Ижкар+3 °C
25 -тӥ коньывуон 2020 Воскресенье
18+

Удмуртилэн тӧроез Александр Бречалов туннэ, 24-тӥ толсуре, куасэн бызьылонъя Галина Кулакова нимо марафонэ пыриськиз, ӵошатсконъёс спортъя «Чекерил» огъетын ортчизы. Улосвыллэн кивалтӥсез 10 иськемез ортчиз.

Куас сюрес вылэ потон азяз со пусйиз, куасэн бызьылонъя ньыль полэс олимпи чемпионка Галина Кулакова нимо нырысетӥез калыккуспо марафон радъясьёслэсь чакланъёссэс ортчиз.

Пусйиськем пыриськисьёслэн лыдзы вань чакланъёсмес ортчиз. Мон шумпотӥсько но тодӥсько, Удмуртиын кусэн бызьылонъя но, биатлонъя но «топовой» ӵошатсконъёс одно ик луыны кулэ.
Александр Бречалов, Удмуртилэн тӧроез

Озьы ик солэн верамезъя, табере ӵошатсконъёсты калыккуспо ёзэ поттыны кулэ, отчы тросгес кунъёс мед пыриськозы, но со понна дыр кулэ.

Куасэн бызьылонъя Галина Кулакова нимо марафонэ Россилэн улосвылъёсысьтыз, озьы ик Казахстанысь 700-лэсь трос адями пыриськиз. 

Куасэн бызьылонъя Галина Кулакова нимо нырысетӥез марафон Икар вӧзысь спортъя «Чекерил» огъетын ортчиз. Пӧртэм иськемъёсы оглом 750 пала адями потӥз, веразы радъясьёс ивортодэтъя «Удмуртия» агентстволэн корреспондентъёсызлы.

Пиналъёс 2 иськеме бызизы. 8–10 аресъем нылъёс пӧлын нырысетӥ вуизы Елизавета Плеханова, София Петренко но Екатерина Тимеева 10–12 аресъем нылъёс пӧлын — София Рыдельник, Софья Ившина, Арина Максимова.

8–10 аресъем пиос пӧлын финиш гожез нырысетӥ ортчизы Ильнар Хасанов, Дамир Бородин, Тимур Перевощиков. 10–12 аресъемъёс пӧлын куинь кужмоосыз — Илья Краснопёров, Радим Васильев но Александр Верёвкин.

Куасэн бызьылонъя Г. А. Кулакова нимо марафон

6 фото

Предприятиослэн но огазеяськонъёслэн командаоссы 3×10 эстафетае пырисько, нылкышноос 30 иськемын, воргоронъёс 50 иськемын кужымзэс мертало.

Воргоронъёс пӧлын 50 иськеме бызёнын вормисьёс:

  1. Равиль Валиахметов (2 час 9 минут 52 секунд)
  2. Александр Уткин (+1,5 секунд)
  3. Дмитрий Япаров (+1,6 секунд)

Нылкышноос пӧлын 30 иськеме бызёнын вормисьёс:

  1. Оксана Главатских (1 час 26 минут 40 секунд)
  2. Алёна Перевозчикова (+3,4 секунд)
  3. Дина Некрасова (3 минут 26 секунд)

Туннэ, 18-тӥ толсуре, куасэн бызьылонъя Галина Кулакова нимо калыккуспо марафонэ пыриськисьёслы старт пакетъёсты сётъяны кутскизы. Со сярысь ивортэ элькунысь физкультурая, спортъя но егитъёсын ужан политикая министерстволэн пресс-службаез.

18–22 толсуре арбериосты басьтыны луоз Ижысь кар ӵектосъёсъя «Лифт» штабын (Пушкинской урам, 216) 9 часысен 18 часозь. Отын ик ужрадъя юанъёс сётыны но ӵошатсконэ пыриськон понна куриськон гожтыны луоз.

23-тӥ но 24-тӥ толсуре старт пакетъёсты сётъян спортъя «Чекерил» огъетын мыноз (23.12 — 9:00-18:00, 24.12 — 7:00-10:00).

Радъясьёс бадӟым уж лэсьтӥзы, ӵошатсконъёс вылӥ уровенен ортчозы. Матысь нуналъёсы дасяськон ужъёсты йылпумъяськомы, куасэн бызьылон сюресэз кутӥськомы
Наталья Гольцова, Удмуртиысь физкультурая, спортъя но егитъёсын ужан политикая министр

Куасэн бызьылонъя Галина Кулакова нимо калыккуспо ӵошатсконъёс спортъя «Чекерил» огъетын 24-тӥ толсуре ортчозы. Ужрадэ пыриськон понна Россилэн 18 улосвылъёсысьтыз 700-лэсь трос адями пусйиськиз ни. Радъясьёс 1 сюрлэсь трос пыриськисьёсты возьмало. 

