Ижкар+3 °C
25 -тӥ коньывуон 2020 Воскресенье
18+

Балезино ёросысь Исак школаын 10-тӥ классын дышетскись Андрей Лебедев кык ар куспын вордскем гурт котырысьтыз 30 пала вашкала удмурт кырӟанъёсты бичаз. «Исак котырысь кырӟан гуръёс» эскерон уженыз со 18-тӥ куартолэзе Алабгоын удмуртъёслэн нырысетӥ ӧтчамзылы 100 ар тырмонлы сӥзем тодосъя конференци улсын «Егит тодосчи» вожвылъяськонын тодматӥз. Пияшлэсь ужзэ жюри тужгес но устоен лыдъяз.

Кызьы вераз дышетскись ивортодэтъя «Удмуртия» агентстволэн корреспондентэзлы, люкам крезьгуръёс нокыӵе кырӟан бичетъёсын уг пумиськыло. Андрейлэн ужаз соос аудио, видео но печатлам амалэн гожтэмын.

Азьло мон курылӥ эшъёсылэсь, вае, шуисько, гожъялэ пересьёстылэсь, кин, мар гожтоз. Соос гожъязы, но тросэз всё равно эстрадной вал ни. Собере кулэ луиз аслым ветлыны. Мукет гуртъёстӥ ветлыса, отӥ старожилъёстӥ пыраса, сое гожтӥм, шедьтӥм
Андрей Лебедев, Балезино ёросысь Исак школаын 10-тӥ классын дышетскись

Солэн кылъёсызъя, удмурт фольклорен тунсыкъяськонэз эшсэ армие келякуз кылдӥз. Соку пияш солдат келян гурез кылыса, сое кельшытӥз. 

«Мар та, кытысь та кырӟан малпаськыса, тунсыко потӥз но, эшшо сыӵеосты утчаны медӥ», — шуэ эскерон ужлэн авторез.

Андрей Лебедев тужгес но тулкымъяськиз трос адями азьын ужзэ возьматыны, малы ке шуоно кык ар ӵоже дасяськыса, ляб возьматӥськыны кышкыт. Нош нырысетӥ инты басьтэм бераз дышетскисьлэн мылкыдыз бурдъяськиз. Азьланяз со «Исак котырысь кырӟан гуръёс» ужзэ паськытатыны малпа — асьсэ котырысь ик ӟуч но удмурт эстрадной кырӟанъёсты люкаса, соосты вашкалаосыныз ӵошатыны ӧдъя.

Ватсалом, фольклорен сяна, Андрей Лебедев математикаен тунсыкъяське. Та тодосъя но солэн эскерон ужъёсыз вань.

Тодэ вайытом, Удмуртъёслэн нырысетӥ ӧтчамзы дырысен 100 ар тырмонлы сӥзем конференцие Алабгое пӧртэм улосвылъёсысь 300 пала удмуртъёс люкаськизы. Ужрадын ӝутэм ужпумъёс сярысь лыдӟыны но резолюцилэн ӵектосэныз тодматскыны луэ татын: «Удмуртъёслэн нырысетӥ ӧтчамзылы 100 ар».

«Удмурт Кенешлэн» тӧроез Татьяна Ишматова но Татарстанысь удмуртъёслэн автономиенызы кивалтӥсь Андрей Герасимов лыдъяло, йӧскалык огазеяськонъёс лулчеберет удысысь сяна, улонысь вань удысъёсъя ужпумъёсты ӝутыны кулэ. Удмуртъёслэн азьветлӥсьёссы со сярысь вераськизы 18-тӥ куартолэзе Удмуртъёслэн нырысетӥ ӧтчамзылы 100 ар тырмонлы сӥзем конференциын Алабгоын.

Татьяна Ишматова тодэ вайытӥз, «Удмурт Кенеш» огазеяськонлэн 1991-тӥ арын юнматэм уставаз гожтэмын, со удмурт калыкен политика, экономика, мерлык но лулпуш ласянь визьнодан уж нуыны кулэ шуыса.

