Ижкар+4 °C
30 -тӥ коньывуон 2020 Удмуртарня
18+

Алнаш ёросысь кык пор гуртъёсын - Пор Гондыргуртын но Варалиын – Быдӟым Атыкай оже пыриськем улосчиоссылы синпелетъёс пуктӥзы. Ужъёсты быдэстыны коньдонлэсь оглюкетсэ гуртын улӥсьёс бичазы. Со сярысь ивортодэтъя «Удмуртия» агентстволы «Староутчанское» муниципал кылдытэтлэн тӧроез Людмила Королёва вераз.

Соослэн обелискъёс гинэ вал, и соос тӥни уксё бичаса, памятникъёс самообложениен каризы
Людмила Королёва, Алнаш ёросысь «Староутчанское» муниципал кылдытэтлэн тӧроез

Пор Гондыргуртын синпелет вылэ 89 нимъёсты гожтӥзы (51-ез - быремъёслэн но 38-эз – бертэмъёслэн), Варалиын - 68 нимъёсты ( 49-эз - быремъёслэн, 19-эз – бертэмъёслэн).

Мари Гондыревоын, котькуд юртэ списокез сётыса, котькудӥз шонерзэ мед учкоз шуыса, лэзьямы ми, озьы оргкомитетын вераськимы. Нош Варалиын кык-куинь интыын список ошемын вал
Людмила Королёва, Алнаш ёросысь «Староутчанское» муниципал кылдытэтлэн тӧроез

Синпелетъёсты гуртъёс шоры ик пуктӥзы. Тулыс, нош ик вань калыкен люкаськыса, котыразы сяськаос мерттозы на.

Пор Гондыгуртын синпелет пуктон ужъёс оглом 140 сюрс манет тыр усизы, со пӧлысь 35 сюрс манетсэ гуртоос люказы, 105 сюрс манетэз элькун коньдэтысь субсидия чотын вуиз. Варалиын 222 сюрс манет пӧлысь 55 сюрс 500 манетсэ гуртын улӥсьёс бичазы, кылемзэ улосвыл коньдэт висъяз

Тодэ вайытом, озьы ик калык юрттэмен туэ гужем Можга ёросысь Гозег гуртын Быдӟым Атыкай ожын быремъёслы синпелетэз усьтӥзы

Россиысь тодосъя академилэн Урал ёзэтысьтыз Эскеронъёсъя удмурт федерал центрлэн Историяя, кылъя но литературая удмурт институтысьтыз тодосъя ӧнерчиос 1941-1945 аръёсы Быдӟым Атыкай ожын Вормонлы 75 ар тырмонлы сӥзьыса монография поттӥзы. Со сярысь ужъюртлэн пресс-службаез ивортӥз.

Книгалэн авторез – истори тодосъя кандидат, Удмуртиысь тодос удысысь дано ужась Николай Родионов, тодосъя редакторез – Центрлэн кивалтӥсез воштӥсез, истори тодосъя доктор Людмила Бехтерева

Архивысь ужкагазъёс, кунысьтымы но кунгож сьӧрысь авторъёсын поттэм ужъёс, Историяя, кылъя но литературая удмурт институтысь тодосъя ӧнерчиослэн эскеронъёссы вылын нырысьсэ туж мур возьматэмын, кыӵе инты басьтӥз Удмуртия Быдӟым Вормонын.

Тодосчиос азьын ужась луэменыз но ассэ жалятэк тыршеменыз, Шаерзэ яратэменыз асьмелы тупа улон но эрик ваем калыклэн подвигез сярысь тодэ ваёнэз утён ужпум сылӥз.

Тодэ вайытом, азьвылгес Ижкарын «Книга года на родине П. И. Чайковского» улосвылкуспо фестивальын-вожвылъяськонын вормисьёсты пусйизы

Удмуртиысь Кун Кенешлэн тӧроез Владимир Невоструев «Вормон диктант» ужрадэ Кузебай Герд нимо йӧскалык лыдӟетъюртлэн азбарз радъям площадкаын пыриськиз. Со сярысь улосвыл парламентлэн прес-сслужбаез ивортӥз.

Ужрадэ пырисько адямиос, кин Атыкай музъемлэн адӟонэз сярысь сюлмаське, кин аслэсьтыз Шаерзэ но солэсь историзэ яратэ но дунъя. <…> Тестысь юанъёс секытэсь ӧй вал, одӥгез сяна. Мур малпаськоно, тодэ ваёно луиз. Тунсыко но пайдалыко ужрад
Владимир Невоструев, Удмуртиысь Кун Кенешлэн тӧроез

Ужрадэ пыриськисьёслы 45 минут ӵоже 25 юанъёслы валэктонъёс сётоно вал. Йылпумъянъёсты 30-тӥ куарусён бере диктантпобеды.рф сайтын тодыны луоз.

Тодэ вайытом, Удмуртилэн тӧроез Александр Бречалов «Вормон диктантэз» «Аксион-холдинг» заводысь площадкаын гожтӥз

3-тӥ куарусёнэ Удмуртилэн тӧроез Александр Бречалов «Вормон диктант» ужрадэ пыриськиз. Со сярысь кивалтӥсь «ВКонтакте» мерлыко вотэсысь бамаз ивортӥз.

