100 лет государственности Удмуртии
Ижкар+22 °C
6 -тӥ инвожо 2020 Кӧснунал
16+

14-тӥ куарусёнэ Вавож ёросын Кузебай Гердлэн 120 ар тырмонэзлы сӥзем «Чагыр кышет» велопробег ортчоз. Пыриськисьёс удмурт гожъясьлэн но югдытӥсьлэн музей-юртаз Гурезь-Пудгае мынозы, оглом 15 иськем пала. Со сярысь ивортодэтъя «Удмуртия» агентстволы вераз Вавож ёросысь шаертодонъя музейлэн кивалтӥсез Ирина Ложкина.

Туж тунсыко ужрад луоз. Пумиськиськом черкогуртысь паркын 9 часысен. Отын луоз инструктаж, собере зарядка. Пукиськомы великъёсамы но шонтӥськомы Гурезь-Пудга музее федерал трасса кузя. Одно ик полицейскойёс келяса мынозы
Ирина Ложкина, Вавож ёросысь шаертодонъя музейлэн кивалтӥсез

«Чагыр кышет» велопробеглы кичӧлтон сётӥзы шаертодонъя музейын ужасьёс, соослы ёрос администраци дурбасьтӥз. Кылсярысь, ёросысь Депутатъёслэн кенешсылэн тӧроез Александр Шишкин ужрадлы ӟусъёс лэсьтыны юрттӥсьёсты шедьтӥз. Тямыс ӟусъёсты чагыр кышетэз выллем буялозы. 

Кузбай Гердмылэн вань кылбурез «Яратон чагыр кышет» шуыса. Тодэ ваим со чуръёсты. Соин ик ми стартын дӥсяломы чагыр кышетъёс йырамы. Гурезь-Пудга музейын ӟусъёсты, кудзэ лэсьтӥзы ни милям спонсоръёсмы юри тӥнь та ужрадлы, ми отчы суредам ни контуръёс, рисунокъёс удмурт орнаментэн, и чагыр кышет со милям луоз. <…> Нырысь ик нимаз расписывать каром со ӟусъёсты, нош собере люкалом пазлэз сямен. Со луоз одӥг бадӟым кышет выллем, одӥг ӝӧк выллем
Ирина Ложкина, Вавож ёросысь шаертодонъя музейлэн кивалтӥсез

Музейын озьы ик чузъяськозы Кузебай Гердлэн кылбуръёсыз, соосъя гожтэм кырӟанъёс. Со сяна, велопробеге пыриськисьёс дэмен ӝук сиёзы, табань пыжозы. 

Радъясьёс ужрадэ 50 пала адямиез возьмало. Ирина Ложкиналэн верамезъя, пыриськисьёс пӧлын тросгес луозы лулчеберет удысын ужасьёс, со сяна, 18 аресысен вань мылкыд карисьёс итӥськыны быгатозы.  

Туннэ, 16-тӥ оштолэзе, Ижкарысь Йӧскалык лыдӟетъюртлэн Йӧскалык но шаертодон литературая центраз Кузебай Гердлэн но Ашальчи Окилэн вордскем дырысенызы 120 ар тырмонлы сӥзем «Шедьты «Гердлэсь сандыксэ» ужрад кутскиз. Та удмурт гожъяськисьёслэн улон но ужан сюрессыя квест амалэн лэсьтэм нырысетӥез ужрад, вераз ивортодэтъя «Удмуртия» агентстволы Йӧскалык лыдӟетъюртысь шаертодонъя ёзэтын ужась Светлана Вордакова. Шудон маршрутэ Кузебай Гердлэн но Ашальчи Окилэн биографиенызы герӟаськем Ижкарысь интыпусъёс пыртэмын.

Светлана Вордаковалэн кылъёсызъя, та шудонэ радъясьёс тросгес егитъёсты витё, малы ке шуоно квестэ пыриськисьёслы 2 час ӵоже Ижкар кузя ветлоно луоз, нош юанъёслы валэктонъёс QR-кодъя сётоно. Валамон, мылкыд карем арлыдоосты но шудонэ куто.

Та шудонмы радъяськоз Ижкаретӥ, пӧртэм юртъёсын герӟаськемын. Кудӥз ке но герӟаськемын Кузебай Гердлэн ужан интыеныз, кудӥз ке но чик но герӟаськемын ӧвӧл, соин ик шудӥсьёс асьсэос валаны кулэ ни. Юанъёс шуг ке потӥзы, соослы сётӥсько пӧртэм подсказкаос, сыӵе но радлыкез вань
Светлана Вордакова, Йӧскалык лыдӟетъюртысь Шаертодонъя ёзэтын ужась

Ӧнерчи верамъя, Йӧскалык лыдӟетъюрт Пушкинлэн творчествоезъя, Ижкарысь ышем-бырем юртъёсъя сыӵе шудонъёс ортчытъяз ни, нош шаертодонъя ёзэтын ужасьёс понна та нырысетӥ сыӵе уж. Квестэз радъян бордын ӧнерчиос толэзь пала тыршизы: нырысь ик шудонлэн радлыкеныз тодматскизы, собере юанъёс кылдытӥзы.

Тани малпано ке, вылтӥз-вылтӥз гинэ кадь со творчествоез эскериське, айсберглэн йылъёсыз гинэ усьтӥсько та квестын, пырак мур-мур уд эскериськы со творчествоез, кылсярысь, лекциен ӵошатыса, мукет ужрадъёсын ӵошатыса. Нош озьы ке но, со юанъёссэ кылдытыны, огез бӧрсьы мукетсэ радъяны туж трос кужым кулэ луиз
Светлана Вордакова, Йӧскалык лыдӟетъюртысь Шаертодонъя ёзэтын ужась

Калыклы шудон тунсыко потӥз ке, радъясьёс мукет удмурт гожъясьёслэн творчествозыя но таӵе квест кылдытозы.  

Кыӵе пӧрмиз со нырысетӥ табаньмы, шуом, туннэ шудонэ пыриськисьёс вералозы ни
Светлана Вордакова, Йӧскалык лыдӟетъюртысь Шаертодонъя ёзэтын ужась

Ватсалом, туннэ сяна, «Шедьты «Гердлэсь сандыксэ» шудон 21-тӥ оштолэзе «Библионочь» ужрад улсын ортчоз на.

16-тӥ оштолэзе 13 часын Удмуртиысь Йӧскалык лыдӟетъюртын (Удмурт урам, 264) «Шедьты «Гердлэсь шыкыссэ» урам шудон (квест) кутскоз. Ужрад Кузебай Гердлэн но Ашальчи Окилэн вордскемзы дырысен 120 ар тырмонлы сӥземын. Со сярысь ивортэ ужъюртлэн пресс-службаез.

Шудон маршрутэ Кузебай Гердлэн но Ашальчи Окилэн биографиенызы герӟаськем Ижкарысь интыпуъёс пыртэмын.

Куронъёсты быдэстон улсын пыриськисьёс Кузебай Гердлэн но Ашальчи Окилэн улонысьтызы но творчествоысьтызы тунсыко выль ивортодэтэн тодматскозы, Ижкарысь лулчеберетъя но историяя вӧлмет сярысь тодонъёссэс паськытатозы, командаен ужаны, утчаськыны дышетскозы.

Ужрадэ вань мылкыд карисьёс пыриськыны быгато. Пыронэз эркын.

