Ижкар+19 °C
14 -тӥ гудырикошкон 2020 Удмуртарня
16+

Сюресчиос Ижкарысь Саранской урамысь сюресэз выльдыны кутскизы. Объект Владимир Путинэн кичӧлтэм «Кышкыттэм но ӟечлыко автомобиль сюресъёс» йӧскалык ӵектос улсын 2020-тӥ арын тупатъяны чаклам шоркарысь сюресъёс пӧлысь берпуметӥез луэ. Со сярысь элькун тӧролэн но кивалтэтлэн пресс-службазы ивортэ.

Та сюрес кылем даурысь 60-тӥ аръёсы лэсьтэмын. Куд-ог интыосын вуж асфальт шобретэзлэсь номыр ӧз кыльы. Югдурез гопъёсты ворсан но, картаосын тупатъян ужъёс но тупатыны уг быгато ни. Соин ик ми общественникъёсын ӵош сое йӧскалык ӵектос улсын лэсьтоно сюресъёс пӧлы пыртыны пумкылъян кутӥм
Олег Бекмеметьев, Ижкарлэн тӧроез

Выльдэм сюреслэн кузьдалаез 634 метр луоз

Та дыре сюресчиос сюреслэсь вужмем инъетсэ кушто. Собере со интые векчиятэм излэсь но луоё кӧльылэсь выль инъет вӧлдыны чаклало. Бӧрысь сюрес вылэ кык сӥен асфальтобетон кисьтозы.

Со сяна, Саранской урамысь Клубной урамен дорозь тротуарез быдэсак выльдозы

Туннэ нуналлы Ижкарын «Кышкыттэм но ӟечлыко автомобиль сюресъёс» йӧскалык ӵектос улсын лэсьтоно 23 сюресъёс пӧлысь 13-ез вуттэмын ини. Дасаз ужъёс азьланьтӥсько. 

Тодэ вайытом, Грак ёросын йӧскалык ӵектосъя сюресъёсты тупатъянэз туэ понна йылпумъязы. 

Якшур-Бӧдья ёросын «Опорный план дорожной деятельности» элькун программа улсын Тыло - Узя (Старые Зятцы – Узи) сюреслэсь ньыль иськем люкетсэ тупатӥзы. Со сярысь «Удмуртавтодор» огазеяськонлэн «ВКонтакте» мерлыко вотэсысь огиназ ивортӥзы.

Азьвыл черкогуртъёс вискысь сюреслэн тулыс но сӥзьыл ветлыны луонтэм люкетэз сэрен отын улӥсьёслы 10 иськем котырсконо луылэ вал

Ӧнерчиос сюрес урдсысь куакъёсты но вечи писпуосты утялтӥзы, канаваосты муромытӥзы, ву кошкон гумыосты сузязы но тупатъязы. Лазег интыосын сюреслэн инъетаз сюй киськазы. Вылзэс векчиятэм изэн но луоё кӧльыен шобыртӥзы.

«Удмуртавтодорысь» сюресчиос элькун программая ньыль объектъёсын ужъёсты йылпумъязы ни, 13 люкетъёсын ужъёсты азьланьто. 2020-тӥ арын 28 сюрес кузя мынон-ветлонэз умоятыны чакламын, оглом 131,5 иськем.

Тодэ вайытом, 3-тӥ гудырикошконэ Дэбес – Увай сюресэз тупатъяны кутскизы

Грак ёросын «Кышкыттэм но ӟечлыко автомобиль сюресъёс» йӧскалык ӵектосъя Алнаш – Грак но Кизнер – Грак сюресъёслэсь люкетъёссэс тупатъянэз йылпумъязы. Со сярысь улосвыл тӧролэн но кивалтэтлэн пресс-службазы ивортӥз.

Алнаш – Грак сюресэз 12-тӥ куартолэзе тупатъяны кутскизы. Вить иськемлэсь кузь люкетын вужмем асфальтэз утялтӥзы но выльзэ кык сӥен вӧлдӥзы. Сося на, сюрес дуръёсты юнматӥзы.

Кизнер – Грак сюрес вылын ужъёсты куартолэзь пумын мытӥзы. Сюресчиос озьы ик изъянмем шобретэз утялтӥзы, кык сӥен асфальтобетон вӧлдӥзы но сюрес дуръёсты юнматӥзы.

Со сяна, тупатъям сюрес люкетъёсын мер транспортэ пуксён интыосты умоятӥзы, выль сюрес пусъёс но сигнал юбоос пуктылӥзы.

