100 лет государственности Удмуртии
Ижкар+22 °C
6 -тӥ инвожо 2020 Кӧснунал
16+

Быръёнъёс но быръён кампания элькунын лачмытак ортчизы. 19-тӥ куарусёнэ элькун тӧро дорын ортчем аппарат кенешонын со сярысь вераз улосвылысь кунпуш ужъёсъя министр Александр Первухин.

«44 куриськонъёс но ивортонъёс вуизы, со пӧлын быръёнъёсъя ӧриослэсь. 24-ез со пӧлысь куара сётон нуналэ. Лыдъясько, одӥгез но тӥян учыр куара сётонлэн йылпумъянъёсыз, соослэн зэмлыксы вылын нокызьы ӧз шӧдӥськы. Бырйисьёслы коньдон сётон, сектан но мукет учыръёс сярысь вераськонъёс ӧз зэмалэ. Со умой. Солы луонлык кылдӥз Быръёнъёсъя валтӥсь ӧриен но мукет ёзэсъёсын вань учыръёсъя ужан амалъёсты дасямен валче. Бюллетеньёсты нуон-ваён сюресъёсын 16-тӥ но 17-тӥ куарусёнэ ужамын вал. Быръёнъёсъя участокъёсын 2 сюрс полицейскойёс ужазы. Быдэс штат кужмоятэм ужан амалэ выжтэмын вал. Туннэ (19-тӥ куарусёнэ — ред.) мон косэмез юнматӥ — вуоно быръёнъёсын мер радлыкез радъянэ коня ке воштонъёс пыртон пумысен ӵектонъёсты ЦИК-е но элькун кивалтӥсьёслы сётыны. Участокъёслэн сӧзнэтсы, соосты возьман сӧзнэт, урнаосты нуон-ваён сӧзнэт трос аръёс ӵоже ӧз вошъяське ни. Али со туала улонлы уг тупа», — вераз Александр Первухин.

Ватсалом, элькунысь МВД-лэн пресс-службаез ивортэмъя, кык учыръя административной уж ӝутэмын — «ӧтен-ӝуткан материалъёсты быръёнъёс но референдумъёс сярысь катрадлыклэсь куронъёссэ тӥяса лэсьтон, вӧлмытон яке интыян» статьяя. Озьы ик одӥг уж лэзьымтэ интыын ӧтё-ӝуткан уж нуон учыръя.

Со сяна, Глазкарын улӥсь вылэ административной катрадлыкез тӥям понна протокол гожтэмын. Воргорон быръён участоке кудӟыса лыктэм но жоб кылъёсын вераськем. 6 ивортонъёсъя материалъёс быръёнъёсъя интывыл ӧриосы сётэмын. 13 учыръя вазиськонъёсты али кунпуш ужъёсъя ёзэсъёс эскеро.

Удмуртилэн тӧроез Александр Соловьёв 18-тӥ куарусёнэ быръёнъёсы ветлэм элькунын улӥсьёслы тау кариз. Резиденциын ортчем аппарат кенешон бере 19-тӥ куарусёнэ со сярысь вераз журналистъёслы.

«Бен, мыным кельше. Потэ вал, тросгес адямиос партилы мед дурбасьтозы шуыса. 50 процент — со сокем трос ӧвӧл. Ми кема возьмамы, ку луоз 51 процент. Озьы ке но, нырысь-валысь чотанъёсъя, ми Приволжск федерал округъя 8-тӥ яке 9-тӥ. Урод ӧвӧл… Быръёнъёс секыт вал. Мынам асьме бырйисьёслы ӟеч кылъёс вераме потэ. Пумиськонъёс, кудъёссэ ми ортчытӥмы, эшшо одӥг пол возьматӥзы, асьме бырйисьёс элькун тӧрлыкъёс шоры умой учко. Трос лэсьтӥське элькунын, валамон, ваньмыз уг. Гуртын пумиськонъёс, предприятиосын пумиськонъёс возьматӥзы, азьлане вамышъёс вань. Милемыз кылӥзы, калык милем оске. Табере валтӥсез, депутатъёс вань оскытонъёссэс мед быдэстозы шуыса. Кызьы вераз Владимир Путин, ми ваньзэ лэсьтыны кулэ, калыкен быръемъёс вань быгатонозэ мед лэсьтозы шуыса», — пусйиз Удмуртилэн тӧроез.