Финн-угор егитъёслэн огазеяськонзылэн (МАФУН) Академиез аслэсьтыз ужрадъёссэ финн-угор кылъёсын ортчытъяны кутскоз. Нырысетӥез вебинар — удмурт кылын — быдӟым удмурт кылбурчилы, тодосчилы но кун ужасьлы Кузебай Гердлы сӥземын луоз. Со сярысь ивортэмын МАФУН-лэн «ВКонтакте» вотэсысь бамаз.

Гердлэн улон но ужан сюресэз сярысь ивортон лэсьтоз кылосбур тодосъя доктор Александр Шкляев. Нимысьтыз саклык висъялоз улонысьтыз тодмотэм палъёсызлы.

Интернет пыр вераськон 5-тӥ оштолэзе Москва дыръя 19 часын кутскоз.

Вебинаре пыриськон понна азьвыл ик пусйиськыны кулэ.

21-тӥ южтолэзе, Кылбуретлэн дунневыл нуналаз, Ижкарысь 14 номеро маршрутэтӥ ветлӥсь троллейбусын Кузебай Гердлэсь кылбуръёссэ лыдӟизы. Акциез радъязы Удмуртиысь Кузебай Герд нимо йӧскалык музей, Кузебай Герд нимо йӧскалык гимназия но «ИжГорЭлектроТранс» муниципал предприяти.

Музейысь ӧнерчилэн Надежда Кузнецовалэн верамезъя, та выллем ужрад — троллейбусын кылбуръёсты лыдӟон — 2003-тӥ арын ортчылэм ни. Туэ Кузебай Герд вордскем дырысен 120 ар тырмонэз пусъемен валче сое нош ик радъяны малпазы.

Соку ик герӟаськимы гимназиен но «ИжГорЭлектроТрансэн». Кыкназы соос соглаш луэмзэс веразы. Озьы ми Кылбуретлэн калыккуспо нуналаз ми малпамы лэсьтыны
Надежда Кузнецова, Кузебай Герд нимо йӧскалык музейысь ӧнерчи

14 номеро маршрутэз юнме шорысь ӧз быръе — со Кузебай Герд ураметӥ ортче. Со сяна, та маршрут одӥгез тужгес кузез луэ, со быдэс карез ортче — Труд урамысен Буммаш микрорайонэтӥ, Удмурт, Воровский, Карл Либкнехт урамъёстӥ Строительёслэн городоказы («Завод Керамблоков» дугдылонниозь).

Кылбуръёсты гимназиын дышетскисьёс но музейын ужасьёс лыдӟизы. Со сяна, музейысь ӧнерчиос кӧня ке ужъёсты кагаз вылын поттыса, соосты транспортын мынӥсьёслы сётъязы.

Кузебай Гердлэсь кылбуръёссэ Ижысь троллейбусын лыдӟизы

10 фото

«Микрофонэз кутыса лыдӟыны ӧз дӥсьтэ, но лыдӟисен ӵош, мон адӟи, лыдӟизы соос. Троллейбусын эшшо ошылэмын Кузебай Гердлэн биографиез, солэн кылбуръёсыз. Адске, адямиос учко, лыдӟо шуыса. Со туж шумпотытэ: озьыен, токма ум лэсьтӥське», — вераз Надежда Кузнецова.

Гимназиын 9-тӥ классын дышетскись Аня Китова верамъя, одӥг пала мынытозь даслэсь трос кылбуръёсты лыдӟиз — ӟуч но удмурт кылын. Кепыр потон чик ӧй вал, шуэ нылаш.

Тунсыко вал, уката ик адӟиськиз, калыклы тунсыко шуыса. Чабизы но милем, дурбасьтӥзы. <…> Мон толон книгаосты библиотекаысь басьтӥ, дорын лыдӟи, аслым кельшымон кылбуръёсты бырйи. Мон ӟуч но, удмурт но кылын лыдӟи — адямиос пӧртэм кылбуръёсын мед тодматскозы
Аня Китова, Кузебай Герд нимо гимназиын дышетскись

Соня Захарова гимназиын 8-тӥ классын дышетске. Солэн верамезъя, та трос калык азьын астэ возьматон ласянь умой опыт.

Мон нырысь ик туж пайми, малы ке шуоно со туж аспӧртэм — троллейбусын кылбуръёсты лыдӟон. Но собере малпай, со туж умой опыт луоз шуыса
Соня Захарова, Кузебай Герд нимо гимназиын дышетскись

Троллейбусын мынӥсьёс кылбуръёсты туж сак кылзӥзы, егитъёс пельысьтызы наушникъёссэс но поттылӥзы. Кылбур лыдӟисьёслы пальпотонъёсын но кичабонъёсын тау каризы.

Нялтас пусъёмы, Кузебай Герд урам Ижкарысь Ленин ёросын интыяськемын

Туннэ, 1-тӥ южтолэзе, Ижкарысь Кузебай Герд нимо музейын «Этнограф но дыр: Кузебай Гердлэн 120 ар тырмонэзлы» адӟытон усьтӥськиз. Отын возьматэмын музейлэн фондысьтыз тодосъя ужъёс, книгаос, туспуктэмъёс, Удмуртиысь дано суредасьлэн Илья Ходыревлэн Кузебай Гердлэн «Финно-угорская колыбель» диссертациез борды лэсьтэм ужъёсыз но удмурт азьветлӥсьлэн улоназ кутӥськем арбериосыз. Со сярысь ивортэмын йӧскалык музейлэн нимлыко сайтаз.

Удмурт калыклэн историяз Кузебай Гердлэн улонэзлэсь номыр сокем шимесэз но сокем яркытэз ӧвӧл. Вакчи улон куспаз Кузебай Герд трос статьяос печатлаз, аслэсьтыз 23 книгаоссэ поттӥз, соос пӧлын кылбуръёсын но поэмаосын 3 бичет, калык кырӟанъёсын 3 бичет, ӟучысь удмурт кылэ берыктэм 16 книгаос. Кузебай Гердлэн удмурт калыкез эскеронъя ужез дуно
Кузебай Герд нимо йӧскалык музейлэн пресс-службаез

Удмуртиысь йӧскалык музейлэн со одӥгез нырысетӥез кивалтӥсез, кудӥз этнографияя коллекция кылдытыны кутскиз. Кузебай Герд музеез калыклэсь улонзэ пӧртэм палъёсысен эскерись тодосъя ужъюрт лыдъя вал, шуэмын ивортонын.

Ватсалом, «Этнограф но дыр» адӟытон 10-тӥ куартолэзёзь ужалоз.

Тодэ вайытом, Кузебай Герд нимо йӧскалык музейын туннэ, 1-тӥ южтолэзе, эшшо одӥг адӟытон усьтӥськиз на. Чеберлыко киужъёсын «Киуськон крезь» возьматонын элькунысьтымы пӧртэм куиськон амалъёсъя лэсьтэм 29 ковёръёсты адӟыны луэ.

«Кузебай Гердлы — 120» темая мукет иворъёс

Дэбес ёросысь лулчеберетъя но туризмъя «Сибирский тракт» центрын Кузебай Гердлы 120 ар тырмонэз но Анай кыллэсь нуналзэ пусъёнэз «Мон удмурт» ужрадэ огазеязы. Со сярысь ивортодэтъя «Удмуртия» агентстволы  «Сибирский тракт» центрысь ӧнерчи Галина Опарина вераз.

