружокъёс нуо.

Тани сценкаос но асьмеос ик гожъяськом. Эшшо интернетмы ӧвӧл. Соиз туж начар. <…> Со секыт. Соин ик милемлы асьмелы ваньзэ кароно луэ. Сценарийёс но асьмеос ик гожъяськом, кырӟанъёс но, кылбуръёс но гожъяськом – ваньзэ-ваньзэ йырысь
Александра Зайцева, «Элькуновидение-2019» вожвылъяськонэ пыриськись

Тодэ вайытом, «Элькуновидение» КиясаПичи ПургаКезМожгаШарканБалезино, Ижкарысь Индустри, Первомай ёросъёсысь кырӟасьёс но пыриськыны дасясько. 

Ижкарысь Первомай ёрос понна «Элькуновидение-2019» вожвылъяськонын сцена вылэ егит кырӟась Евгения Аркова потоз. Тунсыкъяськонъёсыз но вормонъёсыз сярысь со ивортодэтъя «Удмуртия» агентстволэн корреспондентэзлы вераз.

Евгения Аркова та дыре Удмурт кун университетын ньылетӥ курсын дышетске. Азьланяз англи кылъя дышетӥсь луыны дасяське.

«Элькуновидение» вожвылъяськонын Евгения «Яратон» нимо кырӟанзэ быдэстоз. Кылъёссэ тодмо удмурт гожъяськись Михаил Петров гожтӥз, нош крезьгурзэ – ачиз Евгения Аркова но Кирилл Кириллов.

Со мыным туж кельше, мон али асме озьы ик шӧдӥсько - яратон - соин ик кырӟасько со сярысь
Евгения Аркова, «Элькуновидение-2019» вожвылъяськонэ пыриськись

Евгения понна «Элькуновидение» нырысетӥез бадӟым вожвылъяськон уг луы ини. Кылем арын нылаш Удмуртилэсь данзэ Йошкар-Олаын «Мисс студенчества финно-угрии-2018» вожвылъяськонын утиз но вормисе потӥз. Отын но огаз конкурсын со кырӟан быдэстӥз но укулелеен шудӥз.

Кырӟаны сяна, Евгения кылъёсты дышетыны яратэ, англи кылын эрико вераське ини, со сяна венгер кылэз вала, кӧня ке вераськыны но быгатэ. Озьы ик эктыны кельшытэ.

Мон ветлӥсько «Чебеляй» студие. <…> Эктӥсько удмурт эктонъёсты
Евгения Аркова, «Элькуновидение-2019» вожвылъяськонэ пыриськись

«Элькуновидение» вожвылъяськонэ кырӟась выль тодон-валан басьтыны, выль тодмоос шедьтыны шуыса мынэ. Со сяна, льӧль малпанзэ быдэстыны луонлык утча.

Крезьгуро группа кылдытэме потэ. Оло, кинэ ке шедьто, кин мыным со бордын юрттыны быгатоз
Евгения Аркова, «Элькуновидение-2019» вожвылъяськонэ пыриськись

Тодэ вайытом, азьвыл КиясаПичи ПургаКезМожгаШарканБалезино но Ижкарысь Индустри ёросъёсысь кырӟасьёсын тодматӥм ини.   

Ижкарысь Индустри ёрослэсь данзэ «Элькуновидение-2019» вожвылъяськонын Виталий Белков утёз. Кырӟасен но вуоно эмчиен ивортодэтъя «Удмуртия» агентстволэн корреспондентэз тодматскиз.

Кизнер ёросысь Вуж Бӧдья гуртын вордӥськем 21 аресъем Виталий Белков али Ижкарысь кун эм академиын витетӥ курсын эмчилы дышетске, нош бӧрысь дышетсконзэ хирургия ӧръя азинтоз шуыса пусъе.

Кырӟанэн пияш пичи дырысеныз тунсыкъяське ини.

Дорын ваньмыз кырӟало но, мыным но пыриз, видимо
Виталий Белков, «Элькуновидение-2019» вожвылъяськонэ пыриськись

Виталий Белковлэн верамезъя, кырӟаны нимаз дышетскемез солэн ӧвӧл, ас вакытаз крезьгуръя школаын фортепиано классъя тодон-валан люказ. Нош али эм академиысь театр студие ветлэ, отын ик кырӟаны но дышетске.