Ми шуиськом татын, лулчеберетъя ужпумъёсын гинэ ум выриське шуыса, маин ӵемысь асьмелэн ужмы йылпумъяське. Ми огазеяськон, кудӥз удмурт этнослэсь мылкыдъёссэ улонысь вань удысъёсын — политика, экономика — возьматэ. Озьы 1991-тӥ арын декларировать каремын вал
Татьяна Ишматова, «Удмурт Кенеш» огазеяськонлэн тӧроез

Озьы ик уставын пусъемын, огазеяськонлэн ёзчиосыз удмурт кылэз утён, азинтон но вӧлмытон бордын ужаны кулэ шуыса. Нимысьтыз висъямын Россиысь финн-угор калыкъёсын, Венгриен, Финляндиен но Эстониен кусып юнматон ужпум. Конференцие люкаськемъёс та борды Россиысь вань калыкъёсын кусыпъёсты тупатонэз но ватсаны куризы на.

Туннэ нуналлы пӧртэм ӧръёсъя вормонъёс шӧдӥсько ни. Кылсярысь, асьме улосвылын «Удмурт Элькунысь кун кылъёс но Удмурт Элькунысь мукет калыкъёслэн кылъёссы сярысь» кат юнматэмын, кытын удмурт кыл кун кыл луэ шуыса пусъемын. Со вӧзы итӥське катэз быдэстонъя нимысьтыз программа. Ваньмаз улосвылъёсын, кытын удмуртъёс тросэн уло, «Удмурт Кенешлэн» ёзэтъёсыз кылдытэмын, озьы ик удмуртъёслэн мукет йӧскалык огазеяськонъёсынызы кусыпъёс тупатэмын, шуэ Татьяна Ишматова.

Кин огазеяськонын кемалась ни, тодаз возе, кыӵе вал югдур. Вал учыръёс, куке одӥг огазеяськон кыклы люкиськиз, куке ог-оген валан ӧй вал. Со, валамон, огазеяськонлэсь кужымзэ ӧз юнматы. Плюс луэ, ми туннэ ӵошен шуыса — егитъёс но, нылкышноос но, камсьӧр удмуртъёс но
Татьяна Ишматова, «Удмурт Кенеш» огазеяськонлэн тӧроез

Эшшо одӥгез быдэстэм ужпум — йӧскалык геройёслэсь нимъёссэс данъян. Туннэ нуналлы Кузебай Герд но Ашальчи Оки нимо премиослэн бадӟым историзы ни, соос сярысь трос адями тодэ. Озьы ик  тужгес но усто журналистъёсты «Удмурт Кенеш» Эрик Батуев нимо данъетэн пусъе. Со сяна, выльысь улӟытозы Трокай Борисов нимо премиез. 

«Ми со сярысь верам ни, туэ 1-тӥ толсурысен «Удмурт Кенеш» ас бурд улаз Трокай Борисов нимо преми сётъянэз кутэ. Та данъетэн пусъёзы со муртъёсты, кин ӵапак кун политикаен выре», — ватсаз Татьяна Ишматова.

Со сяна, туннэ нуналлы йӧскалык кадръёсты дасян сӧзнэт вань. Кузебай Герд нимо

Читать полностью

18-тӥ куартолэзе Татарстанысь Алабгое Удмуртиысь, Бигерысь, Башкириысь, Киров но Пермь улосвылъёсысь, Марий Элысь 300 пала удмуртъёс люкаськизы. Пумиськон мугзы — Удмуртъёслэн нырысетӥ огъяросси ӧтчамзы дырысен 100 ар тырмонлы сӥзем тодосъя конференция. Сое «Удмурт Кенеш» кичӧлтэмен Татарстанысь удмуртъёслэн автономизы Алабгоысь Казань федерал университетлэн филиалаз радъяз. 

IMG_0004.JPG
Бигерысь удмуртъёс конференцие вуэмъёсты пумитало Фото: Наталья Еркешева ©

Ужрадэ лыктэмъёсты ӟечкыланы вуизы Удмуртиысь Кун Кенешлэн кивалтӥсез Алексей Прасолов но солэн воштӥсез Надежда Михайлова, элькунысь лулчеберетъя но туризмъя министр Владимир Соловьёв но солэн воштӥсез Пётр Данилов, Удмуртиысь йӧскалык политикая министрлэн воштӥсез Павел Орлов, Кун Кенешысь депутат, «Удмурт Кенешлэн» тӧроез Татьяна Ишматова, Татарстанысь Кун Кенешлэн кивалтӥсезлэн воштӥсез Татьяна Ларионова, Бигерысь удмуртъёслэн автономизылэн но Финн-угор калыкъёслэн огазеяськонзылэн кивалтӥсез Андрей Герасимов но мукетъёсыз.