Озьыен, 2020-тӥ арын йӧскалык ӵектосъя тупатъяны чаклам 19 улосвыл объектъёс пӧлысь туннэ нуналлы 13-яз ужъёс йылпумъямын ни, кылемаз ужъёс азьланьтӥсько.

Тодэ вайытом, элькун программая Грак ёросын Вылӥ Эгра – Мишкино – Татарстанлэн гожез сюреслэсь люкетсэ тупатъяло.

Удмуртиын Эгра – Красногорск сюреслэсь ньыль люкетсэ тупатъязы. «Кышкыттэм но ӟечлыко автомобиль сюресъёс» йӧскалык ӵектос улсын выльдэм сюрес оглом 11,3 иськем кыстӥське. Со сярысь ӵектослэн улосвыл офисэзлэн пресс-службаез ивортӥз.

Кыкез тупатъям люкетъёс Эгра ёросын интыяськемын, эшшо кыкез – Красногорск ёросын

Тупатъян ужъёс улсын сюрес урдсысь будосъёсты утялтӥзы, ву кошкон гумыосты сузязы но тупатӥзы. Сюрес вылысь вужмем сӥзэ куштыса, асфальтобетон суретлэсь ӵошкытатӥсь сӥ лэсьтӥзы, собере кык сӥен асфальтобетон вӧлдӥзы. Озьы ик сюрес дуръёсты юнматӥзы.

Мерлыко транспортэн ветлӥсьёс понна дугдылон интыосты но кожон интыосты выльдӥзы, выль автопавильонъёс пуктӥзы.

Сюресэз, кызьы чакламын вал, Спортъя XXIX элькун гужем гурт шудонъёс кутскытозь вуттӥзы. Ӵошатсконъёс туэ 12-15 гудырикошконэ Красногорск черкогуртын ортчозы, коронавирус югдурен сэрен радлыказы кӧня ке воштонъёс пыртӥззы

Тодэ вайытом, кемалась ик ӧвӧл сюресчиос Глазкар - Яр - Пудем сюреслэсь люкетсэ вуттӥзы

Удмуртиысь Яр ёросын Глазкар – Яр – Пудем сюреслэсь люкетсэ тупатъязы. Со сярысь «Удмуртавтодор» огазеяськонлэн «ВКонтакте» мерлыко вотэсысь бамаз ивортэмын.

Сюресчиос Глазкар – Яр – Пудем сюреслэсь км 21+650 - км 50+490 люкетсэ выльдонэз йылпумъязы. Со Яр каргуртэз котыртон сюрес луэ. Асфальтобетонлэсь шобретэз кык интыын выльдӥзы: нырысетӥез - трассалэн 34-тӥ иськемаз Яре кожон дорысен Яр – Укан – Юр сюресэн вожозь, кыкетӥез - 37,708 иськемысен 38,398 иськемозь.

Тупатъян ужъёс улсын сюрес шобретлэсь алама луэм сӥоссэ утялтӥзы, сюресэз ӵошкытатӥзы но асфальтобетон суретлэсь выль шобрет вӧлдӥзы. Со сяна, сюрес дуръёсты юнматӥзы.

Выльдэм сюреслэн огъя кузьдалаез 2,98 иськем луиз

Сюресэз выльдыны коньдон «Кышкыттэм но ӟечлыко автомобиль сюресъёс» йӧскалык ӵектос улсын висъязы. Та туэ Глазкар – Яр – Пудем сюреслэн кыкетӥ тупатъям люкетэз луэ ини. Азьвылгес Верхняя Убыть гуртэ кожон палан (км 9+250 - км 10+350) но Карасёво гурт дорысь (19+667 - км 21+767) люкетъёссэ выльдӥзы вал.

Пусъём, кылем арын но та сюреслэсь оглом 6 но ӝыны иськем пала кык люкетъёссэ выльдӥзы

Озьы, «Кышкыттэм но ӟечлыко автомобиль сюресъёс» йӧскалык ӵектос улсын Глазкар – Яр – Пудем сюреслэсь оглом 12,659 иськемзэ тупатъязы

Тодэ вайытом, Удмуртиын Дэбес - Уйвай сюресэз тупатъяны кутскизы. Нош Сарапул ёросын Колбиха шур вамен выжез выльдӥзы


Удмуртиын Сарапул – Кияса сюрес вылысь Кигбаево черкогурт дорысь Колбиха шур вамен потон выжез тупатъязы. Со сярысь элькун тӧролэн но кивалтэтлэн пресс-службазы ивортэ.

Выльдэм выж 6 метр кыстӥське

Ӧнерчиос сюрес шобретэз выльдӥзы, барьеръёссэ, перлаоссэ воштӥзы, выжлэсь пыкетъёссэ но со вылэ пырон интыосты тупатъязы но юнматӥзы.