Лулчеберетъя но туризмъя «Сибирский тракт» центр тодматэ Кузебай Гердлэн улонэныз но творчествоеныз. Отын ик удмурт кылэз но пыртӥськом. Лулчеберетэз но басьтӥськом
Галина Опарина, «Сибирский тракт» центрысь ӧнерчи

Кызьы вераз ӧнерчи, толшор пумысен «Сибирский тракт» центрлэн «Зарни шунды» адӟытон вӧлметаз удмурт азьветлӥсьлэн улон вакытысьтыз дӥсьёсын но арбериосын адӟытон ужа. Соин тодматонэн валче, ужъюртысь ӧнерчиос Кузебай Гердлэсь кылбуръёссэ лыдӟо но солэн кылъёсызъя гожтэм кырӟанъёсты кырӟало.

Туннэ нуналлы «Мон удмурт» ужрадэ ог 150 адями пыриськиз ни. Соос пӧлын Дэбес политехникумысь студентъёс, арлыдо муртъёс но школаын дышетскись пиналъёс. Галина Опарина пусйиз, удмурт югдытӥсь сярысь соос тунсыко но капчи амалэн ивортодэт сёто, соин ик дышетӥсьёс пиналъёссэс татчы мыло-кыдо ваё.

Дышетӥсьёслы яраз лэся со темамы, кызьы ми сое пиналъёслы сётӥськом тунсыко но капчи. Лыкто но лыкто. Лыктӥсьёс вань но, ми шумпотӥськом
Галина Опарина, «Сибирский тракт» центрысь ӧнерчи

Со верамъя, та арнязэ Кузебай Гердлы но анай кыллы сӥзем ужрад пыр-поч ужалоз на. Азьланяз радъясьёслэн удмурт азьветлӥсь сярысь веранэн гуртъёсы но потаны мылкыдзы вань.

Со сяна, Дэбес ёросын Анай кыллэн нуналэзлы сӥзем 30 пала ёрос но гурт ужрадъёс ортчозы, шуиз Галина Опарина. Кылсярысь, ӵапак анай кыллэн нуналаз, 21-тӥ тулыспалэ, Зар-Медло гуртысь Удмурт лулчеберетъя центр гуртысь клубазы сямлы пӧрмем ёрос концерт ортчытоз. Котегурт школае быдэс ёросысь удмурт кылэз дышетӥсь пиналъёс люкаськозы. Соос понна анай кылэн герӟаськем шудонъёс но викторинаос радъяськозы. Анай кыллэсь нуналзэ пусъён улсын Дэбес ёросысь куд-ог гуртъёсын экспресс-викторинаос, адӟытонъёс но лыдӟетъюртын урокъёс ортчозы.

Тодэ вайытом, Анай кыллэн нуналэзлы сӥзьыса, Яр ёрос лыдӟетъюртын «Бадӟым удмурт диктант Яр сямен» ортчиз. Со сяна, 21-тӥ тулыспалэ ёросысь калык ужаны йӧскалык дӥсен потоз. Нош «Лудорвай» музей-заповедник ужрадъёссы, экскурсиоссы сярысь анай кылын гожтэм веранъёсын видеоужъёсты возьма.

Ижкарысь Кузебай Герд нимо гимназиын 7-тӥ классын дышетскисьёс Денис Мишкин, Дарина Бускина но Лариса Гилазова Удмуртилэн шоркараз удмурт югдытӥсен Кузебай Гердэн герӟаськем интыосъя навигатор кылдытӥзы. Аспӧртэм экскурсия кылем арын «Выль даурлэн эскерисез» конференциын вормиз. Нош 15-тӥ тулыспалэ пиналъёс асьсэ ӵектосэнызы Вавожын ортчем «Герд лыдӟонъёсы» люкаськемъёсты тодматӥзы.

Кызьы вераз ивортодэтъя «Удмуртия» агентстволы нылпиослэн дышетӥсьсы Марина Сергеева, гимназия Кузебай Гердлэсь нимзэ нуллэ бере, соин герӟаськем ужъёс одно ик лэсьтоно.

Ми тыршиськом начальной школаысен, шор школаысен, бадӟым школаысен но тодматыны нылпиосты Кузебай Гердэн, кыӵе со адями шуыса, маин со выриз, ужаз. Озьы кылдӥз милям малпан лэсьтыны кыӵе ке экскурсия солэн интыосызъя
Марина Сергеева, Кузебай Герд нимо гимназиысь дышетӥсь

Навигаторъя котькуд нылпи Ижкарысь Кузебай Гердэн герӟаськем интыез шедьтыны быгатоз.

Картае пыртэмын:

  • Кузебай Герд нимо гимназия;
  • Чеберлыко киужъёсъя элькун центр — азьвыл отын школа вал, кытын Кузебай Герд дышетӥсь но кивалтӥсь луыса ужаз;
  • Первомай ёросысь нылпи творчествоя юрт — азьвыл отын Ольгалэн приютэз, Ижкарысь нырысетӥез нылпи юрт вал, кытын Кузебай Герд кивалтӥсь луыса ужаз;
  • Кузебай Герд нимо йӧскалык музей;
  • Кузебай Гердлы синпелет.

Со юртъёсысь стендысь яке буре ваён пулысь югдытӥсь сярысь ивортодэтэз лыдӟыса, нылпи навигаторын сётэм юанъёслы валэктон шедьтоз.

«Кылсярысь, милям фойеын, гимназие пырыса, туж умой стенд вань, кудӥз возьматэ, вера, Кузебай Герд кытын вордӥськиз, кин солэн анай-атаез вал, собере кытын со ужаз, кытын со улӥз — ваньзэ со сое возьматэ», — ивортӥз Марина Сергеева.

навигатор
Навигаторлэн бамъёсыз Фото: Наталья Еркешева ©

Дышетӥсь верамъя, навигаторез Кузебай Герд нимо гимназиысь пиналъёс вылын эскеризы ни. Таӵе амалэн экскурсия пиналъёслы но тунсыко потэ, дышетӥсьлы но юрттэт луэ, лыдъя Марина Сергеева.

Со дышетӥсьлы но юрттэт, нылпиослы но асьсэлы тунсыко мед луоз шуыса. Асьсэос но нылпиос шуо, экскурсия но экскурсия, мӧзмыт, ветлӥськод экскурсовод сьӧры. Нош татын соос асьсэос ивортодэт утчало, соослы туж тунсыко
Марина Сергеева, Кузебай Герд нимо гимназиысь дышетӥсь

Ватсалом, азьланяз пиналъёс таӵе навигатор Вавож ёросысь Гурезь-Пудга гуртъя но Киров улосвылысь Советск (азьвыл Кукарка) каръя лэсьтыны чаклало. Нырысетӥяз Кузебай Гердлэн музей-юртэз интыяськемын, нош кыкетӥяз удмурт азьветлӥсь семинариын дышетскиз.

Тодэ вайытом, Кузебай Гердлэн

Читать полностью

Удмурт кылэз тодӥсьёслы китай, япон, корей но тюрк кылъёсты дышетыны капчигес, лыдъя кылосбур тодосъя доктор Алексей Арзамазов. Кызьы вераз тодосчи Вавожын ортчем «Герд лыдӟонъёс» дыръя ивортодэтъя «Удмуртия» агентстволэн корреспондентэзлы, грамматика ласянь но, удмурт кыллы укшась кылъёс ласянь но та кылъёс, ӟучен ӵошатыса, асьмелы матынгес луо.