Тодэ вайытом, 10 час 30 минутлы чотам бюллетеньёсъя «Единая Россия» партия понна куразэс сётӥзы Удмуртиысь 50,3 процентэз бырйисьёс. Сыӵе лыдпусъёсты шараязы элькунысь Быръёнъёсъя валтӥсь ӧриын 97,59 процентсэ бюллетеньёсты эскерем бере.

Россиысь Кун Думае быръёнъёсын 10 час 30 минутлы ивортонъя «Единая Россия» Удмуртиын 50,3 процент куара люказ. Со сярысь ивортэ улосвылысь Быръёнъёсъя валтӥсь ӧри. Та дырлы партиосъя 97,59 процентсэ бюллетеньёсты эскеризы-чотазы.

Мукетъёсыз партиос люказы: КПРФ — 13,85%, ЛДПР — 12,32%, «Справедливая Россия» — 9,08% и «Партия Роста» — 3,23%.

Одӥг мандатъем 34 номеро Ижкар быръён округъя:

— Валерий Бузилов («Единая Россия») — 50,44%;

— Владимир Бодров (КПРФ) — 15,50%;

— Фарид Юнусов («Справедливая Россия») — 13,62%;

— Антон Гусев (ЛДПР) — 10,3%;

— Юрий Мишкин («Коммунисты России») — 3,04%;

— Михаил Назаров («Яблоко») — 1,96%.

Одӥг мандатъем 33 номеро Удмурт быръён округъя:

— Алексей Загребин («Единая Россия») — 43,33%;

— Алексей Чулкин (Партия Роста) — 18,36%;

— Владимир Чепкасов (КПРФ) — 15,05%;

— Виктор Шудегов («Справедливая Россия») — 8,3%;

— Тимур Ягафаров (ЛДПР) — 6,05%;

— Роман Дементьев («Коммунисты России») — 2,58%.

«Куараосты чотан азьланьтӥське. Нырысь ик ми федерал кампаниез пыртӥськомы. Собере ёрос кампаниез пыртыны кутскомы, собере — поселениосъя. Нокин но али вераны уз быгаты (ку йылпумъялозы — ред.), малы ке шуоно ми валаськомы ни, милям Вавож ёросъя ӝеган луоз. Системной администраторлы урод луиз, ӝог эмъюрттэт сётӥсь машинаен эмъяськонние нуизы. Соин ик Алнашын эскерон-чотанэз йылпумъям бере, системной оператор Вавож ёросэ мыноз, отын ГАС «Выборы» сӧзнэтэ пыртон ужез нуоз», — вераз элькунысь Быръёнъёсъя валтӥсь ӧрилэн тӧроез Виктор Кушко.

Россиысь Кун Думае быръёнъёсын одӥг мандатъем 33 номеро Удмурт быръён округъя 102 сюрс 062 адями Алексей Загребин («Единая Россия») понна куара сётӥз. Отчёт лэсьтӥзы 93,91 процентэз быръёнъёсъя ӧриос. 19-тӥ куарусёнэ журналистъёслы со сярысь вераз элькунысь Быръёнъёсъя валтӥсь ӧрилэн тӧроез Виктор Кушко.

«Быръёнъёсы пыриськемъёслэн лыдзы — 44,72 процент. Та дырлы 93,91 процентэз участковой ӧриос отчёт лэсьтӥзы», — пусйиз Виктор Кушко.

Одӥг мандатъем 33 номеро Удмурт быръён округъя мукет кандидатъёс понна тазьы куара сётӥзы:

— Алексей Чулкин (Партия Роста) — 18,50% (44 031)

— Владимир Чепкасов (КПРФ) — 15,08% (35 890);

— Виктор Шудегов («Справедливая Россия») — 8,55% (20 342);

— Тимур Ягафаров (ЛДПР) — 6,09% (14 506);

— Роман Дементьев («Коммунисты России») — 2,57% (6 114);

— Сергей Буторин («Гражданская Платформа») — 1,51% (3 587);

— Ильдар Закиров («Парнас») — 1,36% (3 235).

Одӥг мандатъем 34 номеро Ижкар быръён округъя быръёнъёсын азьпалан мынэ Валерий Бузилов. 19-тӥ куарусёнэ со сярысь ивортӥз элькунысь Быръёнъёсъя валтсь ӧрилэн тӧроез Виктор Кушко. Со понна куара сётӥзы 50,21 процентэз бырйисьёс — 129 сюрс 869 адями.