«Элькуновидение» вожвылъяськонэ Виталий нырысьсэ пыриське. Сцена вылын быдэстоно «Мон тонэ малпай» кырӟанэзлы кылъёссэ но, крезьгурзэ но ачиз гожтӥз.

Сое «Шундыкарын» гожтӥ вал кадь мон, кулэ вал кырӟан гожтыны, мон гожтӥ
Виталий Белков, «Элькуновидение-2019» вожвылъяськонэ пыриськись

«Элькуновидение» кырӟась капчи мылкыдын вамыштӥсько шуэ, калыклы кельшоз шуыса оске.

Вормыны тунсыко, но ӧйтӧд, адӟом, ворми ке, туж усто, конечно
Виталий Белков, «Элькуновидение-2019» вожвылъяськонэ пыриськись

Та вожвылъяськон шаермылы туж кулэ шуыса пусъе.

Выль кырӟанъёс пото ук, кудъёсыз кытысь ке ёросъёсысь пыдлось. «Элькуновидение» ӧз ке луысал, со кырӟанъёсты, оло, ӧй но кылысалмы
Виталий Белков, «Элькуновидение-2019» вожвылъяськонэ пыриськись

Тодэ вайытом, КиясаПичи ПургаКезМожгаШаркан но Балезино ёросъёсысь кырӟасьёс но «Элькуновидение» вожвылъяськонэ пыриськыны дасясько.   

«Элькуновидение - 2019» вожвылъяськонэ 15 ёросъёслэн ыстэм муртъёссы пыриськозы. Концерт люкетэз 19-тӥ коньывуонэ Ижкарысь «Аксион» культура дворецын ортчоз, йылпумъян люкетэз - 2-тӥ шуркынмонэ «Удмуртия» телеканаллэн меӵак эфираз

Балезино ёросысь Юнда гуртысь Надежда Сидорова «Элькуновидение» вожвылъяськонын гуртысьтызы ик Надежда Урасиноваен гожтэм «Инкуазьлэн куараез» кырӟанэн тодматоз. Кызьы вераз со ивортодэтъя «Удмуртия» агентстволэн корреспондентэзлы, кырӟан сюлэмызъя луэ, сое быдэстыкуз вордӥськем гуртэз сярысь малпаське. 

Надежда Сидорова бесерман выжыысь потэмын. Лулчеберетъя колледжысь калык но хор творчествоя ёзэтэз йылпумъямын. Али Юнда гуртысь лулчеберетъя юртлэн кивалтӥсез луыса ужа.

Мон бесерман гуртын улӥсько бере, фольклорен герӟаськемын. Фольклор кырӟанъёсты тросгес кырӟасько
Надежда Сидорова, «Элькуновидение-2019» вожвылъяськонэ пыриськись

Кырӟан солэн ужез но, ваньмон дырзэ тырмытон но, яратонэз но луэ шуэ.

Мон быдэсак творчествое усемын, мон понна кырӟан, фольклор, крезьёс – улонам тужгес валтӥсьёсыз. Озьы ик семьяе, соос мон понна туж висё
Надежда Сидорова, «Элькуновидение-2019» вожвылъяськонэ пыриськись
 

Надежда Сидорова «Элькуновидение» вожвылъяськон элькунмылы туж кулэ шуыса пусъе. Угось отысь выль кырӟасьёс гинэ ӧвӧл, выль кылбурчиос но, крезьгурчиос но пото.

Соослэн но ведь эшшо гожъяны мылкыдзы ӝутске
Надежда Сидорова, «Элькуновидение-2019» вожвылъяськонэ пыриськись

Кырӟась понна «Элькуновидение» нырысетӥез бадӟым конкурс луэ. Надежда Сидоровалэн кылъёсызъя, азьвыл коллективен гинэ вожвылъяськонъёсы пыриськылэмез вань, нош огназ – нырысьсэ.