Удмурт кылэз тодӥсь пиналъёс, ӟуч пиналъёсын ӵошатыса, соос капчигес пыро китай кыллэн дуннеяз. Куара ласянь но грамматика ласянь соослы капчигес валаны китай кыллэсь пуштроссэ. <…> Ми дышемын финн-угор кылъёс (ӵыжы-выжы кылъёсмы — ред.) шуыса. Тюрк кылъёс, япон, корей но асьмелэн ӵыжы-выжы луись кылъёсмы
Алексей Арзамазов, кылосбур тодосъя доктор

Та дыре кунсьӧр кылъёсты дышетон модае пыремын шуыны луэ. Туала адямиос, нырысь ик егитъёс, школаосын, озьы ик ас понназы но пӧртэм кунгожсьӧр кылъёсты дышето. Алексей Арзамазов кылэн быръён ласянь ӵектонъёссэ вераз.

«Удмурт кылэз тодӥсьёслы кенеш сётысал дышетыны китай кылэз но, япон кылэз но. <…> Япон кыл сярысь вераськыса, мон уг шуы трос огкадь луись кылъёс, но удмурт кыллы тупась кылъёс пумиськыло. Грамматика ласянь но мон ӧй шуысал туж капчи, но капчигес луысал дышетыны япон кылэз, тон удмурт сямен вераськиськод ке», — вераз Алексей Арзамазов.

Мукет кылъёсты дышетон сярысь вераса, тодосчи анай кыллы но саклык висъяз.

«Жаляса верано, вань сыӵе ышись кылъёслэн «Горд книгазы», <…> удмурт кыл отчы пыре. <…> Со сыӵе пусъет калыклы — удмуртъёслы удмурт кылэз утёно шуыса, удмурт кылэз дышетыны кулэ шуыса, удмурт сямен вераськыны кулэ шуыса. Малы ке шуоно адямиос ӧз ке вераське удмурт сямен, со ышоз. Кызьы будосъёс ышо, озьы ик кылъёс ышо», — йылпумъяз Алексей Арзамазов.

Тодэ вайытом, элькун «Герд лыдӟонъёс» Вавожын 15-тӥ тулыспалэ ортчизы. Конференцие 350 пала адями люкаськиз. Удмуртиысь тодмо но егит тодосчиос, дышетӥсьёс но пиналъёс пӧртэм ӧръёсъя 11 ивортонъёсын тодматӥзы.

Ватсалом, туэ Удмуртиысь но удмурт кылэз дышетӥсь мукет улосвылъёсысь удмурт кылъя но литературая дышетӥсьёслэсь устозэ методикая огазеяськонэз быръёзы. 

15-тӥ тулыспалэ Вавожын XXI элькун «Герд лыдӟонъёсын» Кузебай Герд нимо йӧскалык премилэсь 2017-тӥ ар понна лауреатъёссэ данъязы. Таяз радэ премиен пусъемын нылпи кылбурчи, Удмуртиысь но Россиысь Гожъясьёслэн огазеяськонъёссылэн ёзчиез, «Удмуртия» издательстволэн азьвыл валтӥсь редакторез Вениамин Ившин но Кияса ёросысь Уддяди гуртысь Росси Федерациысь калык творчествоя дано «Инвожо» коллективлэн кивалтӥсез Надежда Пахомова.

Кызьы вераз журналистъёслы Надежда Пахомова, 20 ар ужатозяз котьма вал. Банкын ужакуз со лулчеберетъя ужрадъёс ортчытыны спонсоръёс капчиенгес шедьтэ вылэм. Нош ӟучъёс сое мукет сямен валазы.

«Вал сыӵе вераськонъёс, националист но шуылӥзы. <…> Сое ӟуч калык валаз озьы, удмуртъёслы сиыны-юыны коньдон сёто шуыса. Сыӵе статья потӥз газете. Мон шуак луи, пайми мон», — тодаз вае «Инвожолэн» кивалтӥсез.

Валантэмъёсты палэнтыны шуыса, Надежда Пахомова котырес ӝок люказ. Валэктӥз, спонсор шедьтыса, со ужрадъёс ортчытъя шуыса. Со дырысен Кияса ёросын улӥсь ӟуч калыкен кусыпъёссы тупазы. Табере соос «Инвожо» коллективез куное ӧтьыло.

Туннэ нуналэ табере ӟуч гуртъёс милемыз, «Инвожо» коллективез, ӧтчало куное. <…> Валэктӥськом ке ӟуч калыклы аслад дӥськутэд сярысь, аслад кырӟан-веранэд сярысь, мае тон возьматӥськод, соку соос тонэ туж умой валало. Коллективе мынам быдэс Россилы тодмо ни
Надежда Пахомова, Кузебай Герд нимо йӧскалык премилэн лауреатэз

Кышномуртлэн кылъёсызъя, со ноку но ӧз малпа, ужез понна солы кыӵе ке данъет сётыны кулэ шуыса. 20 ар ужатозям весь лэсьтоно,лэсьтоно малпай мон, ноку но ӧй малпа, куке но мыным премия сётозы шуыса, вера Надежда Пахомова.

«Инвожо» ансамбльлэн кивалтӥсезлэн азьланяз но ужаны мылкыдыз вань. Табере вань тодон-валанъёссэ егитъёслы сётоно, лыдъя Надежда Пахомова.

Со мед кылёз калыклы. Мон кинлэсь ке но басьтыса, кельтӥ ук сое. Тарезэ пинал калыклы кельтыны кулэ. Али тани нылпиосын ужаськом, соослы кельтэм потэ. Соос но мед яратозы фольклорез
Надежда Пахомова, Кузебай Герд нимо йӧскалык премилэн лауреатэз

Пиналъёсты визьноданлы саклык висъя Кузебай Герд нимо премилэн эшшо одӥгез лауреатэз —  Вениамин Ившин. Выль технологиос улонэ пыӵамен туала нылпиос ваньзы сямен ик экран азьын пуко, нош мар котыразы лэсьтӥське, уг адӟо, ӝожтӥське кылбурчи.

«Нош нылашлы яке пияшлы будыны кулэ ук, адями луыны кулэ, улонэз тодыны кулэ. Соин валче ми нош ик ӟеч-ӟеч учкыны кутским Гердлэсь творчествозэ. Солэн пичиослы, школае ветлӥсьтэм пиналъёслы сӥзем ужъёсыз, тужгес кылбуръёсыз, туж сыӵе тодон-валан сётӥсесь. <…>

Читать полностью

XXI элькун «Герд лыдӟонъёсын» Удмуртиысь тодмо но егит тодосчиос, дышетӥсьёс но пиналъёс пӧртэм ӧръёсъя 11 ивортонъёсын тодматӥзы. Конференци 15-тӥ тулыспалэ Вавожысь лулчеберетъя юртын ортчиз. Туэ со Кузебай Гердлэн 120 ар тырмонэзлы сӥземын вал но «Кузебай Герд улэ асьмемын ӵош» нимаськиз. 

Удмурт кун университетысь доцент, кылосбур тодосъя кандидат,  Галина Шушакова аслаз докладаз «Зэм ик-а Кузебай Герд улэ асьмемын ӵош?» юан пуктӥз. Солы валэктон тодосчи кык палысен сётыны тыршиз. Нырысетӥез — кызьы Гердлэн нимыз но ужъёсыз туннэ асьме пӧлын уло.