«Аксион» заводысь ӧнерчиосын ӵош выльысь школа парта сьӧры пукси! Тулкымъяськисько! «Вормон Диктант» гожтӥмы. <…> 45 минут ӵоже Быдӟым Атыкай ожлэн историез сярысь 25 юанъёслы валэктонъёс сётӥ, чидатэк йылпумъянъёсты возьмасько
Александр Бречалов, Удмуртилэн тӧроез

Улосвыллэн тӧроеныз ӵош ужрадэ «Аксион-холдинг» заводлэн кивалтӥсез Геннадий Кудрявцев но биатлонъя дуннелэн куинь пол чемпионэз, Удмуртиысь биатлонъя федерацилэн кивалтӥез Иван Черезов пыриськизы.

«Таӵе ужрадъёсты ялан ортчытъяны кулэ. Уката ик асьме вакытэ, куке историез выльысь гожтыны, Быдӟым Атыкай ожын соизлэсь яке таизлэсь интызэ воштыны яке ужрадъёслы дунъетэз йырчукин берыктыны тыршисьёс трос луизы. Акция – мылкыд сётэ, уката ик егитъёслы. Юанъёс сокем тунсыко сётэмын, эшшо огпол литератураез лыдӟем, та темая тросгес иворт тодэм потэ», - улосвыл тӧролэсь кылъёссэ вераз солэн пресс-службаез.  

Удмуртиын «Воромон диктант» ужрад 189 интыын ортчиз. Вань пыриськисьёс 1945-тӥ арын 10-тӥ куартолэзе потэм «Правда» газетлэсь копизэ басьтӥзы

Ватсалом, «Воромон диктант» 20119-тӥ арысен ортчытъяське. Кылем арын Удмуртиын укмыс полащдакаосын ужрадэ 500 адями пыриськиз.  


3-тӥ куарусёнэ Удмуртиын «Вормон диктант» ужрадэ пыриськисьёслы 1945-тӥ арын 10-тӥ куартолэзе потэм «Правда» газетлэсь копизэ сётозы. Со сярысь элькунысь печатья но калыке ивортодэт вӧлмытонъя агентство пресс-службаез ивортӥз.

Элькунын газетлэсь 5 сюрслэсь трос копиоссэ люкылозы

Газетлэсь макетсэ Россиысь Мер палата дасяз. Со Быдӟым Атыкай ожын вормон сярысь ялэм бере ӵуказеяз ӵукна потэм номерлэн быдэсак тупась копиез. Нырысетӥ бамаз Иосиф Сталинлэн вормись калыклы вазиськонэз поттэмын. Озьы ик Великобританилэн премьер-министрезлэн Уинстон Черчилльлэн но США-лэн азьмуртэзлэн Гарри Трумэнлэн ӟечкыланъёссы сётэмын.

«Правда» газетлэсь копизэ сётъян сярысь кичӧлтонлы Россилэн азьмуртэз Владимир Путин дурбасьтӥз.

Тодэ вайытом, Удмуртиын «Вормон диктант» гожтыны 180-лэсь трос площадкаосты пусйизы

Новости

Воткаын ожгар но истори интыостӥ интерактивной «Вормон маршрут» («Маршрут Победы») кылдытӥзы. Сое Моногородъёсты азинтонъя фондлэн «Прошагай город» ӵектосэз улсын радъязы. Со сярысь элькун тӧролэн но кивалтэтлэн пресс-службазы ивортэ.

«Вормон маршрут» Воткалэн шор урамъёсыз кузя ортче. Отчы Данлык аллеяысь синпель стела, историяя но лулчеберетъя кар музей, кудаз Быдӟым Атыкай ож аръёсы типография интыяськиз, Благовещенской собор, кытын ож аръёсы госпиталь вал, пыро. Эшшо одӥгез тунсыко объект - «Пушка» синпелет. Со ож аръёсы карысь заводын бичам но Удмуртиысь ожгарчиосын Прагаозь вуэм 52 сюрс пушкаос но артиллери системаос пӧлысь одӥгез луэ. 1985-тӥ арын ожтӥрлык карысь шор скверын синпелет луиз.

Пусъём, Моногородъёсты азинтонъя фондлэн «Прошагай город» ӵектосэз улсын «Вормон маршрут» онлайн-акцилы кутскон туэ куартолэзе сётӥзы но сое Росси азьмуртэн Владимир Путинэн ялэм Буре ваёнъя но данлыкъя арлы тупатӥзы. Со улсын каръёс Быдӟым Атыкай ожлы сӥзем истори объектъёссэс онлайн-картаосы пусъё. Коронавирус инфекци вӧлмонэн герӟаськем сюбегатонъёсты куштэм бере, «Вормон маршрут» акциос моногородъёсын офлайн амалэн ортчозы.

Тодэ вайытом, Удмуртиын нырысетӥзэ «Вормон маршрутэз» Глазкарын кылдытӥзы

Ижкарлы «Уж данлыкъя кар» («Город трудовой доблести») ним сётӥзы. Со сярысь Удмуртилэн тӧроез Александр Бречалов 2-тӥ пӧсьтолэзе журналистъёсын пумиськыкуз ивортӥз.

Сюлмысьтым ӟечкыласько Удмуртиын вань улӥсьёсты, кин куара сётонэ мыло-кыдо пыриськиз. Со туж кулэ, дано, со йӧно. Кема верано луоз, мар со Ижкар Совето Союзлэн картаез вылын Быдӟым Атыкай ож дыръя. Мон зэмзэ но туж шумпотӥсько, угось тодӥсько, макем кулэ со татын улӥсьёслы
Александр Бречалов, Удмуртилэн тӧроез

Ижкар понна оглом 547 сюрс куара люказы.