Конференцие пыриськисьёсты ӟечкылам бере, пленарной заседание кутскиз. Отын кылосбур тодосъя кандидат Александр Шкляев «Удмуртъёслэн нырысетӥ ӧтчамзы но удмурт ужъёслэн азинскемзы» ивортонэныз тодматӥз. Истори тодосъя кандидат Валентина Хазиахметова Максим Прокопьев сярысь выль тодэтъёсты шараяз. Кылосбур тодосъя доктор, протодиакон Михаил Атаманов удмурт кылыклэн улоназ Алабголэн интыез сярысь вераз. Нош Россиысь гожъясьёслэн огазеяськонзылэн ёзчиез Николай Кузнецов удмуртъёслэн нырысетӥ ӧтчамзы сярысь истори документъёс пыр ивортӥз.

Нуназе бере кенешонъёс куать секциосын азьланьтӥськизы:

  1. «Егит тодосчи» — дышетскисьёслэн фольклоръя но шаертодонъя эскерон ужъёсынызы улосвылкуспо вожвылъяськон. Темаез: «Удмуртъёслэсь историзэс но этнографизэс дышетонын туала ужпумъёс»;
  2. Егитъёслы визьсынанъя «Шудком» шудон. Темаез: «Удмурт кунлыклы 100 ар тырмон азьын. Туала Россиез кылдытонын удмурт калыклэн интыез»;
  3. Дошкольной дышетон но семьяен уж. Темаез:
Читать полностью

Алабгоын Удмуртъёслэн I огъяросси ӧтчамзылы 100 ар тырмонлы сӥзем улосвылкуспо конференци азьын тодосъя доктор Михаил Атаманов ивортодэтъя «Удмуртия» агентстволэн корреспондентэныз вераськонын пусйиз, Елабуга —со удмурт калыклэн гогыез шуыса.

Мон шуысал, Елабуга, со котырысь вашкала археологической памятникъёс — со удмурт калыклэн гогыез. Татысен удмурт калык кылдӥз. <…> Бигер выжыос татчы бер лыктӥзы, нош удмуртъёслэн та дор музъемзы, шор музъемзы
Михаил Атаманов, кылосбур тодосъя доктор

Солэн кылъёсызъя, вашкала удмуртъёслэн улон интыязы ананьинской культура кылдӥз (асьме вапумлэсь азьло IX–III дауръёсысь Шор Поволжьеысь но Кам котрысь интывылъёсын вӧлмем археологи культура).

«Татын самой сӥё-дано вал могильник, сыӵе шай, Ананьино гурт дорын (со Елабугаен артэ ик, со гуртэз быремын ни), со гуртъя, со шайя быдэс ананьинской культура сётӥз со. Комиен удмуртъёс люкиськемен ой на вал ай соку, озьы ке но, тӥнь та лымшор люкетаз удмуртъёс кылдӥзы, нош уйпал шуръёсын отӥ <…> коми калык кылдӥз ни со ананьино вакытысен. <…> Удмурт калык татын котьку но улӥз», — пусйиз тодосчи.

Михаил Атаманов верамъя, ананьинской культура, Сибырысь тагаркской но Европаысь гальштанской культураосын ӵош, тужгес узырез вал.

«Вот со куинь культураез ог-огенызы луэ ӵошатыны. Удмурт выжыос соку сыӵе вылэ ӝутскизы, собере сыӵе вылӥе ноку но ӧм ни ӝутӥське. Огшоры мынӥм, каллен-каллен улэгес лэзиським. Асьмелэн Арча княжествомы вал, Казаньлэсь со 60 иськемын, Арск шуо сое, отын удмурт эксэй пуке вал. Сое Иван Грозный пазьгиз, удмуртъёслэн соку берпуметӥ со государствозы, нимаз пичи государствозы. Со Казанской ханствое пыре вал. Собере Советской власть дыръя гинэ Трокай Борисов, Максим Прокопьев, Кузебай Герд, мукет азьмынӥсьёслэн нюръяськеменызы Удмурт автономия кылдӥз». — вераз Михаил Атаманов но вашкалазэ тодытэк, туннэ уг луы улыны шуыса пусйиз.