«Татын вераны луэ «Герд» газетэз но, «Удмурт дуннелэн» ватсэтэз луыса нимаз поттэмын со. Синпелет доры сяська понон, кылбуръёс лыдӟон — со сямлы пӧрмем акция луиз «Удмурт Кенешлэн» кивалтэм улсаз. <…> Красильниковлэн музеяз сыӵе диспут-кенешон ортчиз тодосчиосын Гердлэн творчествоез сярысь, улонэз сярысь», — вераз Галина Шушакова.

Солэн ивортонэзлэн кыкетӥ люкетэз Кузебай Гердлэн малпанъёсызлэн улонэ асьме вакытэ пыӵамзылы сӥземын вал.

Туала егитъёсмы кызьы чырмыт ужало, <…> со но Кузебай Гердлэн малпанъёсызлэн улонэ пыӵамез. Учке ай, кыл сярысь сюлмаськиськомы, дышетон сярысь. «Удмурт Кенеш» кичӧлтэмъя трос ужъёс мыно, трос лэсьтэ «Шунды» огазеяськон, егитъёс, соослэн лагерьёссы, «Вамыш» лагерь но «Удмурт-а мон?» форумъёссы
Галина Шушакова, Удмурт кун университетысь доцент

Дышетон удысысь йӧскалык ужпумъёсты эскеронъя институтысь валтӥсь тодослыко ужась, кылосбур тодосъя кандидат Людмила Бусыгина Кузебай Герд сярысь вотэсысь ивортодэтъёслы сӥзем доклад дасяз. Интернетысь удмурт материалъёслэн узырлыксы но ӟечлыксы милемыз туж сюлэмшугъяськытэ, шуиз со.

«Кузебай Гердлы сӥзем материалъёс интернетын ӧжыт ӧвӧл. Озьы ке но, соос уже кутымон, тодмо но тунсыко мед луозы шуыса, вотэсбамъёсысь материалъёсты весь выльдоно, ватсанъёс пыртылоно. Рос-прос лэсьтэм сайтъёсысь ӟеч материалъёсты гинэ дышетон удысын кутыса, нылпиослэсь тодон-валанзэс будэтыны, творчествоя быгатонлыксэс азинтыны луэ», — пусйиз Людмила Бусыгина.

Вавожын ортчем «Герд лыдӟонъёс»

8 фото

Вавоже «Герд лыдӟонъёсы» Санкт-Петербургысь архивысь куара гожтэмъёсты эскерись, кылосбур тодосъя кандидат Виктор Денисов но лыктӥз. Со кылзӥсьёсты Кузебай Гердлэн фонографе гожтэмъёсыныз тодматӥз. Виктор Денисовлэн кылъёсызъя, та дыре 300 пӧлысь 37-ез гинэ гожтэмъёс кылизы, мукетъёсыз ыштэмын.

Мыным потэ, «Удмурт Кенешлы» но мукет огазеяськонъёслы малпаськоно удмурт музъемлэн дано адямиосыныз «Куара портретъёсын галерея» кылдытон сярысь
Виктор Денисов, кылосбур тодосъя кандидат

Читать полностью

Кузебай Герд вордскем дырысен 120 ар тырмонлы сӥзем элькун конференцие Вавоже быдэс Удмуртиысь 350 пала удмурт азьветлӥсьёс люкаськизы. «Герд лыдӟонъёслы» дасям валтӥсь ивортонъёсты кылзыны кутскемлэсь азьвыл лыктэм калыклы ёросысь но элькунысь кивалтӥсьёс вазиськизы.

Ас вакытаз Кузебай Герд туж тыршиз, вордскем музъемез мед сяськаялоз шуыса, солэн малпанъёсыз быдэсмизы, пусйиз Вавож ёрослэн тӧроез Николай Чайников. Туннэ ёрос одӥгез тужгес азинлыкоез ёрос луэ — гурт возёсъя но, мер удысъя но. Бусыосын вань туала куронъёслы тупась техника ужа, пуктӥсько выль гидъёс, школаос, спорт объектъёс. Озьы ик кивалтӥсь пусйиз, ар ӵоже ёросын Гердлэн юбилеезлы сӥзем трос ужрадъёс ортчозы на шуыса.

Йӧскалык азьветлӥсьлэн вордскем музъем вылаз куноосты кырӟанъёсын пумитазы. Соосты кылзыса, сюлэмам небыт но шуныт луиз, вераз Удмуртиысь йӧскалык политикая министр Лариса Буранова.

Сыӵе адямиос сярысь, Кузебай Герд кадь, туж секыт вераны. Ваньзэ вераны ке, мае пусъем потэ, быдэс нунал быгатӥсько, дыр, та сцена вылын сылыны, нош ӧжыт вераны сюлмы уг чида. Котькуд калыклэн вань аслаз батыръёсыз. Котькуд даур вае котькуд калыклы батырез. Нош таӵе адямиос, Кузебай Герд кадь, сю аръёс но, сюрс аръёс но ортчыса, соос калыклэн историяз одно ик кылё.
Лариса Буранова, Удмуртиысь йӧскалык политикая министр

Министр тодаз ваиз Гердлэн 100 аръем юбилеезлы дасяськон улсын кылдэм мылкыдъёссэ. Пайми, вакчи улонэз ӵоже но кӧня быгатӥз адями лэсьтыны удмурт калык понна, шуиз Лариса Буранова.

«Котькуд удысын учкыны ке, со нырысь вал: музейын нырысь вал, школаын, удмурт кылын со нырысь вал, этнографиез учкыны ке, наука, со нырысь вал. Кӧня кужым кулэ, кӧня яратон кулэ! Соку монэ паймытӥз эшшо одӥг фраза Гердлэн, удмурт калык сярысь со вераз (ӟуч кылын нырысь адӟи): «я порой до ненависти люблю свой народ». Соку мон туж кема малпай, кызьы озьы луэ яратыны? Кӧня ке но ар ортчыса, мон сое валай: со сыӵе зол яратэ вал ас калыкез, ас кылэз, анай кылэз, адӟыса ваньзэ, кызьы удмурт калык улэ та дунне вылын, кыӵе секыт со улэ, пеймыт со улэ. Учкиськод ке, туж трос кылбуръёс Гердлэн сӥземын со улонлы, тӥ ваньзэ сое тодӥськоды. Со котьку но турттӥз асьме удмурт калыкез нуыны азьлань. Возьматыны, кыӵе чебер сюрес возьма удмурт калыкез», — вераз Лариса Буранова.

Герд лыдӟонъёсын
Элькун конференцие лыктэмъёслы мылкыд сётӥзы нылпиос Фото: Наталья Еркешева © udmurt.media

Солэн кылъёсызъя, туннэ котькуд

Читать полностью

Туннэ, 15-тӥ тулыспалэ, Вавожысь Лулчеберетъя ёрос юртын XXI элькун «Герд лыдӟонъёс» ортчозы. Радъясьёс 350 пала пыриськисьёсты возьмало. Туэ ужрад Кузебай Гердлэн вордскем дырысеныз 120 ар тырмонлы сӥземын. Конференция «Кузебай Герд улэ асьмемын ӵош» нимаське. 