«Победа» оргкомитетлэн видеоконференци амалэн кенешоназ Россилэн азьмуртэз Владимир Путин кулэ ужкагазъёсты матысь дыре кинюртоз шуыса вераз.

Ужъюлтошъёсмылэсь одӥг дыре 20 каръёслы «Город трудовой доблести» дано ним сётон пумысен ӵектонъёссэс быдэстыны мон сямен номыр уг люкеты. Аргументъёс татын валамонэсь но оскымонэсь но Федерал катлэн радлыкезлы но куронъёсызлы быдэсак тупало. Эшшо одӥг пол пусъеме потэ, ми куаразэс сётэм адямиослэсь мылкыдзэс лыдэ басьтыны кулэ - «Город трудовой доблести» дано, вылӥ ним сётыны кичӧлтонлы сюлмысьтызы но паськыт дурбасьтэмзэс
Владимир Путин, Росси Федерацилэн азьмуртэз

Ижкар сяна, дано нимез эшшо 19 каръёс басьтӥзы - Нижний Новгород, Самара, Челябинск, Саратов, Пермь, Новосибирск, Екатеринбург, Иваново, Красноярск, Комсомольск-на-Амуре, Ульяновск, Нижний Тагил, Новокузнецк, Казань, Уфа, Омск, Томск, Иркутск, Барнаул.

Дано ним басьтэмен валче Ижын карлэн гербеныз но Росси азьмуртлэн нимез сётон пумысен косэтэныз стела пуктозы. Со сяна, 1-тӥ куартолэзе, 9-тӥ куартолэзе но Карлэн нуналаз ужрадъёс но салютъёс ортчытъялозы. 

Ижкарлы «Уж данлыкъя кар» (««Город трудовой доблести») ним сётон понна Россилэн Кункатаз воштонъёс пыртонъя огъяросси куара сётон улсын сизьым нунал ӵоже элькунын 250 сюрс адями дурбасьтӥз. Эшшо 150 сюрс куара азьвылгес люкамын вал. Карлэн тӧроез Олег Бекмеметьев куара сётонлы нырысь-валысь йылпумъянъёс лэсьтӥз.

Ижкар – та нимез басьтыны быгатӥсьёс пӧлысь одӥгез тужгес тупамонэз луэ. Ож аръёсы Удмуртилэн шоркараз ужась промышленной предприятиос армилы ожгар техника но снаряжение лэсьтӥзы. Соос фронтлы 12 миллион ыбылӥськон тӥрлык сётӥзы. 1042-тӥ арысь толшорысен асьме заводъёс уй-нуналскын одӥг ыбылӥськон но одӥг авиаци дивизиослы тырмымон ожтӥрлык поттӥзы
Олег Бекмеметьев, Ижкарлэн тӧроез

Ижкар сяна, дано ним понна Россиысь эшшо 20 каръёс – бадӟым промышленной центръёс - нюръясько. Приволжск федерал округын – Казань (201 сюрс 672 куара люказы), Саратов (600 сюрс куара), Самара (519 сюрс 93 куара), Нижний Новгород (742 сюрс 662).

Матысь дыре Россилэн азьмуртэз Владимир Путин «Победа» оргкомитетлэсь кенешонзэ ортчытоз, отын улосвыл кивалтӥсьёслэсь каръёслы дано ним сётыны вазиськонъёссэс эскерозы.

«Уж данлыкъя кар» ним басьтэм каръёсын стела пуктозы. Олег Бекмеметьевлэн верамезъя, Ижкарын стела кылдоз со ёросын, кудаз улӥсьёс кичӧлтонлы тросгес куара сётӥзы. Нырысь-валысь йылпумъянъёсъя, куара сётонэ Октябрь ёросын улӥсьёс тужгес мыло-кыдо пыриськизы.

Тодэ вайытом, Тодэ вайытом, Ижкарлы уж данлыкъя кар ним сётон понна куара люкан 2020-тӥ арын 5-тӥ южтолэзе кутскиз

Дэбес ёросысь «Тольён» муниципал кылдытэтын «Генеральская гостиная» ӵектос улонэ пыӵато. Со Вормонлы 75 ар тырмонлы сӥземын но улосчимылэн Фёдор Городилов генерал-майорлэн нимыныз герӟаськемын.

Фёдор Иванович Городилов 1912-тӥ арын Дэбес ёросысь Наговицыно гуртын вордскиз. Фин оже ветлӥз. Быдӟым Атыкай ож дыръя Берлинозь вуиз. Горд Кизили, Отечественной война, Горд Знамя, Ленин нимо, «Знак Почёта» но мукет орденъёсын но медальёсын пусъемын. Вань улонзэ ожгар техникаез азинтон бордын тыршиз, Москваын улӥз, 1989-тӥ арын улонысь кошкиз

Ӵектос муниципал кылдытэтысь ньыль гуртын улонэ пыӵатӥське – Тольёнын, Варниын, Лесагуртын, Турнэсын. Та гуртъёсысь библиотекаосын но Варниысь школаын ожысь но ужысь ветеранъёслы сӥзем экспозициос дасямын. Соос пӧлын нимысьтыз инты басьто Фёдор Городиловен герӟаськем материалъёс но экспонатъёс. Тужгес но узыр экспозиция люкамын Тольён библиотекаын. 