Мон арысь аре чакласько, учкисько, мон понна со туж тунсыко конкурс. <…> Кышкасько ке но, туэ дӥсьтӥ. <…> Нырысь ик асме эскереме потэ, быгатӥсько-а мон, кытчы азьланяз кыстӥськоно
Надежда Сидорова, «Элькуновидение-2019» вожвылъяськонэ пыриськись

Вожвылъяськонэ со Алина Бияноваен пыриськыны кулэ вал. Но, жаляса верано, нылкышно «Элькуновидение» вуыны уз быгаты. Соин валче Надежда Сидорова огназ кужымзэ мерталоз

Тодэ вайытом, азьвыл ми КиясаПичи ПургаКезМожгаШаркан ёросъёсысь кырӟасьёсын тодматӥм.

Шаркан ёросысь Зар-Вишур гуртысь «Инвожо» ансамбль «Элькуновидение-2019» вожвылъяськонэ дасяське. Со сярысь ивортодэтъя «Удмуртия» агентстволэн корреспондентэзлы «Инвожо» ансамбльлэн кивалтӥсез Ольга Широбокова вераз.

Михаил Широбоков, Александр Ардашев, Ольга Широбокова, Яна Широбокова, Екатерина Шкляева но Алина Сутягина кылбурчиен Владимир Котковен но крезьгурчиен Николай Несмеловен гожтэм «Вае эшъяськом» кырӟанэз быдэстозы.

Шаркан ёросысь коллектив учкисьёсызлы кемалась тодмо ини. Кылем арын соос 10 ар тырмонзэс но пусйизы. Солы луыса гурт клубазы пӧртэм аръёсы ансамбле пыриськисьёсты люказы но бадӟым концерт радъязы. Ольга Широбоковалэн кылъёсызъя, сцена вылэ оглом 12 адями люкаськиз.

Нырысь кутским вал ми ӟуч кырӟанъёс бордысен, али удмурт эстрада вылэгес выжим. <…> Ми асьме авторъёслэсь трос кырӟанъёс кырӟаськом. Милям гуртамы уго трос гожъяськисьёс. Владимир Васильевичлэсь (Котков – ред.) трос кырӟаськом кырӟанъёссэ
Ольга Широбокова, «Инвожо» ансамбльлэн кивалтӥсез

Ансамбль пӧртэм фестивальёсы пыриськылэ. Ольга Широбоковалэн верамезъя, тужгес бадӟымез, кытчы соос кык пол пыриськылӥзы ини – Сыктывкарын ортчись «Ыбица» фестиваль.

Тыршемзылэсь емышсэ ёросазы адӟо но пусъё. Кылсярысь, одӥг арзэ «Инвожо» ансамбль Шаркан ёрослэн Данъян пул вылаз пыртэмын вал

Учкисьёссы но концертъёссэс ӵыдытэк витё. «Элькуновидение» вожвылъяськонын гуртооссы понна висьыны мыныны зар-вишуръёс кык автобус куриллям ини.

Быдэс гурт калык ми понна сюлмаське ини. Туж зол ярато. Вот сыӵе зол отдача вань ке учкисьёслэсь, тодӥськод, тонэ соос витё шуыса, шумпотыса пумитало, туж бадӟым мылкыд сёто
Ольга Широбокова, «Инвожо» ансамбльлэн кивалтӥсез

«Элькуновидение» вожвылъяськонэ пыриськыны мылкыдзы кырӟасьёслэн кемалась кылдэм ини. Но арысь аре ёрос быръён люкетын вормисе потыны ӧз быгатылэ. Шаркан ёросын трос гинэ кырӟась коллективъёс, соин ик «Элькуновидение» мынӥсьёсты рос-прос быръё. Тани туэ «инвожоослы» шуд усиз.

«Элькуновидение» - со удмурт кырӟанлы, мыным потэ, туж бадӟым ӧс усьтэ. <…> Мыным но, коллективмылы но со туж яра, туж шумпотыса пыриськиськом ми со конкурсэ
Ольга Широбокова, «Инвожо» ансамбльлэн кивалтӥсез

Тодэ вайытом, КиясаысьПичи ПургаысьКезысь но Можгаысь коллективъёс но «Элькуновидение» пыриськыны дасясько. 