Юрино, Рябиновка гуртъёсын, Выезд черкогуртын улӥсьёс та сюрес вылтӥ нуналлы быдэ Сарапулэ ужаны мыно. 

Озьы ик сюресчиос Дэри ёросысь Докша гурт дорысь Сарапул – Вотка сюрес вылысь ву кошкон гумыез тупатъязы, котырзэ умоятӥзы.

Тодэ вайытом, озьы ик туэ шуръёс но чугун сюрес вамен вить выжъёсты тупатъялозы

3-тӥ гудырикошконэ Дэбес ёросын Дэбес – Увай сюресэз тупатъяны кутскизы. Со сярысь улосвыл тӧролэн но кивалтэтлэн пресс-службазы ивортэ.

«Опорный план дорожной деятельности» элькун программая сюреслэсь ветлыны луонтэм 3 иськемзэ тупатъялозы.

Ӧнерчиос сюреслэсь урдэсъёссэ юнматозы, пуксён интыосты выльысь лэсьтозы, сюрес пусъёс, сигнал юбоос, кенертонъёс пуктозы. Сюрес вылэ кык сӥен асфальт вӧлдозы.

2020-тӥ арын элькун программая 28 сюрес люкетъёсты выльдыны чакламын, оглом 131,5 иськем. Та дыре 11 люкетъёсын ужъёсты азьланьто, куатьсэ вуттӥзы ни.

Тодэ вайытом, азьвылгес Глаз но Алнаш ёросъёсын гурт сюресъёсты тупатъян ужъёсты йылпумъязы.

Ижкарын Ленин ёросысь 3 номеро кар эмъюрт доры нуись Западной ульчаысь сюресэз тупатъян ужъёсты йылпумъязы. Со сярысь «Удмуртавтодорлэн» сайтаз ивортӥзы.

Сюресчиос 250 метре кык сӥен выль асфальт вӧлдӥзы, сюрес урдэсъёсты юнматӥзы. Со сяна, тротуаръёс лэсьтӥзы.

Ужъёсты «Кышщкттэм но ӟечлыко автомобиль сюресъёс» йӧскалык ӵектосъя быдэстӥзы.

Тодэ вайытом, эмъяськонни доры нуись Западной, озьы ик Загородной ульчаосысь сюресъёсты тупатъяны куартолэзе кутскизы

Ува ёросын Ижкар – Ува сюреслэсь люкетсэ тупатъянэз йылпумъязы. Ужъёсты «Кышкыттэм но ӟечлыко автомобиль сюресъёс» йӧскалык ӵектосъя быдэстӥзы. Со сярысь улосвыл тӧролэн но кивалтэтлэн пресс-службазы ивортэ.

Сюрес люкетлэн кузьдалаез 5,644 иськем.

Трасса бадӟым ёрос центрез элькунлэн шоркареныз герӟа. Сюрес зор уродмемын вал. Со дыре ик Ижкар – Ува элькунысь одӥгез тужгес ужатӥськись сюрес, отӥ трос бадӟым машинаос ветло
Ярослав Семёнов, Удмуртиысь кивалтэтлэн тӧроез

Сюресчиос тупатъян ужъёсты 1-тӥ куартолэзе кутскизы. Соос сюреслэсь изъянмем вылзэ утялтӥзы, шобретлэсь ӵошкытатӥсь но вылӥ сӥос вӧлдӥзы, урдэсъёссэ юнматӥзы. Озьы ик сюрес пусъёсты воштӥзы, сигнал юбоос пуктылӥзы, транспортэ пуксён интыосты умоятӥзы.

Ужъёсты кутӥсь ӧрилэн сюресчиослы юанъёссы ӧз кылдэ, сюресэз уже кутон сярысь ужкагазэз ваньзы кинюртӥзы. 

Эгра – Красногорск сюреслэсь «Кышкыттэм но ӟечлыко автомобиль сюресъёс» йӧскалык ӵектосъя кык люкетъёссэ тупатъян ужъёсты 80 процентлэсь ятырлы быдэстӥзы. 24-тӥ пӧсьтолэзе ужась ӧри лэсьтӥськонэз чакланы вуылӥз. Со сярысь йӧскалык ӵектослэн улосвыл офисэзлэн пресс-службаез ивортэ.