Проектлэн одӥгез кылдытӥсез но улонэ пыӵатӥсез - Тольён школаысь музеен кивалтӥсь Галина Бойкова. 

- Школа музеямы Фёдор Иванович Городилов сярысь узыр материал люкамын, - вера Галина Петровна. – Но мынам кемалась ини сюлэмы бӧрдэ вал, соосты туж ӧжыт адямиос адӟо шуыса. Кӧтӝоже сярысь верай муниципал кылдытэтмылэн кивалтӥсезлы Любовь Александровна Белослудцевалы. Со ӵектӥз Городиловлы сӥзем висъет библиотекае лэсьтыны, «Генеральская гостиная» проект дасяны.

Ӵектос бордын Галина Бойкова но Любовь Белослудцева ӵошен ужазы. Тыршемзы юнме ӧз луы. Проектсэс ёрос конкурсын вылӥ дунъязы, сое улонэ пыӵатыны 30 сюрс манет сётӥзы. Соин Тольён библиотекае стеллажъёс, шкафъёс, чебер укно возъетъёс басьтӥзы. Фёдор Городиловлы но дано улосчиоссылы экспозициос дасян понна Варни, Лесагурт, Турнэс библиотекаосы но уксё висъязы.

Культура юртын ужасьёс но мукетъёсыз мылкыд карисьёс саесъёссэс пужалъяса тупатон ужъёс борды басьтӥськизы: вуоно генерал висъетлэсь борддоръёссэ волятӥзы, буязы, возъетъёс вуризы. Кылем даурлэсь шӧмзэ пыӵатон понна Тольёнысь но Чепыкысь вашкала пуконъёс,

Читать полностью

2020-тӥ арын 22-тӥ инвожое, Буре ваён но кайгырон нуналэ, Можга ёросысь Гозег (Лудзи-Шудзи) гуртын Быдӟым Атыкай ожын быремъёслы синпелетэз усьтӥзы. Сое кичӧлтонъёслы коньдэтысь юрттэт сётонъя «Наша инициатива» элькун программа улсын пуктӥзы. Со сярысь «ВКонтакте» мерлыко вотэсысь бамаз Можга ёрослэн тӧроез Александр Васильев ивортӥз.

Ёрос тӧролэн верамезъя, 2019-тӥ арын элькун программа улсын синпелет артысь Бальӟашурын пуктӥзы. Гозегъёслэн бускельёссылэсь кылемзы ӧз поты.

Бальзашурын улӥсьёслэн бускельёссы – Гозегын улӥсьёс, бере кылёно ӧвӧл шуизы. Соос котькызьы но ас гуртооссылэсь нимъёссэс пыраклы кельтоно шуыса малпазы
Александр Васильев, Можга ёрослэн тӧроез

Гуртоос «Наша инициатива» программае пыриськон понна куриськон келязы. Соослы ёрос но гурт администрациосын ужасьёс юрттӥськизы. Озьы ӵектоссы вожвылъяськонын вормиз но коньдон утӥз.

Синпелет пуктон понна элькун коньдэтысь 254 сюрс 338 манет висъязы, гурт коньдэтысь – 38 сюрс манет, ужбергатӥсьёс 38 сюрс 150 манет сётӥзы, гуртоос 38 сюрс 302 манет люказы

Синпелетэз усьтон ужрадэ Удмуртиысь кивалтэтлэн тӧроезлэн воштӥсез Анатолий Строков, интыысь кивалтӥсьёс, гуртысь азьветлӥсьёс, ож мышкын тыршемъёс но ож вакытысь нылпиос пыриськизы.

Тодэ вайытом, 2020-тӥ арын 9-тӥ куартолэзьлы элькунамы тупатъяны чаклам синпелетъёс пӧлысь 200-лэсь троссэ лэсьтыса вуттӥзы

24-тӥ инвожое Ижкарын Быдӟым Атыкай ожын Вормонлы 75 ар тырмонлы сӥзем акциос ортчозы. Со сярысь кар администрацилэн пресс-службаез ивортэ.

Нырысетӥез «Победный марш» акци луоз. 10 часысен 12 часозь но 15 часысен 19 часозь Ижкарысь Пушкинской но Советской урамъёсысь громкоговорительёс пыр ож вакытысь маршъёс но кырӟанъёс чузъяськозы

«Весть Победы» акци улсын интыысь дыръя 12 часын быдэс кунын 1 минут ӵоже вань транспорт гудоксэ ужатоз. Ужрадэ нимаз адямиослэн автомобильёссы, мер но ужан транспорт, поездъёс но корабльёс пыриськозы. Ижкарын акци борды заводъёс но черкъёс итӥськозы. Озьы ик ужрадэ вань мылкыд карисьёсты пыриськыны ӧтё.

75 ар талэсь азьло сямен ик 21 час 30 минутысен 22 часозь инбаме тыл юбо ӝутскоз. Ижкарысь Шор площадысь выль фонтанлэн вулэсь полотно вылаз учкисьёслы лазер шоу но Ижкарлы «Город трудовой доблести» дано ним сётон кичӧлтонлы сӥзем видеоролик возьматозы.

Тодэ вайытом, 24-тӥ инвожое Россиысь каръёсын Вормонлы 75 ар тырмонлы сӥзем парадъёс ортчозы. Эпидеми югдурез лыдэ басьтыса, Удмуртиысь тӧрлыкъёс Парад ортчытонлэсь куштӥськизы.  

