Ижкар+3 °C
25 -тӥ коньывуон 2020 Воскресенье
18+

Удмуртия Ижысь автозаводлэсь Lada Vesta SW но Lada Vesta SW Cross выль модельёссэ басьтылоз. Соосты тросэн поттонэз кутсконлы сӥзем сӥё-дано ужрадын 11-тӥ куарусёнэ со сярысь вераз элькун кивалтэтлэн тӧроезлэсь ужзэ быдэсъясь Ярослав Семёнов.

Ми заводлэсь вуззэ басьтӥськомы, ми сое муниципал кылдытэтъёсы келяськомы, ми кивалтэтэз со машинаосы пуктӥськомы…
Ярослав Семёнов, Удмуртиысь кивалтэтлэн тӧроезлэсь ужзэ быдэсъясь

Удмуртиысь кивалтэтлэн тӧроезлэсь ужзэ быдэсъясь озьы ик ужалозы выль автомобилья но ужалозы шуыса оскемзэ вераз, уката ик предприятилэсь вуззэ басьясьёслэсь «умой кылъёсты гинэ кылыны луэ». Со сяна, Ярослав Семёнов заводлэсь элькунлэн экономикаяз бадӟым интызэ но ужез умой радъямзэс пусйиз. Ӧнерчиос умой интыосын ужало, кивалтӥсьёслэсь тау каронъёс басьто, соослэн нокытчы кошкемзы уг поты.

20 Lada Vesta автомобильёс Удмуртиысь тӧролэн но кивалтэтлэн автопарказы пӧсьтолэзе вуизы, со понна 12 миллион манетлэсь кӧня ке ятыр тыризы.

Тодэ вайытом, Lada Vesta SW но Lada Vesta SW Cross выль модельёсты Ижысь автозаводын тросэн поттыны кутскизы 11-тӥ куарусёнэ.

Ижысь автозаводын LADA Vesta SW но LADA Vesta SW Cross машинаосты тросэн поттыны кутскизы. Нырысетӥосыз выль автомобильёс конвейерысь вордӥськонэ, 11-тӥ куарусёнэ, васькизы. Автозаводын ужасьёсты элькун кивалтӥсьёслэн нимынызы ӟечкылаз Удмуртиысь кивалтэтлэн тӧроезлэсь ужзэ быдэсъясь Ярослав Семёнов.

Удмуртилэн быръем тӧроезлэн Александр Бречаловлэн, Удмуртиысь кивалтэтлэн нимынызы праздникен ӟечкыласько. Выль автомобилез поттыны кутскон выль кораблез ву вылэ лэзёнлы укша. Кузёосызлы — кышкыттэмлыко но каньыл ветлон
Ярослав Семёнов, Удмуртиысь кивалтэтлэн тӧроезлэсь ужзэ быдэсъясь

Тросэн поттыны кутскон азьын выль модельёсты лабораториосын но сюрес вылын эскеризы. Озьы ик «АвтоВАЗ» -40 градусысен +55 градусозь температураен термокамераын эскеронъёс ортчытӥз.

LADA Vesta SW Cross машиналэн кузоваз ватсаса 33 ёзъёс пыртэмын, озьы сое юнгес карыны луиз.

АвтоВАЗлэн вице-президентэз Алеш Братош пусйиз, та нунал Ижысь но Тольяттиысь заводъёс понна туж пусйымон луэ шуыса. Lada Ижевск предприятилэн кивалтӥсез Михаил Рябов заводын ужасьёслы нимысьтыз тау кариз.

«Та автомобилез поттыны кутскон азьын бадӟым но секыт уж быдэстэмын. Тау со понна. Ми асьмедыз одӥг командаен возьматӥмы. Туж умой вуз пӧрмиз, басьяськисьёс ласянь кулэяськон луоз», - вераз Михаил Рябов.

Выль автомобильёсты поттон понна Ижын 79 выль но выльдэм ёзъёсты лэсьтыны кутскизы, сварка, буян но бичан цехъёсын выльдӥськонъёс ортчытэмын. Конвейерын 38 пӧртэм выль операциос кылдӥзы.

LADA Vesta SW но LADA Vesta SW Cross машинаосты 2017-тӥ арын сӥзьыл вузаны кутскозы.

11-тӥ куарусёнэ Ижысь автозаводын Lada Vesta SW универсалэз тросэн поттонэз кутскыны чаклало. Солы сӥзем сӥё-дано ужрадэ предприятиын ужасьёс Ижкарлэсь тӧрозэ Юрий Тюринэз ӧтизы, ивортэ муниципалитетлэн пресс-службаез.