Кык сюрес люкетъёслэн огъя кузьдалазы 11 иськемлэсь трос. Ужъёсты XXIX элькун гужем гурт шудонъёс кутскытозь йылпумъяны кулэ, соос Красногорскын 12-15 гудырикошконэ ортчозы

Эгра ёросын сюреслэсь 5,37 иськемзэ тупатъяло, ужъёсты 13-тӥ оштолэзе кутскизы. Сюресэз кык сӥен асфальтобетонэн шобыртӥзы, сюрес урдэсъёсты юнматӥзы. Со сяна, транспорт дугдылонниосты умоятӥзы, кык выль павильонъёс пуктӥзы.

Красногорск ёросын 5,7 иськемзэ выльдозы. Отын озьы ик кык сӥен асфальтобетон вӧлдӥзы, сюрес урдэсъёсты юнматӥзы. Сося на, 600 метрын кенертон лэсьтозы, кык дугдылонниосты умоятозы.

Объектъёсты сётытозь сюресчиос сюрес урдэсъёсты ӵошкытатыны но куд-ог интыосын юнматыны, сюрес пусъёс, сигнал юбоос пуктылыны, лэсьтӥськон жуг-жагез утялтыны кулэ на.

Ватсалом, йӧскалык ӵектосъя тупатъяно 19 улосвыл объектъёс пӧлысь сизьымаз ужъёсты йылпумъязы ни. 16-тӥ пӧсьтолэзе (Якшур-Бӧдья – Шаркан) – Шегъян Тыло (Петуньки) сюрес вылын тупатъян ужъёсты кутскизы

Удмуртиын «Опорный план дорожной деятельности» элькун программая Алнаш но Граз ёросъёсын кык сюрес люкетъёсты тупатъянэз йылпумъязы. Со сярысь элькунысь тӧролэн но кивалтэтлэн пресс-службазы ивортэ.

Алнаш – Туймыйыл (Удмуртский Тоймобаш) сюреслэсь 5,5 иськемзэ векчиятэм изэн но луоё кӧльыен шобыртыса выльдӥзы. Со сяна, ву кошкон гумыосты сузязы, сюрес урдсысь канаваосты муромытӥзы.

Туймыйыл – 1 сюрс 500 улӥсен гурт поселенилэн центрез. Гуртысь школае быдэс поселениысь пиналъёс ветло. Выльдэм сюресэтӥ школа маршрут ортче.

Озьы ик Глаз ёросысь Глазкар – Понино – Зотово сюреслэсь люкетсэ тупатъян ужъёсты йылпумъязы. Отын Золатри гурт дорысен Пудвай гуртозь 4 иськем пала сюресэз выльдӥзы. Туннэ Золтариын 500 пала улӥсез. Озьы ик шаертодонъя «Истоки» музей ужа, арлы быдэ отчы 5 сюрслэсь трос адями вуылэ.

Та дыре элькун программая 11 сюресъёс вылын ужъёс азьланьтӥсько на:

- Гозек – Ӟуч Пычас;
- Тыло – Узи;
- Кез – Кулига – Карсовай;
- Балезино – Сергино;
- (Эгра – Сьӧлта – Сюмси – Киров улосвыллэн гожез) – Гури – Ӟатча (2 люкет);
- Якшур-Бӧдья – Красногорск;
- (Ижкар – Сарапул) – Сизьгурт;
- Выли Эгра – Мишкино – Татарстанлэн гожез;
- Гыбдан – Ӟуч Кусо;
- «Эгра – Глазкар) – Андрейшур.

Матысь дыре Дэбес ёросын Дэбес – Уйвай сюрес вылэ потыны чаклало, отын 3 иськемез тупатъялозы.

Та дыре элькун программая куать объектъёсын ужъёсты быдэстӥзы ни: Алнаш – Туймыйыл, Сарапул – Вылӥ Бугрыш, Первомайской – Черепановка, (Эгра – Сьӧлта – Сюмси – Киров улосвыллэн гожез) – Кӧпка – Удгурт, Чумой - Узырмон, Глазкар – Понино – Зотово. Таяз арын 28 сюрес люкетъёсты выльдыны чакламын, оглом 131,5 иськем мында. 

Грак ёросын Вылӥ Эгра – Мишкино – Татарстанлэн гожез сюреслэсь люкетсэ тупатъяны кутскизы. Со сярысь ёрослэн тӧроез Виктор Белов «ВКонтакте» мерлыко вотэсысь бамаз ивортӥз.

Тодэ вайыто, та люкет улосвылысь транспортъя но сюрес возёсъя министерстволэн Удмурт Элькунысь ветлыны луонтэм сюресъёсын лыдметаз пыриз
Виктор Белов, Грак ёрослэн тӧроез

Ӧнерчиос сюреслэн инъетысьтыз музъемез воштозы, вылӥ шобретсэ выльдозы. Оглом 1,1 иськемез тупатъялозы. Со понна элькун коньдэтысь 5 миллион манетлэсь трос коньдон висъязы.