Сортэз яратӥсьёс 10, 30 но 50 иськеме бызьылозы. Пиналъёсты 2 иськемез ортчыны ӧтё. Ужась коллективъёс понна 3×10 эстафета радъяськоз. Быдэс сюресэз ортчем муртъёслы марафонлэсь медальзэ сётозы, вормисьёсты кузьымъёсын пусъёзы.

24-тӥ толсуре «Чекерил» огъетэ чугун сюреслэн кассаосыз (Ленин урам, 4) дорысен нимысьтыз автобус ветлоз — 7 часысен 9 часозь котькуд 15 минутлы быдэ. Берен бертыны луоз 14 часысен 17 часозь (озьы ик котькуд 15 минутлы быдэ).

Марафонэ пыриськон понна пусйиськыны, бызьылон сюресъёсын тодматскыны луоз ужрадлэн сайтаз.

Куасэн бызьылонъя Галина Кулакова нимо калыккуспо марафонэ Удмуртиын 1200–1400 пыриськисьёсты возьмало. Со сярысь 13-тӥ толсуре ортчем пресс-конференциын вераз элькун кивалтэтлэн тӧроезлэн нырысетӥ воштӥсезлэсь ужзэ быдэсъясь Александр Свинин.

Озьы, солэн верамезъя, спортэн тунсыкъяськисьёс пӧлын та ӵошатсконъёс тужгес трос калыкез люкась коммерци стартъёс луозы. Корпоративной эстафетае гинэ 30 пала командаос куриськон сётӥзы ни. 10-тӥ толсурлы 600-лэсь трос адями пусйиськемын вал ни, со пӧлысь 350-эз мукет улосвылъёсысь. Оглом Россиысь 54 каръёсысь но 13 интывылъёсысь.

Радъясьёс пыриськисьёслы марафонлэн тодметэныз нимысьтыз изьыос но мукет арбериос дасяло, соосты лэсьтонэ элькунысь ужбергатӥсьёсты кыскыны тыршо.

Александр Свинин пусйиз, ӵошатсконъёс мынон интыосы пыриськисьёсты но учкисьёсты нуон-ваён радъямын луоз шуыса

Солэн кылъёсызъя, куасэн бызьылонъя Галина Кулакова нимо калыккуспо марафон элькунын сяме пырыны кулэ. Озьы ик, кызьы «Титан»-триатлон но 2018-тӥ арын куарусён кутсконын ортчытыны чаклам полумарафон.

Тодэ вайытом, куасэн бызьылонъя марафонэ пыриськемзы сярысь ялӥзы ни Удмуртилэн тӧроез Александр Бречалов, Удмуртиысь Биатлонъя федерацилэн кивалтӥсез Иван Черезов, паралимпи чемпион Владислав Лекомцев.

Пыриськон понна пусйиськыны, куронъёсын но трассаослэн схемаосынызы тодматскыны марафонлэн сайтаз луэ.

Ватсалом, марафон дистанциос сяна (50 иськем воргоронъёс понна но 30 иськем нылкышноос понна), 2 но 10 иськеме бызьылонъёс, озьы ик эстафетаос луозы.

Дуннелэн куинь пол чемпионэз но Олимпи шудонъёслэн кык пол призерез, Удмуртиысь Биатлонъя федерацилэн кивалтӥсез Иван Черезов куасэн бызьылонъя Галина Кулакова нимо калыккуспо марафонэ пыриськоз. Со сярысь элькунысь спортъя министерстволэн пресс-службаез ивортэ.

Куас — спортысь одӥгез тужгес дунтэмез амал, кудӥз тазалыкез юнматыны юрттэ. Умой, уно калыклы чаклам та выллем стартъёс асьме элькунын тросгес кылдо шуыса. Шумпотыса марафонэ пырисько, 50 иськеме бызё
Иван Черезов, Удмуртиысь Биатлонъя федерацилэн кивалтӥсез

Азьвылгес марафонэ пыриськыны мылкыдзэс Удмуртилэн тӧроез Александр Бречалов но паралимпи чемпион Владислав Лекомцев шараязы.