«Быръёнъёсы пыриськиз 43,14 процентэз. Та дырлы 95,22 процентэз быръён ӧриос отчёт лэсьтӥзы», — вераз Виктор Кушков.

Мукет кандидатъёсын люкам куараос:

— Владимир Бодров (КПРФ) — 15,57% (40 сюрс 270 адями);

— Фарид Юнусов («Справедливая Россия») — 13,74% (35 сюос 523);

— Антон Гусев (ЛДПР) — 10,33% (26 сюрс 717);

— Юрий Мишкин («Коммунисты России») — 3,05% (7 сюрс 883);

— Михаил Назаров («Яблоко») — 1,98% (5 сюрс 124);

— Руслан Тимуршин («Парнас») — 1,62% (4 сюрс 185).

Тодэ вайытом, 94,6 процентсэ бюллетеньёсты эскерон-чотанлы йылпумъянъёсъя, «Единая Россия» 50,7 процент куара люказ.

Россиысь Кун Думае быръёнъёсын Удмуртиын «Единая Россия» 50,7 процент куара люказ. 19-тӥ куарусёнэ 9 часлы 94,6 процентэз бюллетеньёс эскеремын-лыдъямын. 19-тӥ куарусёнэ журналистъёслы со сярысь вераз улосвылысь Быръёнъёсъя валтӥсь ӧрилэн тӧроез Виктор Кушко.

Мукетъёс партиос люказы: КПРФ — 13,87%, ЛДПР — 12,32%, «Справедливая Россия» — 9,27% но «Партия Роста» — 3,23%. 3 процентлэсь ӧжыт куара люказы: «Коммунисты России» — 2,21%, «Российская партия пенсионеров за справедливость» — 1,83%, «Яблоко» — 1,2%, «Родина» — 1,17%, «Патриоты России» — 0,68%, «Зелёные» — 0,63%, «Парнас» — 0,63%, «Гражданская платформа» — 0,32%.

Россиысь Кун Думае быръёнъёсын куара сётон Удмуртиын йылпумъяськиз. Интыысь дыръя 20 часын вань участокъёс ворсаськизы. Тодэ вайытом, 18-тӥ куарусёнэ кунын парламентлэсь 7-тӥ ӧтчамзэ быръёнъёс мыно.

18 часлы Удмуртиын 38,3 процентэз бырйисьёс кура сётӥзы.

Та быръёнъёслы йылпумъянъёсъя оглом 450 мандатъёсты люкозы: 225-сэ партиослэн списокъёссыя но 225-сэ одӥг мандатъем округъёсъя.

Кылемаз быръёнъёсын ӝыны палаез бырйисьёс куразэс сётӥзы «Единая Россия» партия понна — 49,32%, со парламентын 238 интыосты басьтӥз. Соку Кун Думае эшшо куинь партиос ортчизы — КПРФ (19,19%), «Справедливая Россия» (13,24%) но ЛДПР (11,67%).

18 часлы Удмуртиын куара сётонэ пыриськизы 38,4 процентэз бырйисьёс. Журналистъёсын брифингын со сярысь ивортӥз элькунысь Быръёнъёсъя валтӥсь ӧрилэн тӧроез Виктор Кушко.

Одӥг мандатъем 33 номеро округъя — 39,25%, 34 номеро округъя — 37,63%.

Каръёсъя: Воткаын — 38,25%, Можгаын — 36,61%, Глазкарын — 35,05%, Cарапулын — 34,32%, Ижкарын — 31,54%.

Гурт ёросъёсъя шорлыдын 47,37 процентэз бырйисьёс куара сётон участокъёсы ветлӥзы. 18 часлы тужгес трос бырйисьёс куаразэс сётӥзы Алнаш ёросын — 56,36%, тужгес ӧжыт Дэри ёросын — 38,3%/.

Виктор Кушко верамъя, Дэри ёросысь одӥгаз быръён участокын возьмамтэ учыр луиз. Италмас черкогуртын тыл кысӥз. Соку ик куара сётон интые камераен адями пыриз, но ӧриез пӧськемен янгыше уськытӥз.

«Ӧри та учырен нокызьы герӟаськемын ӧвӧл, — пусйиз Кушко. — Со кунмуртэз ӝегатыны МВД-ысь, но ФСБ-ысь кужымъёс кыскемын. Собере эскеронъёс луозы, малы юртын тыл кысӥз».