Вань ужъёсты 30-тӥ куарусёнозь быдэстыны кулэ

Озьы ик Виктор Белов ватсаз, Татарстан палась сюресэз выльдон пумысен бускель элькунын али ӵектос дасяло.

Тодэ вайытом, азьвылгес Сьӧлта ёросын ветлыны луонтэм сюресэз тупатъязы.

16-тӥ пӧсьтолэзе (Якшур-Бӧдья – Шаркан) – Шегъян Тыло (Петуньки) сюрес вылын тупатъян ужъёсты кутскизы. Со 2020-тӥ арын «Кышкттэм но ӟечлыко автомобиль сюресъёс» йӧскалык ӵектосъя выльдыны чаклам берпуметӥез улосвыл сюрес, ивортэ элькунысь тӧролэн но кивалтэтлэн пресс-службазы.

Та дыре дасяськон ужъёс мыно. Ӧнерчиос сюреслэсь вуж шобретсэ куштыны, куд-ог интыосын инъетсэ юнматыны но кык сӥен выль асфальтобетон вӧлдыны кулэ. Со сяна, сюрес урдэсъёсты юнматозы, сюрес вылысь васкьон интыосты лэсьтозы.

Оглом 5,7 иськемлэсь трос сюресэз тупатъялозы

Тодэ вайытом, 2019-тӥ арын Шегъян Тылое сюреслэсь 3,2 иськемзэ выльдӥзы.

19 улосвыл но муниципалкуспо сюресъёс пӧлысь али 12 люкетъёсын ужъёс мыно, сизьым объектъёс вуттэмын ни. Со Глаз ёросын Эгра – Глазкар но Глазкар –Яр – Пудэм, Дэри ёросын Ижкар – Якшур-Бӧдья, Алнаш ёросын Алнаш – Грак, Пичи Пурга ёросын Пичи Пурга – Улӥ Кечол, Кез ёросын Кез – Пужмезь – Чепца но Сьӧлта котыр сюрес.

Со сяна, Ижкарын 23 объектъёс пӧлысь 13-яз техника ужа. Туннэ нуналлы тямысэз люкетъёс вуттэмын ни. Со Пушкинской ульчалэн Холмогоров нимо ульчаысен Октябрьлы 10 ар ульчаозь люкетэз, Раздельной но Профсоюзной пролкаос, Ижкар – Оранжерейной огъет сюрес, Халтурин нимо, Парашютной, Загородной, Драгунов оружейник нимо ульчаос. Матысь дыре Советской но Саранской ульчаосын тупатъян ужъёсты кутскозы. 

Алнаш ёросын «Кышкыттэм но ӟечлыко автомобиль сюресъёс» йӧскалык ӵектосъя Алнаш – Грак сюреслэсь люкетсэ тупатъян ужъёсты йылпумъязы. 9-тӥ пӧсьтолэзе объектэз уже кутон ужкагазъёсты юнматӥзы. Со сярысь Удмуртиысь транспортъя но сюрес возёсъя министерстволэн пресс-службаез ивортэ.

Сюресчиос уж борды оштолэзь пумын басьтӥськизы. Соос 4,9 иськемысь вуж асфальтэз утялтӥзы но кык сӥен выль асфальтобетон вӧлдӥзы. Со сяна, сюрес урдэсъёсты юнматӥзы. Мер транспорт дугдылон интыосты умоятӥзы, «Верхний Утчан» дугдылонниын павильон пуктӥзы.

Тодэ вайытом, Алнаш – Грак сюреслэсь оглом 10,09 иськем мында кык люкетсэ тупатъялозы. Та дыре Грак ёросын ужъёсты азьланьто.

Ватсалом, «Кышкыттэм но ӟечлыко автомобиль сюресъёс» йӧскалык ӵектосъя туэ тупатъяны чаклам 16 улосвыл сюрес люкетъёс пӧлысь куатез выльдэмын ни. Со Глаз ёросын Эгра – Глаз но Глаз – Яр - Пудем сюрес, Дэри ёросын Ижкар – Якшур-Бӧдья, Сьӧлта котыр сюрес, Пичи Пурга ёросын Пичи Пурга – Улӥ Кечол, Алнаш ёросын Алнаш – Грак. 

Ижкарысь Парашютной, Загородной но Оружейник Драгунов нимо ульчаосын сюресъёсты тупатъянэз йылпумъязы. «Кышкыттэм но ӟечлыко автомобиль сюресъёс» йӧскалык ӵектосъя быдэстэм ужъёслэсь ӟечлыксэс 8-тӥ пӧсьтолэзе ӧри эскериз. Со сярысь Удмуртиысь тӧролэн но кивалтэтлэн пресс-службазы ивортэ.