Тодэ вайытом, марафон спортъя «Чекерил» огъетын 24-тӥ толсуре ортчоз. Программаын 10, 30 но 50 иськемъем дистанциос, 3 адямиен 10 иськеме эстафета, пиналъёслы 2 иськемъем старт.

«Пыриськыны 300-лэсь трос адями курон сётӥз ни», — иворто радъясьёс.

Куриськон сётыны, радлыкез но трассаослэн схемаосыныз тодматскыны марафонлэн сайтаз луэ.

Сочиын Паралимпи шудонъёслэн биатлонъя но куасэн бызьылонъя кык пол чемпионэз, дуннелэн чемпионэз Владислав Лекомцев 24-тӥ толсуре Удмуртиын куасэн бызьылонъя Галина Кулакова нимо калыккуспо марафонэ пыриськоз. Со сярысь ивортэ элькунысь физкультурая, спортъя но егитъёсын ужан политикая министерстволэн пресс-службаез.

Канадаын дуннелэн Кубокезлэн люкетаз ӵошатскон бере кӧня ке нуналме дорын, Удмуртиын, шумпотыса ортчыто но вуоно стартъёслы дасяськонме куасэн бызьылонъя Галина Кулакова нимо калыккуспо марафонэ пыриськыса азьланьто. Ӧтисько ваньдэсты стартэ, куас сюрес вылын пумиськытозь!
Владислав Лекомцев

Марафон спортъя «Чекерил» огъетын ортчоз. Программаын 10, 30 но 50 иськемъем дистанциос. Предприятиос но огазеяськонъёс 3 адямиен 10 иськеме корпоративной эстафетае куриськон сётыны быгато, нош пиналъёс 2 иськемын ӵошасткозы.

Со сяна, 23-тӥ толсуре марафонэ пыриськись куноос понна экскурсия ортчытозы. Нош ӵошатскон нуналэ, 24-тӥ толсуре, учкисьёслы конкурсъёс радъяськозы.

Тодэ вайытом, марафонлы дасяськемез сярысь «Твиттерысь» вотэсбамаз азьвылгес ивортӥз Удмуртилэн тӧроез Александр Бречалов но.

Ватсалом, марафонэ гожтӥськыны но трассаослэн схемаенызы тодматскыны луоз марафонлэн нимлыко сайтаз.

Удмуртиын Куасэн бызьылонъя Галина Кулакова нимо калыккуспо марафонэ сюрс пала спортсменъёс пыриськыны быгатозы. Ӵошатскон 24-тӥ толсуре «Чекерил» огъетын ортчоз. Со сярысь ивортӥзы элькунысь физкультурая, спортъя но егитъёсын ужан политикая министерствоын.

Министерствоын верамзыя, спортсменъёс 2 иськемын 50 иськемеозь кузьдалаем сюресъёс вылын вожвылъяськозы. Радъясьёсыз «ТИТАН» огазеяськон, Удмуртиысь физкультурая, спортъя но егитъёсын ужан политикая министерство, Удмуртиысь куасэн бызьылонъя федерация.

Ужанрадлыкын таӵе амалъёс:

  • Нимаз бызьылонъёс (2 иськем)
  • Нимаз бызьылонъёс (10 иськем)
  • Этафета (3×10 иськем)
  • Марафон (50 иськем) (воргоронъёс)
  • Марафон (30 иськем) (нылкышноос)

Ӵошатсконэ Россилэн но мукет кунъёслэн кунмуртъёссы пыриськыны быгато. Пусйиськон нимлыко сайтын кутскиз ни.

Лыктэмъёсты нимлыко пусъён но стартэ потон пакетъёсты сётъялозы «Чекерил» огъетлэн кунокуаяз 23-тӥ толсуре 9 часысен 21 часозь.

Нялтас вераса, марафонлы дасяськемез сярысь «Твиттерысь» вотэсбамаз ивортӥз Удмуртилэн тӧроез Александр Бречалов. 18-тӥ коньывуонэ со Иван Черезовен нырысетӥ тренировказэ ортчытӥз.


Тодэ вайытом, 4 полэс олимпи чемпионкалы но дуннелэн 9 полэс чемпионкаезлы Галина Кулаковалы сӥзем бадӟым ӵошатсконъёсты Удмуртиын ортчытъян мылкыдыз сярысь Александр Бречалов 2017-тӥ арын оштолэзе вераз вал.