Тодэ вайытом, Удмуртъёслэн I огъяросси ӧтчамзылы 100 ар тырмонлы сӥзем улосвылкуспо конференцие Алабгое 300 пала адями люкаськиз. Тодосчиос, азьветлӥсьёс, дышетӥсьёс но дышетскисьёс Удмуртиысь, Бигерысь, Башкириысь, Киров улосвылысь но Пермь шаерысь вуизы.

Туннэ, 18-тӥ куартолэзе, Татарстанысь Алабгоын удмуртъёслэн нырысетӥ ӧтчамзы дырысен 100 ар тырмонлы сӥзем улосвылкуспо конференция ортче. Отчы Удмуртиысь, Бигерысь, Башкириысь, Киров улосвылысь но Пермь шаерысь, Марий Элысь тодосчиос, азьветлӥсьёс, дышетӥсьёс но дышетскисьёс люкаськизы. Пыриськисьёслэн огъя лыдзы 300 пала луиз.

Коференцилэн ужан радлыкез:

09:00 — 10:00 — пыриськисьёсты пусъён;

10:00 — 10:15 — удмуртъёслэн нырысетӥ ӧтчамзы дырысен 100 ар тырмонлы сӥзем фильм;

10:15 — 12:00 — конференциез усьтон, пленарной ивортонъёс:

  • Александр Шкляев, кылосбур тодосъя кандидат — «Нырысетӥ удмурт огазеяськонлы ӝоген 100 ар тырмоз»;
  • Валентина Хазиахметова, истори тодосъя кандидат — «Три комиссара: архивные материалы повествуют» книгалэн материалъёсызъя Максим Прокопьев сярысь вылез »;
  • Михаил Атаманов, кылосбур тодосъя доктор  — «Елабуга удмурт калыклэн улоназ»;
  • Николай Кузнецов, Удмуртиысь дано журналист — «Удмуртъёслэн нырысетӥ ӧтчамзы. Историяя документъёс пыр эскерон но малпаськонъёс»;
  • Татьяна Иванова, Можгаысь Трокай Борисов нимо педагогикая колледжысь дышетӥсь — «Дышетӥсьёслэн семинариысенызы педагогикая колледжозь».

12:00 — 13:00 — нуназеян;

13:00 — 15:00 — секциосъя уж:

  • «Егит тодосчи» — дышетскисьёслэн фольклоръя но шаертодонъя эскерон ужъёсынызы улосвылкуспо вожвылъяськон. Темаез: «Удмуртъёслэсь историзэс но этнографизэс дышетонын туала ужпумъёс»;
  • Егитъёслы визьсынанъя «Шудком» шудон. Темаез: «Удмурт кунлыклы 100 ар тырмон азьын. Туала Россиялэн кылдытоназ удмурт калыклэн интыез»;
  • Дошкольной дышетон но семьяен уж. Темаез: «Анай (удмурт) кылэз нылпи садъёсын дышетон. Азинскон сюресъёс»;
  • Кыл но дышетон. Темаез: «Анай (удмурт) кылэз школаосын дышетон. Азинскон сюресэз утчан»;
  • Лулчеберет но туризм. Темаез: «Этно- но экотуризм — азинскыны луонлыкъёс»;
  • Тӧрлык. Мерлык. Кунмуртъёслэн кичӧлтонъёссы. Темаез: «Мер огазеяськонъёслэн мерлыко институтъёсты
Читать полностью

18-тӥ куартолэзе Татарстанысь Алабго карын удмуртъёслэн нырысетӥ ӧтчамзы дырысен 100 ар тырмонлы сӥзем тодосъя конференци ортчоз. Отчы Удмуртиысь, Татарстанысь но мукет улосвылъёсысь тодосчиос, удмурт азьветлӥсьёс, дышетӥсьёс но дышетскисьёс, шаерчиос но гожъясьёс люкаськозы. Со сярысь «Удмурт Кенеш» огазеяськонлэн нимлыко сайтаз ивортэмын.

Кызьы шуэмын ивортонын, Удмуртиысь тодмо тодосчиос Александр Шкляев но Михаил Атаманов, Кузонысь Валентина Хазиахметова но мукетъёсыз нырысетӥ удмурт ӧтчамлэн кулэлыкез, отын сэрттэм ужпумъёс, сое радъясьёс но Алабгоысь удмуртъёсын герӟаськем интыос сярысь вералозы.