Туннэ кутэм ваньмыз объектъёс школаос, нылпи садъёс, эмъюртъёс доры нуо. Тросаз учырын – со частной сектор, кытын сюресъёсты аръёсын ӧз тупатъяллялэ. Таяз арын Ленин ёрослы нимысьтыз саклык висъямын – 11 сюресъёс тупатъяны луозы. 2020-тӥ арын йӧскалык ӵектосъя со тужгес бадӟым уж. Тодэ вайытом, татын Шабердӥ трактын, Клубной ульчаын ужало на, алигес Кирзаводской ульчаын кутскизы, сое 50 арлэсь трос рос-прос ӧз тупатъяллялэ
Ярослав Семёнов, Удмуртиысь кивалтэтлэн тӧроез

Парашютной ульчаез 19-тӥ куартолэзе тупатъяны кутскизы. Сюрес люкетлэн кузьдалаез – 550 метр, озьы ик Гагарин ульчаысен Степной ульчаозь тротуаръёсты выльдӥзы. Сюресэз тупатъям сяна, отын 11 люкъёсты ӝутӥзы, кулэ интыосын бордюр изъёс пуктӥзы, сюрес урдэсъёсты юнматӥзы.

Загородной ульчаез Областой ульчаысен Нагорной ульчаозь тупатъязы, кузьдалаез – 260 метр. Машинаос ветлон интыез выльдэм сяна, выль тротуар лэсьтӥзы. Та сюрес 3 номеро кар эмъяськонние нуэ. Быдэстэм ужъёслэсь ӟечлыксэс сӧсыръёслэн «Благо» мер огазеяськонзылэн кивалтӥсезлэн воштӥсез Сергей Меркурьев эскериз.

Милем котькуд выжон интыез, котькудзэ сюрес но тротуар вожез эскерыны туж кулэ. Малыке шуоно коляскаен адямиос возьматыны быгато – тупало соос милем яке уг. Нош умой луоз ваньмызлы – сӧсыръёслы но, нуныоссэс коляскаын нуллӥсь анайёслы но. Куке ужъёс 70 процентлы быдэстэмын вал, мон ужась ӧри дыръя тротуаръёс вылысь сюрес вылэ васькон интыосты умоятон пумысен алонъёс верай вал. Туннэ ваньмыз соос лыдэ басьтэмын. Сюресчиослэн ужамзы пумысен чагиськонъёсы ӧвӧл
Сергей Меркурьев, сӧсыръёслэн «Благо» мер огазеяськонзылэн кивалтӥсезлэн воштӥсез

Оружейник Драгунов нимо ульчалэн Мужвай ульчаысен Кузебай Герд нимо ульчаозь люкетаз ужъёсты пӧсьтолэзь пумын кутскыны малпало вал, но ӧдъязы 1-тӥ инвожое. Сюрес люкетлэн кузьдалаез – 600 метрлэсь трос. Та сюрес 85 номеро школа, 213 но 268 номеро нылпи садъёс доры нуэ. Озьы ик отын Драгунов оружейниклэн скверез интыяськемын. Сюреслэсь люкетсэ тупатъям сяна, тротуаръёсты выльдӥзы, кулэ интыосын бордюр изъёсты лапеггес каризы.

Вань объектъёсты алонъёстэк кутӥзы.

Тод вайытом, Удмуртия сюресъёсты тупатъяны ватсаса коньдон басьтыны быгатоз

Удмуртия сюресъёсты тупатъян понна ватсаса 340 миллион манет басьтыны быгатоз. Кызьы вераз элькунлэн тӧроеныз Александр Бречаловен пумиськонын Сюресъёсъя федерал агентстволэн кивалтӥсез Андрей Костюк, сыӵе ӵектонэн кун кивалтэтэ Россиысь транспортъя но сюрес возёсъя министерство вазиськиз. Со сярысь улосвыл тӧролэн но кивалтэтлэн пресс-службазы ивортэ.

Александр Бречаловдэн кылъёсызъя, ватсам коньдон Ижкар агломерацие пырись Воткаысь, Сарапулысь, Можгаысь но Камбаркаысь сюресъёсты тупатъяны мыноз. Выльдэм сюресъёслэн оглом кузьдалазы 27,9 иськем луоз

Сюресъёсты лэсьтон но тупатъян тужгес бадӟым ужъёс «Кышкыттэм но ӟечлыко автомобиль сюресъёс» йӧскалык ӵектосъя мыно. 2020-тӥ арын сое быдэсъяны 1 миллиард 560 миллион манет висъязы, со пӧлысь 780 миллион манетэз – федерал коньдэтысь.