Удмуртиын Йӧскалык лыдӟетъюртлэн Быдӟым Атыкай ожын быремъёсты но ышемъёсты утчанъя «Поиск солдата» буре ваён элькун акциезлы йылпумъянъёс лэсьтӥзы. Со сярысь ужъюртлэн пресс-службаез ивортэ.

2020-тӥ арын 1-тӥ оштолэзьысен 31-тӥ куартолэзёзь ёросъёсысь но каръёсысь лыдӟетъюртъёсын кылдытэм консультациосъя 125 центръёс калыклэсь вазиськонъёссэс басьтӥзы. Акци улсын элькунысьтымы но мукет улосвылъёсысь (Санкт-Петербургысь, Киров улосвылысь, Пермь, Ставрополь шаеръёсысь) 2 сюрс 603 улӥсьёс юрттэт курыса вазиськизы. Ӧнерчиос ивортодэт утчаны 2 сюрс 900 вазиськонъёс басьтӥзы, со пӧлысь 2 сюрс 644-ез быдэстэмын, 256-езъя тырмыт ивор шедьтыны ӧз луы.

Ожгарчиос сярысь ивортонъёс утчан понна ӧнерчиос Россиысь обороная министерстволэн базаосысьтыз, росси, улосвыл но мукет кунъёсысь интернет-ресурсъёсын: «Мемориал», «Подвиг народа в Великой Отечественной войне 1941–1945 гг.» базаосысь, «Память народа» порталысь, электрон буре ваён книгаосысь, «Саксонские мемориалы» порталысь, эскеронъёсъя «Судьбы военнопленных и интернированных в Финляндии 1939–1955 гг.» базаысь, Горд Кирослэн утчаськонъя но ивортодэтъя сайтъёсысьтыз,  ужкагазъёсын «Архивы Арользена»центрлэн сайтысьтыз но мукет интыосысь утчаськизы.

Калыклэн вазиськонъёсызъя сяна, библиотекаосын ужасьёс ёрос администрациослэн но мукет ужъюртъёслэн, кылсярысь, шаертодонъя музейёслэн, вазиськонъёссыя ужазы. Соос паркъёсын, данъян пулъёс вылын, стендъёсын, газетъёсын буре ваён плитаос лэсьтыны юрттӥзы, Россиысь обороная министерстволэн «Дорога памяти» ӵектосаз пыриськизы, «Бессмертный полк онлайн» акцие пыриськыны мылкыд карисьёсты гожъязы.

Пандемия вакытэ но ӧнерчиос ужамысь ӧз дугдылэ. Куриськонъёсты басьязы, онлайн-консультациос ортчытъязы, Быдӟым Атыкай ож аръёсы бырем яке ышем солдатъёс сярысь ивортодэт утчанъя дэмланъёс лэсьтӥзы

Акцие пыриськисьёслы элькунысь Йӧскалык библиотекаысь ӧнерчиос юрттӥськизы. Ӵектослэн «ВКонтакте» мерлыко вотэсысь огиназ ӵем гинэ электрон презентациос,

Читать полностью

Ижкарын Быдӟым Атыкай оже пыриськем чугун сюрес вылын ужасьёслы синпель пус пуктозы. Со сярысь кар администрацилэн пресс-службаез ивортэ.

Ижкар администрациысь историяя но лулчеберетъя синпелетъёсты утёнлы, ульчаослы, пролкаослы но дугдылонниослы ним сётонлы но воштонлы юрттонъя ӧри Горьковской чугун сюреслэн кивалтӥсезлэн воштӥсезлэн Александр Лапшинлэн ӵектонэз понна дурбасьтӥз.

Синпель пусэз Гагарин нимо ульчаысь Алексей Титов нимо сквере пуктозы

Буре ваён огъет фронтын ожмаськем но уженызы Вормонэз матэктытэм адямиослы гажамез но тау каремез возьматон луоз. Быдӟым Атыкай ож аръёсы улосчиосмы вакчи дыр ӵоже Ижкар – Балезино чугун сюресэз лэсьтӥзы. Уже 40 сюрслэсь трос адями пыриськиз. Соос 3 миллион кубометр музъем ужъёсты быдэстӥзы, сюреслы 95 иськеме нюлэсъёсты коразы.

Эскизъя пичи вырйылын гырлыен гырлыжугонни пуктозы, солэн паллян палаз - Быдӟым Атыкай ож вакытысь паровозлэн кузэн питранъёсыз, паллян палаз - ож аръёсты гожтэмен стела. Котырысьтыз интывылэз брусчаткаен шобыртозы, вож будосъёс мерттозы, тыл, пуконъёс, жагтыронниос пуктозы.

Ужъёсты 1-тӥ гудырикошконозь – Чугун сюрес лэсьтӥсьёслэн нуналзы дорозь – быдэстыны чаклало.

Кызьы верамын ивортонын, «Уж данлыкъя кар» («Город трудовой доблести») дано ним басьтон вожвылъяськонэ пыриськись Ижкар понна синпель пусэз пуктон уката пусйымон луэ.