Куасэн бызьылонъя Галина Кулакова нимо ӵошатсконъёсты радъян сярысь тупанкылэз Удмуртиын 29-тӥ оштолэзе юнматозы. 18-тӥ оштолэзе Пичи Пурга ёросэ вуылыкуз журналистъёслы со сярысь вераз элькун тӧролэсь ужзэ огдырлы быдэсъясь Александр Бречалов.

Солэн верамезъя, элькунын Галина Кулакова кадь нимо-дано адямиос уло бере, «куасэн бызьылонъя одӥгзэ устозэ марафонэз» радъянэз но ӵошатсконъёслы дано куасэн бызьылӥсьлэсь нимзэ сётонэз со аслаз долгеныз лыдъя. Кичӧлтонлы коньдонэн юрттыны дась луись адями шедиз ни.

«Вань адями, кудӥз бадӟым ӵошатсконэз радъяны коньдон висъялоз, ми со сярысь трос азьялонъёс лэсьтомы, Россилэн вань каръёсысьтыз сюрсъёсын спортсменъёс Удмуртие мед лыктозы», — пусйиз Бречалов.

Со сяна, сыӵе ӵошатсконъёс трос табыш но ваё.

Со туж умой экономика. Росси Федерациысь улосвылъёслэн шоркаръёсазы бызьылонъя котькыӵе марафон карлэн казнаяз 10 миллионысен 25 миллион манетозь табыш кельтэ… Асьмелэн вань луонлыкъёс, асьмелэн туж ӝикыт интывылмы, чебер каръёсмы — ачиз Инмар сое лэсьтыны косэ. Туж бадӟым кулэяськон но: мон тӥледлы вераны быгатӥсько, таӵе куазен Москваын велосипедэн уг ветло на, нош татын ветло ни. Озьыен, кунмуртъёслэн спортэн выремзы потэ, ӵошатсконъёсы пыриськемзы потэ, ми соослы вань луонлыкъёс кылдытыны кулэ
Удмуртилэн тӧроезлэсь ужзэ огдырлы быдэсъясь Александр Бречалов

Чакланъёсъя, куасэн бызьылонъя нырысетӥез марафон Удмуртиын вуоно сезонын ортчоз ни.

Удмуртиын дунне ӵошатскон ортчыны быгатоз — куасэн бызьылонъя Галина Кулакова нимо марафон. Улосвылысь кивалтэтлэн кенешоназ 10-тӥ оштолэзе сыӵе малпанзэ шараяз элькун тӧролэсь ужзэ огдырлы быдэсъясь Александр Бречалов.

Мон малпаськыны ӵектӥсько. Асьме дорын зэмзэ но бадӟым куасэн бызьылӥсь, чемпион (Галина Алексеевна Кулакова — ред.) улэ. Соин ик шонер луысал та выллем ӵошатсконъёс солэсь нимзэ нуллысалзы ке. Нош асьмелэн ужпуммы сое дунне ӵошатскон карыны, Росси ӧвӧл, дунне. Кызьы сое лэсьтыны — кенешом. 29-тӥ числое (оштолэзе, Г. А. Кулаковалы 75 арес тырмон нуналэ — ред.) асьмеос сое шараяны кулэ ини. Мон министрен (Россиысь спортъя министрен Павел Колобковен — ред.) со сярысь вераськи ни, со мукетгес вераськон, но та сярысь ик
Удмуртилэн тӧроезлэсь ужзэ огдырлы быдэсъясь Александр Бречалов

Удмуртилэн тӧроезлэсь ужзэ огдырлы быдэсъясь ватсаз, кылсярысь, спортэз гажасьёслэн биатлонзы вань на шуыса. Мыло-кыдо спортсменъёс солы гожъяллям вылэм вордӥськем Ижкаразы ӵошатсконъёс радъямзы потэ шуыса, но пӧрмымтэ, ортчытӥллям Подмосковьеын. Александр Бречалов соосты, озьы ик Россиын бадӟым ӵошастконъёс радъясьёсты та ужпумъя кенешыны ӧтиз.

Куасэн бызьылонъя Галина Алексеевна Кулаковалы сӥзем марафон ортчытон сярысь вераськон 29-тӥ оштолэзе солэсь 75 арессэ пусъёнэз радъян пумысен кенешонын ӝутскиз. Олимпи шудонъёслэсь, дуннелэсь, кунмылэсь куасэн бызьылонъя трос пол чемпионзэ ӟечкыланы вуозы Россиысь спортъя министр Павел Колобков но Галина Кулаковаен ӧтем спортсменъёс.

Наверх
Вниз