Туэ йӧскалык ӵектос улсын чакламлэсь 62 процент палаез ужъёс быдэстэмын ни. Та дыре соос улосвыл сюресъёслэн 30 люкетъёсаз но Ижкарысь ульчаосын азьланьтӥсько. Укмысэз объектъёс вуттэмын ни.

Со сяна, Удмуртиын 13 выжъёсты выльдонъя ужкагазъёсты дасяло.

Йӧскалык ӵектос сяна, элькунын «Гурт интывылъёсты котыр ласянь азинтон» кун программа ужа. Сое быдэсъяны 646 миллион 400 сюрс манет висъязы. Тупатъян ужъёс оглом 25,24 иськемын мыно: Кияса – Лутоха, Якщур-Бӧдья ‒ Шаркан – Быги, Кез ‒ Кулига ‒ Карсовай ‒ Жерноково – Медьма.

2020-тӥ арын М-7 «Волга» федерал трассалэн люкетъёсаз тупатъян но рос-прос тупатъян ужъёсты йылпумъяны чаклало. 

Балезиноын элькун субсидиос чотын сюресъёсты тупатъяны кутскизы. Со сярысь Удмуртиысь тӧролэн но кивалтэтлэн пресс-службазы ивортэ. 

Таяз арын каргурт Удмуртиысь гурт ёросъёс пӧлысь тужгес трос коньдон басьтӥз – 40 миллион манет. Татын сюресъёсты аръёсын ӧз тупатъялэ, соин ик сӧриськем сюресъёслэн лыдзы 60 процентлы матэктэ
Ярослав Семёнов, Удмуртиысь кивалтэтлэн тӧроез

Висям коньдонэн Блезиноысь сизьым ульчаосты тупатъялозы: Азин, Киров, К. Маркс, Русских нимо, Первомайской, Советской, Лесобазовской пролка. Сюрес шобретэз кык сӥен вӧлдозы – ӵошкытатӥсьсэ ньыль сантиметр зӧкта, вылзэ – вить сантиметр.

Озьы ик каргуртлы гопъёсты ворсан понна коньдон висъязы, со сюресъёсты рос-прос тупатъятытозь ветлымон возьыны юрттоз.

Таяз арын Балезино ёросын 32 иськемлэсь трос улосвыл сюресъёсты тупатъялозы. Со «Опорный план дорожной деятельности» элькун программае пыртэм кык объектъёс: Балезино – Сергино сюреслэн кык люкетэз но (Эгра – Глазкар) – Андрейшур сюреслэн кык люкетэз.

Тодэ вайытом, кылем арын Балезино – Сергин сюреслэсь оглюкетсэ выльдӥзы но Чупчи шур вамен выжез усьтӥзы

Удмуртиын Пичи Пурга – Улӥ Кечол сюреслэсь 4,5 иськем люкетсэ тупатъян ужъёсты йылпумъязы. Со сярысь элькунлэн тӧроез Александр Бречалов «ВКонтакте» мерлыко вотэсысь бамаз ивортӥз.

Ӧнерчиос сюреслэсь вужмем шобретсэ утялтӥзы но кык сӥен асфальтобетон вӧлдӥзы. Со сяна, сюрес урдэсъёсты ӝуждалаезъя ӵошкытатӥзы но пасьталаезъя юнматӥзы. Озьы ик дугдылон интыосты умоятӥзы, дугдылонни павильонъёс пуктӥзы, сюрес пусъёсты но сигнал юбоосты воштӥзы.

Тодэ вайытом, сюреслэсь люкетсэ тупатъян ужъёс «Кышкыттэм но ӟечлыко автомобиль сюресъёс» йӧскалык ӵектосъя куартолэзьысен мынӥзы. Кылем арын озьы ик та сюреслэсь Яганысен Улӥ Кечолозь 4,37 иськемзэ выльдӥзы

Удмуртиын «Гурт интывылъёсты ялан азинтон» («Комплексное развитие сельских территорий») кун программа улсын тупатъяны чаклам куинь гурт сюресъёс вылын ужъёс кутскизы. Сюресчиос Шаркан, Кез но Кияса ёросъёсын ужало ини, ивортэ элькун тӧролэн но кивалтэтлэн пресс-службазы.