Тодэ вайытом, 22-тӥ инвожое Ижкарын, быдэс Россиын сямен ик, «Буре ваён сюсьтыл» («Свеча памяти») ужрад ортчоз

Глазкарын Быдӟым Атыкай ожез буре ваён интыостӥ нырысетӥзэ Удмуртиын «Вормон маршрутэз» («Маршрут Победы») кылдытӥзы. Онлайн-акциез Росси азьмуртэн Владимир Путинэн ялэм Буре ваёнъя но данлыкъя арлы тупатӥзы но Моногородъёсты азинтонъя фондлэн «Прошагай город» ӵектосэз улсын радъязы. Со сярысь Удмуртиысь тӧролэн но кивалтэтлэн пресс-службазы ивортэ.

Удмуртилэн уйпал шоркараз ожен но историен герӟаськем интыостӥ куать иськемъем кульчоям маршрут кылдытӥзы

Маршрут Свободы площадьысь «Нулевой километр» дорын кутске. Собере Чупчи шурлэн ярдуретӥз кудӟытӥсь юонъёсты поттӥсь завод завод доры вуэ. Быдӟым Атыкай ож аръёсы со юртын тамак поттон фабрика ужаз. Солы 1941-тӥ арын Ленинградысь но Феодосиысь тама лэсьтон фабрикаосысь ваем тӥрлык инъет луиз. Глазкарысь завод фронтлы махорка, табак но папиросъёс поттӥз.

Куинетӥез дугдон инты – 1946-тӥ арын усьтэм Механикая чупчи завод. Сое 1941-тӥ арын пӧсьтолэзе кылдытэм Патронъёс поттон завод вылын кылдытӥзы, ож аръёсы отын ожгар снарядъёс лэсьтӥзы.

Маршрутэ Геройёслэн скверзы но пыриз. Сое 1995-тӥ арын 7-тӥ куартолэзе, Вормонлы 50 ар тырмонлы сӥзьыса, сое усьтӥзы. Скверын Глазкарын но Глаз ёросын вордскем Совето Союзлэн но Россилэн Геройёсызлэн бюстъёссы сыло. Солэсь кыдёкын ӧвӧл, Горький нимо паркын, Совето Союзлэн Героезлэн, Белорус фронтын ожмаськем снайперлэн Татьяна Барамзиналэн синпелетэз сылэ.

Озьы ик «Вормон маршрутэ» ожысь пӧртэм ужрадъёслы сӥзем кӧня ке буре ваён пулъёс, Глазкарысь ож дыръя бырем эмчиослы барельеф но ож дыръя бырем дышетӥсьёслы но дышетскисьёслы стела шедизы.

Маршрут 1941-1945 аръёсы фронтын но ож мышкын вормонэз дурем муртъёслы с ож дыръя бырем муртъёслы сӥзем Вормон монумент азьын йылпумъяське.

Онлайн-картае оглом 11 объектъёсты пыртӥзы

«Прошагай город» ӵектос улсын Моногородъёсты азинтонъя фонд «Маршрут Победы» акци ялӥз. Отчы пыриськон понна моногородъёс интыосын лыдмет, схема кылдытыны, маршрутлы дырез чотаны но объектъёсты онлайн-карта вылын

Читать полностью
Новости

Быдӟым Атыкай ожын Вормонлы 75 ар тырмонлы сӥзьыса, 28-тӥ куартолэзе Ижкарын Россиысь тодосъя академилэн Урал ёзэтысьтыз Эскеронъёсъя удмурт федерал центрлэн азбараз укмыс пӧртэм магнолиосты мерттӥзы.

Магнолиослэсь сад кылдытонлэн мур тодметлыкез вань. Асьмелэн анай-атайёсмы, песянайёсмы, песятайёсмы Быдӟым Атыкай ожлэсь вань секытсэ но ыштонъёсты чидазы но вормизы. Та сад – вань шуг-секытъёсты вормонлэн тодметэз. Со асьмелы кужым сётоз, та садэ лыктыса, асьмеос выжыосмес тодамы ваёмы
Александр Фёдоров, Эскеронъёсъя удмурт федерал центрысь ёзэтлэн кивалтӥсез, гурт возёс тодосъя доктор

Шуныт интылы дышем магнолиез удмурт музъем вылэ выжыятон но капчиен ӧз сётӥськы. Сортъёсты бырйыны, будосъёсты толалтэ утён амалъёс шедьтыны куать ар кулэ луиз.

Тросэзлэн будосъёслэн сяськаоссы тӧдьы но ӵуж луозы. Азьланяз кидысъёсты карын улӥсьёс но басьтыны но асьсэ сад-бакчазы мерттыны быгатозы.

Пусъём, садэз Вормон Нунал азьын мерттыны малпало вал, но нимаз висъяськыса улон вакыт тупамен сэрен, ужрадэз берлолы выжтоно луиз. Кызьы вераз Россиысь тодосъя академилэн Урал ёзэтысьтыз Эскеронъёсъя удмурт федерал центрлэн кивалтӥсез Михаил Альес, шунытэз яратӥсь магнолиосын сад Приволжск федерал округъя Удмуртиын гинэ луоз.

Тодэ вайытом, 2020-тӥ арын Удмуртиын 11 миллион 500 сюрс пала писпуос мерттӥзы ни. 

Буре ваён но данлык аре Удмуртиын Быдӟым Атыкай ожын быремъёслы синпелетъёсты тупатъян ужъёс азьланьтӥсько. 385 чакламъёсыз пӧлысь туннэ нуналлы 223-зэ выльдӥзы ини. Со сярысь «ВКонтакте» мерлыко вотэсысь бамаз элькун кивалтэтлэн тӧроез Ярослав Семёнов ивортӥз.

