Ижкар-12 °C
28 -тӥ тулыспал 2021 Воскресенье
18+

Удмуртиын Гремихаысь мувӧй кыскон интыын тылпу кортнамын. Иворъёсъя «Удмуртия» агентстволэн шимучыр интыын ужась корреспондентэзлы со сярысь веразы Россиысь МЧС-лэн элькунъя Валтӥсь управлениезлэн ыстэм муртъёсыз.

28-тӥ оштолэзе 5 сюрс тоннаем буш резервуар ӝуаз. «Удмуртнефть» компанилэн ивортэмезъя, резервуар ужысь поттэмын вал. Тылпу потӥз техобслуживание дыръя. Тылпуэз котыртыны луиз. Гремихаысь месторождение Удмуртиын тужгес бадӟымез мувӧй поттон интыен лыдъяське.

Фото: Григорий Фомин

18 часлы тылпу кортнамын вал. Интые вуизы элькунысь инкуазь узырлыкъёсъя но инкуазез утёнъя министерстволэн ыстэм муртъёсыз.

Россиысь МЧС-лэн Валтӥсь управлениез азьвылгес ивортӥз вал, шимучырын быремъёс но шугадӟонэ шедемъёс ӧвӧл шуыса. Тылпу потӥз интыысь дыръя 28-тӥ оштолэзе 15 час 5 минутэ. Матысь гуртъёсын улӥсьёслы кышкытлык ӧвӧл.

Фото: Григорий Фомин

Фото: Григорий Фомин

Дэри ёросысь Гремихаысь месторождениын мувӧй возён резервуарын тылпу потӥз ужан вискын. Со сярысь ивортэ «Удмуртнефть» огазеяськонлэн улосвыл политикая но калыкен кусып возёнъя ёзэт.

Компанилэн ивортэмезъя, ӝуаны кутскем резервуар ужысь поттэмын вал. Тылпу котыртэмын.

«Мукет объектъёслы кышкытлык ӧвӧл. Тылпуэз кысонэ пырисько «РН-Пожарная безопасностьысь» кужымъёс, МЧС-лэн ёзэсъёсыз. Нырысь чакланъёсъя, шугадӟонэ шедемъёс ӧвӧл. Уж вылын шимучыр ӧз шӧдӥськы», — верамын компанилэн ивортоназ.

Россиысь МЧС-лэн элькунъя Валтӥсь управлениез азьвылгес ивортӥз, шимучырын быремъёс но шугадӟонэ шедемъёс ӧвӧл шуыса. Тылпу потӥз интыысь дыръя 15 час 5 минутэ 28-тӥ оштолэзе. Сое кысон бордын тырше 142 адями.

Удмуртиысь Дэри ёросысь Гремихаысь месторождениын потэм тылпуын быремъёс но шугадӟонэ шедемъёс ӧвӧл. Иворъёсъя «Удмуртия» агентстволэн корреспондентэзлы со сярысь веразы Россиысь МЧС-лэн элькунъя управлениысьтыз пресс-службаын.

«Ми ваньзэ чакласьком. Шугадӟонэ шедемъёс, уката ик, быремъёс сярысь нокыӵе жингыртонъёс — ӝог эмъюрттэт сётон ёзэсысь, месторождениысь — ӧз вуылэ. Вераськон мынэ резервуар ӝуан сярысь гинэ, али сое кысон бордын ужало Россиысь МЧС-лэн Валтӥсь управлениысьтыз тылпу кысисьёс но спасательёс», — вераз управленилэн ыстэм муртэз.

Пресс-службаын пусйизы, мувӧй поттон интылы матысь гуртъёсын улӥсьёслы нокыӵе кышкытлык ӧвӧл.

«Резервуарын мувӧй ӧжыт вылэм. Ми оскиськомы, тылпуэз матысь дыре кортнаны, собере кыскыны луоз шуыса», — веразы МЧС-ын.

Удмуртиын Дэри ёросысь Гремихинской месторождениын тылпу потон интые 142 адями мынӥз. Со сярысь ивортэ Россиысь МЧС-лэн элькунъя Валтӥсь управлениезлэн пресс-службаез.

Управлениын ивортэмзыя, пуштон кылӥськиз но мувӧй возён 5 сюрс кубометръем резервуар ӝуаны кутскиз шуыса ивортон Ижкарысь диспетчер ёзэсэ вуиз интыысь дыръя 15 час 5 минутэ 28-тӥ оштолэзе. Шимучыр кылдӥз «Удмуртнефть» огазеяськонлэн мувӧез дасянъя «Гремихинское» участоказ. Пуштон дыръя резервуарын 250 кубометр пала мувӧй вал. Резервуарлэн оглюкетэз куашказ.

«Интые 142 адями, 29 техника келямын, со пӧлын Россиысь МСЧ-лэсь 111 мурт но 17 техника», — верамын пресс-службалэн ивортоназ.

Шимучыр кылдонлэн мугъёсыз, быдӟалаез эскерисько. МЧС-ын калыкез буйгатскыны куро, нош водительёслы вазисько, соос тылпу техникалы медаз люкетэ шуыса.

Гремихинской месторождение одӥгез тужгес узырез лыдъяське. Отын секыт мувӧез потто, но тросэн. Со интыын 25 миллион тонна пала мувӧй вань. Месторождение 1964-тӥ арын усьтэмын. Мувӧез поттон кутскиз 1981-тӥ арын.

Удмуртиын Дэри ёрсоысь Гремихинской месторождениын мувӧен резервуар ӝуа. «Удмуртия» агентстволы иворез зэматӥзы Россиысь МЧС-лэн элькунъя Валтӥсь управлениезлэн пресс-службаяз.

«Гремихинской месторождениын тылпу потон сярысь ивор вуиз интыысь дыръя 15 час 5 минутэ. Отчы адямиос но техника келямын, озьы ик Россиысь МЧС-лэн Удмурт элькунъя Валтӥсь управлениезлэн оперативной группаез но аэромобильной группировкаез», — ивортӥзы пресс-службаын.

Тодэ вайытом, 11-тӥ оштолэзе «Удмуртнефть» огазеяськонлэн Гремихинской месторожденияз гумыысь 4 тонна пала мувӧй кисьтӥськиз. Со интыын куинь пӧйшуръёслэн шӧйзы шедьтэмын. Элькунысь инкуазь узырлыкъёсъя но инкуазез утёнъя министерстволэн пресс-секретарез Дмитрий Коробейников ивортэмъя, али ыштонъёсты лыдъян мынэ.

Наверх
Вниз