2020-тӥ арын (Якшур-Бӧдья - Шаркан) - Быгы, Кияса – Лутоха но (Кез – Кулига - Карсовай) – Жорногурт – Медьма сюресъёсты тупатъялозы. Ваньмыз со сюресъёс гуртъёсысь калыклэн улоназ бадӟым инты басьтӥсь ужъюртъёс но гурт возёс вузъёс поттӥсь предприятиос доры нуо. Озьы ик отӥ школа маршрутъёс ортчо.

Ужъёсты быдэстыны 646 миллион манет висъязы, со пӧлысь 304 миллионэз – улосвыл коньдэтысь

Таяз арняе Быгые сюресэз тупатъян борды кутскизы. Выльдэм сюрес элькунысьтымы йӧл поттон удысысь огаз валтӥсь гурт возёс предприятие - «Восход» огазеяськонэ вуттоз. Кызьы пусйиз улосвыл кивалтэтлэн тӧроез Ярослав Семёнов, 2019-тӥ арын йӧл вузанэз будэтонын «Восход» кыкетӥ инты басьтӥз.

Туннэ предприятилэн сюро таза пудо уллёяз 3 сюрс 800-лэсь трос пудоос пыро, уй-нунал ӵоже 48,3 тонна йӧл потто. Со сяна, Быгыын арлы быдэ финн-угор сиён-юонъя «Быг-Быг» фестиваль ортче, отчы Удмуртиын улӥсьёс но куноос люкасько
Ярослав Семёнов, Удмуртиысь кивалтэтлэн тӧроез

Туэ сюреслэсь 4,2 иськемзэ выльдыны чаклало. Сюресчиос ву кошкон выль гумыос лэсьтозы, асфальтобетон вӧлдозы, выль сигнал юбоос, сюрес пусъёс, кенертонъёс пуктозы.

Кияса – Лутоха сюресэз инвожое лэсьтыны кутскизы. Со элькунамы туэ понна тужгес кузез выльдэм сюрес луоз – 11 иськем. Выльдэм сюрес муниципал кылдытэтэ пырись гуртъёсты Киясаен герӟалозы. Со сяна, выль сюрес «Дубровское» экофермае нуоз. Отын 1 сюрс 200 йыр пудолы чаклам ферма туэ пӧсьтолэзе ужзэ мытоз.

(Кез – Кулига - Карсовай) – Жорногурт – Медьма сюресэз тупатъян борды туэ южтолэзе басьтӥськизы. Сюрес оглом 9 иськем 770 метр кыстӥськоз. Медьмаын озьы ик скал кыскон ферма ужа, ю тысь будэто. Та вакытэ объектын ву кошкон сӧзнэтэз тупатъян, сое утӥсь футляр лэсьтон ужъёсты йылпумъяло.

Тодэ вайытом, та дырлы элькунамы вань программаосъя сюресъёсты лэсьто ини.

Удмуртиын 2021-тӥ арын «Кышкыттэм но ӟечлыко автомобиль сюресъёс» йӧскалык ӵектос улсын тупатъяны чаклам сюресъёсты эскерыны кутскизы. Со сярысь ӵектослэн улосвыл офисэзлэн пресс-службаез ивортэ.

Та дыре тупатъяно сюресъёсын лыдметэ 56 сюресъёс пыро. Со пӧлысь 10-эз – улосвыл но муниципалкуспо сюресъёс, 30-эз – Ижкарысь сюресъёс, 16-ез – Дэри черкогуртысь но ёросысьтыз сюресъёс.

Тупатъяно сюресъёсты азьвылгес мер кенешонъёсын юнматӥзы ини, но йылпумъясь лыдметэз эскеронъёс ортчытэм но тупатъян ужъёслэсь дунзэ чотам бере гинэ юнматозы.

2021-тӥ арын йӧскалык ӵектосэз улонэ пыӵатон понна 1 миллиард 360 миллион манет висъялозы

Подрядной огазеяськонысь инженеръёс, «Управтодор» ужъюртысь ӧнерчиос но Ижкарысь но Дэри ёросысь ыстэм муртъёс ваньзэ 56 сюресъёсты чаклалозы. Соос сюрес шобретлэсь зӧкталазэ мерталозы, сюреслэсь инъетсэ эскерозы, алама интыоссэ пусъёзы. Собере соослэн эскеронъёссыя котькуд сюресъя смета кылдытозы, тупатъян ужъёслэсь дунзэс лыдъялозы. 

Тупатъяны чаклам вань сюресъёсты туэ 31-тӥ пӧсьтолэзёзь эскерыны кулэ

Тодэ вайытом, та дыре йӧскалык ӵектос улсын Ижкарысь Пастухов нимо урамысь сюресэз выльдо

Наверх
Вниз