Куара сётонъя огъя нуналэ, 18-тӥ куарусёнэ, 15 часлы Удмуртиын 30,48 процентэз бырйисьёс эрикрадзэс быдэстӥзы. 2011-тӥ арын Кун Думалэн куатетӥ ӧтчамаз депутатъёсты быръёнын та лыдпус 39,75 процент вал, ивортӥз журналистъёслы элькунысь ЦИК-лэн тӧроез Виктор Кушко.

Ижкарын — 24,22%. Улосвылысь каръёсъя шорлыдын — 25,66%/ Тужгес трос бырйисьёс кура сётӥзы Воткаын — 30,93%.

Элькунъя тужгес тросэз куара сётӥзы Алнаш ёросын — 47,06%, тужгес ӧжытэз — Ижкарысь Ленин ёросын — 21,85%.

Виктор Кушко верамъя, 201-тӥ арын лыдпусъёс 1,5–2 процентлы вылӥынгес вал.

Одӥг мандатъем 33 номеро Удмурт округъя 31,24 процентэз бырйисьёс кура сётӥзы, 33 номеро Ижкар округъя — 29,80 процентэз.

Ватсалом на, Интерфакс ивортэмъя, Приволжск федерал округын кура сётонэ тужгес мыло-кыдо пырисько Башкириын, Татарстанын но Мордовиын улӥсьёс. Москва дыръя 12 часлы Привольжеын 10-ысен 35 процентозь бырйисьёс куаразэс сётӥзы.

Башкириын 12 часлы 39 процентэз бырйисьёс куара сётӥзы. 12 часлы округъя со тужгес бадӟым лыдпус. Озьы ке, но, 2011-тӥ арын эрикрадзэс та дырлы быдэстӥзы вал 48,1 процентэз Башкириын улӥсьёс. Мордовиын 28,29 процентэз куара сётӥзы (2011-тӥ арын -30 процент котыр). Татарстанын — 35 процентэз (2011-тӥ арын — 32,98 процент).

Тужгес ӧжытэз бырйисьёс куара сётӥзы Пермь шаерын. Интыысь дыръя 12 часын 10,74 процентэз быръён участокъёсы вуылӥзы. Сыӵегес ик лыдпус вал 2011-тӥ арын.

Удмуртиысь Кун Кенешлэн тӧроез Владимир Невоструев куара сётӥз Ижкарысь 93 номеро школаын интыяськем 5/20 номеро быръён участокын. Кивалтӥсьлэн верамезъя, со быръёнъёсты одӥг пол но ӧз кельтылы.

«Зэм верало, мон одӥг пол но ӧй кельты (быръёнъёсты — ред.), котьку мынӥсько но азьланез понна куараме сётӥксьо. Ас вакытаз ёрос кенеше, кар думае, асьме кунмылэн азьмуртэз понна куара сётылӥ <…> Оглом, вань бырёнъёсы котьку мыло-кыдо пыриськисько», — вераз Владимир Невоструев.

Удмуртиысь Кун Кенешлэн тӧроез ваньзэсты праздникен — Куара сётонъя огъя нуналэн ӟечкылаз но элькунын улӥсьёсты быръёнъёсы пыриськыны ӧтиз. Улосвылын сыӵе эрикрадзы вань 1 миллион 200 сюрс пала адямилэн.

Фото: Ольга Константинова

Нялтас вераса, ужъюртъёсын, кытын куара сётон радъямын, пыжиськемъёс, канцеляр вузъёс, пӧртэм книгаос басьтыны луэ. Но улосвыл парламентлэн тӧроез пыжиськемъёсты ӧз басьты, валэктӥз, кутэмняньёс сое дораз возьмало шуыса — кузпалыз пыжиз. Владимир Невоструевлэн кылъёсызъя, быръёнъёсты ческыт ӝытсиёнэн пусъён семьялэн йылолэз луиз.

10 часлы Удмуртиын куара сётонэ пыриськизы 6,84 процентэз бырйисьёс. Журналистъёслы со сярысь вераз элькунысь Быръёнъёсъя валтӥсь ӧрилэн тӧроез Виктор Кушков.

«Элькунъя оглом 6,84 процент. 33 номеро быръён округъя — 7,04%, 34 номеро округъя — 6,65%. Ижкаръя лыдпусъёс: Индустри ёрос — 4,87%, Устинов — 5,11%, Ленин — 3,84%, Октябрь — 4,83%, Первомай — 3,42%», — пусйиз Виктор Кушко.