Элькунысь тодосчиос, озьы ик пиналъёс Кузебай Гердлэн пӧртэм ӧръёсын ужамезъя докладъёс дасязы:

  • «Гердлэн кылыз: удмурт кыл дунне кылъёс пӧлын»  Алексей Арзамасов, кылосбур тодосъя доктор;
  • «Зэм ик-а Кузебай Герд улэ асьмемын ӵош?»  Галина Шушакова, кылосбур тодосъя кандидат;
  • «Герд туннэ но ӵуказе»  Александр Шкляев, кылосбур тодосъя кандидат;
  • «Кузебай Гердлэн улон сюресэзъя малпанъёс»  Николай Кузнецов, Россиысь но Удмуртиысь гожъясьёслэн огазеяськонзылэн ёзчиез;
  • «Кузебай Герд но туала удмурт нимкылъёс бордын ужан»  Валентина Ившина, педагоги тодосъя кандидат;
  • «Кузебай Герд интернет ресурсъёсын» - Людмила Бусыгина, кылосбур тодосъя кандидат;
  • «Владельческая коллекция Ф. К. Ермакова в Национальной библиотеке»  Лариса Дмитриева, кылосбур тодосъя кандидат;
  • «Мадиськон ӝытъёс»  Анна Зайцева, Гурезь-Пудгаысь шоръёзо школаын 10-тӥ классын дышетскись;
  • «Кузебай Гердлэн дышетскисьёсыз но ужъюлтошъёсыз — милям улосчиосмы»  Светлана Щёткина, Гурезь-Пудгаысь шоръёзо школаысь историяя дышетӥсь ;
  • «Кузебай Гердлэн улон но ужан сюресэзлэн азинскемез»  Денис Мишкин, Дарина Бускина, Лариса Гилазова, Кузебай Герд нимо йӧскалык гимназиын дышетскисьёс (дышетӥсьсы: Марина Сергеева).

Со сяна, ужрадын Кузебай Герд нимо йӧскалык премилэсь 2017-тӥ ар понна лауреатъёссэ данъялозы. Таяз радэ данъетэз басьтозы нылпи кылбурчи, «Удмуртия» издательстволэн азьвыл валтӥсь редакторез Вениамин Ившин но Кияса ёросысь Уддяди гуртысь Росси Федерациысь калык творчествоя дано «Инвожо» коллективлэн кивалтӥсез Надежда Пахомова.

Вавожын ужа ивортодэтъя «Удмуртия» агентстволэн корреспондентэз. Нунал ӵоже со отысь

Читать полностью

2018-тӥ арын удмурт дуннеын куинь бадӟым юбилейёс пусйисько: Кузебай Герд но Ашальчи Оки вордскем дырысен 120 ар тырме, удмуртъёслэн нырысетӥ ӧтчамзылы — 100 ар. Соин ки удмуртъёслэн вань ужрадъёссы туэ со котырес лыдпусъёслы сӥземын луозы, вераз журналистъёслы «Удмурт Кенеш» огазеяськонлэн тӧроез Татьяна Ишматова.

Кузебай Гердлэн юбилеезлы сӥзем ужрадъёс Удмуртиын толшорысен кутскизы ни. Каръёсын но ёросъёсын флешмобъёс, акциос, конференциос ортчизы. Нош валтӥсез элькун ужрад тулыспалэ чакламын.

15-тӥ тулыспалэ ортчытэмын луозы бадӟым «Герд лыдӟонъёс» Вавож ёросын, малы ке шуоно вордӥськемын Кузебай Герд отын. Пусъемын луозы лауреатъёсмы, кудъёсыз туэ понна данъямын луозы Кузебай Герд нимо йӧскалык премиен
Татьяна Ишматова

Ашальчи Окиез но вордӥськем палъёсаз буре ваёзы, шуиз «Удмурт Кенешлэн» тӧроез. «Ашальчи лыдӟонъёс» Грак ёросын ортчозы (кылем арын элькун конференци Алнашын радъяськиз). Соку ик Ашальчи Оки нимо йӧскалык премилэсь лауреатъёссэ данъялозы.

«Соин валче Нылкышно кенешлэн ужрадъёсыз луозы на, кудъёсыз герӟалозы гожъяськисьёсты, кылбурасьёсты, творческой сыӵе кышномуртъёсты», — ивортӥз Татьяна Ишматова.

Кызьы вераз «Удмурт Кенешлэн» тӧроез, куартолэзе Алабгоын (Елабугаын) удмуртъёслэн бадӟым ужрадзы ортчоз. Ӵапак татын 100 ар талэсь азьвыл асьме калыклэн нырысетӥ ӧтчамез радъяськиз. 2018-тӥ арын Алабгое люкаськемъёс эскерозы, мар лэсьтэмын даур куспын но шонер-а сюрес бырйизы вал соку удмурт азьветлӥсьёс. Чакланъёсъя, уж вить ӧръёсъя радъяськоз. Та ужрадэ палэнын улӥсь удмуртъёс но одно ик пыриськозы, пусйиз Татьяна Ишматова.

«Вераны кулэ, со Максим Прокопьев (кылбурчи, югдытӥсь, удмуртъёслэсь нырысетӥ ӧтчамзэс одӥгез радъясь — ред.) ик вордӥськемын Татарстанысь Ныръя гуртын. Соин валче асьмеос турттӥськом солэсь нимзэ мед шара поттозы, тросгес бадӟым доклад мед лэсьтозы Татарстанын улӥсь удмуртъёс», — вераз «Удмурт Кенешлэн» тӧроез.

Тодэ вайытом, Кузебай Гердлы сӥзем лыдӟонъёс элькунысь ёросъёсын, Ижкарын но Москваын ортчизы ни. Азьветлӥсьлэн вордскем палаз, Вавожын, сое буре вайыса, флешмоб радъязы. Нош али Кузебай Гердлы но Ашальчи Окилы сӥзем интернет-викторина ортче. Со 15-тӥ южтолэзезь кыстӥськоз.

Удмурт кылын шонер гожъяськыны быгатэмез эскеронъя «Бадӟым удмурт диктант» акция 2017-тӥ арын 31-тӥ южтолэзе ортчоз. Азьвыл сое ӟуч кылъя «Тотальной диктантэн» одӥг нуналэ радъяло вал. Мылкыд карисьёс кыказ но ужрадэ пыриськыны мед быгатозы шуыса, удмурт ужрадэз Ашальчи Окилэн вордскем нуналэзлы (4-тӥ оштолэзь) матысь лыдпусэ выжтӥзы. Со сярысь туннэ, 30-тӥ толшоре, «Удмурт кенеш» огазеяськонлэн пумиськоназ тодмо луиз.

31-тӥ южтолэзез Ашальчи Окилэн вордскем нуналэзлы сӥзьыны луэ
Наталья Кондратьева, Удмурт кун университетысь Удмурт кылосбуръя, финно-угроведениея но журналистикая институтлэн кивалтӥсез

«Бадӟым удмурт диктантэз» гожтон понна Ижкарын, элькунлэн ёросъёсаз но мукет улосвылъёсын удмуртъёс тросэн улон интыосын нимысьтыз площадкаос кылдытозы. Со сяна, азьвыл аръёсы сямен ик, котькуд адями диктантэз «Мынам Удмуртие» радиоысь кылзыса гожтыны быгатоз.