Туэ «Элькуновидение» вожвылъяськонэ Можга ёрослэсь «Алача» ансамбль пыриськоз. Кинъёс соос но маинызы висъясько, ивортодэтъя «Удмуртия» агентстволэн корреспондентэзлы ансамбльысь огез кырӟась Ирина Дмитриева вераз.

«Алача» ансамбль ньыль нылкышноосты но одӥг воргоронэз огазея. Ирина Дмитриева, Илона Дьяконова, Полина Булдакова, Екатерина Данилова но Владимир Петров лулчеберет но крезьгурлы дышетон удысын тыршо. Можга ёросысь пӧртэм гуртъёсын уло ке но, пумиськылыны дыр шедьто.

Нылъёслэн вань фольклоръя асьсэ нылпи коллективъёссы. Озьы ми люкаським. Ог-огенымы кемалась тодмо бере, одӥг тунсыкъяськонмы вань бере, ойдолэ коллектив кылдытом шуыса вераським. Пиналъёслы но крезьгуръя школаын ужрадъёс дыръя яке мукет пумиськонъёсын возьматоно шуыса
Ирина Дмитриева, «Алача» ансамбле пыриськись

Ансамбле пыриськисьёс сяме пырем фольклорез утён бордын тыршо. Котькыӵе вожвылъяськонъёсы пыриськыны вуо. Кылсярысь, Казаньын ортчем «Яблонь белый цвет»калыккуспо вожвылъяськонысь I степенё лауреатъёс луыса бертӥзы, «ГуртFEST» фестивальын кыкетӥ инты басьтӥзы.

Зэмзэ ке вераса, ми котькытчы пыриськыса вуттӥм ини. <…> Нош татын малпам, милемыз Татариын гинэ тодыны кулэ ӧвӧл, Удмуртын но
Ирина Дмитриева, «Алача» ансамбле пыриськись

Алача - етӥнлэсь яке кагазлэсь куэм яркыт буёло басма. Ирина Дмитриевалэн кылъёсызъя, ансамблязы но соослэн ваньзылэн ик вашкала куэм дӥсьёссы вань. Но азьвыл соос мукет сямен нимаськизы.

Нош собере милям мар ке но удмуртсэ басьтэммы потӥз, тунсыкозэ, тодмотэмзэ. Интернетысь учким но милемлы сюриз алача – озьы ми «Алача» луом шуыса малпам
Ирина Дмитриева, «Алача» ансамбле пыриськись

«Элькуновидениын» «алачаос» кылбурчиен Римма Рыловаен но крезьгурчиен Александр Андреевен гожтэм «Дауръёсын мед улоз» кырӟанэз быдэстозы.

«Элькуновидениын» ми эксперимент лэсьтыны малпам. Отчы угось туала обработка кулэ. Ми оскалтоно кариським
Ирина Дмитриева, «Алача» ансамбле пыриськись

Вожвылъяськонэ можгаос асьсэды возьматыны, кылзӥсьсэс шедьтыны мынӥськом шуо. Вормон понна но нюръяськозы шуыса пусъё.

Тодэ вайытом, азьвыл КиясаПичи ПургаКез ёросъёслэсь данзэс утьыны дасяськисьёсын тодматӥм вал ини.

Кез ёросысь Юлия Третьякова «Элькуновидение-2019» вожвылъяськонын яратон сярысь кырӟанэз быдэстоз. Ивортодэтъя «Удмуртия» агентстволэн корреспондентэзлы со конкурслы дасяськемез, оскон-возьманъёсыз сярысь мадиз.

Егит нылкышно Кез ёросысь «Леспромхоз» лулчеберет юртын пиналъёсын ужанъя методист луыса тырше, ужрадъёс ортчытэ. Со сяна, кырӟанъя но эктонъя «Ӟардон» ансамбле ветлэ.

Вожвылъяськонэ пыриськыны со ачиз мылкыд кариз. Солы «Яратон» кырӟан азьвыл аръёсы Кез ёрос понна конкурсэ пыриськылэм Сергей Ефремов гожтӥз.  