Куара сётонэ тужгес трос бырйисьёс пыриськизы ни Алнаш ёросын — 13,97 процент, Каракулино ёросын — 13,83%, Пичи Пурга ёросын — 13,46%. Тужгес пичи лыдпусъёс — Ижкаръя Первомай ёросын — 3,42%, Ленин ёросын — 3,84%, Октябрь ёросын — 4,83%.

Каръёсъя куара сётэмъёс: Вотка — 7,07%, Глазкар — 5,04%, Можга — 6,98%, Сарапул — 5,35%.

Нялтас вераса, 2011-тӥ арын 10 часлы куара сётонэ пыриськизы 5,78 процентэз бырйисьёс.

Брангуртысь песянайёс черкогуртысьтызы школаын быръён участокын кырӟазы. Озьы ик соос ваньзэсты куара сётонэ пыриськыны ӧтизы, ивортэ «Удмуртия» агентстволэн корреспондентэз.

Кырӟасьёс участоке 8 час 30 минутэ вуизы. Одӥгез песянай быръёнъёсъя ӧрилы сылалтэм огреч но нянь ваиз. Куара сётыса, соос вань лыктэмъёслы капчи мылкыд но удалтонлык сӥзизы. «Милям тӥлед кырӟан кузьмаммы потэ, мылкыдды умой мед луоз. Милям туннэ мылкыдмы туж умой. Ми егит дырысенымы быръёнъёсты яратӥмы. Бадӟым мылкыдын лыктӥмы туннэ», — вераз коллективлэн ёзчиез Галина Конева.

Песянайёс пусйизы, соос туннэ умой уло, куара сётӥзы «таӵе улон медаз сӧриськы» шуыса. Галина Коневалэн верамезъя, быръёнъёслэсь палэнскон «умой ӧвӧл, кулэ мыныны. Куара сётонэ мыноно но ӟеч адямиосты быръёно».

Удмуртилэн тӧроез Александр Соловьёв Россиысь Кун Думае депутатъёсы быръёнын куаразэ сётӥз Удмурт кун университетлэн кыкетӥ корпусысьтыз быръён участокын, ивортэ «Удмуртия» агентстволэн корреспондентэз.

«Кӧня асме тодӥсько, ноку ӧй кельтылы (быръёнъёсты — ред.), нош тодӥсько мон асме 18 аресысеным, сыӵе эрикрад асьмелы сётэмын 18 арес тырмем бере. Кыӵе мылкыдын лыктӥсько… «Родиналы долг сётыны» уг шуы, кулэ аслэсьтыд валамдэ возьматыны но умой адямиос понна куара сётыны. Мон сое умой мылкыдын лэсьтӥ», — вераз Удмуртилэн тӧроез.

«Мар понна куара сётӥськомы?» юанлы Александр Соловьёв вераз, куара сётоно азинскон но огсыр улон понна.

«Та кык кылъёсты люкыны уг луы — азинскон но огсыр улон. Туж потэ, асьмелэн со пӧрме кадь — ми лэсьтӥмы ваньзэ, Удмуртиын быръёнъёс зэмлыко но катъя мед ортчозы шуыса», — пусйиз улосвыллэн кивалтӥсез.

Вераны кулэ, быръёнъёс — со калыклэсь мылкыдзэ тодон гинэ ӧвӧл, праздник но. Куара сётон бере Удмуртилэн тӧроез калык шудонъёсы пыриськиз. Соос быръён участокысь потонын радъяськизы.

18-тӥ куарусёнэ 8 часын Удмуртиын ялан ужась 1 сюрс 181 но огдырлы кылдытэм 22 быръён участокъёс усьтӥськизы. Куара сётонъя огъя нуналэ элькунын Россиысь Кун Думае, улосвылысь ёросъёслэн но поселениослэн кенешъёсазы депутатъёсты быръё. Озьы ик кар думаосы кӧня ке мандатъёс буш кылемын вал. Куара сётон участокъёс 20 часозь усьтэмын луозы.

Элькунын улӥсьёс Россиысь Кун Думае депутатъёсты быръёзы одӥг мандатъем кык округъёсъя — 33 номеро Удмурт но 34 номеро Ижкар, озьы ик партиос понна кура сётозы.