«Ужрадысен нырысьсэ пумиськозы удмурт азьветлӥсьёслэн — Трокай Борисовлэн но Иосиф Наговицынлэн, нырысетӥ ӧтчамез радъясьёслэн — ӵыжы-выжыоссы», — ивортэ «Удмурт Кенешлэн» пресс-службаез.

Удмуртъёслэн Алабгоын 1918-тӥ арын ортчем ӧтчамзы калыкмылэн историяз бадӟым инты басьтэ. Ӵапак соку удмурт лулчеберетэз, кылэз, эм удысэз азинтон сярысь юанъёсты нырысьсэ ӝутӥзы. Но тужгес валтӥсез — отын делегатъёс огкылэ вуизы, удмуртъёслы нимысьтыз автономия кылдытоно шуыса. Нош 1920-тӥ арын 4-тӥ шуркынмонэ гожтэмын вал Декрет Вотской автономной область кылдытон сярысь.

Ватсалом, конференци йылпумъяськем бере пыриськисьёс Алабго кузя поръялскыны но карысь удмуртъёсын герӟаськем интыосы вуылыны быгатозы. Кылсярысь, судлэсь юрсэ, кытын 1895-тӥ арын Мултан ужъя кыкетӥез процесс ортчиз. Озьы ик адӟыны луоз, кыӵе юртын потӥз «Гудыри» газетлэн нырысетӥ номерез.

Тодосъя улосвылкуспо конференциез «Удмурт Кенеш» огазеяськон но Бигерысь удмуртъёслэн «Кенеш» автономизы радъяло.

Удмуртъёс нырысетӥ йӧслыко ӧтчамлы 100 ар тырмонэз пусйыны дасясько. 2018-тӥ арын 18-тӥ куартолэзе Алабгоын (Елабугаын) солы сӥзем научно-практической конференци ортчоз. «Удмурт Кенешлэн» Пичи кенешезлэн 20-тӥ южтолэзе пумиськоназ ӧтчамлэн удмуртъёслэн улоназы интыез сярысь ивортон лэсьтӥз кылосбур тодосъя кандидат Александр Шкляев.

Мон малпасько, куке асьмеос туннэ пусйиськом нырысетӥ съездэз, со но бадӟым уж, малы ке шуоно со асьмелы сётӥз инъет, лобӟон сюрес
Александр Шкляев, кылосбур тодосъя кандидат

Нырысетӥ ӧтчам дорозь удмуртъёс вӧсяськонъёсы гинэ ӵош люкаськылӥзы, нош татын соос асваланзы сярысь малпаськыны кутскизы, пусйиз тодосчи ивортодэтъя «Удмуртия» агентстволэн корреспондентэныз вераськонын.

Со кутскон сётӥз удмурт государственностьлы. Соин ик солэн туж бадӟым значениез. <…> Соос отын люкаськизы, собере соос автономия кылдытӥзы, кытчы люказы самой основной массивъёссэ удмуртъёслэсь, кылдӥз собере автономной область, собере кылдӥз республика — соин ик асьмелэн вань туннэ шаермы, флагмы, гербы. Асьмелы право сётэмын асьме кылынымы ужаны, дышетскыны но асьме культурамес узырмытыны, лэсьтыны. Мукет ужпум, кызьы асьмеос со правоез кутӥськомы уже
Александр Шкляев, кылосбур тодосъя кандидат

Удмуртъёслэн нырысетӥ ӧтчамзылэн кичӧлтӥсез луиз революционер, большевик, кылбурчи но югдытӥсь Максим Прокопьев. Со борды итӥськиз Трокай Борисов. Кыкетӥез сярысь туннэ трос тодӥськомы ке, Прокопьевлэн нимыз вунэмын шуыны луэ. Нош со туж батырлыко адями вал, со сюлмаськиз удмуртъёс понна зэм ик но кыӵе ке огазеяськон кылдытыны, шуэ тодосчи.

«Со граждан ожлэн героез, со туж батырлыко адями, со кылбурчи но, со государственной деятель. Нырысез со вал удмурт, кудӥз ыстэмын вал Москвае Наркомнацлэн удмурт ёзэтэныз кивалтыны — сыӵе со бадӟым адями, нош со вунэмын. Вунэмын, малы ке шуоно со вазь бырыны шедиз, 19-тӥ арын со быриз Пермь шаерысь Кунгур город дорын разведкаын дыръяз», — валэктӥз Шкляев.