Удмурт диктантлы текстэз, Кузебай Гердлэн вордскемез дырысен 120 ар тырмонлы сӥзьыса, кылосбур тодосъя кандидатэз Александр Шкляевез гожтыны куризы.

Тодэ вайытом, «Бадӟым удмурт диктант» акция 2018-тӥ арын сизьыметӥзэ ортчоз ни. Кылем арын диктантэз гожтыны Удмурт кун университетэ 36 адями лыктӥз, нош оглом ужрадэ 700-лэсь трос адями пыриськиз. 

Ватсалом, ӟуч кылын шонер гожъяськыны быгатэмез эскеронъя «Тотальный диктант» 14-тӥ оштолэзе ортчоз. Солы текст Россиысь тодмо гожъясь Гузель Яхина гожтоз. 

Кузебай Гердлэн кылбуръёсыз Москваысь Удмуртилэн постпредствояз чузъяськизы. Удмурт кылбурчи но азьветлӥсь вордскем дырысен 120 ар тырмонлы сӥзем ӝытэ 26-тӥ толшоре шоркарын улӥсь 20 пала удмуртъёс лыктӥзы. Соос пӧлын егитъёс но, арлыдоос но вал, шуиз ивортодэтъя «Удмуртия» агентстволы Москваысь удмуртъёслэн «Герд» огазеяськонзылэн кивалтӥсезлэн воштӥсез Маргарита Сельченкова.

Солэн кылъёсызъя, пумиськонэз Артём Малых но Ольга Урасинова туж быгатыса но ваньзылы кельшымон радъязы.

Москваысь удмуртъёс, улосчиос лыдӟизы Гердлэсь кылбуръёссэ удмурт сямен но, ӟуч сямен но. Та ӝытэз нуиз Артём Малых. <…> Со, Москваын ке но вордскемын, ӟеч тодэ удмурт кылэз, ӟеч тодэ Гердлэсь творчествозэ, туж трос кылбуръёс со лыдӟиз
Маргарита Сельченкова, «Герд» огазеяськонлэсь кивалтӥсьсэ воштӥсь

Пумиськонын истори тодосъя кандидат Виктор Денисов Кузебай Гердлэн улон сюресэныз но творчествоеныз тодматӥз. Архивысь вашкала удмурт гожъямъёсты шедьтыса, тодосчи Гердлэсь зэмос куаразэ кылзӥськытӥз, шуиз Маргарита Сельченкова.

«Гердлэн» кивалтӥсезлэн воштӥсез ватсаз, Москваысь удмуртъёслэн кылбур лыдӟон ӝытъёсы пыриськыны мылкыдзы вань, соин ик азьланяз Ашальчи Окилы сӥзем ӝыт ортчытыны чакламын.

Тодэ вайытом, Кузебай Герд вордскем дырысен 120 ар тырмонэз Удмуртиын пӧртэм ужрадъёсын пусъё. Кылсярысь, Йӧскалык лыдӟетъюртлэн Йӧскалык но шаертодон литературая центрез вань мылкыд карисьёслы лыдӟонъёс ортчытӥз. Нош али Кузебай Гердлы но Ашальчи Окилы сӥзем интернет-викторина мынэ. Со 15-тӥ южтолэзёзь кыстӥськоз. Со сяна, 15-тӥ тулыспалэ Вавожын элькун «Герд лыдӟонъёс» ортчозы.

Пиналъёслы но егитъёслы элькун лыдӟетъюрт вань мылкыд карисьёсты «Удмурт литератураысь классикъёс — Кузебай Герд но Ашальчи Оки» интернет-викторинае пыриськыны ӧте. Визьсынан ужъюртлэн нимлыко сайтаз ӟуч кылын мынэ. Со сярысь ивортодэтъя «Удмуртия» агентстволы вераз лыдӟетъюртысь шаертодон но йӧскалык литературая ёзэтлэн кивалтӥсезлэсь ужзэ быдэсъясь Марина Пахомова.

Викторина 1-тӥ толшорысен 15-тӥ южтолэзёзь мыноз. Отын (юанъёсын блокъёс — ред.) 12+ но 16+ гожтэмын положениын, <...> 16+ со 16-ысен 30 аресозь
Марина Пахомова

Юанъёсты дасяз лыдӟетъюртлэн шаертодон но йӧскалык литературая ёзэтысьтыз ӧнерчи Антон Огальцев. Со ик бырйиз книгаосты, кудъёссэ лыдӟыса шонер валэктонъёс сётыны луоз.

Марина Пахомовалэн верамезъя, лыдӟетъюрт тросгес пиналъёслэсь но егитъёслэсь литератураен тунсыкъяськон мылкыдзэс пӧртэм амалъёсын ӝутыны тырше, интернет-викторина — одӥгез соос пӧлысь.

Нош шаертодон ӧрез бырйимы, соос ӟуч книгаосты гинэ медаз лыдӟе, асьме удмурт гожъясьёсты но мед тодозы шуыса
Марина Пахомова

Солэн кылъёсызъя, та дырлы 2 гинэ адями викторинае пыриськемын.

Пусйыны кулэ, валэктонъёслэсь шонерлыксэс эскерем сяна, дунъясьёс шонер гожъяськыны быгатэмез но чаклалозы.

Юанъёслы валэктонъёсты 15-тӥысен 30-тӥ южтолэзёзь эскерозы но йылпумъянъёс лэсьтозы. Вормисьёсты «Нылпиослы но егитъёслы книгалэн арняез» элькун праздникын пусъёзы.

Ватсалом, удмурт литератураысь классикъёс Кузебай Герд но Ашальчи Оки вордскем дырысен туэ 120 ар тырме. 

Тодмо луиз элькун «Герд лыдӟонъёсты» ортчытонлэн дырыз но темаез. Конференци Вавожысь лулчеберетъя юртын 15-тӥ тулыспалэ ортчоз. Ужрадлэн темаез: «Кузебай Герд улэ асьмемын ӵош». Со сярысь ивортодэтъя «Удмуртия» агентстволы «Удмурт Кенеш» огазеяськонлэн кылкутӥсь секретарез Елена Александрова вераз.

Солэн кылъёсызъя, «Герд лыдӟонъёсъя» ужась ӧрилэн пумиськонэз 16-тӥ толшоре ортчиз. Дырзэ но темазэ сяна, радъясьёс валтӥсь докладчикез но бырйизы. Со литератураез эскерись но кылбурчи, кылосбур тодосъя доктор Василий Ванюшев луоз. Озьы ик ужрадын мылкыд карисьёс но вераськыны быгатозы.

Вань пыриськисьёс (Кузебай Герд нимо — ред.) гимназиысь дышетӥсьёс но нылпиос, собере отысь но вань мылкыд карисьёс, Вавожысь. Озьы ик тодосчиос сётэмын мылкыд, Йӧскалык лыдӟетъюртысь вуэмын куронъёс
Елена Александрова

Чакланъёсъя, «Герд лыдӟонъёс» элькун конференцие 400 пала адями люкаськоз.

«Удмурт Кенешлэн» кылкутӥсь секретарез ватсаз, ужрадъя паськытатэм оргкомитет Вавож ёрос администрациын 19-тӥ толшоре люкаськоз. Отчы огазеяськонлэн тӧроез Татьяна Ишматова но пыриськоз.