Кылемзэ синпелетъёсты 2020-тӥ ар пумозь лэсьтозы

Та ужъёслы коньдон элькун коньдэтысь висъямын. Озьы ик бадӟым ӵектослы коньдон висъяны мылкыд каризы спонсоръёс, депутатъёс но «Наша инициатива» мер огазеяськонлэн ыстэм муртъёсыз
Ярослав Семёнов, Удмуртиысь кивалтэтлэн тӧроез

Тросаз муниципал кылдытэтъёсын вань синпелетъёсты тупатъязы ини. Котькинлэсь ӝог Ижкар, Дэбес, Кизнер но Кияса ёросъёс вуттӥзы. 

Тодэ вайытом, Россилэн азьмуртэз Владимир Путин Вормон парадэз но «Быронтэм полк» ужрадэз ортчытон нуналъёсты шараяз.

Россилэн азьмуртэз Владимир Путин обороная министрен Сергей Шойгуэн видеоконференци амалэн пумиськонэз дыръя Вормон Нуналлы 75 ар тырмонлы сӥзем парадэз но «Быронтэм полк» ужрадэз ортчытон нуналъёсты шараяз. Со сярысь Кремльлэн нимлыко сайтаз ивортэмын.

Кун кивалтӥсьлэн кылъёсызъя, Россиын оглом, озьы ик тросаз улосвылъёсын но Ожгар кужымъёсын югдур огсыр возиське, нош трос интыосын огсыр ӧре пыре бере, парадэз ортчытонлы дасяськыны луэ.

Россилэн шоркараз, Москваын, но мукет каръёсын Быдӟым Атыкай ожын Вормонлы 75 ар тырмонлы сӥзем ожгар парадлы дасяськонэз кутскыны косӥсько. Ми сое 24-тӥ инвожое ортчытомы – со нуналэ, куке 1945-тӥ арын вормисьёслэн историе кылем парадзы ортчиз, куке Горд площадетӥ Москва вӧзын ожмаськем но Ленинградэз утем, Сталинград котырын жугиськем, Европаез мозмытэм, Берлинэз басьтэм ожгарчиос ортчизы
Владимир Путин, Росси Федерацилэн азьмуртэз

Россилэн азьмуртэз дасяськон но парадэз ортчытон дыръя кышкыттэмлыкъя вань куронъёсты чурыт быдэсъяны куриз.

Кышкыттэмлыкъя куронъёсты быдэсъянэз озьы ик радъяны «Быронтэм полк» ортчон дыръя уз луы. Каръёсысь урамъёсы туж трос калык потоз, висэз чаклан сярысь вераськон ик ӧвӧл, пусйиз Владимир Путин. Соин ик ужрадэз пӧсьтолэзе ортчытыны ӵектӥз.

«Бессмертный полк» маршез <…> 26-тӥ пӧсьтолэзе ортчытыны ӵектӥсько, со асьмелэн ожгар данлыкъя эшшо одӥгез нуналмы – Россиысь Ожгар-Зарезь Флотлэн нуналэз. Со нуналэ ик кунысь Ожгар-Зарезь Флотлэн валтӥсь базаосаз Ожгар-зарезь парад ортчытыны курисько
Владимир Путин, Росси Федерацилэн азьмуртэз

Владимир Путин югдурез чакласа возёзы но матысь толэзьёсы кышкытлыкез дунъялозы шуыса пусйиз. Ӧнерчиос кышкытлыкъя куронъёсты быдэстыны уг луы шуыса веразы ке, «Быронтэм полклэсь» шествизэ берлолы выжтыны луонлыкез эскерозы.

Адямиослэн улонзы, тазалыксы, кышкыттэмлыксы – ми понна валтӥсез, номырин мертантэм дунлык
Владимир Путин, Росси Федерацилэн азьмуртэз

Тодэ вайытом, Вормон Парадэз мукет дырлы выжтон сярысь Россилэн азьмуртэз 17-тӥ оштолэзе вераз вал. 

26-тӥ куартолэзе Удмуртиысь Калыкъёслэн эшъяськон юртазы «Герои народа – герои страны» улосвылкуспо вожвылъяськонын вормисьёсты шараязы. Ужрад онлайн амалэн ортчиз, ивортэ ужъюртлэн пресс-службаез.

Пӧртэм калыкъёслэн Быдӟым Атыкай ожын батырлыко ожмаськемзылы сӥзем но Вормон Нуналлы 75 ар тырмонлы тупатэм эскерон ужъёсъя вожвылъяськонэ Ижкарысь но Казаньысь 7-11 классъёсын дышетскись куать сюрслэсь трос пиналъёс пыриськизы.

Вожвылъяськонэ ужъёсты куинь ӧръёсъя кутӥзы. Озьы ик радъясьёс «Тужгес мыло-кыдо школа» номинациез нимаз висъязы.

Ижкарын вормисе потӥзы:

  • «Всё для фронта, всё для Победы!» ӧрын - 10 номеро школаысь 10-тӥ классын дышетскись Егор Кокорин
  • «Герои народа – герои страны» ӧрын – 45 номеро лицейысь 8-тӥ классын дышетскись Мария Кутергина
  • «Дети войны: всё для фронта, всё для Победы» ӧрын – 17 номеро школаысь 11-тӥ классын дышетскись Елизавета Шубина
  • «Эссе на тему «Герои народа — герои страны» ӧрын (валтӥсь вожвылъяськонтэк) – 52 номеро школаысь 9-тӥ классын дышетскись Алёна Курылёва

Казаньын вормисе Вероника Бобровская, Зиля Яхиева но Илсаф Нургалиев потӥзы.