Удмуртиысь кӧня ке бырйисьёслы тросгес бюллетеньёс сётозы — куара сётонъя огъя нуналэ 18-тӥ куарусёнэ ёросъёслэн но поселениослэн кенешъёсазы быръёнъёс ортчо, нош Ижкарын (кык округъёсъя), Воткаын, Сарапулын, Можгаын но Камбаркаын (быдэн одӥг округъя) кар думаосы депутатъёсты бырйыны кулэ. Оглом гуртын ёрос кенешъёсы 682 но поселениослэн кенешъёсазы 2 сюрс 900 мандатъёсты люкозы.

Россиысь Кун Думае федерал но одӥг мандатъем кык округъёсъя куара сётон понна Удмуртиын 2 миллион 405 сюрс 200 бюллетеньёс лэсьтӥзы. 2016-тӥ арын 1-тӥ пӧсьтолэзьлы ивортонъёсъя улосвылын 1 миллион 198 сюрс 517 бырйисьёс.

Кун парламентэ 2011-тӥ арын 4-тӥ толсуре ортчем быръёнъёсы Удмуртиысь 56,55 процентэз бырйисьёс куара сётонэ пыриськизы (2007-тӥ арын — 61 процентлэсь тросэз), кунъя — 60,2 процент (2007-тӥ арын — 63,71 процент). Соку Кун Дума партиослэн списокъёссыя гинэ бырйиськиз, пыриськизы 7 партиос. 2016-тӥ арын — 14. Вить ар талэсь азьло тужгес трос куара люказ «Единая Россия» — 45,09 процент (кунъя — 49,32 процент), со бере мыно КПРФ — 19,55 процент (19,19 процент), ЛДПР — 16,59 процент (11,67 процент), «Справедливая Россия» — 11,18 процент (13,24 процент), «Яблоко» — 2,84 (3,43), «Патриоты России» — 2,54 (0,97), «Правое дело» — 0,67 процент (0,60 процент).

Тодэ вайытом, Удмуртиысь Быръёнъёсъя валтӥсь ӧрилэн тӧроез Виктор Кушко чакламъя, 2016-тӥ арын 18-тӥ куарусёнэ куара сётонэ 50 процент палаез бырйисьёс пыриськозы.

18-тӥ куарусёнэ Россиысь Кун Думае быръёнъёсын асьсэ участоказы куара сётыны быгатӥсьтэм бырйисьёс 5 сюрс 541 открепительной удостоверениос басьтӥзы. Со элькунын улӥсь бырйисьёс пӧлысь 0,5 процентэз луэ. Журналистъёслы со сярысь вераз улосвылысь Быръёнъёсъя валтӥсь ӧрилэн тӧроез Виктор Кушко.

«Открепительной удостоверениос сёто со кунмуртъёслы, кудъёсыз кыӵе ке мугъёсъя асьсэ быръён участоказы куара сётыны уз быгатэ. Открепительной удостоверениез басьтон понна соос 3-тӥ гудырикошконысен 6-тӥ куарусёнозь быръёнъёсъя интывыл участокъёсы вазиськыны быгатӥзы. Та дыре открепительной удостоверениосты сёто быръёнъёсъя участковой ӧриосын, отын, кытын бырйисьёс куара сётыны дышемын, со адресъёсъя ик», — вераз со.

Удмуртиысь ЦИК-лэн тӧроез озьы ик тодэ вайытӥз, таяз быръён кампаниын дырызлэсь вазь куара сётон уг радъяськы шуыса.

Тодэ вайытом, 18-тӥ куарусёнэ Удмуртиын Россиысь Кун Думае быръёнъёс ортчозы. Одӥг мандатъем кык округъёсъя 15 кандидатъёс вожвылъяськозы, соос политикая 9 партиослэн ыстэм муртъёссы луо. Со сяна, ортчозы ёросъёслэн но поселениослэн кенешъёсазы депутатъёсты быръёнъёс (нырысетӥосаз 3 сюрс 204 кандидатъёс пусъемын, кыкетӥосаз — 5 сюрс 849), кар Думаосы ватсаса быръёнъёс (Ижкарын кык мандат буш, Воткаын, Сарапулын, Можгаын но Камбаркаын быдэн одӥген). Оглом — пӧртэм ёзъёсы 333 быръён кампаниос.