Мон кылем арын Сергей понна висьыны ветлӥ. И мон шуисько, мынам но со быдӟа сцена вылэ потэме потэ, мыным но гожтэ, шуисько, кырӟан кыӵе ке, шулдыр мед луоз. Со мыным номыр пумит ӧз вазьы но мынь гинэ потӥз. Ӝыны ар ортчыса-а, мар-а, дорам лыктӥз но, Юля, шуэ, мон кырӟан гожтӥ тыныд
Юлия Третьякова, кырӟась

Кырӟан гожтыны ачиз ик куриз вал ке но, малпанэз быдэсмонлы туж паймем. Но, кырӟанлэсь пуштроссэ лыдӟыса, солы уггес тупа кадь шуыса шӧдэм.

Нош али репетициос ортчытъяськом, дасяськиськом но вживаться кариськисько ни-а, мар-а мон. Мынам кадь шуисько ини
Юлия Третьякова, кырӟась

«Элькуновидение» вормон понна уг мынӥськы, шуэ.

Адями шоры учкыны, асме возьматыны
Юлия Третьякова, кырӟась

Кырӟаны-эктыны быгатэм сяна, Юлия Третьякова спортэн эшъяське. Гужемзэ капчи атлетикаен выре, толалтэ куас вылэ султэ. Кузпалэныз ӵош кык пиналзэс будэто.

Тодэ вайытом, азьвыл Кияса но Пичи Пурга ёросъёсысь «Элькуновидение» пыриськись артистъёсын тодматӥм вал. 

Удмурт кырӟанъя «Элькуновидение-2019» вожвылъяськонын Пичи Пурга ёрослэсь данзэ эстрадая «Акцент» группа утёз. Отчы куинь йӧно воргоронъёс пырисько. Соос сярысь ивортодэтъя «Удмуртия» агентстволэн корреспондентэзлы ёросысь лулчеберет юртысь ужез радъянъя но методикая ёзэтысь калык творчествоя методист Наталья Петрова вераз.

Сергей Соснов, Сергей Никандров но Эдуард Мираев «Элькуновидение» кыкетӥзэ пырисько ини. Но азьвыл соос нимаз но пӧртэм аръёсы потазы вал. Озьы ке но, валанзы вань ини шуыны луоз.

Воргоронъёс куиньназы ик ёросысь лулчеберет юртын тыршо: Сергей Соснов - Пичи Пургаысь калык хорлэн аккомпаниаторез, Сергей Никандров - кивалтӥсьлэн воштӥсез но ветеранъёслэн хорзылэн аккомпаниаторез, Эдуард Мираев - эстрадая «Акцент» группалэн кивалтӥсез.

Сергей Никандров – со хозяйственник, солэн аслаз юртъерез, Сергей Сосновлэн аслаз магазинъёсыз вань – пӧйшуранъя, чорыганъя, Эдуард Мираев сюанъёсты нуэ. Соос ваньзы творческой адямиос
Наталья Петрова, Пичи Пурга ёросысь лулчеберет юртысь ужез радъянъя но методикая ёзэтысь калык творчествоя методист

Наталья Петровалэн верамезъя, воргоронъёс ас удысазы азинскем, быгатонлыко муртъёс луо. Сергей Соснов Удмуртиысь гожъясьёслэн но крезьгурчиослэн огазеяськонъёссылэн ёзчиез луэ. Пичи Пурга лулчеберетлэн азинсконэз понна висе. Кылбуръёс гожъя, солэн трос гинэ бичетъёсыз потэмын ини. Кылбуръёссэ ӵем гинэ ёросысь крезьгурчиос кырӟан гожтыны быръё.

«Элькуновидение» пыриськыны быръем «Сӥзьыл пала» кырӟанзылэсь кылъёссэ Сергей Соснов гожтӥз, крезьгурзэ - Эдуард Мираев

Наталья Петровалэн кылъёсызъя, Эдуард пичи дыръяз элькунамы туж тодмо адями вал.