Устоосызлэсь ужъёслэсь авторъёссэс Казане но Ижкаре экскурсиосын пусйизы. Нырысь-валысь чакланъёсъя, соос сӥзьы каникулъёс дыръя ортчозы. Озьы ик вормисьёслэсь ужъёссэ «Герои народа – герои страны» бичетэн поттозы.

Вожвылъяськон витетӥзэ ортчиз ни. Таиз ар аспӧртэм луэ. 2020-тӥ арын Удмуртия но Татарстан 100 ар тырмонзэс пусъё. 

Тодэ вайытом, азьвылгес Удмурт кадет корпусысь 10-тӥ классын дышетскись Артём Поскрёбышев эссе ӧрын творчество ужъёсъя «Geschichte in Biografien» - «История в биографиях» калыккуспо вожвылъяськонын вормиз, нош Можгаысь 4-тӥ классын дышетскись Полина Алексеева «Правнуки Победителей» огъяросси конкурсын нырысетӥ луиз.

Приволжск федерал округысь В. Г. Стариков нимо Удмурт кадет корпусысь 10-тӥ классын дышетскись Артём Поскрёбышев эссе ӧрын творчество ужъёсъя «Geschichte in Biografien» - «История в биографиях» калыккуспо вожвылъяськонын вормиз. Со сярысь Удмуртиысь дышетонъя но тодосъя министерстволэн пресс-службаез ивортӥз.

Удмуртиысь кадет корпусын дышетскись эскерон ужзэ прапрадедэзлы Константин Трофимович Поскрёбышевлы сӥзиз. Сое 1941-тӥ арын шуркынмонэ Глазкарысь фронтэ басьтӥзы. Карел фронтлэн 7-тӥ армияз пыртэм 114-тӥ стрелковой дивизиын гереӟетъя взводын телефонист луыса службазэ нуиз. Артём но солэн анаез Елена Алексеевна ӵыжы-выжызы сярысь ивортодэтэз пырыен-пырыен люказы. «Мынам песятае Герой вал!» сочиненизэ кадет ӟуч кылын гожтӥз, стрелковой полклэн ожмаськон сюресысьтыз выпискаосты ватсаз. Константин Поскрёбышев фронтысь 1945-тӥ арын бертӥз. Трос аръёс ӵоже Глазовысь лесобазаен кивалтӥз. Артём сое анай-атаезлэн верамъёссыя тодэ.

Вожвылъяськон «Российская и германская молодежь в диалоге: история и память» ӵектосэз быдэсъян улсын ортчиз. Дунъясьёс доры Россилэн вань улосвылъёсысьтыз, Германиысь, Украинаысь но Казахстанысь 2 сюрс 700-лэсь трос ужъёс вуизы. 2 сюрс 175-сэ ӵектослэн сайтаз поттӥзы

Дунъясьёслы трос тунсыко ужъёс пӧлысь куатьсэ гинэ вормисьёсты бырйыны капчи ӧй вал. Соин ик 12-сэ пусйыны малпазы: куатьсэ ӟуч кылын но куатьсэ немец кылын.

Озьы ик вожвылъяськонлэн радъясь комитетэз устооссэ ужъёсты бичетэн поттыны пумкылъян кутӥз. Отчы дунъясьёсын нимаз пусъем 75 эссеос пырозы.

Тодэ вайытом, Можгаысь 4-тӥ классын дышетскись Полина Алексеева «Правнуки Победителей» огъяросси конкурсын вормиз

Можгаысь 8 номеро гимназиысь 4-тӥ классын дышетскись Полина Алексеева «Бессмертный полк России» мер движениез радъям «Правнуки Победителей» огъяросси конкурсын вормисьёс пӧлы шедиз. Со сярысь элькун тӧролэн но кивалтэтлэн пресс-службаез ивортэ.

Вожвылъяськонэ быдэс Россиысь но мукет кунъёсысь 11-18 аресъем 16 сюрслэсь трос пиналъёс пыриськизы

Улосвыл люкетъёсын 400-лэсь трос егитъёс вормизы. Экспертъёслэн ӧризы соос пӧлысь 17 устооссэ бырйиз – Россилэн федерал округъёсысьтыз быдэн кык адями но Тунисысь одӥг пыриськись. Дунъясьёслэн верамзыя, трос умой ужъёс вуизы, соин ик вормисьёсты бырйыны капчи ӧй вал.

Пиналъёс Россиысь Обороная министерстволэсь усьтэм архивъёссэ, ож вакытысь газетъёсты но журналъёсты, озьы ик семьяязы утиськись гожтэтъёсты, ужкагазъёсты, туспуктэмъёсты эскеризы. Тросэз ветеранъёслэн тодэм ваёнъёссыя сюлме йӧтӥсь веранъёс ыстӥзы.

Устоосызлэсь ужъёслэсь авторъёссэс Москвае сӥё-дано пусъён ужрадэ ӧтёзы.

Тодэ вайыто, Удмуртиысь дышетскисьёсты сочинениосты гожтонъя огъяросси вожвылъяськонэ пыриськыны ӧтё.


Наверх
Вниз