Пичи кенешлэн пумиськоназ со удмурт геройёслы синпелетъёс пуктыны ӵектӥз — Владимир Короленколы, «со асьмелэн йӧскалык героймы», Максим Прокопьевлы, Ашальчи Окилы, Филипп Кедровлы. Отӥяз нош Михаил Петровлы, Флор Васильевлы, Геннадий Красильниковлы.

Валамон, туж бадӟым асьмелы уж лэсьтӥзы Буран песянайёс, озьы ик туж бадӟым вал Библиез берыктон, малы ке шуоно со ваньмыз ӝутэ асьмелэсь самосознанимес. Асьмеос умой тодыны кулэ историмес, кулэ гожтыны удмурт йӧскалык движенилэсь историзэ. Валаны кулэ, малы удмурт самосознание туж улын шуыса, малы анай-атайёслэн пиналъёссэс удмурт классэ сётэмзы уг поты
Александр Шкляев, кылосбур тодосъя кандидат

Солэн верамезъя, удмурт движениелэн пӧртэм вакытъёсыз вал ке но, со пӧлын «чигнанъёсыз, вормымтэ ужъёсыз», азьланьын солэн бадӟым луонлыкъёсыз.

Ватсалом, удмуртлыкез утён но азинтон ужзы, амалъёссы сярысь Пичи кенешын вераськизы Башкортостанысь но Пермь шаерысь удмуртъёслэн огазеяськонъёссылэн азьветлӥсьёссы. Со сяна, отын ик этнографез, истори тодосъя докторез Владимир Владыкинэз 75 арес тырмонэныз ӟечкылазы

Вуоно арын 18-тӥ куартолэзе Алабгоын (Елабугаын) удмуртъёслэн нырысетӥ ӧтчамзылы 100 ар тырмонлы сӥзем научно-практической конференци ортчоз. Ивортодэтъя «Удмуртия» агентстволы со сярысь вераз Татарстанысь удмуртъёслэн йӧскалык лулчеберетъя автономизылэн кивалтӥсезлэн воштӥсез Марина Иванова.

«Елабугаын нырысетӥез съезд ортчиз, удмуртъёс понна туж пусйымон инты луэ. Соин ик со интыын ик 100 ар ортчыса но люкаськиськомы», — пусйиз со.

Толон, 6-тӥ толсуре, Алабгое «Удмурт Кенешлэн» тӧроез Татьяна Ишматова вуылӥз, отын конференцилэн пуштросэз пумысен вераськизы. Чакламзыя, уж вить ӧръёсъя радъяськоз.

Вить направление луыны кулэ отын: егитъёс понна одӥгез луоз, кыкетӥез дышетӥсьёс понна, нылпи садъёсысь визьнодасьёс понна куинетӥез, собере ньылетӥез шаертодонъя но НКО
Марина Иванова

Солэн кылъёсызъя, пумиськонын вераськозы мар умоез но уродэз вал ортчем даур ӵоже, кызьы ваньмыз со удмуртъёс вылын шӧдӥськиз. Нимысьтыз саклык висъялозы удмуртъёслэсь нырысетӥ ӧтчамзэс люкам муртлы — Максим Прокопьевлы.

«Котькытын верало Трокай Борисов сярысь, кудӥз куинетӥ ӧтчамез ортчытӥз, удмуртъёслы кунлык сётӥз. Нош та ужез кутскем адями, Максим Прокопьев, палэнэгес кыле. Соин ик тросгес со бордысен выриськом», — пусйиз Марина Иванова.

Ужрадэ 200 пала адямиез возьмало — вань улосвылъёсысь, кытын удмуртъёс уло.

Конференциез радъясьёс: «Удмурт Кенеш» огазеяськон, Татарстанысь удмуртъёслэн йӧскалык лулчеберетъя автономизы но Алабго карлэн администрациез. Марина Ивановлэн верамезъя, азьланяз конференциез ортчытон пумысен Удмуртиысь но Татарстанысь кивалтэтъёс куспын тупанкыл но гожтэмын луоз, оло.

Наверх
Вниз