Со туж трос концертъёсын ветлэ вал Геннадий Ганьковен, шонер ик уг тодӥськы ни, но со кыӵе ке но радиконкурсын но вормиз вал
Наталья Петрова, Пичи Пурга ёросысь лулчеберет юртысь ужез радъянъя но методикая ёзэтысь калык творчествоя методист

«Акцент» группалэн кивалтӥсезлэн Эдуард Мираевлэн верамезъя, соос кырӟаны нимысьтыз дышетскымтэ, крезьгуро арбериен шудыны гинэ. Озьы ке но, кырӟаны туж ярато, сюлмысь тыршо.

Ми понна вормон валтӥсез ӧвӧл, пыриськон гинэ. Сценалэсь, калыкен вераськемлэсь мылкыд, кайф басьтэммы потэ. Вормон милемлы сокем кулэ ӧвӧл, кӧня тунсыко конкурсэ пыриськон
Эдуард Мираев, «Акцент» группалэн кивалтӥсез

Тодэ вайытом, Кияса ёрослэсь данзэ «Чильтэр» ансамбль утёз.

Кема ик дыр ӧз кыльы ни, Удмуртиын нош ик удмурт кырӟанъя «Элькуновидение-2019» вожвылъяськон ортчоз. Ивортодэтъя «Удмуртия» агентство тодматоз, кинъёс туэ выль кырӟанъёссэс быдэстозы.

Кутскомы Кияса ёросысь «Чильтэр» ансамбль бордысен. Кинъёс отчы пырисько, мар ужало, ансамбльлэн кивалтӥсез Любовь Митрянова вераз.

«Чильтэр» ансамбль сизьым ар ӵоже кылзӥсьёссэ шумпоттэ ини. Отчы Кияса ёросысь Калыклы мерлыко юрттэт сётонъя центрысь котькытчы вутскись ньыль нылкышноос пырисько: Наталья Бочкарёва – кулэяськисьёс доры гуртазы потаса ужан ёзэтэн кивалтӥсь, Роза Беспалова – со ёзэтысь ик ӧнерчи, Елена Печникова – психолог но Любовь Митрянова – реабилитация ёзэтысь ӧнерчи.

Любовь Митряновалэн верамезъя, «Элькуновидение» пыриськыны мылкыдзы куинь ар талэсь азьло кылдӥз ини, но весь мар ке люкетылӥз. «Вакытэз вуэмын вылымтэ на али», - шуэ ансамблен кивалтӥсь. Нош туэ ваньмыз тупам. Мылкыдзэс тужгес ик ӝутъям центрен кивалтӥсьсы Тамара Новосёлова.

Кузёмы милемыз туж поддержать кариз. <…> Капчи адями ачиз. Милемлы но со котькуд ужын сюрес усьтэ. Мылкыд кариз, уксёен юрттӥз - кырӟанъя но, дӥськут вуронъя но, чисто ачиз малпаз модельёс но, материал басьтыны гинэ но ачиз ветлӥз. Вӧзын сыӵе юрттӥсь вань ке, мылкыд сётӥсь вань ке, аслад но мылкыдыд луэ
Любовь Митрянова, «Чильтэр» ансамбльлэн кивалтӥсез

Та вожвылъяськонэ «чильтэръёс» нырысьсэ пырисько. Конкурсысь выль эшъёс шедьтыны, выль кырӟанъёс кылыны, выль мылкыд басьтыны малпало. Со сяна, вормон сярысь малпанзы но сюлэмазы вань, шуо, дас устоосыз пӧлы ке но пырозы шуыса оско. «Элькуновидениын» соос Кияса ёрос администрациысь ӧнерчиен Ольга Танаеваен гожтэм «Гуртын будэмын » кырӟанэз быдэстозы.

Со трос аръёс ӵоже пинал дырысеныз ачиз кырӟанъёс гожъя, гитараен шудэ, арганэн но шудэ. Музыкант. Творческой адями туж
Любовь Митрянова, «Чильтэр» ансамбльлэн кивалтӥсез

Творчествоен вырон сяна, нылкышноос гурт котыразы но вутто: нылпиоссэс будэто, пудо вордо, емыш будэто, корка пукто, киужлы но дыр висъяло. Со сяна, мугорзэс веськресгес карон понна фитнесэ но потало.