Вераны кулэ, нырысетӥ дас универсалъёсты та ар кутсконын поттӥзы.

Выль моделез тросэн поттыны кутскон азьын предприятиын универсаллы ёзъёс лэсьтон тӥрлыкез выльдыны чаклазы.

Куд-ог ивортонъёсъя, выль «Весталэн» 1,6 литръем но 106 вал кужымъем 16 клапанэн двигателез луоз. Азьланяз кужымез будэтэмын луыны быгатоз.

Тодэ вайытом, таяз арын 7 толэзь ӵоже Ижысь автозаводын 62 сюрс 40 машина бичазы, 2016-тӥ арысь та вакытэн ик ӵошатыса, со 17 процентлы тросгес.

«АвтоВАЗ» Lada Vesta седанлы дунъёсты шараяз, автомобильёсты матысь дыре Ижкарын поттыны кутскозы. Со сярысь ивортэ «Российская газета».

1,8 литр моторен Lada Vesta SW Cross тужгес узыр комплектациен 800 сюрс манетлэсь дуно сылоз. Lada Vesta седанлэн дуныз 550 сюрс манетысен кутске.

«АвтоВАЗлэн» кивалтӥсез Николя Мор верамъя, Lada Vesta универсалъёсты поттон матысь дыре кутскоз, нош вузан — 2017-тӥ ар пумын.

Удмуртилэн тӧроезлэсь ужзэ быдэсъясь Александр Бречалов Ижысь автозаводэ вуылӥз, но Lada Vesta SW но Lada Vesta SW Cross выль автомобильёсты эскеронэ пыриськиз. Со сярысь ивортэ улосвыл тӧролэн но кивалтэтлэн пресс-службазы.

Озьы ик Александр Бречалов «АвтоВАЗлэн» кивалтӥсеныз Николя Морен пумиськиз.

Автогигантлэн дизайнъя дирекциезлэн кивалтӥсез Стивен Маттин выль Лада Весталэн пӧртэмлыкъёсыз но умоез сярысь вераз. Солэн кылъёсызъя, та машинаослэн умой но бадӟым багажниксы, озьы ик Lada Vesta SW но Lada Vesta SW Cross понна яркыт нап ӵуж буёл кылдытэмын.

Александр Бречалов выль кроссоверен ветлӥз но солы умой дунъет сётӥз.

«АвтоВАЗлэн» кивалтӥсез пусйиз, выль моделез тросэн поттон таяз арын 4-тӥ кварталын кутскыны кулэ шуыса.

Александр Бречалов Vesta SW/SW Cross машинаосты эскериз

11 фото

Ижкарысь автозавод толшоре-тулыспалэ машинаос поттонзэ 25 процентлы будэтӥз. Со сярысь ивортэ Удмуртиысь промышленностья но вузкаронъя министерстволэн пресс-службаез.

«2017-тӥ арын толшоре-тулыспалэ 14 сюрс 276 автомобиль бичамын, 2016-тӥ арысь та вакытэн ик ӵошатыса, со 25 процентлы тросгес», — верамын ужкагазын.

Пӧртэм удысъёсъя со одӥгез тужгес бадӟым лыдпус.

Тодэ вайытом, Ижкарысь автозаводын али тросгес потто Lada Vesta автомобильёсты. Таяз арын предприятие 2016-тӥ арын мында ик машина бичаны чакла. Кылем арын заводлэн конвейерысьтыз 96 сюрс автомобиль васькиз, со пӧлысь 60 сюрсэз — Lada Vesta.

29-тӥ куарусёнэ Ижкарысь автозавод 50 сюрсэтӥзэ LADA Vesta седанэз поттӥз. Машина предприятилэн музеяз уз кыльы, «АвтоВАЗлэн» одӥгезлэн дилерезлэн салоназ мыноз, ивортэ «Удмуртия» агентстволэн корреспондентэз.

Фото: Григорий Фомин

Котырес лыдпусэн машина «люкс» комплектациен бичамын но «блюз» — пеймыт лыз — буёлэн шобыртэмын.

«Дыр ӝог бызе, нырысетӥзэ «товарной» автомобилез бичам дырысен ар ортчиз. Vesta-ез поттон азинлыко луиз Тольяттиысь но Ижкарысь командалэн умой ужаменыз. Нош предприятиын «универсалэз» поттыны дасясько ни», — вераз сӥё-дано ужрадэ люкаськем заводын ужасьёслы но ӧтем куноослы «LADA Ижевский автозавод» предприятилэн кивалтӥсез Михаил Рябов.