Россиысь Кун Думалэн сизьыметӥ ӧтчамаз депутатъёсты быръёнэ 18-тӥ куарусёнэ Удмуртиысь быръёнъёсъя участокъёсы элькунын улӥсь ӝыны палаез бырйисьёс лыктозы. 15-тӥ куарусёнэ журналистъёсын пумиськылыкуз сыӵе чакланъёссэ шараяз улосвылысь Быръёнъёсъя валтӥсь ӧрилэн тӧроез Виктор Кушко.

«Берло вить аръёсы югдурез учкыса, ми чакласькомы, таяз арын куара сётонэ ӧжытгес адями пыриськоз шуыса. 50 процентлы матын луоз, — вераз со. - 2011-тӥ арын Россиысь Кун Думае депутатъёсты быръёнэ улосвылын 56 процентэз бырйисьёс пыриськизы».

Виктор Кушко верамъя, куара сётон понна бюллетеньёсты быръёнъёсъя интыосысь ӧриосы 16-тӥ куарусёнысен сётъяны кутскозы, соосты полициысь ӧнерчиос возьмалозы.

Россиысь ЦИК Кун Думалэн сизьыметӥ ӧтчамаз быръёнъёсы КПРФ-лэн кандидатэзлэн Владимир Чепкасовлэн табыш сярысь ивортонысьтыз янгышъёсты шедьтӥз. Со сярысь ивортэ ТАСС.

Быръёнъёсъя валтӥсь ӧри ивортэмъя, Чепкасов возьматӥз, солэн ужбергатонэзлэсь табышез кылем арын 734 сюрс 237 манет луиз шуыса. Но Вытъёсъя федерал ёзэслэн ивортонэзъя, ужбергатон кандидатлы 7 миллион 300 сюрс манетлэсь трос табыш ваиз.

Тодэ вайытом, азьвылгес Удмуртиысь быръёнъёсъя ӧри Россиысь Кун Думалэн сизьыметӥ ӧтчамаз депутатъёсты быръёнъёсы ӧдӥг мандатъем 2 округъёсъя 15 кандидатъёсты юнматӥз. Элькунысь ЦИК-лэн нимлыко сайтаз ивортэмъя, ӧри одӥг гинэ кандидатэз юнматыны пумит луиз, ассэ ӵектэм Олег Овчинниковез. Партиослэн ыстэм муртъёссы со радлыкез шугъяськонъёстэк ортчизы.

Кун Думае быръёнъёс 18-тӥ куарусёнэ ортчозы.

Владимир Чепкасов одӥг мандатъем 33 номеро Удмурт округъя ӵектэмын.

Удмуртиысь быръёнъёсъя ӧри катрадлыкен пусъем дыре Россиысь Кун Думае депутатъёсты быръёнъёсы элькунъя одӥг мандатъем кык округъёсъя 15 кандидатъёсты юнматӥз.

Элькунысь быръёнъёсъя ӧрилэн нимлыко сайтаз ивортэмъя, ӧри одӥгзэ гинэ кандидатэз пусйыны пумит луиз, со ассэ ӵектэм Олег Овчинников. Партиосын ӵектэм муртъёс со ужрадэз ваньзы шугъяськонъёстэк ортчизы.

Быръёнъёсъя одӥг мандатъем 33 номеро Удмурт округын пусъемын 8 адями: Алексей Загребин (ӵектӥз «Единая Россия»), Алексей Чулкин («Партия Роста»), Сергей Буторин («Гражданская платформа»), Роман Дементьев («Коммунисты России»), Владимир Чепкасов (КПРФ), Тимур Ягафаров (ЛДПР), Ильдар Закиров (ПАРНАС) но Виктор Шудегов («Справедливая Россия»).

Одӥг мандатъем 34 номеро Ижкар округын 7 кандидатъёс депутатлэн мандатэз понна вожвылъяськозы: Валерий Бузилов («Единая Россия»), Юрий Мишкин («Коммунисты России»), Владимир Бодров (КПРФ), Антон Гусев (ЛДПР), Руслан Тимуршин (ПАРНАС), Михаил Назаров («Яблоко») но Фарид Юнусов («Справедливая Россия»).

Озьыен, «единороссъёс», коммунистъёслэн кык партиоссы, эсеръёс, либерал-демократъёс но ПАРНАС улосвылысь кыказ ик одӥг мандатъем округъёсын быръёнъёсы пыриськозы. Нош «Партия Роста», «Гражданская платформа» но «Яблоко» одӥгаз вань кужымзэс сётыса ужаны малпазы.