Кыӵе уж борды ум кутскиське, ваньмыз милям киямы ӝуа. Ваньзэ быгатӥськом. Мылкыд сётӥсь луиз ке – дуннеез берыктом. Сыӵеесь ми ваньмы ньыльнамы ик
Любовь Митрянова, «Чильтэр» ансамбльлэн кивалтӥсез

Тодэ вайытом, «Элькуновидение-2019» вожвылъяськонэ Удмуртиысь ёросъёсысь но каръёсысь 15 куриськонъёс вуизы

Ижкарын «Элькуновидение - 2019» вожвылъяськонэ куриськонъёсты кутон йылпумъяськиз. Со сярысь ужрадлэн «ВКонтакте» мерлыко вотэсысь огиназ ивортэмын.

Сцена вылэ потыны быгатозы 15 ёросъёсысь кырӟасьёс:

  1. Кияса ёрос – «Чильтэр» ансамбль, «Гуртын будэмын» кырӟан, кылъёсыз но крезьгурез Ольга Танаевалэн;
  2. Можга ёрос – «Алача» ансамбль, «Дауръёсын мед улоз» кырӟан, кылъёсыз Римма Рыловалэн, крезьгурез Александр Андреевлэн;
  3. Кез ёрос – Юлия Третьякова, «Яратон» кырӟан, кылъёсыз но крезьгурез Сергей Ефремовлэн;
  4. Пичи Пурга ёрос – «Акцент» группа, «Сӥзьыл пала» кырӟан, кылъёсыз Сергей Сосновлэн, крезьгурез Эдуард Мираевлэн;
  5. Алнаш ёрос – Ирина Бурдина но Елена Никонова, «Тонэ пумитай» кырӟан, кылъёсыз Светлана Ермаковалэн, крезьгурез Михаил Бурдинлэн;
  6. Глаз ёрос – Юрий Князев, «Чагыр инметӥ» кырӟан, кылъёсыз Валентина Васильевалэн, крезьгурез Юрий Князевлэн;
  7. Ижкарысь Индустри ёрос – Виталий Белков, «Мон тонэ малпай» кырӟан, кылъёсыз но крезьгурез Виталий Белковлэн;
  8. Шаркан ёрос – «Инвожо» кырӟанъя ансамбль, «Вае эшъяськом» кырӟан, кылъёсыз Владимир Котковлэн, крезьгурез Николай Несмеловлэн;
  9. Балезино ёрос – Надежда Сидорова но Алина Биянова, «Инкуазьлэн куараез» кырӟан, кылъёсыз но крезьгурез Надежда Урасиновалэн;
  10. Ижкарысь Первомай ёрос – Евгения Аркова, «Яратон» кырӟан, кылъёсыз Михаил Петровлэн, крезьгурез Евгения Арковалэн;
  11. Ижкарысь Октябрь ёрос – Алина Егорова, «Берытскы» кырӟан, кылъёсын но крезьгурез Алина Егоровалэн;
  12. Кизнер ёрос – Александра Зайцева но Елена Афонова, «Гуртэлы» кырӟан, кылъёсыз но крезьгурез Александра Зайцевалэн;
  13. Эгра ёрос – Елизавета Лекомцева, «Улонмы – чылкыт куар» кырӟан, кылъёсыз но крезьгурез Елизавета Лекомцевалэн;
  14. Ижкарысь Ленин ёрос – Катерина Кенӟали, «Сюлэмо» кырӟан, кылъёсыз но крезьгурез Катерина Кенӟалилэн.
  15. Сьӧлта ёрос – Василий Иванов, «Ой, кыӵе со зэмос яратон» кырӟан, кылъёсыз но крезьгурез Прохор Столбовлэн.

Вуоно кӧснуналэ,

Читать полностью

«Элькуновидение 2019» вожвылъяськон туэ дышем сямен берпуметӥез луыны быгатоз. Со сярысь ивортодэтъя «Удмуртия» агентстволы конкурсэз огез радъясь Светлана Пикулева ивортӥз.