Удмуртиысь кивалтэтлэн тӧроез Виктор Савельев ар ӵоже юбилей машинаез поттонэз «коллективлэн эшшо одӥг вормонэныз» нимаз но вуоно арын лыдпусэз ӧжытсэ кык поллы будэтыны ӵектӥз.

Фото: Григорий Фомин

«АвтоВАЗлэн» кивалтӥсезлэн Николя Морлэн вазиськоназ верамын вал, Ижкарысь предприятиен ӵошен ужез Тольяттиын дунъяло, 50 сюрсэтӥзэ Вестаез поттонэз предприятилэн историяз выль вакытэз лыдъяло шуыса. Озьы ик зэматэмын, 2017-тӥ арлэн кыкетӥ ӝыныяз Удмуртилэн шоркараз «универсал» (SW) но «внедорожник» (Cross) модельёсты поттыны кутскозы.

«Та нырысетӥез азинлык, но возьматон, быдэс «АвтоВАЗ» азе пуктэм ужпум быдэстэмын шуыса. Мар чакламы — ми сое быдэстӥмы. Ми быдэстӥмы кылем арлы чакланъёсты, быдэстӥськомы таиз арлы чакланъёсты», — вераз журналистъёслы Михаил Рябов.

«Туннэ ми эшшо одӥг пол историез шӧдӥмы. 50 сюрсэтӥез авто — со предприятилэн но, элькунлэн но азинлыкез. Нырысетӥез, со асьме адямиослэн ужан интыоссы, шоро-куспо уждун татын бадӟымгес — 32–33 сюрс, со умой ни! Таяз арын соос миллиард манет вытъёс тырозы, куиньмосэз со пӧлысь асьме элькун коньдэтэ мыноз — со лыдпусъёс вузпӧрез туннэ умой ласянь возьмато», — вераз журналистъёслы Виктор Савельев.

Фото: Григорий Фомин

Тодэ вайытом, Ижкарын LADA Vesta поттыны кутскизы 2015-тӥ арын 25-тӥ куарусёнэ. Куинь толэзьскын со кунын дас тужгес вузаськись машинаос

Читать полностью

Ижысь автозавод 2017-тӥ арлэн кыкетӥ ӝыныяз Лада Весталэсь кык выль модификациоссэ поттыны кутскоз. Кызьы вераз иворъёсъя «Удмуртия» агентстволы АВТОВАЗлэн пресс-центрезлэн кивалтӥсез Сергей Ильинский, вераськон мынэ универсал (LADA Vesta SW) но внедорожник (LADA Vesta Cross) сярысь.

«2017-тӥ арлэн кыкетӥ палараз АвтоВАЗ группа LADA Vesta SW универсалэз, озьы ик Cross версизэ поттонэз кутскыны чакла. Автомобиль бичаськоз отын ик, кытын LADA Vesta седан потто — «LADA — Ижевский Автозавод» предприятиын», — вераз Ильинский.

Кӧня выль автомобильёс поттэмын луозы, али тодмо ӧвӧл на. «Ужпӧрлэн быдӟалаез сярысь вераськыны али вазь на», — шуиз Ильинский.

Ижкарын Лада Вестаез тросэн поттыны кутскизы 2015-тӥ арын 25-тӥ куарусёнэ. Нырысетӥ модельёсыз вузаськыны кутскизы кык толэзь ортчыса — 25-тӥ шуркынмонэ. Нырысетӥ толэзьлы йылпумъянъёсъя, со Россиысь тужгес басьтӥськись 20 автомобильёс пӧлы шедиз но С классын вузаськись машинаос пӧлын азьветлӥсь трос пол луылӥз.

Ижын потӥсь LADA Vesta машиналэн 1,8 литръем, но 122 вал кужымъем двигателез луоз. Та сярысь 28 тулыспалэ «Российская газета» ивортэ.

Али таӵе двигательёсын потэ Тольяттиын лэсьтиськись LADA Xray. Нош Ижысь LADA Vesta машиналэн двигателез — 1,6 литръем, но 106 вал кужымъем.

Тодэ вайытом, куарусёнэ Ижысь автозаводын поттыны кутскозы выль LADA Vesta Cross.

Та арын толшор куспын гинэ LADA Vesta Россиын дас тужгес, но чем басьяськылӥсь машинаос пӧлы пыриз — 1 643 автомобиль вузамын вал.

Наверх
Вниз