Тодэ вайытом, Россиысь парламентлэн выль ӧтчамаз 450 депутатъёс пӧлысь ӝыныез одӥг мандатъем округъёсъя шедёзы, мукет ӝыныез — партиослэн списокъёссыя.

Кун Думае быръёнъёс 18-тӥ куарусёнэ ортчозы. Со нуналэ ик Удмуртиын ёросъёслэн но поселениослэн кенешъёсазы депутатъёсты быръёзы.

8-тӥ гудырикошконэ Удмуртиын Россиысь Кун Думае быръёнъёсы одӥг мандатъем округъёсъя кандидатъёсты пусъён йылпумъяськоз. Иворъёсъя «Удмуртия» агентстволэн корреспондентэзлы со сярысь веразы элькунысь быръёнъёсъя ӧриын.

Да дырлы 11 кандидатъёс пусъемын. Кандидатуразэс ӵектэмзы сярысь ялэм эшшо вить муртъёсъя пумкылъянъёс кутэмын луозы. Соосын сётэм ужкагазъёсты али эскеро на. Катъя солы 10 нунал висъяське.

Быръёнъёсъя ӧрие ужкагазъёсты сётон дыр 3-тӥ гудырикошконэ йылпумъяськиз.

Та дырлы быръёнъёсъя Удмурт (33 номеро) округын пусъемын Алексей Загребин («Единая Россия»), Роман Дементьев («Коммунисты России»), Владимир Чепкасов (КПРФ), Тимур Ягафаров (ЛДПР), Ильдар Закиров (ПАРНАС), Виктор Шудегов («Справедливая Россия»). Асьсэлэсь кандидатуразэс ӵектӥзы но али пусйымтэ на: Алексей Чулкин («ПАРТИЯ РОСТА»), Сергей Буторин («Гражданская платформа»).

Быръёнъёсъя Ижкар (34 номеро) округын пусъемын Юрий Мишкин («Коммунисты России»), Владимир Бодров (КПРФ), Антон Гусев (ЛДПР), Руслан Тимуршин (ПАРНАС), Фарид Юнусов («Справедливая Россия»). Асьсэлэсь кандидатуразэс ӵектӥзы но али пусйымтэ на: Валерий Бузилов («Единая Россия»), Михаил Назаров («ЯБЛОКО»), Олег Овчинников (ачиз ӵектӥськиз).

Тодэ вайытом, Россиысь Кун Думае быръёнъёс ортчозы 18-тӥ куарусёнэ. 2003-тӥ арысен нырысьсэ соос суро амалэн ортчозы. Озьы 450 депутатъёс пӧлысь 225-ез огъя федерал округъя партиослэн списокъёссыя быръемын луозы. эшшо 225 -ез — одӥг мандатъем округъёсъя.

Россиысь Кун Думае быръёнъёс дыръя Удмуртие калыккуспо чакласьёс лыктыны быгатозы. 8-тӥ пӧсьтолэзе ортчем пресс-конференциын со сярысь ивортӥз Россиысь быръёнъёсъя ӧрилэн ёзчиез Василий Лихачёв.

«10 адями пала. Мон малпасько, тӥледлы сыӵе десантлы дасяськыны кулэ», — вераз Россиысь быръёнъёсъя валтӥсь ӧрилэн ёзчиез.

Солэн ивортэмезъя, Россиын 28 кунъёсысь 500 калыккуспо чакласьёсты возьмало. Та дыре списокез юнматон мынэ.

Ваньмыз чакласьёс пӧлысь 80 адями кемалы лыктоз. Соос кунэ 1,5–2 толэзьлы вуо но югдурез эскерыны кутско. Кылемез 420 адями 3–4 нуналлы лыктэ.

«Ми ӧтиськомы Россилэсь но Беларусьлэсь союзной кунзылэсь ыстэм муртъёссэс, Россиысь быръёнъёсъя валтӥсь ӧриен валче ужан сярысь тупанкылъёс юнматэм 27 кунъёслэсь ыстэм муртъёссэс, ми ӧтиськомы быръён технологиосын ужась 4 нимысьтыз огазеяськонъёсты. Со быръёнъёсты радъясь европейской, азиатской но дунневыл нимаськись ассоциациос… со сяна, ми нырысьсэ ӧтимы арабской ассоциациез», — ивортӥз Лихачёв.

Солэн верамезъя, туэ ӧтен ӧвӧл келямын Европаысь Кенешлэн парламент ассамблеяезлы.

Наверх
Вниз