Элькун конференциез радъянъя но ортчытонъя Вавож ёросысь ӧрилэн нырысетӥ пумиськонэз 11-тӥ толшоре ортчиз. Отын вераськизы, кыӵе огазеяськон, ӧнерчи мар понна кылкутоз. 

Тодэ вайытом, элькун «Герд лыдӟонъёс» Ижкарлэн палэназ туэ кыктэтӥзэ радъяськозы ни. Кылем арын ужрад Пичи Пурга ёросын ортчиз.

15-тӥ толшоре Ижкарысь Йӧскалык лыдӟетъюртлэн Йӧскалык но шаертодон литературая центраз Кузебай Гердлэн вордскем дырысеныз 120 ар тырмонлы сӥзем лыдӟонъёс ортчизы. Соин гожтэм яратоно кылбуръёссэс лыдӟыны тодосчиос, политикъёс, журналистъёс, студентъёс, удмуртлыкез азинтӥсьёс — огкылын, вань мылкыд карисьёс люкаськизы.

Кылбурчи Анастасия Шумилова малпамъя, Кузебай Гердлэн ужъёсыз ноку но уз вужме, малы ке шуоно кылбурчи со дыре улӥсь муртъёслэсь трослы азьлань кошкемын вал.

Герд ноку вашкала уз луы, малы ке шуоно вань сыӵе адямиос, кудъёсыз ас вакытсылэсь кемалась азьлане кошкемын. Тӥни Герд одӥгез сыӵеез вал. Соин ик али дырлы но солэн произведениосыз туж тупасесь: пуштроссэ но басьтӥськом ке, формаоссэ но
Анастасия Шумилова, кылбурчи
 

Соин но, дыр, Кузебай Гердлы сӥзем ужрадын трос егитъёс вал. Удмурт кун университетысь удмурт кылосбуръя, финно-угроведения но журналистикая институтын 2-тӥ курсын дышетскись Алёна Глухова лыдӟонъёсы вуэмзэ удмурт кылбурчилы синмаськеменыз валэктӥз.

«Зэмзэ верано ке, мон туж синмаськемын Кузебай Гердлы, мынам потӥз лыдӟеме солэсь кылбурзэ. Мон бырйи кылбурзэ, «Черсон» нимаське со. Отын туж сыӵе аспӧртэмлыко ӵошатонъёс. Со мемиезлы сое гожъя кадь, озьы ке но мукет адямиослы вазиське со кылбуреныз», — шуиз Алёна Глухова.

Егит удмурт кылбурчи Богдан Анфиногенов понна Кузебай Герд — тужгес но кужмо кылбурчи. 

«Удмурт кылбурет сярысь ке верано, (Кузебай Герд — ред.) одно ик эталон, тужгес сыӵе тодмо кылбурчи, тужгес дано кылбурчи. <…> Мон понна со «вышка» шуыны луоз, сыӵе вылӥ уровень», — лыдъя Богдан Анфиногенов.

Кузебай Гердлэсь кылбуръёссэ лыдӟон


Тросэз пыриськисьёс пусйизы, Кузебай Герд туж пӧртэм темаосъя но пӧртэм амалъёсъя кылбуръёс гожъяз шуыса. Кылосбур тодосъя доктор Василий Ванюшев верамъя, кылбурчилэн гожъяськон манерез дыр ортчемен вошъяськиз.

Гердэз валаны кутскеммы бере тани ваче кыстаськонъёс луизы литературоведъёс куспын. Уката но соин но: ялан вунэтӥзы, адями весь ачиз но вошъяське шуыса. Ачиз со будӥз, дунне воштӥськиз, дуннелэсь куронъёссэ со шӧдэ, со вошъяськиз
Василий Ванюшев, тодосчи
 

Тодэ вайытом, 14-тӥ толшоре гожъясез, йӧскалык азьветлӥсез, Удмурт автономия кылдытон понна нюръяськисез Кузебай Гердэз Ижкарысь синпелетэз дорын буре ваизы. Ӵапак та нуналэ со вордскем дырысеныз 120 ар тырмиз. Арнянуналэ ик Вавож ёросын Кузебай Гердлэн котырес лыдпусэзлы сӥзем флешмоб ортчиз. Удмурт азьветлӥсьлэн юбилеезлы сӥзем ужрадъёс элькунамы азьланьтӥськозы на.

14-тӥ толшоре Удмуртиын гожъясез, йӧскалык азьветлӥсез, Удмурт автономия кылдытон понна нюръяськисез Кузебай Гердэз буре ваизы. Ижкарысь синпелетэз доры (усьтэмын 2005-тӥ арын 2-тӥ шуркынмонэ) удмурт азьветлӥсьёс, политикъёс, дышетӥсьёс, пиналъёс люкаськизы.

Вераськисьёс Кузебай Гердлы тау карон кылъёссэс веразы но туннэ асьмеос жадьытэк ужаны, солэсь кутскем ужзэ азьланьтыны кулэ шуыса пусйизы.

«Туннэ секыт син азе пуктыны, луысалыз-а мед-а Удмурт Элькун нимаз автономия но нимаз элькун, ой-а? Нош соослы луыса асьмеос туннэ дасяськиськом юбилейлы — автономилэн 100 ар тырмонэзлы (2020-тӥ арын — ред.) <…>», — вераз Удмуртиысь лулчеберетъя но туризмъя министр Владимир Соловьёв.

Кузебай Гердлы 120 ар тырмонэз пусъён

12 фото

1926-тӥ арын Кузебай Герд шаертодонъя музеен кивалтыны кутскиз, улосвылын музей сӧзнэтэз кылдытонъя нырысетӥзэ учкетэз (концепциез) гожтӥз. Солэн валтэмез улсын нырысетӥосыз экспедициос ортчизы, соку люкам арбериосын но ивортодэтэн Йӧскалык музейын тодматскыны луэ.

Та дыре Кузебай Гердлэсь нимзэ нулло Ижкарысь но Вавожысь урамъёс, Удмурт Элькунысь Йӧскалык музей, Йӧскалык гимназия.

Гимназилы Кузебай Гердлэсь нимзэ сётон сярысь ивортодэтъя «Удмуртия» агентстволэн корреспондентэзлы вераз дышетсконнилэн соку кивалтӥсез, та дыре «Удмурт Кенеш» огазеяськонлэн Ижкарысь Первомай ёросъя ёзэтэзлэн кивалтӥсез Ольга Шилова.

«Туж мон солы синмаськемын вал — дӥсьтонлыкезлы, быгатонлыкезлы котыр ласянь. Мынам но сыӵе пиналъёсты будэтэм потӥз та гимназиын. Малы ке шуоно учке ай: со ик этнограф, со ик историк, со ик литературовед, со ик гожъяськись, со ик кун ужась. Сыӵе ик дӥсьтонлыксы мед луоз шуыса, солы синмаськыса, солэсь луонлыксэ адӟыса, асьсэлы мед пыӵатозы, медаз луэ соос возьдаськисесь, асьсэлэсь кылзэс мед вераны быгатозы, соингес Кузебай Гердлэсь нимзэ сётэм потӥз гимназилы», — тодаз ваиз Ольга Шилова.

Кузебай Гердлэн вордскем палъёсаз — Вавож ёросысь Гурезь-Пудга гуртын 1998-тӥ арын солэн музей-юртэз ужаны кутскиз.

«Фондмы узырме арысь аре,

Читать полностью
Наверх
Вниз