Вуоно арын – Удмуртилэн кунлыкезлы 100 ар тырмон арын – кужмоосызлэсь вожвылъяськонзэс радъялом. Суперфиналэ вань аръёсысь вормисьёс пыриськозы. Озьыен, кузьымез но супер луоз!
Светлана Пикулева, «Элькуновидение» вожвылъяськонэз огез радъясь

Удмурт кырӟанъя «Элькуновидение» вожвылъяськонын вормылӥзы:

  • 2012-тӥ ар — Можга ёросысь «Вить Сергейёс» ансамбль «Льӧму сяська» кырӟанэн;
  • 2013-тӥ ар — Можга карысь «ВиА» дуэт (Влад Андреев но Андрей Конышев) «Тон мынам чеберае» кырӟанэн;
  • 2014-тӥ ар — Шаркан ёросысь «Тулкым» ансамбль «Кырӟан но мон» кырӟанэн;
  • 2015-тӥ ар — Пичи Пурга ёросысь Андрей Корнилов «Льӧмпу сяська» кырӟанэн;
  • 2016-тӥ ар – Пичи Пурга ёросысь Игорь Петров но Андрей Байсаров «Аня» кырӟанэн;
  • 2017-тӥ ар – Сарапул ёросысь Павел Смирнов «Чирдоз уӵы» кырӟанэн;
  • 2018-тӥ ар – Дэбес ёросысь Артемий Гаврилов «Мон удмурт» кырӟанэн.

Тямысэтӥез пыриськись ӝоген тодмо луоз. «Элькуновидение 2019» вожвылъяськонын аьсэдыз возьматыны мылкыд карисьёслэсь куриськонъёссэс 30-тӥ куартолэзёзь куто.  Валтӥсь люкетэз Ижкарын 19-тӥ коньывуонэ ортчоз. Йылпумъян люкетэз -  2-тӥ шуркынмонэ телеэфирын.

Удмурт кырӟанъя «Элькуновидение 2019» вожвылъяськонэ куриськонъёсты сётоныны дыр одӥг арня пала кылиз. Туннэ нуналлы вить куриськон вуиз. Со сярысь ивортодэтъя «Удмуртия» агентстволы конкурсэз огез радъясь Светлана Пикулева ивортӥз.

Каллен вуо. Али витез пусъемын. Котьку сямен, берпуметӥ нуналэз возьмало
Светлана Пикулева, «Элькуновидение» вожвылъяськонэз огез радъясь

Вожвылъяськонэ пыриськыны куриськонъёс та дырлы сётӥзы:

  1. Кияса ёрос - «Чильтэр» ансамбль («Гуртын будэмын» кырӟан, кылъёсыз но крезьгурез Ольга Танаевалэн;
  2. Можга ёрос –«Алача» ансамбль («Дауръёсын мед улоз» кырӟан, кылъёсыз Римма Рыловалэн, крезьгурез Александр Андреевлэн);
  3. Кез ёрос – Юлия Третьякова («Яратон» кырӟан, кылъёсыз но крезьгурез Сергей Ефремовлэн);
  4. Пичи Пурга ёрос – «Акцент» группа («Сӥзьыл пала» кырӟан, кылъёсыз Сергей Сосновлэн, крезьгурез Эдуард Мираевлэн);
  5. Алнаш ёрос – «Сябась» ансамбль («Тонэн сяськая улонэ» кырӟан, кылъёсыз Любовь Ганьковалэн, крезьгурез Александр Галеевлэн.

Тодэ вайытом, куриськонъёсты басьтон 30-тӥ куарусёнозь кыстӥськоз. Коньывуонлэн нырысетӥ шутэтскон нуналъёсаз «Элькуновиденилэн» быръён люкетэз ортчоз. Со пыр потэмъёс асьсэлэсь быгатонлыкъёссэс сцена вылын возьматозы 19-тӥ коньывуонэ. Йылпумъян люкетэз 2-тӥ шуркынмонэ «Удмуртия» телеканаллэн меӵак эфираз ортчоз.

Пусъём,удмурт кырӟанъя «Элькуновидение 2019» вожвылъяськон таяз арын тямысэтӥез луоз ни. 

Тодэ вайытом, кылем арын сцена вылэ 21 кырӟасьёс но коллективъёс потазы, вожвылъяськонын Дэбес ёросысь Артемий Гаврилов вормиз.

Наверх
Вниз